|احدى الكافيهات _ منتصف اليوم |
صحيت من النوم عندي حاله من التمرد
التمرد على كل شيء .. حياتي ومشاعري
وشغلي .. متمرده عليا انا شخصيا
كنت حاسه ان انا مش قادره انقذ نفسي زي
العاده من الحاله دي حتى فنجان القهوه
منصفنيش .. كنت حاسه ان وحيده وحيده
للغايه .. مشاعري متلخطبه ..هلكاني مش قادره
احددها .. كل الي عوزاه ان ابقى لوحدي تماما
قفلت التليفون ..وفتحت الراديو على تراك هادي
مكنتش مركزه في كلماته على قد اللحانه
طلعت فستان اسود .. وسبب حالة التمرد
اخترت روج احمر .. بصيت على نفسي
كنت حاسه ان شخص غريب ..مش انا !
هزيت كتافي وخدت شنطتي ونزلت
خطوه في التانيه وصلت لاقرب كافيه لـ بيتي
عشان لو مقدرتش اواجهه العالم اكتر من كده
اقدر انسحب بسرعه وارجع للعالم بتاعي .
=قهوه مظبوط ..مع كيك بشوكلاته مش كده .
بصيت للويتر الي حفظ طلبي من كتر ما باجي هنا
-عاوزه قهوه ساده بعد اذنك .
كنت رافضه اي شيء يحلي حياتي دلوقتي حتى لو كانت قهوه .. كنت حاسه ان منتهيه من كل شيء
بهرب من الناس ..من المسؤوليه ...
الحقيقه ان انا بهرب مني !!
غمضت عيوني مع نفس بارد زي قلبي تمام
عمري ما حسيت ان قلبي دافي عمري ما قدرت اطبطب على قلبي وقوله انك بخير ..لانه عمره ما
كان بخير فتحت عيوني مع صوت محمد سعيد
|رغم الوجع لساك بخير
طمنت روحك باللقا
رغم الوداع من غير رحيل
حالف تغيب بعد الفراق|
بصيت للويتر الي حط فنجان القهوه مع جواب صغير الحقيقه عرفت انه منك من ريحة برفانك
الي مغراقه .. وكأنك بتتحداني ان قلبي ميعرفهاش
فتحت الرساله وكانت قصيده لـ عمرو حسن
|جوابي ده الأخير ليكي
يامعاليكي
ياست الحسن
ياسبب الحزن والعلة
ياشجرة حسبتها ضله وطلعت نار
بداية القول : مساء الخير علي الأزهار على خدودك
مابنجرّحش
ومابنسمحش حد يقول كلام عنك
لذلك ثم أما بعد ،
أنا الطفل اللي كان ف عنيكي متشعبط
يشوفك روحه تتلخبط |
محاولات فاشله ان اخبي ابتسامتي ..مش هنكر اعجابي للقصايد الي بتختراها ليا .. لوصفي الدقيق في القصيده دي بذات .
سحبت الكرسي بهدوء وشاركتني جلستي مع القهوه
كنت عارفه انك هنا من ساعة اما دخلت .. من نظرتك الي كانت متباعني ولا ... الحقيقه انا مش عارفه
انا جيت هنا عشان هو اقرب كافيه لـ بيتي فعلا
ولا عشان كنت عارفه ان هلقيك هنا !!
كنت لسه هتتكلم بس انا سبقك قبل اما
اضعف قدام عيونك وابسامتك .. وقلبي يميل .
-متحبنيش .
قولتها بكل تمرد وقوه ... وانا بصالك بثقه
وباخد اول بق من قهوتي .. وانا ببص على الروج الي طبع في الفنجان .. في العاده كنت همسحه
بس دلوقتي لا .
=الحب مالوش سلطان .. انا اسف ان هكسر قواعدك
بس ملكيش امر عليه المرادي .
- حبك ليا مش هينولك فيه غير الاذى ، مافيش حاجه في قلبي اقدر اقدمهالك .. ولاحب ولا دافى .
كنت عاوزه اقوله شخص مش قادر يحب نفسه
هيقدملك حب ازاي .. شخص عنده فوبيا من العلاقات ... هيقدر يواجه خوفه ازاي .
بصلي رجع ضهره وسند على الكرسي وابتسم بكل ثقه زي عادته .
= بس متنكريش ان بقى ليا جزء في قلبك
بيحسسك بالدفى في بعض الاوقات
خدت بق تاني بهدوء هعترف اكيد لا
-انت راجل جميل ورقيق ... ولو مع ست غيري
قلبها هيميل في ثواني ... خلينا صحاب .
