أعمق وأعظم أربع حروف عرفتها الإنسانية.. واحدة من أجمل المفردات في التاريخ.. كلمة ثابتة على مر العصور وبكل اللغات لا بتتغير مع الزمن ولا بيروح سحر تأثيرها.. كلمة ليها قدسيتها الكبيرة جدا، وهي الإعتراف الأكبر وأوقات الأصعب ولكنه الأحلى دايما.. أيوة هي.. كلمة "بحبك".
وما بين الأربع حروف دول –بحبك- بتتجمع كل المشاعر الإنسانية.. كلمة مبهرة!.. ممكن تبقى سبب سعادتك وممكن تتسبب في ألمك، ممكن تقربك قوي من حد وممكن برضه تكون أهم أسباب بعدك عنه، أوقات تقولها بمنتهى الجرأة وأوقات ماترضاش تطلع من بين شفايفك من الخوف، ممكن تديك جرعة مكثفة من الشعور بالأمان وهي نفسها ممكن تسرق منك سلامك الداخلي وتدخلك في دوامة صعبة من المشاعر الملخبطة، كلمة بتتلون بمية لون وشكل مع كل حد بتتقاله.. يعني تختلف من أب وأم.. لأخ.. لابن.. لصديق أو صديقة.. لاتنين بيحبوا بعض أو متجوزين.. أو حتى لنفسك، والإحساس اللي بتتقال بيه هو الوحيد اللي يقدر يشيلها ويدخلها جوة قلب حد وماتفهمش إيه اللي بيحصل وقتها جوة مشاعرك وجسمك وإيه الشعور العميق الحلو المرعب الغريب اللي بيضرب كل ما فيك.
ولكن كمان هي كلمة فيها وعد وعهد، فيها إلتزام ومسئولية كبيرة.. كلمة مش سهلة وماينفعش تتحلول للعبة زي ما بيحصل كتير حوالينا، وفي رأيي إن كلمة "بحبك" في حد ذاتها علاقة ورابط قوي، وبرغم إن فيه ناس بتشوف كلمة "بحبك" تابو أو أكلاجية ومحفوظة أو مجرد كلمة حلوة ورومانسية مع إنها كلمة إنسانية من الطراز الرفيع.. وكتير بيكون أعظم أحتياجاتنا بس إننا نقولها أو نسمعها.. لكن تلاقي اللي يقول لك خلاص ما هي عارفة إني بحبها أو خلاص ما هو بقى جوزي، ما أولادي عارفين إني بحبهم أمال أنا بعمل كل ده عشان مين؟، أو أصل أنا مابعرفش أقولها.. وعمري ما فهمت إزاي فيه حد مابيعرفش يقولها يعني؟.. بس دول في الواقع ناس بيستكبروا يقولوها أو مستقلين بيها أو مكسوفين أصلا وتحديدا احنا الرجالة أكتر وده راجع طبعا لمفهوم الرجولة المشوة اللي رضعناه كشرقيين من واحنا عيال.. مع إنك لو فكرت فيها هتلاقي إن جزء من رجولتك الحقيقية إن تقدر تقول "بحبك" وإنت متحمل مسئوليتها وعارف قيمتها، بل وفيه أبحاث اتعملت على كابلز كتير كانت نتيجتها مفاجأة وهي إن الستات بتقولها أكتر من الرجالة بنسبة 2:1، مش بس كده أنا كمان في رأيي أن الست أكتر تقديسا واحتراما لكلمة "بحبك" ومابتطلعش منها غير وهي حساها فعلا أكتر من بعض الرجالة اللي بيقولها بنفس السهولة اللي بيعزم بيها على صاحبه بسيجارة ولأغراض بعيدة تماما عن الحب.. مفهوم طبعا!.
