ـ ـ زينه زينه، مالك يابنتي
_احنا لسه هانسأل شوف بنتي مالها
_خير يادكتور البنت مالها
٠مافيش حاجه هي بس مشكله نفسيه، وده اسم دكتور كويس، وإن شاء الله خير ياجماعه إطمنوا..
•• شوفي يازينه، أي حاجه هاتقوليها مستحيل تخرج برا الأوضه ديه، إتكلمي وماتخافيش من أي حاجه، أنا عايز أساعدك صدقيني، لسه مش عايزه تتكلمي، يازينه إنتي ماعندكيش حاجه، بصراحه أناكنت فاكر إنك أقوى من كده، طب إنتي شايفه إنه يستاهل تموتي نفسك علشانه كل ده؟
= أنا مابموتش نفسي علشان حد، أنا مش عايزه أكلم حد لأني تعبت من الدنيا ومن نفسي
•• ياااه قد كده الناس وحشه عندك، طب وبابا وماما، مش شايفه عاملين ازاي من يوم ماتعبتي، دول بيحبوكي قوي على فكره
(ثم تبكي وتنهال بالبكاء)
ممكن نهدى شويه، ونتكلم بقى، مش كفايه سكوت كده
،إنتي ايه يا آنسه مابتتعبيش
= والله أنا بحبهم قوي أنا كمان ربنا أعلم بيا
••علشان كده بتعذبيهم معاكي
= والله أنا مش زعلانه علشانه، انا بس زعلانه على نفسي وإني وافقت أكلمه
••بس إنتي مكنتيش تقصدي، روفيده أختك قالتلي إللي حصل، بس انا عايز أسمعك، ده لو حابه تتكلمي
= أقول إيه بس
•• تقولي إللي حصل
من كام سنه عملت أكونت على الفيس، كنت محتاجاه علشان جروبات كتير علشان دراستي وكده، وكنت نفسي أحفظ القرآن، ولقيت جروب للتحفيظ، قولت أدخله، ألاقي حد يساعدني وأمشي معاهم واحده واحده ونتسابق وألاقي متابعه، دخلته، لكن كان محفظ مش محفظه، كان محترم قوي فى تعاملاته معانا، كان حذر حتى فى اسلوبه وفى كلامه والبنات كمان كانوا كويسين ومحترمين قوي، كان بيتبسط مني وبيشجعني، إتصاحبت على بنات الجروب وكنا بنتشارك ونتنافس وكنت مطمنه إني فى أمان، وكان بينهم بنت اسمها "مريم" وبعدين إتبعتلي طلبات من مجموعه معينه، ٥ او ٦بنات، كان أغلبهم صحاب لبعض، وبعدين تابعت المحفظ ده وتابعت صفحته قولت علشان استفيد، وكنت بتفاعل معاه كمان واسألوا فى التعليقات وبيرد،كنت مبسوطه باللي أنا فيه، صحبه صالحه وحفظ كتاب الله، مشاعر أخدتني للسما، وكأني هادخل الجنه بكره، فرحت إني فيه فى حياتي ناس كده، اخدني الفضول وكنت بتابع اخباره لحد مابصرحه اتغير احساسي ناحيته لحاجه تانيه، حاولت أبعد وخوفت من نفسي، وبعدت حتى عن الجروب نفسه وإلتزامي معاهم قل، لكن فضلت صلتي بمريم موجوده، كانت بتسأل عليا ونتشارك حاجات كتيره الشيكولاته والورد وصحيانا بدري، كانت أصغر مني بشويه، كانت بتكلمني فى حاجات معينه كمراهقه، كلام عن حب أو غيره، منه حبها للمحفظ بتاعنا، وكنت دايما بحاول أنصحها كنت بخاف عليها قوي زي اختي، مع الوقت حسيت إني البنات دول وأولهم مريم هما نفسهم المحفظ بتاعنا
••وعرفتي إزاي إنه هو؟
= مريم هي اللي عرفتني
•• قالتلك يعني
= لأ، بس كانت بتقولي حاجات من حياته، يعني مثلا هما الاتنين كانوا بيحبوا نفس الحاجات
•• مش جايز تكوني غلطانه، أو مثلا من إحساسك وتفكيرك فيه خلاكي تشوفي الناس شبهه، او جايز حتى البنت ديه تكون هي إللي من كتر تركيزها معاه ومشاعرها بتحاول تاخد من طباعه مثلا، علشان تثبتلك إنها مش طفله وإنها شبهه
=لأ، لأني ف لحظه معينه خوفت من نفسي لما إبتديت أحس بحاجه ناحيته كنت خايفه أكون سرقت احساسها وحلمها، وكنت عايزه أساعدها، لحد ماقالتلي إنها إحساسها مكانش حقيقي و برضوا بعدت بس فضل الشبه موجود