ظهر عمرو حسن قبل اما يرد المرادي وكأنه بياكد على كلامي .
|خلينا أصحاب شايفاك انسان طيب حسّاس
راجل ورقيق تنفع كصديق لكن كحبيب
عمري ما فكرت تستاهل أحسن مني كثير |
- بتحبه صح ؟ .. من رايي تسمع كلامه .
= بس انا مش عاوز الاحسن .
مش عارفه ارد .. لاول مره هكون شخص مؤذي
في حيات حد .. مش هقدر ف الحل هو الهروب
-انا اسفه .
|وبحبك جدا صدقني وجوايا حاجات
بس احنا إخوات |
سبته وسبت فنجان قهوتي وقلبي المتمرد عليا
وهيحبه .. او حبه !! مش عارفه او مش فاهمه مشاعري يمكن مش قد فكره تحمل مسؤوليه
شخص غيري ومشاعر تانيه .. وانا بهرب مني
ومن مشاعري الي هلكاني .
فتحت تليفوني واول رساله منه .
=منتهتش الحكايه بتبتدي .
ضحكت ومشيت هببقى في حكايه ؟
يعني هقدر اسلم قلبي ؟!
طب هفتح كفوفي ليه ولا هيكسرني زي الباقي
بصيت للسما الدنيا مطرت بدات اضحك زي الطفله
ونسيت همومي وتفكيري لو حتى لثواني .
________
اليوم كان هادي وبدا يجي الليل
بدات فترة احزاني بدا قلبي يهلكني ..
بدات الحيره والأسئلة الي ملهاش أجابه
بدا قلبي يحنلك ..بدات افكر فيك
مابين ان اديك فرصه ولا ابعد واهرب بـ قلبي
طول عمري بجازف عمري ما خوفت اخد خطوه
طول ما الخطوه دي بعيده عن قلبي .. مش سهل
ابدا ان اسلملك قلبي بدون ضامن .
بس السؤال هنا من امتى والقلوب ليها ضمان؟!
دخلت من البلكونه وسبت هواها يدخل الشقه
نسمه الهوا الساقعه الي يتسبب الرعشه لجسمي
فتحت الراديو وظهرت فيروز الي قررت تشاركني
ليلة البارده .. والحزينه للغايه .
|شو كانت حلوه الليالي والهوى يبقى ناطرنا |
ابتسمت ودخلت المطبخ طلعت المكونات وبدات اعمل الكيكه .. افتكرت انك قولتلي قبل كده
انك بتحب الكيكه فـ ابتسمت وبدا اعملها
بحب اكتر وكأني بعترف بعمايلها ب حبي ليك
.. مجرد ما الفرن اشتغل البيت بقى دافى ..
زي قلبي تمام لما يفتكرك .
طلعت الكيكه مع كوبايه نسكافيه ودخلت البلكونه
وانا لسه بدندن مع فيروز .. كان معاك حق لما قولت
هروبي منك .. معناها ان هفكر اكتر .. ان قلبي هيتعلق بيك اكتر .. معنى كده ان لو واجهة مشاعري
هبطل احبك ؟
ولا ابطل افكر ؟ .. اظن ان ده سبب تاني ان افضل اهرب .. انا مكتفيه بالشوية المشاعر الي ليك في قلبي .. مكتفيه ب ابتسامتي الهاديه الي بتظهر لما
بفكر فيك ... مكتفيه بالدفى الي بحسه في قلبي
بسببك انت .. انت وبس .
مسكت التليفون وقررت اسالك .. مش هفضل
لوحدي في الحيره دي ..
-مش خايف لو واجهة مشاعري ابطل احبك !.
=ده معناها انك بتحبيني .
بيركز في الكلمه .. في الحرف عشان يعكسه لصالحه .
-انا بحط احتمالات .
=وليه افرض الوحش .. مش يمكن لما تواجهي مشاعرك تقتنعي انك بتحبيني وتبدا الحكايه .
- وايه الي مخليك واثق ان بحبك .. ايه دليلك .
= حيرتك .. وانك سايبه الباب مفتوح ... ف ايدك تختفي وفي ايدك انك تبعديني عنك ... انتي خايفه
ومش مدياني حتى فرصه اطمنك .
خدت نفس حاسه ان هلكانه بعافر في طريق
مش عارفه هو ايه ولا نهايته ايه ... بيجي في عقلي حاليا كل الأسئلة الكونيه .. ف اخترت سؤال غريب معرفش قولته ليه ...
-بتحب اسكندريه .
=جدا .. تيجي نروح نقعد على البحر هناك يمكن تلاقي اجابه للي محيرك .
