عُزله.. ومعارف والنهايه واحده
ومحطات الدنيا زحمه
هاند فري ميوزك بسيط
بعيد عن الدوشه بقيت وحيد
اتفضل ولع سيجارتك
وامسك وردتك
واستني محطتك
طل من الشباك
شوف كام قطر فاتك
وشوف مين استناك
...
الحياه بالمقلوب اجمل
وطفولتك في رجلك شنكل
والعزله عن ناسك
واهلك واحبابك عزلتك
لكن انتا بكل ذكاء هربت من عزلتك
وقررت تعيش وتشوف وتعاشر
أديك
عشت وشوفت وعاشرت
وحبيت واتفارقت وفارقت
ورجعت تاني لعُزلتك
بعد ما عِرفت كل الناس وكل الناس عِرفتك
دلوقتي أقدر أقولك إن أشواقك خذلتك
واختفي الكل من جنبك
عشان تتأكد انك مازلت وحيد
وان الشعور ده ثابت جواك
لو في مليون كارهك
اكيد فيهم حد بيتمناك
...
وهي بالنسبالك حد مختلف
في ضحكتها شروق الشمس
حتي في اكتئابها
ليل هادي بدون سُحب
شوفتها تشبه شوفت ضوء قمر كامل
وحاسس اني بتعامل مع كائن طفولي
لكنه طولي وكامل
نضج كلامها مش عارف إزاي ممكن يتحول في ثانيه لضحك هستيري
من جمالها ممكن تخليك في ارتباك نفسي
...
هي مش إعتياديه
ومش في حياتك تكرار لحد
ومش نسخه من شخص نتا عرفته زمان
وده الشئ اللي بيخليها دايماً في بالك
قادره تخرجك من اي حاله
جنبك حتي في عز وجعك واكتئابك
هاديه هدوء بحر بلا امواج
لو بتشتاق فانا مشتاق
احلامها بسيطه
لو كانت قابله بكل عيوبك
يبقي بتحبك مهما الناس قالولك
...
بعرف ابعد جداً
فمترهنش علي وجودي في حياتك
وحياتي بعدك هتستمر بشكل يخليك تقول
انك مكنتش تعرفني برغم قوه علاقتنا
واتاكد ان ده هيكون رد الفعل لفعلك
انا مبعرفش اكون في مكان
مش حاسس فيه بقيمتي
ولا حتي اقبل اني اكون في حياه حد
مش فارق معاه وجودي من عدمه
كل شئ بينا انتا اللي قررت هدمه
لو مش ذنبك اكيد مش ذنبه
مش بعاتب علي شئ انتا قاصده
مش غرور مني بس صعب تعوضني
والايام كفيله بكل الطرق انها تثبتلك ده
وتثبتلك كمان ان التفكير لعنه
..
ولعنه التفكير
بسببها بنخسر حاجات كتير
حابب الانعزال وبتهرب منك جواك
ومن شده ادراكك التفاصيل
اتخلق حواليك دايره وهم
وعقلك شايف ان دي مشكله ملهاش حل
فعشان كده قررت تاني الانعزال
اديك راجع تاني عزلتك
بعد ما عرفت كل الناس وكل الناس عرفتك
اتفضل
غير اغنيتك
طفي سيجارتك
ارمي وردتك
انزل محطتك
شوف كام قطر استناك
وشو فمين فاتك
وافتح النوت
واكتب فيها
مين منك
ومين جنبك
ومين باعك
ومين اتخلي عنك
وطل في ذكرياتك
شوف كام حاجه كسرتك
لكنها دلوقتي قوتك
لكن اياك اياك عشان خاطر حبايبك
حتي لو كانوا قليلن ترجع تاني عزلتك .
تعليقات
إرسال تعليق