•3 عملات
_هاخدها
°لكن انا اللي هاخدها
بصيت على الشخص اللي بيتكلم جمبي
_انا اللي مسكتها الأول، يبقى هي بتاعتي
°وانا قولت أن انا هاخدها
شديتها من أيده وانا على أتم الاستعداد اني مش هتنازل عنها
_مش هسي...
قبل ما أكمل الجملة، لقيت شخص مسك أيدي وبيجري، مَسكته لأيدي أجبرتني على الجري معاه
_أنتَ مين؟، وبتعمل اية؟
=جاي انقذك أنتِ والشئ اللي فأيدك
_بس انا مش محتاجة مساعدة حد
سيبت أيده بعد ما دخلنا شارع جانبي
=مش دة اللي شوفته واحنا هناك!
_شكرًا لـمساعدتك، لكني ماكنتش محتاجه ليها
اتعدلت من مكاني عشان امشي من قدامه، لكني لقيته رجع يمسك أيدي ويجري بيا، بصيت ورايا كان في مجموعة حراس بيجروا ورانا!
_احنا بنجري ليه!
=مش واخدة بالك من الحراس اللي ورانا؟
_معقول كُل دة عشان الشئ الصغير اللي فأيدي دة!
بص على اللي مسكاه فأيدي ومردش عليا، رجع يبص قدامه تاني واحنا بنكمل جري
بصيت عليه بإرهاق _انا تعبت
=قربنا نوصل
كُل دة شئ صعب على شخص قضى معظم حياته مش بيخرج من البيت، روتين واحد كُل يوم، هو يوم واحد فالأسبوع بخرج فيه عشان اجيب النواقص اللي هتكفيني لأسبوع تاني
_هو احنا نا...
من غير ما أكمل لقيتنا طلعنا سلم وواقفين فوق بيت، مش طويل لكنه مكون من كام دور يوضح للي هيقع من هنا أنه هيفضل عاجز لفترة
=انا همسكك وننط انا وأنتِ
_هنعمل اية!
=لازم دا يحصل عشان نعرف نهرب منهم
_لكن المسافة عاليه
مد ليا أيده وهو بيتكلم
=واثقه فيا؟
بصيت لأيده الممدودة كام ثانيه، بعدتها عني وانا ببص جمبه وعلى الحبل اللي لو قدرت اربطه فالبيت اللي قدام، النزول مش هيكون أصعب حاجة موجودة
ربطت الحبل ونزلت وانا لسه شايفه صدمته من رد فعلي، استنيته عشان ينزل هو كمان لكنه فضل أنه ينط وميستخدمش الحبل، على راحته، كُل انسان مسوؤل عن تصرفاته
=قدرنا نهرب منهم
ابتسمت نص ابتسامه وانا بتكلم_قدرنا نهرب
=هنروح على فين بعد كدة
_اسمها أنتَ هتروح على فين، انا رايحه بيتي
وقف قدامي=لكن أنا مش عندي بيت
_امال عايش ازاي!
=بتنقل بين كُل بيت وبيت شوية
_تمام، يبقى أعمل كدة المرة دي كمان
من غير ما أسمع رده كُنت مشيت من قدامه، وصلت البيت الصغير اللي عايشه فيه واللي مش كتير يعرفوا بوجود مكان زي دة نظرًا لأنه قديم وبعيد نسبيًا عن المدينه، بيت هادي وفاضي يشبه كتير ليا، محدش من اللي ساكن حواليا يعرف أن في شخص عايش معاهم فالبيت دة، غالبًا محدش يعرفني غير صاحب المكتبه الموجودة فالمكان لأني كُل يوم بشتري منه كتاب جديد فيخلص وارجع اشتري تاني
اول ما وصلت فتحت الشئ اللي كُنت لسه مشترياه واللي بسببه قضيت مغامرة مجربتهاش قبل كدة! واللي كان عبارة عن بلورة صغيرة، جواها وردة بلون اللبني واللي يعتبر لوني المفضل، منورة جوا البلورة وحواليها انوار تشبه للنجوم، حقيقي كانت تستاهل اقضي مغامرة لحصولي عليها
عملت كوباية شاي وخدت كتابي الجديد وخرجت الجنينه الصغيرة اللي عملاها بعد البلكونة بشوية، روتين كُل يوم، ومعتقدش اني حابه أنه يتغير فـمرة، الإنسان يقدر يكتفي بنفسه، وبجدارة
قطع لحظات هدوئي دي خبط عالباب، واللي نادر لما حد يخبط عليه
=مفاجأه صح؟
_انتَ .. أنتَ جيت ازاي!
