واحد من الشله اللي قاعدين اتكلم°مش فاهم هي لما تحط هيفرق اية! بجد شايفه أنها هتحلو أو هتغطي اللي فوشها مثلًا!
'كلهم ضحكوا وكأنها بتقول نكته
دة الكلام اللي سمعته وانا رايحه أقعد معاهم، اللي مفروض أنهم .. صحابي، لكن أنا عمري ما حسيت كدة، لا هما شبهي ولا انا شبهم، أشخاص فرضتهم علي نفسي لأجل أن بس اكون زي اي شخص طبيعي وعنده صحاب
دي تاني سنه ليا فالجامعة لكنها متختلفش كتير عن بقية حياتي، حياه متخلاش أبدًا من التنم.ر واظن أن دة السبب الوحيد اللي بعض الناس بتكلمني لأجله، والبعض الآخر شايفني نكره وبيخافوا مني، أو من شكلي!
بعدت بعيد عنهم وانا الدموع مغرقة وشي زي الشلال، خبطت فشخص فبدون ما ارفع وشي اعتذرت
_انا .. انا آسفه، حقيقي مقصدش
~انا اللي آسفه، انا كُنت سرحانه وماخدتش بالي
_ولا يهمك
جيت عشان امشي لكني حسيت بتشتتها فاتكلمت_أنتِ شكلك جديدة هنا؟
~ايوة الحقيقي دي اول سنه ليا، انا عارفة أن الدراسة ابتدت من بدري لكن كان عندي ظروف ومقدرتش انزل ودة اول يوم ليا
_اقدر اساعدك فحاجة؟
~انا سياسه واقتصاد، لكن الجامعة كبيرة اويي ومش عارفة اروح فين!
_انا كمان سياسه واقتصاد وأنتِ نفس المبنى بتاعي، ممكن اوصلك لو تحبي؟
~مش عايزة اتعبك معايا
ابتسمت لها بخفة _ مفيش تعب عليا ولا حاجة
خدتها ومشينا وانا بمسح بواقي الدموع اللي علي وشي
~كدة موريش محاضرات انهاردة، ممكن نجيب حاجة من الكافتيريا
_اكيد، تعالي
قعدنا فترابيزة فابتدت تتكلم~ ممكن اسألك سؤال؟
رديت عليها وانا عارفه هتقول اية_اتفضلي
~هو أنتِ كُنتِ بتعيطي ليه؟
الدموع اتجمعت فعيني تاني وانا ببصلها
~خلاص اسفه لو حاجة بتضايقك انا اسفه، ماكنتش اقصد
_بيتن.مروا عليا، اظن انك شايفة شكلي، ويمكن أن ماكنش اكيد فدي اسوء ملامح ممكن حد يشوفها
بصتلي باستغراب وهي بتتكلم~اسوء ملامح؟ انا مش شايفه أن في شئ يدعى أنهم يتريقوا عليه فيه!
_انا ممتنه لكلامك، لكن صدقيني لو قولتي الحقيقه مش هتفرق كتير لأني شيفاها، شخص عنده اسوء وش علي الاطلاق، وَحمه كبيره تكاد تكون هي وشي كُله، رغم اني ماكنتش بشوفها بالسوء دة، دايمًا شايفه ملامحي حلوة لكن..
