{ وَ تَحْسَبُونَهُ هَيِّناً وَهُوَ عِنْدَ اللَّهِ عَظِيمٌ }
🌚💚💚💚.
_ ياله يا فهودي هتتأخر على المدرسه، وبابي هيمشي و هيسيبك.
~ حاضر يا مامي، جاي اهو.
_ خد يا حبيبي حط السندوتشات في الشنطه و خد جراب النضاره، علشان لما تلعب تشيلها علشان متتعورش
اتفقنا!
~ اتفقنا يا مامي.
_ ياله فين بوسه وحضن مامي.
= مش ياله يا فهد بقا.
~ ياله يا بابي
سلام يا مامي، مش هتأخر عليكِ، متقلقيش.
_ في رعايه الله يا حبيبي
و متنساش تاكل السندوتشات
و متنساش الدعاء قبل الاكل
و الصلاه يا فهودي
اوعى تنسى الصلاه في المسجد يا حبيبي ماشي.
~ ماشي يا مامي، سلام.
_______________🤎
~ مامي انا جيت، أنتِ فين ؟
_ انا في المطبخ يا حبيبي، تعالى.
~ فاضيه يا مامي؟
_ أفضالك يا حبيبي
اللّٰه!
هو انا عندي كام فهد يعني
ياله قولي عملت ايه في المدرسه؟
~ ه.هو انا ينفع مروحش تاني
اصلي هيا وحشه اوي.
_ ليه كدا بس يا فهودي
ايه اللي حصل؟
~ يا مامي مش عايز اروح تاني
علشان مفيش حد هناك بيحبني
و كلو عندوا اصحاب و انا لأ
هو انا وِحِش يا ماما؟
_ لا طبعا يا قلب ماما
إنتَ اجمل حد في عيوني و هتفضل كدا دايما
و بعدين دا إنتَ لسه في أول سنه ليك
و الصحاب مش بالساهل كدا
يعني محتاجين وقت علشان تعمل صحاب كتييير اوووي.
~ يعني لو قعدت في المدرسه وقت كتير
هيبقى عندي صحاب كتير؟!!
_ اكيد إن شاء الله يا قلب ماما
و ياله روح اغسل إيدك
وغير هِدومك و تعالى علشان تساعد ماما.
~ حاضر يا مامي.
" بتنهيده كبيره "
خايفه، خايفه عليك يا قلب ماما من اللي هتشوفه في المجتمع
للأسف عايشين في مجتمع مُش سوي
و هتتظلم فيه يا حبيبي
حقيقي ربنا يقويك، و تقدر تقف قدام المستقبل المجهول اللي بدايته مُش مُبشِّره بالمره.
_________________🤎
_ يا حبيبي ركز شويه.
~ يا مامي تعبت و البتاع دا صعب.
_ يا قلب مامي تعبتني بجد
ركز يا حبيبي شويه.
" بعيون مدمعه "
~ ه.هو انا فاشل يا مامي، علشان كدا مش عارف افهم و احل؟!
" بابتسامه حنونه "
_ لا طبعا يا قلب مامي
دا فهودي، اشطر كتكوت صغنتوت و هيبقى اشطر حد.
~ ب.بس معلمتي بتقول لي إني فاشل و صحابي اشطر مني و اني مُش هنجح ابدا.
_ إنتَ بتثق في مين يا حبيبي
مامي ولا معلمتك؟!
" بكل تلقائيه "
~ اكيد، أنتِ يا مامي طبعا.
_ طب و مامي بتقول، إن فهد اشطر كتكوت و هيطلع من الاوائل كمان و هنروح و نجيب هديه للمعلمه بتاعتك كمان، و نقولها إن فهودي اشطر حد اصلا.
" بكل حماس و بدأ بالتسفيق ب إيده "
~ ههه، ايوا طبعا علشان فهود شاطر و هيطلع من الاوائل.
= علشان كدا
جبتلك نوتيلا علشان بتحبها.
" بفرحه طفل برئ "
~ ههه، إنتَ احلا بابي في الدنيا كلها.
" بتكشيره طفوليه "
_ إيه دا و أنا يا سي أدهم!!!
= ههههه، عايش مع طفلين ياربي
خدي يا ستِ المصاصه اللي بتحبيها يا تافه.
" بغضب "
_ و مش جايب لي نوتيلا!!
= ههههه، متقلبيش وشك كدا
حطيتها ليكِ في التلاجه يا ستي
غِلِط كِدا!
_ ياربي على جمال الواد أدهووم و حلاوته.
= يا شيخه!!
" بعناق "
_ ههه،طب والله اجمل أدهووم بجد.
~ خدوني معاكوا يا ناس.
" الاتنين "
هههه، تعال يا فهود.
_______________🤎
~ ماااميييي.
_ ايه يا فهود بتصوت كدا ليه!
~ شوفتِ يا ماما فهود جاب النهارده الدرجه النهائيه في الامتحان.
_ بجد يا فهوودي؟!
~ ايوا يا مامي، اهو كمان.
_ شطووور يا قلب مامي
ما شاء الله، اللهم بارك.