سبت التليفون وبصيت لسما اذا كان انا مش عارفه ايه الي محيرني .. يبقى هلاقي اجابه ازاي .
صحيت الصبح لبست فستان خفيف مينفعش في الجو ده اطلاقا .. بس كان محسسني ان جميله
وان ينفع يكون ليا حكايه .
جهزت شنطه صغيره فيها روايه ، نوت بوك ، وهاند فري وجبت الماج بتاعي حطيت فيه نسكافيه
ونزلت وانا حاسه ان قلبي خفيف زي الفراشه
وقفت مكاني قدام البيت لما شوفته واقف وساند على عربيته ..لابس البلوفر الاسود الي بحبه
اول اما شافني وقف وابتسم ..فـ قلبي دق .
= كنت عارف انك هتمشي لوحدك .
-واقف هنا من امتى .
=مش مهم .
-اومال ايه المهم .
=ان لقيتك .
اتنهدت وانا فضلت بصاله ليه غاوي تتعب قلبك
مع شخص زيي .. ازاي عندك الشجاعه انك تجازف
ب قلبك ناحية المجهول .. وانت مش عارف اذا
كان الي جاي هيرضي قلبك ..ولا هيزيده وجع.
فتحلي الباب بكل شياكه ف ركبت وانا عامله نفسي مضطره .. بس الحقيقه قلبي كان فرحان ان لاول مره هيكون ليا شريك في رحله .
=نسكافيه ده .
-بتاعي .
=تقصدي كان .
بصتله ب استغراب لما اشتغلت اغنيه فرنسيه انا بحبها .. الحقيقه كنت فاكره أن عمرو حسن هيكون
االطرف التالت بينا زي العاده ... بس
=عارف انك بتحبي الاغاني الفرنسيه .. قررت اشاركك فيها زي ما بتشركيني عمرو حسن .
هزيت راسي وفتحت الشباك طلعت ايدي وبدات اغنيه معاها وكأني في عالم تاني .. عالم هادي وجميل ... عالم قلبي فيه هادي مش داخل سباق
مع الدنيا .
وصلنا اسكندريه وقعدنا على البحر طلعت النوت
وبدات اسجل تفاصيل اليوم قبل اما انسى .
=هتكتبي عني .
- تخيل .. مينفعش بطل اليوم انهارده ميتكتبش عنه .
= كتبتي عني قبل كده .
-تفتكر انت كتبت .
هز كتافه وبصلي وابتسم لقيتني تلقائيا ببتسم زيه
=انتي عارفه انا امتى حسيت ان بحبك .
-امتى .
=لما لقيتني بضحك تلقائيا لما بشوف ضحكتك
زي مانتي عملتي كده دلوقتي .
ماهو انا برضو مكنتش ينفع اضحك زي الهبله كدا .
قام وجاب كابتشينو لينا احنا مسكت الكوبايه بدات احس بدفى في ايدي
= سمعتي اغنيه امير عيد الجديده .
-لا .
طلع التليفون وشغل الاغنيه ابتسمت لما حسيت قد ايه الاغنيه بتوصفنا ..بتوصف كل حاجه غريبه بينا
|رحت هنا و هناك على امل حد يمسحلي الماضى قلبى مش راضى |
=مش ناويه تحبيني يا ورد .
- عاوزه الصراحه .
=اكيد .
-قلبي مال ودق .. بس مش قادر يطمن ولا قادر يبعد
حاسه اننا قريبن بس بينا مليون خطوه .
= كل اما بقرب بحسك بتبعدي اكتر .. وبتكوني قاصده البعد .
- خايفه اكون شخص مؤذي .. خايفه اذي قلبك
الي بكل لطف حسسني قد ايه ان اتحب في وقت
انا مش قادره احب نفسي .
|على طول تايه عمري ما اديتني اجابة
دايماً خايف خايف من خطوتها الاجاية
علي طول غامض حاولت اقول الي جوايا |
=ايه رايك نعيش اليوم ب يومه .. ندي فرصه لينا
ولـ قلوبنا .
- طب وبكره هبطل افكر فيه إزاي .
=لما بجي بكره نفكر سوا .
- ولو جه بكره ومكنتش هنا .
=انا هفضل ديما هنا .
ميلت براسي على كتفه وانابرمي حمول الدنيا والتفكير والتعب ورا ضهري .. هيحصل ايه لو سبتني افرح ..لو انا بطلت تفكير .
=ندي لنفسنا فرصه ؟.
ابتسمت - و لقلوبنا كمان .
|دايماً خايف خايف الوقت يخونى فى ثانية
فى وسط حفلة مايلة علي كتفى
خايف اتحرك تهرب منى|
تعليقات
إرسال تعليق