_ تاني؟!!!
قولتها بزهول وانا ببصلها وبركز في وشها الأصفر وشفايفها الي بترتعش
_ هو ايه الي تاني! من فضلك هات شريط بنادول
_ انتي عارفة دي المرة الكام تاخدي شريط بنادول خلال التلت ايام الي فاتوا؟!
_ وانت مالك ؟ هاته وخلاص
_ هو انتي شيفاني ببيع بليلة!!!
شاورتلها على البالطو الي كنت لابسه
_ بالطو دا ولا يونيفورم تانية اعدادي!
_ بقولك ايه يا دكتور .. انا داخلة عارفة انا عاوزة ايه هتجيب طلبي ولا أجيب من اي صيدلية تانية
_ لا من عندنا ولا من عند اي حد تاني
_ تمام .. متشكرة خالص
_ رايحة فين
_ وانت مالك!!!
قالتها بعصبية وخرجت
_ الو يا دكتور آسر تمام يحبيب اخوك، اسمعني .. في بنت كدا .. لا مش الجو .. البنت دي .. لا يا آسر مش هي .. اسمع بقا .. البنت د.... هتشاقى مع مين يا ابني انا اعرف اسمها حتى!! ... آسر البنت دي هتيجي تطلب منك بنادول .. متديهاش .. كدا هفهمك بعدين
قفلت السكة معاه ورنيت على باقي الدكاترة الي في الصيدليات حوالينا، لمحتها جاية من بعيد ووقفت برا الصيدلية ابتسمتلها وانا بحط ايدي في جيوب البالطو
_ ايه! ملقتيش؟!
قربت مني وهي بضيق عنيها
_ انت الي مخلتش حد يبعهولي هه
_ انا!!!! وانا هعمل كدا ليه يعني
_ عشان انت انسان حشري وبتدخل في الي ملكش فيه
_ أنا!!!!! أنا حشري!!! دا أنا جميل خالص
ابتسمت وانا بقرب منها وبسند بكتفي على جدار الصيدلية
_ مقولتليش بقا، هو انتي بتاخدي بنادول كتير كدا ليه؟!!
_ وانت مالك انت!! انت مالك ؟
_ لا دا شغلي معلش
_ هم في صيدلة بيعلموكوا تشيلوا مناخيركوا من وشكوا وتحطوها في حياة الناس ؟!
_ لا علمتنا ان مضاعفات المسكنات خطر
_ طب انا عندي حل جميل
_ اممم
_ خليك في حالك عشان الدنيا تمشي
_ طب ما انا عندي حل أجمل، قوليلي ايه الي مخليكي تاخدي البنادول الكتير دا وهساعدك
_ والله الي جابك تدرب عندنا دا جنى عليك وعلينا كلنا
سابتني ومشيت بعد ما فضلت مبتسم زي الهبل
بعد الموقف دا تقريباً بقيت مراقبها، عرفت اسمها من أم حبيبة الي فاتحة مكتبة جمب الصيدلية وعرفت انها في تجارة، خدت بالي من انها ملهاش معارف كتير ولا صحاب لأن كل خروجاتها تقريباً لوحدها
_ صباح الخير
_ صباح ال....
ابتسمت اما شوفتها واقفة قدامي
_ صباح الفل
_ هات...
_ بنادول؟!
_ لأ .. هات
_ اكسترا؟!
_ لأ .. د...
_ يبقي بروفين
_ دوڤ .. كريم دوڤ
رفعت حاجبي للحظة
_ ايه ؟ غريبة؟!
_ يعني .. أصلك يا اما مسكن للصداع يا اما جاية تشتمي التنسيق الي دخلني صيدلة
ضحكت وبصتلي للحظة
_ لا انهردا هناخد بريك
_ طيب .. حلو
سكتنا احنا الاتنين، كنت عاوز اعرف ايه الكلام الي عاوز اقوله بس مش عارفه وهي ساكتة مش عارفة تقول ايه
اتنحنحت
_الكريم
_ اه اه .. تمام .. معلش اصل .. اصل مش متعود على ..
_ ايوه ايوه
كنا متوترين انا وهي، طلعت الكريم وحطيته قدامها
_ اتفضلي
_ شكراً
كانت لسه هتمشي
_ آنسة عايدة
_ امم
_ الصلاحية
_ الصلاحية!!!
_ احم .. ايوه مهو ...
_ انت عرفت اسمي منين
_ انا!!! وهو انا هعرف اسمك منين يا آنسة عايدة
_ اه فعلاً
قريت الصلاحية وابتسمت
_ لا لسه
ضحكت وخرجت
_ ايه يا يونس!! بتضحك زي العبط كدا ليه
_ انت هنا من امتا
_ من ساعة صلاحية الكريم يا حنين
دخل وشد الكرسي بصلي وهو بيغمز رفعت حاجبي وسألته
_ ايه؟!!
_ ايه انت؟!