~ عايز مكافئه بقا لو سمحتي.
_ من عيوني حاضر
هتخلص امتحاناتك كلها
بعدها على طول هنخرج اجمد خروجه
و المكان اللي عايزه استاذ فهود كمان.
" بحماس "
يارب اخلص بسرعه يارب.
_ ههه، طب ادخل ذاكر بقا.
______________🤎
كِبر فهد و اللي كنت خايفه منه حصل
المجتمع
و الناس
هما اسوء حاجه على الوجود
فهد الطفل البريء، دلوقتي بقا منطوي، مُنعزل، مُش بيتكلم، مُش واثق في نفسه، مُش حابب الحياه، مُش عايز يكمل، و لو ب إيده ينتحر دلوقتي ف هيعملها للاسف قبل بكره
بس مانع نفسه لانه عارف أنه حرام، و طالما حرام يبقي مقدرش اهوب ناحيته
اه الحمدلله اني عرفت انَمّي الجانِب الديني عَنده
بس خايفه من المجتمع
خايفه المجتمع يغلبني كمان ف الامل الوحيد اللي فاضل ليا زي ما قدر أنه يغلبني في الباقي و كل اللي عملته و بنيته
هده المجتمع و الناس للاسف في لمح البصر
و حقيقي مع كل اسف بقول إنّ ابني بيضيع مني و انا مش في إيدي حاجه اعملها.
_______________🤎
_ فهودي ياله نقوم نخرج.
" ببرود "
~ مش عايز يا ماما.
" بغضب "
_ هتفضل قاعد يعني كدا في البيت كتير
أنتَ مرتاح كدا؟!!
مرتاح لما عمال تحبس نفسك كدا في الأوضه!
مرتاح و إنتَ سايبهم كدا يهزموك!
مرتاح و إنتَ مستسلم كدا!
هو دا فهد اللي كان قوي و للاسف يعز عليا اقول كان!
ده فهد اللي عشت حياتي اربي فيه و ازرع فيه الثقه و إزاي يحب نفسه؟!
فين فهد؟!!
فين فهد يا فهد؟!!
" بدموع "
~ ف.فهد إتدمر يا أمي
فهد إتدمر
_ تعالي يا حبيبي في حضن ماما و احكي ليها
مش وحشك حضنها بارضوا
" بعياط "
~ ت.تعبت يا ماما
تعبت من تنمرهم عليا
مُش قادر استحمل نظراتهم اللي كلها قرف مني
مُش قادر استحمل كلامهم
مُش قادر اطلع اشوف نظراتهم
انا فعلا مُش قادر اسمع كلمه يا ابو اربع عيون
هما ليه مُش فاهمين إنه مُش بإيدي
ليه مُش فاهمين إنه مرض عادي من ربنا
و ليه مُش فاهمين إني مليش دخل في شكلي أو حتى لون بشرتي
تعبت من كُتر ما بسمعهم بيقولوا لي يا اسمر
هو انا مالي
هو مُش دي خلقت ربنا
يعني انا مُش بإيدي حاجه
انا لو بايدي اكيد كنت هختار اجمل شكل
ليه يا امي هما وحشين اوي كدا
ليه؟!!
_ طب هسأل سؤال بسيط
إنتَ كَـ فهد
شايف من وجهه نظرك
ايه هيا مواصفات اجمل رجل مثلا؟!
~ ي.يكون بشرته بيضه و شعره ناعم و حلو و لونه اسود و عيونه ملونه و مش بيلبس نضاره و مش طويل اوي يعني و سط و مش رفيع اوي، لا يعني يكون جسمه مليان شويه و حلو و كدا.
_ طب هقولك انا بقا بالنسبالي
أنه يكون طويل و رفيع و يكون اسمراني و عيونه لونها بني و ياه لو شعره بني فاتح كدا شويه زي الراجل ابوك أو اسود زي الواد فهودي مُش هنقول لا بارضوا.
~ هههههه، دا أنتِ عكسي خالص يا ماما
_ بالظبط كدا يا حبيبي
لان بكل بساطه
كلنا ميولنا و وجهه نظرنا غير التاني
كلنا مُختلِفين
مُش لازم اللي انا بحبه يبقا هو افضل حاجه
يعني إنتَ شايف أن الراجل لو ابيض ف هو كدا بقا جميل و معرفش ايه
من الرغم اني انا
مُش بشوف الرجاله البيض غير أنها بيض كدا و ملزقه.
و عادي لأن دي وجهه نظري
بس مثلا لو اتعاملت مع راجل بشرته بيضا، هل هيحصل حاجه، لا هتعامل معاه زيه زي اي حد، لانه بشر، حتى لو هو فيه مواصفات انا مُش حباها
و طبعا اكيد في بنت تانيه
بتحب الرجاله البيضه و بتشوف أن السُمر مُش حلوين
ف دي وجهات نظر يا حبيبي
و زي ما ربنا خلقنا مختلفين في الشكل
ف خلقنا بارضوا مختلفين في وجهات النظر
علشان نعرف نعيش و نتعايش
ف إنتَ اكيد بشكلك دا و بكل حاجه فيك حتى عيوبك، اكيد في شخص هيحبك زي ما إنتَ و اكيد مواصفاتك بالنسبه لشخصٍ ما فا هيا اجمل حاجه.
