كَانِت واقفه بِنت في البلكونه مع فنجان القهوه ونسمه الهوا،ومامتها واقفه جنبها.
روحيه: بُصي ده.
نور: اه ماله يعني؟
روحيه: عريس ليكِ.
نور: انا عاوزة حاجات اهم من الجواز يأمي، اتمنى اسافر واخلص الدُكتوراه، اتمنى احقق إنجازات مش اروح اتجوز؟
روحيه: طب و ده؟
نور: يمامـ...! ايه؟ مش ده ابو طويله الاهبل! ابن اخوكِ ده؟
روحيه وهي بتبتسم: ها حلو؟ عاجبك ده؟
نور: عاجبني في ايه بلا وكسه، ده اطول من الشجره!
روحيه: يبنتي ريحي قلبي، نفسي اشوفك عروسه.
نور وهي ماسكه دماغها: اه يدماغي ياني، انا حفظت الكلام ده، اُمي انا سني مش كبير انا لسه 25سنه. متستعجليش على جوازي كده.
روحيه: ماشي يبنتي اللِ تشوفيه.
نور: لولولولوليييييي اخيراً قولتِ اللِ تشوفيه.
ام ايمان(جارِتهم): ايه يبت ينور عندكم فرح ولا ايه؟
نور فـِ سرها''ياربي لو تخلي مناخيرك في وشك يطنط'': لا يطنط ام إيمان معندناش فرح، والحقي الواد ابنك بيعيط خُشي شوفيه.
روحيه: يبنتي عيب كده.
نور: ماهي اللِ غريبه دي لو سمعتني بكح بتسألني هتتجوزي امتى! متعرفيش ايه علاقه ده بـ ده و كمـ... الجرس بيرن هروح افتح.
نور: ابو طويله اتفضل ادخل.
خالد: وحشاني اوي بجد.
نور: طب اقطم عشان مزعلكش واتفضل شوف عاوز ايه من عمتك.
خالد: ماشي، اعمليلي القهوه على مأكلمها.
نور لسه هتزعق بس جالها فكره حلوه، ليه لأ؟ ليه متنفذهاش.
عملتله قهوه بالملح، اه بالملح عادي، شخص تقيل في نفسه فـَ الترحيب يختلف شويه.
نور: اتفضل، عملتلك قهوه عُمرك ما هتنساها.
خالد: عشان من ايدك وانا عُمـ..، ايه القرف ده؟
نور: ايه السُكر فيها زياده ولا ايه؟
خالد: دي مُره اوي.
نور بإبتسامه عريضه: بس مش امرّ مِنك يعني.
خالد بص لـِ روحيه: عن اذنك يعمتي، هبقى اكلمك في الموضوع اللِ كُنت جايلك عشانه بس يوم تاني عشان ميحصلش مشاكل.
نور وهي بتقلده: عشان ميحصلش مشاكل.
خالد مسك ايدها جامد وفضل يهددها ولأن نور بتلعب كراتيه معداش ثواني ألا وكان واقع في الارض.
نور: صدقني ايدك دي لو لمستني تاني هكسرهالك، يلا عيب على طولك يأهبل، فاكر انك لما ي
تمد ايدك على بت هحترمك انا كده مثلاً!
خالد سابها ومشي، هيعمل ايه تاني لو فضل خمس دقايق ممكن يروح متكسر.
روحيه: ينفع اللِ حصل ده يـَ نور! ولما خالك يكلمني اقوله ايه؟
نور: وهو كوكي ده هيروح يقول لخالو؟ وبعدين حتى لو خالو سُكر اصلاً. معرفش الواد الرخم ده ابنه ازاي بجد.
روحيه: انا رايحه لخالتك شويه.
نور جاء في بالها كُل ما هو جميل، هو مش كُل حاجه، هي حاجه معينه كده''مالك''صديق واخ وقريب واجدع حد يجبلها شوكليت.
نور: هاجي معاكِ؛ عشان خالتو وحشاني جِداً.
روحيه: والله؟
نور: عندِك شك؟
روحيه: طب يلا ننزل.
روحيه: هي شبطتت فيا قال ايه خالتو وحشاني.
صفاء: حبيبه خالتو دي.
مالك: عيله اوي.
نور: ملكش دعوه.
مالك: تصدقي اني جبت نسكويك امبارح و... يبنتي لسه مكملتش.
نور كَانِت جِريت على المطبخ عشان تعمل النسكويك، ومالك راح وراها عشان يغلس عليا كـ عادتهم.
صفاء: العيال دول لايقين على بعض اوي.
روحيه: عُبط زي بعض فعلاً.
صفاء:ياسلام لو يتجوزوا بعض بدل ماهما رافضين كُل الناس كده.
روحيه: فِكرِك كده؟
صفاء: مفيش غير كده.
نور: بلاش غلاسه بقى هات الشوكليت.
مالك: خلاص خُدي يقصيره.
نور: كمل النسكويك يلا.
مالك: اه نسيت اقولك ابو طويله قابلني وقالي انه جاي يتقدملك النهارده.
نور: يووووه ده رخم، هو جه بس اتقمص مني، كُل ده عشان عملتله قهوه بالملح.
مالك: يخربيت دماغك، اوعي تكوني حطيتي ملح في مجي؟
نور: لا انتَ حبيبي بتجبلي شوكليت وبتخرجني،اما هو بغل مُهزق.
صفاء: لولولولي، انا بقول يا ولاد نقرأ فاتحه!
نور بصت لمالك والاتنين وقعوا من كُتر الضحك.
نور: بتقولك نقرأ فاتحه، انا وانتَ؟ مش معقول لا.
مالك: الهزار بقى وقفشات خالتك.
