ضحك_ قصدك تاج؟
_ وهو في حد هنا بيقدر يقف قدامي غيرها؟
_ طب والله عفوية وجميلة.
_ احترم نفسك.
_ لو مش عارفك كنت هقول غيران؟
_ قوم يالا...
القهوة وصلت يعني الساعة بقت 8 ونص والانسة مجتش تمضي حضور! التأخير ممنوع وهي عارفة، وعارف اني مش هخلص من لسانها لو قررت ألفت نظرها، طب اعمل ايه معاها دي! اتصرف ازاي؟
_ صباح الخير يا مستر عدي.
_ م بدري يا آنسة تاج.
خدت نفس وتمتمت بجملة معتادة _ آه يا قلبي
بصتلي وكملت بصوت مسموع_ مهو بدري فعلا، المفروض الشغل من الساعة 9 باجي انا من 8 ونص تكرمًا مني، ولا علشان انا بعمل ده زوقيًا مني بقا فرض عليا ولازم احضر في ميعاد مش ميعاد شغل اصلا!
_ خلاص في ايه! مكنش سؤال.
_ كان ممكن تسأل بأسلوب ألطف من كده، يعني لو كنت قولت اتاخرتي ليه؟ كان هيجرالك حاجه؟
_ هو مين المدير فينا مش فاهم!
_ اللي بيفهم.
لا وبتسيبني وتخرج! ده مفيش حد هنا يجرأ يتعامل معايا كده، ومعرفش ليه مُتساهل معاها، يمكن علشان منطقية، أو نمطية غريبة، وآه يقلبي بتاعتها قادرة تحرك قلبي، بتخرصني!
_ صباح الخير يولاد...
_ تاج الحقينا.
_ عملتوا ايه وخايفين؟
_ مخلصناش الملفات اللي عدي طلبها مننا.
_ ليه؟
_ انا كنت مع والدتي في المستشفى ورؤية كانت مع خطيبها برا، أما زهرة فكانت في البيت وخلصت اللي عليها بصراحة.
رديت بعملية_ والمطلوب؟
_ توديه انتي لمستر عدي هو مش هيتكلم معاكي.
رفعت حاجبي وسكت وبعد محايلات _ طلبكم مرفوض الساعة هتدق 10 هيجي ياخد الملف معاكم ساعة تقدروا تخلصوا جزء كويس، على الأقل افضل من مفيش.
المؤسسة هنا مسئولة عن تعليم النساء أعباء الشغل، ازاي ده يحصل مش فاهمة، كل حاجة ليها أولويات، والمفروض بما انهم متكلفين بشغل يبقى يتعمل الأول.
10:00
نظرات متحفزة وغيرها خايفة وآخرهم واثقة وقوية، ظهر من آخر الممر طيف لشخص عملي وموهوب، شخص انا برتاح لما بعانده لمجرد العند...
_ الملفات!
سلملته المسئول مني بروتين وقعدت وربعت أيدي، زهرة ووعد ورؤية بيتعازموا مين يسلم الملف الناقص، اتشجعت وعد وسلمته مع مبررات واهيه.
_ أيوة اومال انتوا بتشتغلوا ازاي؟ -صوته علي- يعني ايه الكلام الفارغ ده، استاذه وعد كان ممكن تعملي شغلك قبل ما تروحي بوالدتك، وأستاذة رؤية كان ممكن تعملي زيها أو تلغي خروجتك مع خطيبك، مش فاهم الاستهتار ده ليه؟
خلص! وبخهم؟ الدور جه عليا بقا _ حضرتك اظن اعذارهم مع القدر اللي اتنفذ من الشغل مش شوية.
_ متتدخليش انتي!
_ نعم؟
بصولي باستغراب وبصوله بخوف اخدت نفس واتنهدت _ متدخلش يعني ايه؟ عامل مشكلة علشان فاضل فايل واحد متصححش! مستر عدي أنا مسئولة عن الشغل ده ربع ساعة وهيكون عندك غير كده اظن مفيش داعي للكلام.
قرب خطوة _ على مكتبي حالًا.
_ ليه!
صوته بقا أعلى _ حالًا يا استاذة تاج.
الصوت العالي متعب وخصوصا ليا، ومكنش ينفع اعاند اتحركت قدامه لحد ما وصلت المكتب فتح هو ودخلنا، مش فاهمة ليه بيزعقلي!
_ لما جيتي تقدمي في المبادرة كلنا كنا شايفين انك تستاهلي ده ومازلنا ليه بتدافعي عنهم!