اتنهدت وكملت_لكن من اول يوم فالمدرسة وانا بشوف كُل الاطفال وهو بيخافوا مني، كانوا دايمًا بينادوني بالعفريت، أهلي كانوا دايمًا بيدوني ثقه فنفسي، لكن بوجود كُل شخص حواليا بيحسسني قد اية انا بشعه .. خلوني أفقد كُل ذرة ثقه فيا، أهلي قعدوني من المدرسة وكانوا بيخلوني اروح وقت الامتحانات بس، ودة زود قلة الثقه جوايا، لما اطلع وأشوف نظراتهم اللي بتحرقني، كبرت شوية وكُنت فاكرة أن الأمر هيتغير، معملتش حساب أنه هيزيد فكُل مدرسة دخلتها ماكنتش بخلى من كلامهم، من نظراتهم اللي بتحسسني قد اية انا وحش ماشي بينهم، لحد ما وصلت لهنا .. قعدت سنه اولى كُلها بدون ما حد يقرب مني، والوضع ماكنش غريب عليا لأني متعودة، لحد ما جت شله محدش ميعرفهاش فالجامعه، مجموعة شباب وبنات جُم واتكلموا معايا فأخر ايام فسنه اولى، عمرهم ما كانوا شبهي، عمرهم ما متريقوش عليا لكني أجبرت نفسي لأنهم اول ناس يتكلموا معايا، لحد ما سمعتهم انهاردة وهما بيرجعوا يتنم.روا عليا!
شوفت فعنيها سؤال انا عارفاه كويس .. كويس اويي
_اقدر اجاوبك بدون ما تسألي
~اية؟
_السؤال اللي عايزة تقوليه بس خايفه، هجاوبك عليه
بصيت لي باحراج فاتكلمت انا_فكرت، فكرت فعلًا انت.حر، لكن افتكرت كُل حلم حلمته من وانا صغيرة، مامتي اللي ملهاش غيري واللي حطت كُل جهدها عشان يكون عندي ثقه فنفسي، معقول هسيب كُل دة وامشي! وعشان اية؟ عشان رأي حد مطلبتهوش! للامانه فرأيهم جارح .. جارح اويي وبيفتت القلب لـ ١٠٠ حته، لكن أنا واثقه ان هيجي يوم وكُل شئ هيكون جميل، وزي ما حلمت.
'كانت بتبصلي وكُل معالم الأسى بتظهر علي وشها، نظرة حُزن، لكنها مش من شكلي ودة الغريب! نظرة حُزن يمكن علي حالي!
حاولت اغير الموضوع فضحكت وانا بتكلم وبمسح نهر الدموع اللي مغرق وشي_ اتكلمت كتير صح، دي اول معلومة عني وهي اني مش بفصل كلام
عينيها دمعت ومسكت أيدي~انا اول ما شوفتك مبصتش عليها، مشوفتش وحاشتها اللي بتتكلمي عليها، شوفت عينيكي اللي لونها بني ومع انعكاس الشمس كانت عسلي، وغمازتك الخفيفه اللي بتظهر فخدك الشمال، شوفت مساعدتك ليا لما حسيتي اني محتارة ومش عارفة اروح فين، الشخص اللي شايف غير كدة في غشاوة علي عينيه، أنتِ حلوة قالب وقالبًا
_انا ممتنة لكُل كلمة طلعت منك
~طب انا كمان مليش صحاب، اية رأيك تبقي صحبتي؟
_انا؟ موافقة .. بجد شكرًا
~شوفي اتكلمنا ومعرفناش اسماء بعض
ابتسمت لها واتكلمت_انا موج
~اسمك جميل، شبهك، انا اسمي سَند
'كانت هي أول شخص يشوفني، مش يشوف شكلي، لكن يشوف قلبي، يشوف الشخص اللي عمره ما ظهر من جوايا، كانت تشبهلي.
_الامتحانات قربت وخايفه اويي
~احنا قدها، واثقة أننا هنعديها وهتشوفي
'كانت دايمًا واثقه فيا، عمرها ما حسستني اني وحشة، اقدر أقول انها رجعت جزء بسيط من ثقتي اللي فقداها من زمان، هي الوحيدة اللي عمري ما شوفت نظرة شفقة أو أنها شيفاني بعنيهم!
~مش مصدقة أننا خلصنا امتحانات
_انا قررت اشتغل
~فكرة حلوة اويي، لقيتي مكان؟
فركت فأيدي فلقيتها مسكتها وهي بتتكلم ~متوترة! حصل اية؟
اتنهدت وانا احساس عدم الثقه بيرجع تاني_ محدش هيقبلني! كُله هيطلب شخص حسن المظهر
~ايوة فين المشكله! مانتِ حلوة
رفعتلي حاجبها وهي بتتكلم~ولا عندك رأي تاني؟
ضحكت_لا يستي مفيش
~من بكرة هننزل ندور
تاني يوم جه ونزلنا انا وهي ندور علي شغل..
