_ بقينا خلاص انا وانت .. لبعض ومستحيل البعد بينا يكون ♥️
بصيت جمبي وإبتسمت ..
_بقينا خلاص انا وانت ..؟
" لبعض ؟ "
ابتسمت وقلبي طاير م الفرحه ..
_ لبعض .. لبعض .. لبعض
ضحك ع طريقتي المجنونه .. بس انا ما صدقت انا وهو نبقي لبعض بجد وربنا يجمعنا ..
قرب مني وحضني ..
" طب بما اننا بقينا لبعض بقا وكده ف اي ؟ "
بصيتله ورفعت حاجب ..
_ نعم !
" خدني جوا حضنك دا اللي واحشني "
_ تؤ تؤ بتقولها غلط ..
" أومال هي إسمها إيه ؟ "
_ سيبني جوا حضنك دا اللي واخدني ..
ضحك وشدني لحضنه ..
" عيوني ي قمر غالي والطلب رخيص طبعا ، والله دا إنتي اللي واخده قلبي وفكري وحياتي كلها "😹♥️
ضحكت .. من أكتر الطرق المحببه ليا ف التعبير عن الحب هي الأغاني .. وفكرة إن شريك حياتك يشاركك الحب بطريقتك دي فكرة لطيفه جدا ..
_ لحظه حنان انا عيشتها .. لحظت م شوفتك وقتها .. وبأعلي صوت أنا قولتها .. هفضل معااك .. ♥️
" عشان مجنونه "
بصيتله ورفعت حاجبي :
_ مين دي اللي مجنونه ..
" إنتي ، أيوة متبصليش كده ، م هو محدش كان هيقبل تفاهتي إلا ي حد مجنون ي حد تافه .. "
_ يعني انا مجنونه وتافهه ؟
غمزلي :
" وعشان كده حبيتك "
**********
فوقت من شرودي وبصيت للفون اللي ف ايدي والدموع ف عيوني ..
أنا لسه فاكره اول جوازنا والحب اللي كان بينا وازاي كنا مبسوطين اننا بقينا مع بعض ، ازاي وصلنا لدرجه الفتور دي من ناحية بعض ! إزاي بقا شايف إن وجودي من عدم وجودي مش فارقه كتير ؟
إزاي أنا بطلت أعتمد عليه ؟
طب .. طب هو إزاي بقا شايفني كدا ؟
فضلت مركزه ف الشات اللي بينه وبين نفسه شويه ..
قمت بسرعه وقفت قدام المرايا .. بصيت لنفسي ودققت أوي ..
بشرتي البهتانه ..
شعري اللي اتقصف وباظ ..
الشحوب اللي ف وشي ده ..
عيوني اللي مبقاش فيها أي شغف ..
أنا إزاي وصلت للحاله دي ؟ هو عنده حق ف كل كلمه كتبها ف الشات .. أنا أتغيرت جدا 💔
بصيت ف الفون تاني .. حسيت بيه بيسحب الفون .. بص ف الشات اللي انا فتحاه وبصلي تاني ..
" أسف ، كنت محتاج افضفض مع نفسي "
لف وهيمشي فسالته ..
_ مسألتش نفسك أنا بقيت كده ليه ؟
وقف وجاوبني من غير مايبص ناحيتي ..
" متأكد إننا لو كنا فضلنا نحب بعض زي ماكنا مكنش حد فينا هيوصل لحالته دي .. "
_ أنت بطلت تشوفني حلوه ..
" إنتي بعدتي عني "
_ مسألتش نفسك ليه ؟ مسألتش نفسك عن الحمل الكبير اللي أنا شيلاه لوحدي ؟
" لو اتقاسمناه كان خف عنك وعني كتير "
_ خف عنك !
" اللي يوجعك يوجعني ، اللي يتعبك يتعبني ، واللي يستهلك من روحك بيدبح روحي بسكينه بارده .. "
_ خوفت .. خوفت إنك تتحمل فوق طاقتك بسببي ..
" الخوف قتال ، قتال ف إحساسه ، وف موانعه ، وف نتايجه ، شوفتي نتيجة الخوف .. محدش فينا بقي لاقي التاني "
_ كنت ممكن تتكلم معايا ، كنت محتاجه إحساس إنك لسه بتحبني .. !
" عارف إن حملك تقيل .. مكنتش حابب أزوده عليكي .. عشان أنا بحبك .. محبش أبدا إنك تشوفي ف نفسك عيوب .. "
_ كان لازم أحس بكل حاجه بتنقصني واحده ب واحده .. كان لازم أحس لوحدي اد اي انا إتغيرت .. للأسوء ..
قرب مني وخدني ف حضنه ..
" لو شوفتي نفسك بعيني ، هتعرفي إنك كامله ومفيش ف الدنيا حد زيك ولا حد ينفع يملي عيني غيرك "
بصلي :
" وياريت يشوفوك بعيوني .. كانوا عذروني .. كانوا حبوك لو بيحبوني "
إبتسمت ..
" طب ينفع حد ضحكته قمر كده ويقول اتغيرت للاسوء ! والنبي دا الدنيا كلها اللي أسوء وانتي الحسنه الوحيده فيها .."
بصيت بعيد وإبتسمت من تاني .. محدش بيعرف يخليني مبسوطه غيره ..
مبسوطه بنفسي .. مبسوطه بيه .. مبسوطه بكل حاجه حلوه ف الدنيا خدتها فيه ♥️
_ العتاب محبة ، والحياة مشاركه وود ، واللي يقصر ف حق التاني يبقي من واجب الحب العتاب والملامه مش نبعد من سكات .. فهمتني ؟
" فهمتك .. ووعد وعهد .. العتاب محبه .. وانا بحبك .. لا .. بعشقك .. لبعض من تاني ؟ "
_ ولأخر العمر يانصيبي الحلو ♥️
تعليقات
إرسال تعليق