فاهمني يا حبيبي!
~ ايوا يا ماما.
و حقيقي مبسوط انك في حياتي بجد و ربنا يباركلي في عمرك و متحرمش منك ابدا يا ست الكل.
_ ولا يحرمني منك يا بني ابدا يارب.
_______________🤎
وهيا دي قِصّتي مع التنمر اللي مُمكن تكون انتهت عندي
بس عند ناس تانيه ف هما بيعانوا لسه منها للأسف
التنمر
التنمر هو اسوء حاجه في الوجود
مُمكن بكلمه منك
توقف حياه الشخص ده، مُمكن الكلمه دي تدمر الشخص ده
ممكن الكلمه دي تموت الشخص ده فعلا
و اه تموتوا زي ما سمعتوا
و هنا السؤال!
هو الشخص اللي مات بسبب كلمه منك
مين هيتحمل وزره يوم القيامه؟!
لو هو مات مُنتحر و دا الغالب و اللي بيحصل
ف اكيد هيتعاقب لان الانتحار كُفر مفهاش كلام
بس اكيد ربنا مش هيسيب اللي كان السبب في إنّ الشخص يتقدم و يعمل حاجه زي كدا
اكيد مُش هيسيبه
لان ربنا عادل، و اكيد مش هيرضى بالظلم اللي بنعمله
و كما تدين تدان
اوعى تفكر إنك، هتقول الكلمة كدا و خلاص و بح
لا يا حبيبي، دي اتكتبت
دا إنتَ لو نِستها و الشخص اللي إتقال له الكلمه نفسه نِسيها و العالم كله نِسي
" و بيشاور للسماء "
طب و ربنا ، إييهه!
هينسى!!!!!
مستحيييل يا حبيبي، دي حتى مفهاش تفكير
دي مش هتعدي بالساهل
دي كما تُدين تُدان و هيتعاد لك
فا شوف إنتَ عايز إيه يرجعلك و اعمله
عايز الخير
هيجيلك متقلقش و زياده
عايز الشر كدا كدا غصب عنك هيجيلك
وطبعا اخيرا و ليس اخراً، و طبعا اسف على الإطالة
بس حابب آخر حاجه اقول
إن قصّتي دي موجود منها بنسبه ١٠ ٪ بس من العالم من ناحيه اهلي و دعمهم
يعني إنتَ متخيل أن بنسبه ٩٩ ٪ من العالم
مفيش عنده الدعم اللي حكيته ده
مفيش عنده حد يطبطب عليه
مفيش عنده حد يسمع له
مفيش عنده حد يشاركه حزنه و يحلها ليه
مفيش عنده حد يدعمه
مفيش عنده حد يحس إنه لما هيقع يتسند عليه
مفيش اي حاجه من جانب الاسره خالص
ف بالتالي النتيجه بتكون
اكيد مش الشخص الناجح اللي حقق ده كله بفضل ربنا ثم بفضل أسرته اللي قدرت تخليه واقف هنا دلوقتي
اكيد مفيش اي حاجه بتتقدم للشخص ده
ف اكيد النتيجه بارضوا مفيش، يعني ولا اي حاجه
و بتتحول للإنتحار بعد كدا و العياذُ بالله و ربنا يحفظنا جميعا
فا يتقدموا الدعم اللي يرضي ربنا جوا الاسره
يا يتقدموا الدعم بارضوا
اصل مفيش اختيار
اصلِ لو إنتَ أبوه و أنتِ أمه و مُش مدياه اي حاجه
ف الشخص دا هيستنى ايه من العالَم، ولا عايزين العالَم يستقبله إزاى مثلا
اكيد بكل وحشيه
ف اطفالكم امانه من الله لكم
فحافظوا على هذه الأمانة
و السّلامُ عليكم ورحمه الله وبركاته
______________🤎
^ عاااااا فخوووورررههه بيك اوووي بجد
~ يا حبيبي
دا انا اللي فخور بيكِ و بحمد ربنا أنه عوضني ورزقني بأجمل زوجه و اجمل حور في حياتي
= فخور بيك يا بطل
~ حبيبي يا بابا، تربيتك
_ اه يا واطي يا بتاع ابوك
مين دا اللي تربيته هو دا عمل حاجه دا!!!
" بغمزه "
~ كدا و كدا
كدا وكدا
_ ماشي يا فهودي ماشي
~ طب مش هتدي ابنك فهودي حبيبك حضن
_ هديك دلوقتي علشان انا فرحانه بيك و فخوره بيك اووي، بس مش هكلمك بعدها تاني
~ مش مهم، أنتِ اخرك مصاصه اصلا و انتِ اللي هتيجي تصالحيني و هتديني بوسه فوقيها كمان
_ اتلم يا جازمه
#التنمر مش روشنه حتى ولو بالهِزار، دا مش اكتر من أنه قله تربيه و دين يا شوباب مُش أكتر🤝🏽💔
تعليقات
إرسال تعليق