_ علشان احنا بنات، فاهم يعني ايه؟
بصلي بصدمة _ بنات! مش دي المبادرة اللي بتنادي بالمساواة مع الرجالة برضو؟
_ أنا ربنا كرّمني بأني بنت وديني بيدافع عني وبيطلب منكم التعامل معانا بلين ورأفة، ولكن المجتمع شايف اني منتقصة الحقوق لمجرد كوني بنت، استاذ عدي أنا مش عايزة اتساوى بالراجل لان انا وهو جنسين مختلفين بصفات مختلفة، لكن مش عايزة اتعامل بدونية لمجرد اني بنت وعلشان كده قدمت مع حضرتك ومش هسمحلك تحاول تلغي شخصيتهم وفطرتهم مهما حصل.
سابتني ومشيت كالعادة، وانا مبهور بكلامها وفي دماغي الف سؤال وسؤال، وكلهم ليه؟ وأنا أيدي بتوصل لقلبي تطمنه مع جملتها وابتسامتها مش مفارقة خيالي "آه يا قلبي"
_ دي عملت معاك السليمة!
_ مش مضايق منها، بالعكس هي بتتكلم في الصح.
_ انت هادي اوي ليه كده؟
_ علشان اقتنعت بوجهة نظرها وإن المجتمع فعلا بيحط منهم لمجرد أنهم بنات.
_ م ده مبدأنا الفكرة انك بتسمح أنها تتصرف كده معاك!
_ انت مش فاهم حاجه.
شخصية تاج غريبة بنت رقيقة وانا عارف وبتحاول بس تدافع عن ده، البنت كائن لطيف والاحسن ليها أنها تتصرف بفطرتها من غير ما حقوقها تنقص، ده اللي هي بتدافع عنه واللي أنا هعمله.
_ كل اللي انا فيه بسببك على فكرة.
_ ليه بتقولي كده يـ تاج!
_ علشان بخاف عليكي قولت اروح اتهبب وأقدم معاكي ياريتني م عملتها.
_ طب والله شغل قمر ومبادرة قمر ومدير قمرين.
_ انا بس عايزة أسألك سؤال، عاجبك ايه في عيشة الشاب المصري علشان تنادي بالمساواة معاه!
_ قاعدة القهوة!
_ بالظبط هي دي الحاجة الوحيدة بجانب التدخين.
_ التدخين؟
_ عارفه لو مثلا كان اللي استخدم السجاير البنات الاول كانت هتبقى للبنات بس مش للرجالة، هي اسبقية استخدام مش أكتر، ولكن أنا ممتنة لده لأن عيب كائن كيوت ورقيق وجميل يبقى بسجارة! آه يا قلبي ياني.
_ تاج انتي مالك؟
حاسة أن عندي الف فكرة عايزة اتكلم عنها، الف حاجه ليا رأي فيها، ولكن مقتنعة أن رأيي ک "بنت" لا هيقدم ولا يأخر فبسكت، ولاني بصدع بصراحة من الرغي الكتير ومحاولة إثبات وجهة نظر مش هتفيد أصلا.
_ في اجتماع عند مستر عدي كمان ساعة.
_ خير؟
_ بيقول في تجديدات في القوانين!
_ بتهزري!
_تاج، ايه توقعاتك؟
_ اكيد قانون خايب شبهكم، والله انا الحسنة الوحيدة ليا هنا اني بغير جو بس كده.
_ وبتشربي نسكافية.
_ شاطرة يوعد، وبشرب نسكافية.
بعد شوية إنتظار روحنا احنا وباقي الموجودين في المقر والمقرات التابعة لينا، مكنتش حاسة اني عايزة اعرف ايه الجديد بس الفكرة هو ليه جمعهم كلهم كده!
_ احنا عملنا المبادرة ليه!
_ علشان ترجعلنا حقوقنا.
_ بالظبط، بس مش معنى كده أننا نلغي كونكم ملاذ اللطف والحنية في حياتنا.
همهات بعيدة وانا في صدمة من كلامه _ لو سمحتوا، انا مخلصتش كلامي، المهم احنا قررنا إننا نساعدكم توصلوا لحقوقكم من غير ما نغير فطرتكم.
وجه عيونه ليا_ انتو ربنا كرّمكم بكونكم بنات، وديننا وصى عليكم وعلشان كده احنا هنساعدكم بالقدر اللي ميجيش عليكم.
