بصيت لبعيد وسرحت، ليه احيانا بنحس ان الحب حلم جميل بيخلي كل تفاصيل حياتنا أجمل، واحيانا بيبقى كابوس مؤلم، بيكون سبب السهر والدموع والوجع، ليه؟
اتنهدت _معرفش، يمكن نسيته ولسا بقاياه موجودة في قلبي، يمكن لسا بحبه واكتر من قبل، معرفش ياهدى
_يمكن قلبك خالي منه و دي ذكريات، انتي مجربتيش تدي لحد فرصة ياخد مكانه، يمكن تنسيه!
مشيت هدى وصدى صوتها موجود في المكان، فكرت في كلامها، يمكن معاها حق، انا مجربتش ادي فرصة لحد ويمكن انساه، انا مش فاهمة نفسي، يمكن لسا بحبه، يمكن نسيته، يمكن عشان مفيش غيره جوايا بفكر فيه..
قطع تفكيري صوت هادي بيقول:
_الساعة بقت عشرة والوقت اتأخر، مش هتمشي؟
مبصتش للشخص ومشيت، كنت بمشي في مكان وافكاري في مكان تاني، وصلت البيت لقيت ماما قاعدة
_اتأخرتي يا حبيبتي وقلقت عليـ... مالك يا لين؟
_ماما.. أنا.. ممكن تنامي جنبي انهاردة؟
نامت ماما معايا في اوضتي وسهرنا طول الليل نتكلم، ماما جميلة وقلبها كبير، سألتها فجأة منغير شعور:
_ماما مفيش حل للحب؟
ضحكت _عايزة تحبي ولا تتحبي؟
_عايزة أنسى
اختفت ابتسامتها لثواني، دموعي بدأت تنزل منغير شعور، مسحت دموعي وابتسمتلي:
_الموضوع ده بقاله زمان؟
هزيت راسي بأيوه
_متعرفيش يابنتي، يمكن قلبك خالي ودي ذكريات، استني الشخص اللي ييجي ويملى مكانه، أديه فرصة، يمكن دي ذكريات!
اتنهدت وغمضت عيني، نفس كلام هدى ماما بتقوله، جايز كلامهم صح..؟
غمضت عيني ورحت في النوم، صحيت تاني يوم على صوت أدهم وآية
_خالتوو
_...
_خالتوووو
_همم
_يا خالتوووو لييين
_نعم ياااستيي نعم ابوكي راميكم علينا لييه ملكوش بيت يلمكم يا رؤى تعالي خدي ولادك خافوا ربنا نايمة انا ناايمة
وقفت رؤى على باب أوضتي _ولادي مدايقينك في ايه يا لين دول عسل ربنا يحميهم
_مش هم عسل؟ خديهم و روحي بيتك يللا
_ماما انا ماشية عشان الظاهر انكم ماصدقتو جوزتوني
___________________________
_الوو
_ايوه يا لين مالك
_هدى في عريس متقدملي تعالي
_ايوه جاية جاية
شوية وكانت معايا في اوضتي
_يعني لازم اطلع؟ طب ما نلغي الموضوع وخلاص
_انتي هبلة!! الراجل مستني برا يللا
بحزن _بس انا بحب سامر
_نفسي اعرف بتحبيه على ايه، ده حتى معندوش غمازات
بصتلي نظرة غريبة _لين لو عنده غمازات ومعجبكيش قوليله صاحبتي موجودة
ضحكتني في وقت مش قادرة اضحك فيه، بصيت لشكلي عالمراية
_طب شكلي حلو؟
_ده شكلك الطبيعي انتي مش مغيرة حاجة يعني
_يعني حلوة؟
حضنتني وهمست في ودني
_انتي قمر يالين ده سؤال يتسأل برضه!
_____________________
فضلت قاعدة مبصتش في وشه، قاعدة بتأمل ديكور السقف، بصراحة اول مرة أعرف انه حلو كده
_ايه ده!
بصيتله بخوف _في ايه!
_طب ما تبصي من الأول طيب!
ضحك بصوت عالي، اي ده ده عنده غمازة! ايه اللي انا بقوله ده!!
_انت بتضحك عليا؟
_لا والله مش قصدي، المهم، بتصلي؟
_آه الحمد لله، وأنت؟
_الحمد لله، أنا آدم
_ تشرفنا، حافظ قرآن؟
_قربت أختم، حاجة تاني؟
_لا، الرد هيوصلك مع بابا
رجعت الأوضة وانا قلبي بيدق طبول، هدى جريت عليا
_عنده غمازات؟
_وحدة في الخد اليمين
_و لون عينيه؟
_عسلي
_قمحاوي؟
_اه
_قلتيله صاحبتي موجودة؟
رميت عليها المخدة، وضحكنا، سألتني باستغراب:
_انتي كنتي قاعدة تتأملي شكله؟
_لا والله، ده ثواني بصيتله بس
_و شفتي كل ده! يخربيتك يا شيخة!
ضحكت _بس تصدقي.. قمر!
_هو أحلى ولا سامر؟
_ أمم، لا هو
_انتي دماغك غريب!
______________________
صليت استخارة وارتحت قلت لماما وقالتلي وافقي واتوكلي على الله، وافقت وهوبا الفاتحة هوبا خطوبة هوبا انهاردة كتب كتابي، لبست فستان لافندر فاتح، ميكاب خفيف، مغيرتش في شكلي كتير، لمسات بسيطة وعجبني شكلي جدا
(بارك الله لكما و بارك عليكما وجمع بينكما على خير)
_ازيك يا آنسة
_الحمد لله
_انا تعبت عشان أوصل لهنا على فكرة
_ليه هو انتو بيتكم بعيد؟
سكت شوية وضحك بصوت عالي لحد مادموعه نزلت، انا بضحك باستغراب من ضحكه، مسح دموعه وقالي
_قومي هنخرج
_انت عايز تخطفني
_لو عايز اخطفك، مكنتش هقول لباباكي
_لو بابا عارف ماشي
رحنا واشترينا حاجات حلوة واشترينا درة مشوية واتمشينا، قعدنا على موقف والضلمة حاوطت المكان، الهوا بارد والظاهر هتمطر
_الجو برد
_بردانة؟
_مش اوي
قام وقلع الجاكيت وحطه على كتفي
_ لا دي نقطة لصالحك
غمز _أي خدمة
______________________
الفرح قرب اوي، وانا مش مصدقة، حنين اوي وبيشتري خاطري، بحس ان زعلي مبيهونش عليه، بيحاول يفرحني، كل تفاصيله بتخطف قلبي، غمازته وكلامه وضحكته وصوته وشياكته ده انا حافظة عدد رموشه، ملى قلبي بحنيته ومسح على جروحي و هداها، نسيت السهر والعياط وليلي بقى احلام جميلة بدل الكوابيس، غرقني بحنيته و روحه الحلوة، غرقني بجد!!
______________________
_آسفة
_على ايه؟
_دوق وهتعرف
حط اللقمة في بوقه وانا خبيت وشي بأيديا
_طب مهو حلو
بصيتله لقيت وشه أحمر وبيبلع اللقمة غصب وبيضحك
_مـ تصارحني مرة يا أخي
_والله حلو
_متحلفش! ايه الحلو فيه ده انا حاطة فيه كيلو ملح!
_برضه عاجبني
_ انت بحب المحشي أوي كده؟
_ لا أنا بحبك أنتي
_ايه!
_ايه؟
تعليقات
إرسال تعليق