رفع كتافه وهو بيتكلم=بسيطة، فضلت ماشي وراكي من غير ما تاخدي بالك وشوفتك وأنتِ بتدخلي فانتِ دلو...
وفـثانية كُنت قافلة الباب وهو ما زال بيتكلم، لكنه مكتفاش عند كدة ولقيته بيخبط تاني!
_عايز اية؟
=ابات هنا لحد ما الاقي بيت
_تبات فين!
=ه ن ا
_انا فالبيت لوحدي، معتقدش أنه صح
=بسيطه بردو، ممكن تخرجي أنتِ وتخليني انا هنا
بصيت عليه بصدمه من اللي بيقوله!_انتَ مستوعب بتقول اية!
=بهزر معاكي، انا اكيد مش هخليكي تخرجي، لكن شوفي لقيت اية أثناء تجولي فالمكان هنا؟، فوق البيت دة سطح وفي كُل حاجة ممكن احتاجها وبما أن البيت بتاعك فأكيد اللي فوق البيت تبعك بردو، فتقدري وبكُل سهولة تقوليلي انك موافقة اني اطلع اعيش فوق
اتكلمت وانا بقفل الباب عشان اخلص من الشئ اللي قدامي دة_موافقة، اطلع ومش عايزة مغامرات تاني فحياتي بسببك
معرفش سبب موافقتي أنه يكون هنا، وماكنش عندي فضول أعرف الحقيقه، رجعت المطبخ اعمل كوبايه شاي جديدة بدل اللي اكيد بردت، خدتها وكملت كتابي وانا مازلت على نفس وضعي
تاني يوم، خدت فطاري وكوبايتي والبلورة ودخلت الجنينه
_أنتَ بتعمل اية هنا!
=بفطر
_دي حديقتي!
=هشاركها معاكي
مهتمتش لكلامه وقعدت مكاني عشان يومي يكمل
اتكلم وهو بيبص للبلورة=بقا هي دي اللي حصل كُل دة بسببها امبارح
_شئ ملكش دخل بيه
اتكلم وهو باصص عليا=بس جميله، تستاهل أن الإنسان يضحي عشانها.
مَر أسبوع، أسبوع على وجوده بالمكان هنا، أصبح ضُمن الروتين اليومي بتاعي، وبما أن لكُل بداية نهاية
_هو انتَ مش هترجع؟
رد وهو ماسك البلورة= ارجع فين!
_مملكتك، القصر بتاع الأمير
بصلي بصدمه انا واثقه أنها ألجمته=أنتِ..أنتِ تعرفي منين!
_من اول يوم شوفتك فيه وقت الحراس ما كانوا بيجروا ورانا، كُنت عارفه أن اكيد الحراس مش بيجروا ورانا لمجرد بلورة خدتها، ولما روحت تاني عرفت أن الأمير هرب مع واحدة وهما طبعًا ميعرفوش شكلي لأني دايمًا لابسه الشال وبغطيه، وأكاد أكون الوحيدة فالمملكة اللي تعرف شكل الأمير، فاكر البنت اللي اتخانقت مع أحد حراس الأمير لأنه خبطها بدون ما يقصد اثناء حراستهم للأمير وهو ماشي؟، البنت دي تبقى انا
ابتسم وهو بيكمل على كلامي= وهي بردو نفس البنت اللي خلت أمير المملكه يهرب ويمثل أنه متسول فالشارع
_يعني اية؟
=يعني يوم ما اتخانقتي مع الحراس انا شوفتك، ماكنتش اعرف مكانك فين، لكني ابتديت اهرب كُل يوم من المملكه وانا بمثل اني متسول، لحد ما لقيتك بتتخانقي مع شخص على حاجة مسكاها فأيدك، ودي كانت فرصتي، مش حابه تعيدي المغامرة مرة تاني؟
ضحكت_كانت مغامرة حلوة؟
=جميلة، تستاهل أن الإنسان يضحي عشانها.
"إذا كانت المُعضلة تشابُك أرواح، فكيف تُكف الروح عن الروح؟"
تعليقات
إرسال تعليق