مفيش مكان روحت فيه غير وقال جملة واحدة "سيبي رقم حضرتك ولو احتجناكي هنتصل بيكِ" ، انا عارفة أنهم مش هيتصلوا، ما هو مين اللي ممكن يشغل حد يطفش الناس مش يجذبهم!
~هندور تاني يستي، أنتِ بتيأسي كدة ليه!
_محدش هيقبل يـَ سَند، مفيش حد هيوافق
~قومي يـَ موج
قومت عشان امشي وانا سيباها تنده عليا
~كان ممكن مكلمكيش على فكرة، بس انا مش هاخد عليكي اساسًا
_انا اسفه، متزعليش
~مش هزعل عشان لقيت خبر فرحني
_قوليلي بسرعه حالًا بالًا
~أسر خطيبي، كان منزل أن صاحبه بيدور على بنت تشتغل فالمحل معاه، هو محل ميكاب صغير لانه لسه فاتحه من فترة صغيره ومحدش قابل يشتغل معاه، فأنا اقترحت عليه أنه يقوله عليكي، وهو وافق وهتنزلي من بكرة
_سَند! أنتِ بتتكلمي بجد!
تاني يوم نزلت، اول ما قربت من المكان، كُل ذره خوف جوايا اتجمعت، كُنت هلف وارجع وبلاش أخوض التجربة لكن أنا محتاجة الشغل دة، دخلت المحل .. كان فعلًا محل صغير زي ما قالت سَند
اتكلمت وانا باصه فالأرض_صباح الخير
ظهر شخص كان مديني ضهره لانه بيرتب المكان، رد عليا وهو بيضحك=صباح النور، أنتِ موج صح؟
_ايوة انا
مد أيده عشان يسلم عليا= وانا أمان، ودة محلنا المتواضع
_اتشرفت بحضرتك
=موج، احنا هنشتغل كتير مع بعض، احنا حاليًا بقينا صحاب، مفيش حضرتك.
ابتسمت ابتسامه خفيفه، فـ رجع اتكلم هو =أنتِ عارفه الميكاب واستخداماته صح؟
اتكلمت بإحراج_بفهم .. بفهم شوية
ابتسم ورد عليا= طب قوليلي عارفة أية ومش عارفة أية وهعلمك واحدة واحدة
_انا .. انا بفهم، لكن مش عارفة اسامي، مش عارفة براندات وفي حاجات كتير مش عارفه بصراحه حتى اسمها
فضل يلف فالمحل وهو بياخد من كُل رف شئ، حقيقي معرفش حتى دة اية
=بصي، هوريكي كام منتج وأنتِ تشوفي هتعرفيه ولا لا،
دة اية؟
_ايلاينر
=عارفة بيستخدم ازاي؟
_انا مش جاهله للدرجادي، دة الخط اللي بيتحط فوق العين
ضحك وكمل= ودة؟
_ ماسكرا، وبتتحط عالرموش
=دة؟
فضلت باصه علي اللي فأيده وبحاول اجمع
=دة يـَ موج؟
_بصراحة مش عارفة
=طب قوليلي، دة فاونديشن، بيتحط علي الوش عشان يخفي اثار حبوب او اي حاجة، وبيوحد لون بشرتك
=دة كونسيلر، بيتحط تحت العين عشان يفتحها لو فيها هالات سوده
قاطعته وانا بتكلم _انتَ بتتكلم ازاي!
ضحك بصوته كُله فبصيتله بأحراج_ انا مش قصدي، قصدي أن انتَ عارف الحاجات دي كُلها ازاي
=والدتي كانت فاتحة ستور ميكاب وكُنت واقف معاها بردو من عشر سنين، عشان كدة عارف كُل المنتجات، وهعلمك كُل حاجة
عرفني كذا حاجة وابتديت اشتغل معاه، لكني حقيقي لسه مش فاهمة اي حاجة
_انا عايزة اسيب الشغل
=ليه بس!