روحيه: طب يلا يختي نروح قبل الدنيا متليل.
نور: حاضر يماما.
مالك: اصبري يخالتو هلبس الجاكيت واوصلكم.
نور: وتجبلي شوكليت تاني؟
مالك: واجبلك شوكليت تاني.
مالك نزل ووصلهم وجاب لنور شوكليت،كان بيتكلم هو وهي من على باب الشقه.
نور: مش هتدخل؟
مالك: لا هروح الحق الحلوه قبل ما تنام عشان اتعشى معاها.
نور بإستغراب: الحلوه؟ بتخبي عليا دلوقتي؟
مالك: بخبي عليكِ ايه يبنتي؟
نور: مين الحلوه؟
مالك: خالتك وبعدين انا ليا غير3حلوات؟
نور: والعه، ومين هما بقى.
مالك: اُمي وامك وانتِ.
نور بخجل: ماشي يا اخويا روح اتعشى.
تاني يوم في بيت مالك، امه كانت بتقطع الخُضار على الترابيزه.
مالك: بقولك يا سِت الكُل ما تيجي معايا نتفرج على فيلم عشان معايا تذكرتين للسينما و الواد عمار مسافر ومش هيعرف يجي معايا، فـَ ايه رأيك؟
صفاء شافتها فُرصه: يبني انا سِت كبيره على السينما وكده، بقولك ايه متاخد نور معاك.
مالك: لسه في عِز شبابك يعسل، وماله أخد نور معايا.
صفاء: بتحبها يـَ مالك؟
مالك فاهم دماغ مامته وقصدها: اه بحبها،بنت خالتي مش هحبها ليه؟
صفاء: بتحبها الحُب أياه؟
مالك: هقوم اكلمها وبليل نشوف موضوع الحب ده.
مالك خرج للبلكونه ورن على نور اللِ كانِت بتاكل.
نور: ايه يواد.
مالك: بقولك ايه تيجي نخرج؟
نور: وماله يخويا ميضرش، نروح فين؟
مالك: نور انتِ بتاكلي ايه؟
نور: مكرونه بشاميل.
مالك: من غيري؟
نور: خالتك عملاها حلوه اوي بجد، ماتيجي اتغدا وبعدين نمشي؟
مالك: هو انا واكل بس مكرونه خالتي محدش يقولها لا، بصي البسي البنطلون الموف والتيشرت الاسود والشنطه السوده، ماشي؟
نور: اشمعنى؟
مالك: اسمعي الكلام وانا هلبس واجي.
نور: ماشي لما نشوف اخرتها.
بعد نُص ساعه بالظبط كان مالك عند نور بيتغدى مع خالته،''اما الولاد دي سريعه اوي، دي نور بقالها في الطرحه ساعه..!''
مالك: ايه الحلاوه دي؟
نور: ايه الطعامه دي؟
مالك: ممكن امسك ايدك ونرووووح لبعيد؟
نور: بس يقليل الادب، خلصت طفح؟
مالك: اه خلصت طفح.
روحيه: بسم الله ماشاء الله مطقمين سوا كأنكم مخطوبين.
نور: والله هو اللِ قالي البسي كده معرفش عاوز ايه.
مالك: وماله يعني حتى لو مخطوبين.
نور ابتسمت لمجرد اتخيلت كلامه:يحلم بعيد.
مالك: ايه؟
نور استوعبت كلامها: ايه؟ احيه! بغني اه بغني.
مالك: ماشي، مش يلا ننزل؟
نور: اه يلا، سلام يماما.
مالك: سلام يخالتو.
روحيه: سلام يحبايبي.
في السينما كان شغال فيلم انجلش رومانتيك.
نور كانت بتاكل فشار وبتعيط ومالك عمال يضحك عليها.
مالك بصوت واطي: بتعيطي ليه؟
نور بصوت مقطع: عشان قالها بحبك.
مالك: بحبك.
نور: ايوه قالها كده.
مالك: لا انا بحبك انتِ.
نور: بس بقى بطل هزار.
مالك: مش بهزر والله.
نور: طب نتكلم في ده لما نروح.
مالك: ماشي.
لما الفيلم خلص كانت نور نامت بسبب عياطها وكانت نايمه على كِتف مالك وهي متطمنه وهو مفكرش يبعدها عنه.
مالك: نور، نور اصحى عشان نروح الفيلم خلص.
نور: انا كُنت نايمه على كتفك؟ متقولش!!!
مالك: يبنتي تعبتي من كتر عياطك ونمتي فيها ايه؟
نور: انا اسفه بجد!
مالك: متتأسفيش بطلي هبل ينور في ايه؟
نور: طب يلا نروح.
في بيت نور وروحيه قاعده مُبتسمه.
مالك: بس يخالتو فـَ حددي معاد واجي اخطبها.
نور: مالك! قول انك بتهزر او مثلاً انا في حلم.
مالك: انا بحبك من زمان والله، بس انتِ عاميه بقى، فـَ ايه قولتي ايه؟
روحيه: مفيهاش قول''وقامت مزغرطه كدهو''.
في الخطوبه.
نور: بقى انا احلم وحلمي يتحقق!
مالك: عشان حلمنا واحد.
نور: يعني انتَ بتحبني؟
مالك: لو مش بحبك مكنتش واقف قُصادك النهارده، سيبك انتِ ايه الحلاوه دي؟
نور ضحكت وبدات تكمل الاغنيه: ايه الطعامه دي؟
مالك: ممكن امسك ايدك ونروح لبعيد!
نور: المره دي انا موافقه جداً.
''ملقتش ونس للعمر احسن منك، ملقتش صديق وحبيب وقريب وسنين تتعاش غير وانا وياك💜🦉''
تعليقات
إرسال تعليق