كمان ناس كتير بتتجاهل عظمة مفعولها في حياتنا وعلاقاتنا.. هل تعلم إن كلمة "بحبك" هي الكلمة الأعظم على الإطلاق اللي ممكن تتحطم فوقها أعظم مشاكل وتنتهي بيها خلافات كبيرة، هل تعلم إنها ممكن تنقذ علاقة من الدمار، وتمحي جروح دفيانة بتاكل في قلوب أصحابها.. ولكن بشرط واحد مهم تكون حقيقية فعلا ومن القلب.
كمان برغم كل التصرفات والأفعال والتضحيات اللي ممكن نقول بيها "بحبك" إلا إن نطقها وسمعها وإحساسها وهي خارجة من شفافيك وتأثيرها على للي قدامك حدوتة تانية خالص، كمان مفهومنا عن الحب نفسه بيحكم أصلا كلمة "بحبك" عندنا تساوي إيه.. يعني كل ما كان مفهومك عن الحب سوي وناضج وسليم وإنساني كل ما كان احترامك وتقديسك وإحساسك بالمسئولية هما اللي بيحددوا قيمة الكلمة دي جواك، وكلما شوفت الحب لعبة ومجرد مشاعر نعيش لنا فيها يومين وخمسة رومانسية ووقت حلو نقضية سوا كل ما كان استهتارك بيها وجهلك بعمقها وقيمتها.. ومن أجل الأمانة في ثقافاتنا الشرقية عموما مابنديش كلمة "بحبك" قيمتها الحقيقية واحترامها، ولا يمثل الإعتراف بيها أي مسؤولية على أصحابها فتحولت للبانة في بوق أي حد حس بأي شعور حلو مؤقت وخلاص.
طول الوقت نفسي يكون عندنا في عمق إدراكنا نفس احترام الغرب لكلمة "بحبك" وإلتزامهم بيها وتقديرهم ليها.. مش عشان هما جمال وبيعرفوا يحبوا واحنا لأ.. لكن لأنهم بيقدسوها ومابيقولوهاش وخلاص وبيعتبروها مسؤولية وعلاقة كاملة بتخلقها الكلمة دي فتلاقيهم بيعيشوا سوا ويعملوا حياة بكل ما فيها وبشعور بالإلتزام تجاة بعض جاي من جواهم وكأن (بحبك) نفسها عقد مكتوب بينهم لكنه مش محتاج لا ورق ولا حبر ولا حد يشهد عليه غير قلوبهم!.. مش عايز نوصل للمرحلة دي.. بس عايز نتحمل مسوؤلية كلمة "بحبك" لما نقرر نقولها، بل وهتلاقي عندهم الكذب فيها فعل مجرم ولا تستغل للإشتغلات اللي عايز يلعب بيقول أنا عايز ألعب.. ما بيقولش "بحبك" كما هو الحال عندنا.. ولازم اللي يقولها يكون حاسسها ومتأكد من مشاعره وكمان قدها!.. وقدها دي حدوتة كبيرة لوحدها احنا بنفتقدها بشدة.
ملخص الحدوتة في قناعتي أنا الشخصية.. احنا محتاجين نتعلم نقول "بحبك" من أول وجديد، محتاجين نفهم معناها وقيمتها الحقيقية عشان نعرف نقولها ونسحها صح، محتاجين نلتزم بيها تجاة بعض ونتعامل معاها على إنها كلمة بمية عقد جواز وبمليون دبلة في الإتزام والرابط والشعور بالمسؤولية الكاملة بينك وبين حد قرر يصدقها منك ويبادلك بيها، محتاجين كمان مانحرمش اللي بنحبهم طول الوقت من كلمة "بحبك" حتى لو قولنها مليار مرة وحتى لو كانوا خلاص متأكدين إننا بنحبهم.. عشان "بحبك" دي كلمة بتحيي روحنا وبتشحن طاقتنا وبتصحصح مشاعرنا كل شويا وكمان بتقوي اللي ما بينا دايماً.. وشكرا.
تعليقات
إرسال تعليق