وضِحكه طالعه مِن قَلب بيت قديم
هَجرتي البيت وتركتيه مِكركب
ولا بقا عارف يِتعايش
ولا حتي لِحياته يرَتب
وهَرتب إيه أنا يَعني
ما كُل تَرتيباتي كَانت إنتي
ياسِتي عَارف إني كَئيب
وإني كَمان كِتير بَغيب
بَس مش هو ده كَان إتفقنا تِبعدي
وتِغيبي
وتِفارقي عَن عيني
قديمه إنتي يا كُل الحاجات اللي ما بينا
أنا مِش عارف إزاي لِحد الأن بَحنلها
أنا نِفسي زي زَمان أحكيلها
بس ولا الزمن راجع
ولا انتي كَمان راجعه
أنا كُل يوم مَع نَفسي في مُراجعه
بَراجع كُل إللي كَان بِينا
لاقيت إن كان مِن المَفروض قَبل ما تمشي
أفتكر كام حاجه أدِهالِك زَي
رِيحتك
وِملامحِك
والمَشاهِد إللي ما بينا
برغم المَشاهِد الكِتيره
مَشاهِد حُزني عَليكي بقِت مِتفَصله
وكُل ما أتقَدم خَطوه قُدام
الاقيني بَرجع الف وَره
يِشوفوني الناس بَعدِك
يِقولوا سَكران وشارب حاجه أصفره
أنا لِسه بَعاني في بُعدِك
ولما باجي أقول خَلاص هَنسي
يِرسمك فِنجان قَهوتي
عَروسه في فُستانها الأبيض
فتعَصب وأمسك قَلمي
وأبدأ آكتِب يِخوني قَلمي
في كُل مَره وأكتِب إسمك
بَرمي القلم وأضايِق
وأبدأ آعاتبِك في خَيالي
فَجأه الاقي أبْ بيندَه علي بِنته بإسمك
فَعشان كِده قَررت أكتِبلك
وأقُولِك يا ألِف هَمزه
أنا قَلبي دايماً في نغزَه
وِحياتي دُونِك بلا مَغزي
وأقوم وأعمِل مِن البُن فِنجان تاني
وَأقوله أنا عَلي الجَرح والوَجع
بَقيت مِتعَود
فمَتعِدليش كُل شِويه نفس المشهَد المُعتاد
وِبَطل تِرسمها أنا علي المشهَد دَه بَقيت مُعتاد
وكأن البُن حَب يِصالِحني بيكي
فَرَسمني جَنبِك في فِنجاني
شَكلُه أخِيراً حَسْ إنِي بعاني
فأحضُنه بإيدي وعِيني مِن الفَرحَه تِدَمع
مَكَنِتش صُدفه في اللَحظه دِي
يِرن تِليفوني وأقول ألوُو
تِقوُلي كَلام كِتير عَني
وبَعدها تِقولي سامِحني أنا أسفَه
فَرجَع وأقولِك مَنا قُولتِلِك
لَو كان إننِا نِتفارق سُنه
فإنك ليا دَه فَرضْ
وِإني بَحِبك مِن الشَرق للغَربْ
وِإنك وَحشتيني قَد السما والأرض.
.....
تعليقات
إرسال تعليق