ابويا قال...
ان للصح طريق
وللغلط طرق
واللي يحبك حبه وإياك تهجره
السر سر إياك تنشره
أبويا السند
اكبر عدد مهما حاولوا الناس يزيدوا العدد
أبويا الأمان
مصدر السعاده
إيد دفعاني لقدام
أبويا منبع حنان
سور فولاذي محاوطني
جزمته علي الباب أمان
رباني علي الالتزام
والحق حق
وأخد الحق حرفه
والغلط بندفع تمنه
لو مش دلوقتي يبقي بعدين
وقالي
الدنيا هتمشي معاك سلف ودين
والظالم هيجيله يوم يصبح مظلوم
وحب للناس دايماً الخير
وإن صابك مكروه
يبقا من عند الله خير
والمكان اللي تخاف فراقه مترحلوش
في الدنيا يا ولدي بتتغير الوشوش
كون دايماً ناجح
ومتزعلش لو اتغيرت من حولك النفوس
وسلاحك خليه دايماً نجاحك
واحلامك مع الغير متتشاركش
واياك تامن في الدنيا اللي يخون ويغش
اللي يغش الناس
هتلف الايام ويغشك
واترك في قلب اللي يعاشرك
اثر حلو
بصمه خير
يفتكرك بيها لو قابل بعدك غير
حبيبك هيحبك بكل عيوبك
اياك تغرك الايام
وتلبس توب مش توبك
وتتوه في زحمه قلنا وقال
وإياك تأمن الدنيا لو ضاحكه في يوم
وللزوم
اياك تغرك المظاهر
في كتير جلاليب اصيله
وبِدل بتتلون بالف وش ولون
سامح مره
وعاتب مره
والتانيه ملهاش لزوم
ولو مهما كترت الهموم
ربك فوق
قرب من اللي يقربلك
ويفرح لفرحك
وبلاش العشم يخدعك
وقول مالك
للي بهزاره وضحكه الكتير همه بيداري
إوعي تكون في يوم جاني او اناني
وإوعي الحب يلعب بيك
او الحزن يسكن في يوم قلبك
هيكسرك ويهد فيك
وإياك والظن السوء
وإحذر صديق السوء
أبويا.....
قبل ما بقوله محتجالك بلاقيه
ثابت دايماً كده
وفي قرارته حازم
يحبش الغلط
عاوزني دايماً ناجح
أبويا ضحكته بيضحك بعدها كل الكون
ح ببتني ليه يا والدي في ورده وفيروز وام كلثوم
طبعاً كالعاده هتقولي
ده زمن الفن الجميل
ومن فات قديمه تاه
والقطر اللي يفوتك إياك تاني مره تستناه
يا والدي انتا في عيني طول الوقت عظيم
ومهما اقول هنسي اقول حاجات كتير
ربي ما يحرمني منك ياوالدي
تعليقات
إرسال تعليق