صحيت من نومى اللي ما طالش اكتر من ٤ ساعات ، قلة نومي كانت في الهالات السودة تحت عيني ، كل خلية جوايا كانت مستعدة لليوم اللي اتخلقت علشانه ، قومت ولبست وجهزت نفسي كنت في أشيك حالة مني واتاكدت ان شكلي حلو ونزلت ، رحت قبلها بساعة علشان أتأكد ان كل مكان في الكافيه جاهز لاستقبالنا ، حطيت الورد في مكانه وشغلت موسيقي هادية وجهزت ليها القهوة بالبندق اللي بتحبها واستنيتها في المعاد كانت الساعة ١٢ وجت .. جت ومعاها قلبي اللي فارقني يوم ما لقيتها ، قعدت قدامى وجوايا مشاعر ملخبطة وفرحة وبهجة اول مرة احس بيها كان قلبي بيدق جامد وجسمي سخن ووشي بدأ يحمر وروحى بتتنهد وفي انتظار فرحة صبرت عليها ايام وسنين ، ابتديت اتكلم لما قاطعتني وقالتلي هتكلم انا ...
أنا عارفة انت جاي تقول ايه وحاسة بيك جدا وحقيقي فكرت ألف مرة قبل ما اجي هنا واصارحك بمشاعري ، صداقتنا كانت حلوة ولقيت فيك كل اللي ملقتوش في الناس ، وبرتاح جدا في كلامي معاك وما بعرفش اضحك من قلبى الا وياك ، افتكر اني مليش نصيب في حاجات كتير لكن صداقتنا كانت نصيبي الوحيد الحلو بس ..
بس انا مش هقدر سامحني ، انا حاولت كتير بس ما عرفتش ، ما قدرتش احبك زى ما بتحبني وعارف ان مش ده اللي كنت مستني تسمعه بس مش هاين عليا اسيبك تتعلق بيا وانا مش موجودة انا مقدرة مشاعرك ومقدرة حبك ليا بس قلبي مش ليك وانا ما استاهلش حد زيك انت تستاهل حد افضل وصدقني هتفضل أعز صديق بالنسبالي وعارفة ان كلامنا ده هيغير حاجات كتير بينا بس هفضل بحبك كاصحاب واتمنى ما تكرهنيش ..
قامت ومشيت وانا ساكت ومصدوم وجوايا الف معني للحزن والكسرة والوجع وجوايا مليون تفكير ومليون فكرة للانتحار وانهي اقربهم للموت مشيت وخدت جزء من روحي معاها وسابتلي الجزء الميت مني ، انا ما حبيت نفسي الا لما حبيتها بس هي عندها حق قلبها مش ليا بس قلبي كمان مش ليا وعارف انها هتنساني بس انا عمرى ما هنساها لان عمرى بينتهي مع نهاية الرسالة دي وانا ع حافة برج القاهرة وشايف نهايتي بتقرب ، جايز قلبها مش ليا في الدنيا فاتمني يكون ليا في الآخرة...
تعليقات
إرسال تعليق