••أنا خايف تكون ديه فعلاً مش بنت ويكون حد تاني قاصد يلخبطك ويوصلك إنه هو لسبب إحنا مانعرفوش
= لأ أنا متأكده، البنات إللي حواليا كانوا بيعرفوا تفاصيل دقيقه عنه حتى قبل مايقولها أو ينشرها، يوم ما والدته تعبت، يوم ما أخته كانت بتولد، يوم ما أخوه إتخرج، كل الحاجات ديه كانوا بيعرفوها قبل ماهو يقول، حتى أغلب الأسماء بتاعت البنات إللي حواليا كان فيه حواليه ناس بأسمهم فعلاً
••كملي أنا سامعك
=إبتدى يبانلي قوي إنه هو، مابقتش أعرف هو قاصد ده ولا لأ، حتى لما كان بينشر حاجه وأسألوا بصفحه من صفحات البنات مكانش بينكر، لو تعب مثلا وسألت عليه، واقوله عامله ايه دلوقتي طمنيني عليكي، مكانتش بتنكر، وكانت بتقولي عرفتي إزاي إني تعبانه وكدا، خوفت من نفسي، وخوفت منه وخوفت من ربنا، وبعدت، وإتمنيت كتير إني ربنا يسامحني(بتحكي وهي بتبكي) خوفت مايسامحنيش لأني كان لازم أبعد من أول ماشكيت، كان لازم أعملهم حظر كلهم كل البنات مكانش كفايه إني أبعد، لكن كنت دايماً بخاف أكون ظلماهم فكنت بسكت بس كنت بحاول أتجنب الكل وما ابصش عليهم وبطلت أتابع صفحته أو أي صفحه
لحد ما جه وقت وبعدت عن كل حاجه وقفلت على نفسي مع ربنا وبس أصوم وأصلي وكده علشان أقربله تاني، حسيت إني قلبي إبتدا يطمن، لقيت مريم باعته تقولي أدعيلها بالتيسر ودعيت من غير ما أعرف ليه أو عن إيه، بعدها تاني يوم عرفت إنه إتجوز
••عرفتي ازاي؟
=البنات كانوا بيقولوا وأصحابوا كانوا بيبعتوا تهاني ومباركات وبعدها هو قال
••وعملتي ايه؟
= جاتلي حاله من التناقضات، مابين خلاص ربنا بعد عني الأذى أكيد لو كان خيرا لبقى، وبعدين أبكي على إللي حصل معايا وعملت بلوك لكل البنات وسبت كل حاجه، بس فضلت فى حالة التناقضات ووجعتلي دماغي، كل شويه بفكره وكنت بصدع قوي وأنام
••تناقضات إزاي
=مابين إنه مافيش حد كويس هايعمل إللي عمله معايا وإني ربنا ريحني ومابين زعلي على التحول إللي حصل فى حياتي، وإني حسيت إني خونت ثقة أهلي، وإني أغضبت ربنا
••شوفي يازينه، إنتي فعلاً مكانش لازم تكلمي أو تثقي فى حد غريب مهما كان حتى لو بنت، مهما حصل إحنا بشر، ماحدش فينا معصوم، لكن ماتزويديهاش ، هوني على نفسك، يكفي إنك إنسانه بريئه قوي، بريئه لدرجة إنك عاقبتي نفسك بنفسك وعقلك إختار إللي حصل معاكي من كتر خوفك من ربنا لما حسيتي إنك ضعتي خلاص وتعبك راح ومابقتيش ملتزمه، وده مش صحيح، لايكلف الله نفساً إلا وسعها ربنا أرحم من كده بكتير
= أنا عارفه إنه رحيم بس أنا ماستاهلش ده
•• مين قال كده، ربنا عارف إللي جواكي وهيحاسبك عليه، إنتي جواكي نقاء وبرائه إنتي مش شايفاهم، ياما فيه ناس ظاهرهم منتهي التضرع والإلتزام، إنما الحقيقه الباطن ربنا أعلم بيه، ربنا بيحاسب بما في القلوب والعمل الخالص ليه
= تفتكر هايسامحني؟
••طبعا ً من غير تردد أو تفكير، لازم تكوني متأكده، حتى لو ده ذنب، فوجعك ده توبه
=بس أنا مخنوقه قوي، مكنتش أحب مشاعري تتحرك إلا لشخص واحد بس، حاسه إني خونت إنسان تاني بتفكيري
( ينظر إليها قليلاً ثم ينظر إلى الأرض ويعيد النظر إليها متحدثاً)
••يارب نصيبك يكون يستاهلك ويستاهل تفكيرك فعلاً، إنتي إنسانه رقيقه وجميله وتستاهلي كل خير
= متشكره ربنا يخليك