_المكان مش شبهي، انا مش عارفة اتعلم، انا مكاني مش هنا، انا هخليك تخسر .. تخسر وبس، لو دخلت واحدة وسألت علي حاجة انا مش هعرف ارد عليها، لو سألت وقالت عايزة مُنتج حلو انا مش هعرف اديها حاجة
=انا هعلمك براحه..
بصي دة "برايمر" دة بيتحط قبل الميكاب عشان يرطب الوش، ودة "ايشادو" دة بيتحط عالعين من فوق
_هتلغبط، مش هعرف
=انا واثق فيكِ، هتتعلمي لحد ما تكوني أشطر مني
ضحكت_معتقدش أن حد هيكون أشطر منك
كان بيحاول معايا، مَملش وزهق، مش عارفة اتعلم لكنه بيحاول معايا ومش سايبني!
_ممكن اسأل سؤال؟
=قوليلي
_قولتلي اول يوم علي حاجة اسمها فاونديشن، قولتلي أنها بتخفي العيوب وبتوحد لون البشرة
=أنتِ اتعلمتي وبقيتي اشطر مني اهو
ابتسمت له_بس ممكن اشتريه انا كمان؟
=أنتِ عايزة تحطي ميكاب؟
_يعني عايزة اجرب، عايزة اخبي عيوبي، انتَ مش شايف!
=لطيف
_هو اية؟
=الفاونديشن بيبقى حلو، لكن منصحكيش بيه، وشك حلو كدة، أنتِ مميزة بيكِ
'عدى شهرين ونص، اتعلمت، بقيت شاطرة زي ما قالي، حاولت اتعلم عشان مخلهوش يخسر، وفـ يوم كان المحل زحمه اويي لأن باقي ايام وهيجي يوم مبهج لكُله، العيد
_اليوم كان متعب اويي
=اسف اني اخرتك، لكن اليوم كان يستاهل
_فعلًا
=موج؟ موافقة نتجوز؟
_اية؟
=تتجوزيني؟ موافقة تشاركيني الباقي من عُمرنا؟
مردتش، انا حتى مش مستوعبة!
_بس انا .. أنتَ شايفني كويس؟
=ومش شايف غيرك
_هتمل!
=مقدرش
_انا مش بعرف، محبتش قبل كدة ومجربتش حتى الشعور دة
=هعلمك، زي ما ابتديناها خطوة بخطوة، هنكملها للآخر خطوة بخطوة
"مش كُل شخص اتعرض للتن.مر انتهت قصته نهاية سعيدة وبداية جديدة قادرة تنسيه كُل لحظة بشعه حس بيها، وماكنتش حياته ورديه انتهت بفارس راكب علي حصان ابيض وبياخده لعالمه، كُل ٤٠ ثانيه بينت.حر شخص فالعالم، كُل ٤٥٠٠٠ شخص بينت.حر فالسنه بسبب التنم.ر، متكونش سبب أذيه حد بدافع انك بتحقق الكوميديا، حُط دايمًا نفسك مكانه، متجرحش مشاعر حد بغرض انك عايز تعوض نقص جواك، مفيش اي مبرر يخليك تحكم علي شكل أو شخصيه .. أي شخص، مش من حقك تجرح حد بكلمه لمجرد انك شايفه وحش، الحقيقه أن مفيش شخص وحش، لكن في شخص من جواه وحش فبيحاول يجمل نفسه علي حساب حياة شخص آخر، خليك خفيف ومتكونش انت من ضمن اسباب شخص أنه يسيب العالم ... متكونش سبب فـ أن انسان يكره شكله."
"إذا كانت المُعضلة تشابُك أرواح، فكيف تُكف الروح عن الروح؟"
تعليقات
إرسال تعليق