هو مش المفروض انك يعني تحبيني؟!
بصيتله واللقمه وقعت من ايدي وقولت بصراخ _ احبك؟! يعني اي احبك اختشي على دمك يا قلليل الحيا عاوزني احبك؟!
قرب مني واتكلم بهدوء _ايوه فيها أي دانا يابنتي جوزك برضو .
بعدت عنه بسرعه وقولت بصراخ _ وهو عشان جوزي يبقا احبك اي قلة الأدب دي دانا ابويا لو عرف الكلام ده عن الحب والحاجات القليلة الادب دي ده كان طخني عيارين.
لقيته بصلي بسخريه وحاول يعاملني معاملة الأطفال وقال بابتسامه بسيطه على وشه وبهمس _ مااحنا مش هنقوله.
قولت باستغراب _ مش هنقوله اي؟!
قال ببساطه _انك هتحبيني.
بصيتله باستغراب _ وده ينفع ومش حرام؟!
جز علي أسنانه _ لا حول ولا قوة الا بالله.
قولتله بعفويه _ في اي؟
_ هو انتي مين؟
_ انا مراتك ايمان.
قال بهدوء وابتسامه مغصوبه _ طيب ياايمان يا مراتي انا جوزك واتجوزنا قدام ابوكي وعيلتك كلها ، وليكي عليا حقوق وليا عليكي حقوق و لازم ننفذها عشان نعيش مع بعض كويس واول الحقوق انك تقعي في حبي وده مش حرام خالص ده اللي أمرنا بيه ربنا.
اتكلمت بعفويه _ يعني ذي مانا لاذم اقع في حبك انت لاذم تقع في حبي .
اتكلم بابتسامه لطيفه بينت غمازاته وغمزلي بعنيه وقال _ مانا شكلي وقعت في حبك والله..
بعدت عنه وقولت بصراخ _ ياقليل الربايه بتغمزلي كماااان ، دانا هروح اقول لابويا تعالي شوف الراجل اللي مجوزهولي عاوزني احبه ويالهوي بيغمزلي اي.. اي.. ان انت بتقرب لي أقف عندك يامحمد
جريت على اوضتي وقفلت الباب قربت ناحية المرايه لقيت خدودي حمرت حطيت ايدي على قلبي كان لسه بيدق جامد ، كان في رعشة في قلبي ، شعور غرييب بس حلو ولذيذ.
غريب عني ولا يقربلي ولا اقربله بس كان مهندس جاي بلدنا شافني في البلد وخطفت قلبه ذي ما بيقول، منكرش انه هو اللي خطف قلبي بس انا مروحش اقول ابدااا، متربيه تربيه امي نجاة الغلبانه اللي طول عمرها فاكره ان عيب نتكلم عن الحب قدام حد لا يفتكروا تربيتنا ناقصه ولا حاجه وتربية ابويا اللي دايما بيقولنا ان الحب ضعف واول ما الشخص يعرف انك بتحبه هيسيبك!!
_ ايوه يعني هتحبيني امتى دانا خللت جمبك؟!
ضحكت _ وهو اني احبك بالساهل كده؟!
بصلي بللهفه _ قولي اللي عوزاه طالما هتحبيني.
قولت بللهفة طفله _ هاتلى علبة كيكة هوهوز وكرتونة شيبسي بالجبنه المتبله.
بصلي بسرعه _ حاجه كمان؟!
رفعت حاجبي وابتسمت _ لما افكر الأول..
نزل من البيت وراح يجبلي الحاجات اللي طلبتها منه، فرحته كانت فرحة طفل صغير بتتحديه بحاجه وانه لو عملها هيكسب ويفوز.
حطهم قدامي وبللهفه قال _ ها يا ستي حلوين كده؟!
كنت حاشيه بوقي اكل وقولت _ دول يهبلوا.
لقيته ضحك بحب وقال _ خلصيهم بقاا واجبلك تاني.
سكت شويه وبعدين بصلي بلطف وقال
_ ها فكرتي اي الحاجه التانيه اللي هتطلبيها؟!
_ بتحسسني انك في تحدي وعاوز تفوز بحاجه.
_ وهو حبك مش فوز ومكسب؟!
كنت بصاله بصمت بس كمل وقال _ حبك ليا اكبر مكسب.
رفعت حاجبي _ ولو خسرت؟!
ابتسم بلطف _ مش ههون عليكي تخسريني..
سابني ومشي بعد ما بعتر مشاعري، بعد ما خلاني معرفتش اتكلم ولا ارد، فعلا انا مش هعرف اخسره ومش هيهون بس مافيش للعبه من غير عقباات..
_تعملي مكياج ويطلع حلو عشان رايحين فرح ولد عمك ولاذم اطلع حلوه ولو المكياج مطلعش حلو ... هتخسر..
