: لا حول ولا قوة إلا بالله انا بردوا اللى غريب ؟
: مش كان بينا اتفاق
هزيت رأسي ب أيو
: حلو يبقي بترجع فيه ليه؟
:انا بردوا اللى برجع فيه!
:الله هوا كل ما اكلمك تقولى انا بردوا انا بردوا
: طيب معاكى للآخر كان إيه الاتفاق؟
:إن اللى يخسر دور الدومنه يعمل تيك توك
: الله ومين اللى خسر؟
: أنت تقصد تقول إنى أنا اللى خسرت ؟ لا دا أنت واحشك النكد بقا وشوقك جايبك
قربت منها حبه وهمستلها : هوا من ناحية شوقى جايبينى ف هو جايبنى وكافينى على وشى كمان
وشها أحمر ورجعت خطوه لورا
: لا انا قصدى جايبك للنكد مش إللى ف بالك
قربت خطوه كمان : وهوا إيه اللى ف بالى ؟
وشها عرق وصوتها وصلنى بالعافيه : يونس أهلنا برا
دخل أخوها ف زقتنى وجريت
حطيت إيدي ف جيبي وقولت بصوت عالى : مش هاتفلتى من التيك توك بردوا وضحكت
جه أحمد اخوها وهوا مادد كوباية شاي : انت ليك ف الهبل دا يا يونس
بصيت على طيفها ورديت عليه : ومين يبقي مع أختك ومايتهبلش
: ياسيدي ياسيدي واى كمان
ضحكت و خدت رشفه من كوباية الشاي : عارف يا أحمد انا طول عمرى بكره الشاي لكن لما لاقيتها كل مره بعد الغدا تقوم تعملها كوباية شاي استغربت حبها ليه ولما سألتها عن السر ضحكت وقالتلى انا كنت زيك كدا ماطيقش الشاي بس نقول إيه الست الوالده حبته ف عدتنى حُبه من يومها وانا اكتشفت إن الشاي دا أحلى مشروب ف الدنيا لأن ببساطه رحمه عدتنى حُبه وبينى وبينك غيرت من حبها ليه وبقيت بعد الغدا لازم اشرب كوباية شاي ..
: بقا رحمه أختى اللى كنت بلسعها كل قفا وقفا يطلع منها كل دا ؟
: يابنى اختك دى آه مجنونه بس جنونها هوا اللى محليها تعرف فى مره جات وقفت قدامى كدا ومدت بوزها شبرين وقالتلى ' انا ليه عمر دراعي مااتكسر ؟' قولتلها انتى عبيطه احمدى ربنا ربعت ايدها وقالتلى' أحمد اخويا دراعه اتكسر وهاجر صاحبتى دراعها اتكسر وانت دراعك اتكسر وانا لأ! ' بصتلها يومها كأنها بقره بتتكلم وقولتلها وانتى عايزاه يتكسر ليه ؟ قعدت جمبي وميلت رأسها على كتفي وردت : ' لأن دي امنية حياتى من وانا صغيره '
أحمد ضحك : مش بقولك هبله
رديت عليه : عارف بقا الأغرب إنها مدت إيدها وكانت مصممه انى اكسره وقال إيه انا كدا هاحققلها امنيه من امنياتها ولما ماوافقتش اعمل كدا نكدت وسابتنى ودخلت وقفلت الباب على نفسها
أحمد : كنت إكسره ياعم ولا تنكدها
: ما انا ف الآخر جبت جبيره وساند طبي ولفيتلها دراعها وخلتنى أوقع عليه وبقت بتتعامل كأنه مكسور فعلا
ضحكنا
وانا افتكرتها يومها قد إيه يومها اتبسطت لدرجة إنى انا كمان اتبسط بالهبل دا
لمحتها من بعيد وهيا واقفه تلاعب إبن اخوها " البلااليلالبللا أنت وحش اوى انت كخه البلااليلالبللا عمتو رحمه احلى منك البلااليلالبللا '
طفله بس منوره حياتى مش قادر اتخيل حياتى من غير لعبكتها دى كانت هاتبقي عامله ازاى انا بقيت لما بلاقي خفاش ف الشارع بعمل زيها وبوطى راسي وبمشي عكس ماهوا ماشي ! بقالنا سنه وأنا مش طمعان غير فى إنها تقولى بحبك ..
جيت من وراها وانا بشم ريحة الأكل كانت مشغوله ف طريقة تزيين طبق الرُز : رحمه
كانت مميله راسها بتحاول تظبط زاوية الطبق : اممم
: هوا انا قولتلك انى سايق الهبل؟
خلصت الطبق وحطته فى إيدي ومركزه ف لمساتها الأخيره فى لوحتها ورفعت عينها : آه ومعاك رخصه كمان يا عسل
: طيب وانتى مش ناويه تركبي ورايا بقا ؟
وشها غرقان ف دمه من كتر الكسوف : ااااااا
حطيت الطبق على جنب : قوليها بقا طلعتى روحى
: بعد الشر عليك
: طيب إيه ؟
رفعت كتافها : إيه ؟!!!
: لا دا انتى كدا هاتسوقي الهبل بجد
قربت عليا وأنا مستنى خلاص اهى هاتقول هاتقول ها ها خدت الطبق من ورايا وضحكت وهيا خارجه وقفت مكانى معقول لسه ماحبتنيش ! قلبت فى الطبق الفاضي اللى قدامى ..
دخلت نص رأسها : مابحبش غير اللى يونسنى واختفت
افتكرت لما بتقولى كل مره بعد قعدة صفا " أنت مونسني يايونس "
يونس هنا لأجل يُوّنِسْ رحمه...♥️
تعليقات
إرسال تعليق