•• إنتي خلاص بقيتي بخير، ومش محتاجه تيجي هنا تاني، بس قبل ماتمشي أنا عايز أقولك حاجه، أنا لو مكانك أغير كل تفاصيل حياتي وأخلي إللي حصل ده سبب فى إني أحقق كل أحلامي ويبقالي كيان وحياة وشخصيه بارزه، روفيده قالتلي إنك كنتي بتتمني تكوني داعيه، مش يمكن ربنا عمل كده علشان تفهمي وتحسي بالشباب والبنات طبعاً لما تبقي داعيه إن شاء الله
= روفيده قالت حاجات كتير قوي
•• آه فعلاً، بس أنا إللي كنت بسألها، كنت عايز اعرف عنك كل حاجه، ياريتك تبقي داعيه وتكملي مشوارك، أنا سمعت إنك كمان بتحفظي الاطفال أجزاء قصيره
= كنت
•• وإيه إللي يوقفك، ماتيجي ناخد الحلو فى إللي حصل وكملي أحلامك كلها بلا توقف
= مش عارفه أقولك إيه، أنا بجد متشكره قوي
ــ ماتشكرينيش وسمعيني عنك كل خير وخلي بالك من نفسك
= إن شاء الله، السلام عليكم ورحمة الله وبركاته
ــ وعليكم السلام ورحمة الله وبركاته، لا إله إلاّ الله
=سيدنا ونبينا محمد رسول الله
(وبعد مرور سنه ونص أنهت زينة عامها الجامعي الأخير بتقدير إمتياز وقد أتمت حفظ كتاب الله، كانت تقضي الليل والنهار إجتهاد وعمل، وقد تم قبولها في معهد إعداد الدعاة، و أصبحت أحب وأيسر محفظه في طريقتها، و قررت ان تحل محل تجربتها مع الفيس بوك بنشر الوعي والتثقيف على الفيس بوك عنه بكل الطرق، سواء عن طريق المنشورات أو المحادثات، فقد أصبحت ذات رأي ومشوره من بنات كثيره، وزادت المعجبات على صفحتها وأنجزت الكثير في وقت قياسي حتى بعد أن تزوجت أختها وتركت البيت،فلم تضع وقتاً للتفكير في المستقبل إلا واستغلته إستغلالاً كاملاً)
ــ هو أنا جايه عندكوا النهارده علشان تشغلوني عندكوا
= طبعاً مش أنا زي النهارده إتولدت، يبقى لازم تساعديني، ده إنتي يابخيله حتى ماجبتيليش تورتايه ولا حاجه حلوه ف إيديكي
ــ بس جبت هديه، بس يااااارب تعجبك
ــ أنا مش عارفه إيه إللي طلعها فى دماغكوا، عندي كام سنه أنا علشان أعمل عيد ميلاد، ولا حتى إيه إنجازاتي، إنتوا عايزين تدخلوني النار
_ لأ ياحبيبتي أبوس إيدك، إحنا نحتفل السنه دي وبعدين إبقي براحتك
= أقعدي بقى
ـ يلا يابنات علشان نطفي الشمع، يلا يامحمود
ـ ـ انا جاهز ومستني، ياحبيبتي يابنتي
=ربنا يخليك يا بابا إنت وماما يارب
ـ ـ ويحفظك ياحبيبتي
(ثم طرق الباب)
ــ طارق جه يابابا
ـ ـ طب إجري إفتحيله
ــ حالاً
(فتحت روفيده الباب)
ــ طارق جه ومعاه الضيف يابابا، ومعاه ورد حلو قوي
= ضيف إيه إللي جوزك جايبهولنا، جوزك لامم صحابه على تورتتي، نحتفل إزاي دلوقتي ومعانا حد غريب
ــ إصبري بس
ـ ـ تعالى يابني
•• السلام عليكم ياجماعه
= دكتور خالد
أيوه يا زينه، كل سنه وإنتي طيبه، إتفضلي
= ميرسي قوي شكراً
ـ ـ دكتور خالد يا زينه طلب إيدك مني، إيه رأيك
= ايه
•• وهاكون أسعد إنسان لو وافقتي، وهاكلم حالاً أهلي يستعدوا، هما واقفين على تليفون بكلمه منك، بس أنا قولت مايصحش أجيبهم إلا لما اعرف رأيك
(تومئ برأسها وتنظر للأرض مبتسمه)
~ السكوت علامة الرضا ياعم
•• إستنى ياعم طارق انا عايز أسمعها منها هي
_ماخلاص بقى يابني البت هاتقولك إيه، أختي وأنا عارفاها
ـ ـ مبروك يابنتي
ـ مبروك ياحبيبتي
=ربنا يخليكوا ليا يارب
الحلال اللي بييجي من ربنا فرحته كامله، وإللي بيحبنا بجد هايقبلنا زي ما إحنا وعمره ما هاينسانا، وهايحافظ علينا حتى من نفسه .
تعليقات
إرسال تعليق