لقيته نط من على السرير وبصلي بغيظ وبعدين دخل الحمام يغسل وشه وطلع برا قعد على موبايله معرفش بيعمل اي بس زعلت لما حسيته استسلم طب مش كنت عملتله اختبار أسهل والله انا مني لله!!!! ..
كنت قاعده بقرا روايه لما لقيته بيقولي.
_ قومي يلا اعملك المكياج.
اتفاجأت _ وهتعرف؟!
ضحك وغمزلي _ ما تجربيني؟!
_ اي يا ايمااان القمر ده الميكاب شكله يجنن.
ضحكت بفرحه بعد ما بصيتله ولقيته مبتسم وغمازاته باينه حبيت ابتسامته وحبيت غمازاته وحبيته هو والله!!
عملي المكياج بكل حب اتفاجأت اول ما خلصلي بشكلي اللي كان ذي القمر لما قالي _ طب ماهو مش هينفع امشي معاكي وانتي ذي القمر كده والناس تشوفك .
بصيتله بلطف ورفعت حاجبي وقولت _ والأستاذ بيغير ولا اي؟!
ضحك وقال _ الاستاز بيغير جوي جوي جوي.
لفت انتباهي وانا واقفه بنت جات وقفت جمبه بطريقه غريبه والاغرب انه ضحكلها، بيضحكلهاااااااا؟؟!
قربت منهم وانا قلبي جواه نار قايده ومسكت ايده حطيتها في أيدي وابتسمت وقربت منه وهمستله في ودنه _ هي الانسه زغزغتك ولا اي ياحبيبي عشان تضحك اوي كده؟!
لقيته بصلي ورفع حاجبه وبعدين ابتسم وشاور على قلبي وقال _ هنا في نار؟!
رديت عليه وانا بجز على اسناني وقولت _ هنا في نار وهتحرقك فيها ياحبيبي.
_طب بينا نروح البيت نتحرق سواا.
شخص لطيف، حنين عليا ، بيحاول يفرحني، و يبسطني وأهم حاجه بيحبني..
_ اعملك اي تشربه.
_ قهوه ياام الغوالي..
_ بيئه اوي.
ضحك _ مش عشان اتعلمتيلنا كلمتين مصري هتيجي عليا لا ارجعي اتكلمي صعيدي تاني يابت انا كنت بحبك بالصعيدي.
وقفت مكاني وبصتله بتحذير _ ودلوقتي مبتحبنيش؟!
رفع حاجبه وابتسم وقرب مني ودار حوليا وقال شعر بطريقه خطفت قلبي خطف _ ومتى كان للقلب رأي للتوقف عن حبكي الا تعلمين ان بتوقفه عن حبكي يعني ان توقف القلب تماما اي بمماتي.
قربت منه بدموع _ بعد الشر عليك.
قالي بللهفه _ يعني حبتيني؟!
قولت باستهبال _ ماذا يعني الحب.
لقيته ضحك وقال _ الحب يعني ايمان.
بيعرف يقول كلام حلو يوقع الواحد ليه ، وانا جاهله في الكلام وبالذات الحب خصوصا.
عملتله كوباية شاي بالنعناع معايا، عارفه انه مبيحبش الشاي وبيحب القهوه بس انا بحب الشاي وبحب اعمله للناس اللي بحبها ذي مايكون بعبرلهم عن حبي ليهم..
_اتفضل.
اتكلم _ايمان انا مبحبش الشاي بحب القهوه.
مسكت كوبايتي ورفعتها عشان اشرب منها وانا بقول _ طب ما تحاول تحبه؟!
_انتي بتحبيه؟!
اتكلمت بعفويه _ جدددا الشاي بالنعناع ده لطيف جدااا.
ابتسم _ بقدر لطفك؟!
ضحكت _ يمكن اكتر.
رد بابتسامه وهو بيرفع الكوبايه يشرب منها لما قال _ يبقى هحبه.
لقيته سكت شويه وبعدين قال _ بس بشرط.
حطيت الكوبايه على الصينيه وقولت بهدوء _ امم هو اي بقاا؟!
_ انك تحبيني؟!
قومت بابتسامه وقعدت جمبه على الكنبه ومديت ايدي اخد الكوبايه منه وانا بقول _ وكيف تقول لقلبي ان يحبك وهو بالأساس يعشقك أليس تلك كلمة قليله على عشقه لك؟!
لقيته قام بسرعه وقال بفرحه وهو ماسك ايدي _ يعني اي؟!
_ يعني وقعت في حبك يا بو الغوالي..
دق قلب عاشق فلا مفر ❤️
تعليقات
إرسال تعليق