_ مفيش حاجة
مشيت شوية وانا بحاول ابعد عيني عنه
_ مالك بـ عايدة يا نجم ؟
_ عايدة !! كدا حاف ؟
_ بنت بلدي يعم .. الدور والباقي عالدكتور الوسيم الي لافت نظر بنات المنطقة كلهم
_ آسر!! .. اعملك قهوة
سند على المكتب الي كان عليه الكوفي ماشين
_ وتسأل عليها وتطلع الساعة تمانية تشوفها وهي خارجة .. متقول انك وقعت
_ لا خالص .. فضول بس مش أكتر
ضيقت عيني وبصتله
_ الا قولي صحيح .. ايه حكايتها
_ فضول بردو ؟
ناولته القهوة وبصيت بعيد
_ طيب طيب هحكي .. بص يا سيدي .. هي كانت بتحب واحد زميلها من ايام ثانوي وبعديها دخلوا نفس الكلية وارتبطوا واتخطبوا بس بعديها الواد طلع بتاع بنات وملوش آمان ابوها شافه مع واحدة من الحتة بردو في كافية و جه فض الحوار كله
_ ااااه .. عشان كدا كانت بتيجي تاخد مهدئات ومسكنات طول الفترة الي فاتت
_ دي حاولت تنتحر أساساً
_ تنتحر!
_ ايوه .. بس لحقوها وبعدين انت جيت في الوقت الي بدأ الحوار يهدا وتاخد مسكنات
شربت القهوة وانا عيني على الباب وبفكر فيها
_ الدكتور جه عشان يركبلك الكالونا يا عايدة
رفعت عنيها ناحيتي وابتسمت وانا بميل وبركبها بهدوء
_ مكتوب عليك تشوفني دايماً وانا في أنفاسي الآخيرة كدا
_ قومي بس انتي بالسلامة وهجبلك كرتونة بنادول تتسلي بيها قدام الفيلم
ضحكت وقومت بعد ما ركبتها
_ بالمناسبة في تشكيلة كريمات نازلة .. لو فضيتي عدي عالصيدلية شوفيها
قولتها ورحت ناحية الباب
_ دكتور يونس
_ نعم
ابتسمت _ شكراً
_ انت متأكد أنه فضول ؟!
_ اه يا عم فضول خلصنا يا آسر
_ ووشك الي اتقلب اما عرفت انه هيتقدملها عريس دا ؟
_ ماله وشي .. مهو عادي اهو
_ لا مش عادي وانت فاهم انه مش عادي
بصيت ناحيته لدقيقة وانا بفكر
_ يطلع مين دا ؟! وهي وافقت ولا لسه
_ قولتلك المهندس الي ساكن في العمارة الي قصادها وهي لسه محدش يعرف قرارها
كنت لسه هتكلم قبل ما ألمحها داخلة الصيدلية، سكتنا انا وهي وآسر فضل واقف وسطنا
_ طـ..طيب انا هستأذن عشان سايب الصيدلية و...
واتحرك من المكان، قربت وعنيها لسه في عنيا
_ عاوزة شريط بنادول
كنت متعصب ودمي بيغلي، بعدت عيني لحظة وروحت جبت شريط وحطيته بعصبية قدامها
_ ايه! التوتر مخليكي مصدعة وتعبانة؟!!
_ نعم!!
_ لا ابداً .. ولا حاجة
شالت الشريط وقربت من الباب
_ هو انتي وافقتي عليه ؟
التفتتلي وهي لسه ساكتة
_ لأ
سكتنا احنا الاتنين ثواني قبل ما تحط اديها على مقبض الباب عشان تخرج
_ عريس
_ تاني يا ماما!!!
_ المرادي دكتور صيدلي و...
_ يا ماما قولتلك لا و ... ايه دا ايه؟!! .. قولتي دكتور ايه ؟
_ صيدلي
كنت قاعد في الصالة ضامم رجلي ومبتسم ناحية والدها الي كان مستلطفني في نفس اللحظة الي دخلت فيها وقعدت في الكرسي الي جمبي
قرينا الفاتحة وانا بحاول أسرق نظرات ناحيتها لحد مقولنا كلنا في نفس الثانية " آمين "
_ مبروك
_ الله يبارك فيك
كان والدها سابنا نقعد نتكلم مع بعض في صالون شقتهم
_ مالك مخضوضة كدا ليه؟
_ ابداً .. اصلي مش مصدقة انك رجعت وانك قاعد هنا دلوقت
_ الصيدلية وحشة من غيري مش كدا
_ لا .. الدكتور رخم أوي
_ عملك ايه
_ بيديني الكريم من غير ما يقرالي مدة الصلاحية
ضحكت وانا برجع شعري لورا
_ تلاقيه كان غايب في المحاضرة دي
فاتت بعديها كام سنة، كنت قاعد جمب حسن ابني
_ يلا يا حسن اربعة في تلاتة بكام
_ خمستاشر
_ يا ابني بقا حرام عليك هو انت الأرقام كلها عندك رقم خمستاشر!!!!
قربت مننا وهي بتحط العصير بتاعه والقهوة بتاعتي، بصتلها وهي بتسند كفها على بطنها وبتبص لحسن بفخر
_ شاطر مش كدا
_ دا !! دا الي هيعديه من تالتة ابتدائي هيظلمه
حضنته وهي بتملس على شعره
_ لا طبعاً مفيش الكلام دا .. قول لبابي تلاتة في تلاتة بكام يا حسن
_ خمستاشر
_ بردو!!!
_ قومي يا عايدة هاتيلي شريط البنادول
تعليقات
إرسال تعليق