سحب كرسي وقعد جمبي بدون إذن لسه زي ما هو ،نظره عينه هدوء ضحكته بس شوفته بنظره مختلفه
.. شوفته بعيني مش بقلبي !
_مين حضرتك يا أستاذ؟
"جاوبني بإستهزاء في نبره صوته"
_معقول لحقتي تنسيني يا لينا ؟!
مكنش ينفع ابين اني لسه فاكراه وحافظه تفاصيله وريحه برفانه الساعه اللي كنت جايباها هديه عيد ميلاده بس هو دبح حبي بسكينه بليده!
_عاوز ايه يا خالد؟
_عاوز نرجع
ضحكت بكسره :
_مش انا اللي مش حلوه وشكلي ميديش اني بنت وانك جريت على جوزين عيون هاسكي و حبه شعر اصفر؟
ولا انا اللي محدش هيحبني بعدك وانك قابل خطوبتنا شفقه بيا ورفقه بحالي عشان محدش هيتجوز واحده 100 كيلو ؟
عاوزه نرجع دلوقتي؟!
ليه؟!
ايه اللي اتغير؟!
كان هيتكلم بس وقفته وكملت
_اقولك أنا :
ملقيتش حد يستحملك بكل عيوبك صح؟
وملقيتش اللي يقف جمبك في وسط ما الكل سابك؟
أتأكدت أن محدش يحبك قدي لما أم عيون زرقا باعتك علشان حبه فلوس ورميتك زي الكلب مش كدا؟
_انا اسف غلطه ومش هتتكرر انا عرفت قيمتك و...
_يعني هترجع تحبني تاني ومش هتسيبني مهما حصل؟
"ابتسم بفرحه بعد ما حس انه فيه أمل اننا نرجع"
_اوعدك اني مش هزعلك أبداً
خدت شنطتي وقومت
_الوعد ده ضحكت بيه عليا قبل كدا وصدقتك واللي يجرح مره يجرح ألف مره وانا دوقت المر ّفي بعدك ومش هغلط تاني .
مشيت وسيبته يتعذب في بعدي حس بقيمتي بعد ما فات الآوان
أتأخر في ندمه وانا مش لعبه يتسلي بيها وقت ما يحب
" كل حاجة ليها وقت؛ لما بتتأخر حلاوتها بتروح.!"
تعليقات
إرسال تعليق