اتنهد _ هنعمل فصول تنمية عن ماهية البنت عموماً والتغيرات اللي بتمر بيها حياتها كلها وهيكون مسئول عن ده ناس متخصصة فيه وهندربكم على الشغل مع الاهتمام بالبيت كل ده هيكون متاح ليكم والمباردة دي اقوى من الاولى بكتير، بس أنا عندي امل أننا هنقدر نوصل للي عايزينه.
خلص الاجتماع وكل واحد رجع على مكانه وفضل منتظر المهام الجديدة بتاعته إلا أنا، كنت محتاجة اجابات على أسئلة كتير أوي.
_ مستر عدي.
_ نعم.
_ لو حضرتك فاضي ممكن شوية من وقتك.
بص في ساعته ورجع بصلي باستغراب_ اتفضلي...
_ حضرتك ليه عملت كده؟
_ عملت ايه!
_ غيرت حاجات جديدة هي أساس المبادرة التابعة لينا.
ابتسم _ لينا؟
ابتسمت _ هو انا مش واحدة منكم؟
_ يعني دلوقتي بقيتي مننا؟
_ لا متردش على سؤالي بسؤال، وبعدين لو مش حابب عادي هتريحوني.
_ لا بالله عليكي انتي كنتي ماشية كويس بلاش العند ده.
قربت خطوة معرفش ليه وقولت بصوت واطي_ اقولك سر!
وطى دماغه وقال بنفس تون الهمس _ قولي...
_ أنا بفرح لما بعاندك.
ابتسم _ اقولك انا سر؟
_ انت اللي قتلت موفاسا؟
ضحك_ لا، انا بحب عنادك.
ابتسمتلي ومشيت وانا فرحان اني قدرت اوصل لنقطة حقيقية عندها، وفرحان اني اخدت خطوة كبيرة بينا لما فهمت تفكيرها وقررت اساعد لكن الوقت مش عامل مساعد لينا.
وخصوصًا بعد شغلها الجديد.
_ هنتكلم النهاردة عن الثقة بالنفس...
اتنهدت _ لازم نكون واثقين أننا استثناء مفيش غيرنا، مفيش شبهنا، نسخة واحدة بس مبتتكررش.
في الاجمل الاحن والالطف لكن مفيش شبهنا، دايما عندنا شيء يميزنا ودي اسمها فروق فردية.
_ ودي موجودة عند كل الناس يا مس تاج؟
ابتسمت_ عند الكل سواء راجل أو ست، حبي نفسك، هو ليه الراجل مبيساويش نفسه بيكي! مع انك مرتاحة عنه، وفي مميزات كتير في حياتك، يعني دراستك، ثقافتك، شغلك، اهتمامك، مسئولياتك، أو حتى وقت فراغك!
فضلوا منتظرين الرد فقولت _ هو مش هيقارن نفسه بيكي طول مانتي شايفة نفسك قليلة! عمرك شوفتي مدير عايز يبقى سكرتير؟
_ لا...
_ بالظبط! الراجل مش معيار للنضج ولا للتصرف السليم، وانتي مش معيار للفشل، وتفهمك لده هو أساس انك ترتاحي بعد كده.
حطي حدود لنفسك انا أولي كذا وأخري كذا وعمري ما هعمل شيء مش مسئول مني علشان اظهر قوية، ليه اصلا أظهر قوية وانا قوتي في ضعفي؟
اتنهدت _ قولي لنفسك طول الوقت، انا جميلة، انا كاملة، أنا استاهل الاحسن، أنا مش قليلة، كبري نفسك علشان محدش يصغر منك.
مكنتش محاضرة سهله وخصوصًا اني بتكلم في نقطة مهمة، تنظيم الأفكار والتداخل في المواضيع مهم ولازم يكون بطريقة سلسة، كان واقف بعيد منتظر خروجي وإني اروحله بعد المحاضرات، ولكن ولو ولو مقدرش ده طلع بيحب العند!
_ تاج؟
_ نعم يا مستر عدي.
_ هو انتي مبتجيش ليه تتخانقي معايا بقالك فترة؟
ابتسمت _ وهتخانق معاك ليه مانت ماشي كويس.
_ يعني ايه ماشي كويس مش فاهم؟
_ يعني خلاص انت بتحاول تساعدنا وفهمت أننا مختلفين وأن اهم حاجه فينا اختلافنا، وأننا اتخلقنا علشان نكمل بعض، وأننا موجودين علشان نساعد بعض مش نكون في صراع مين فينا أقوى، هو انت عمرك شوفت مقارنة بين ارنب وبطة؟
_ لا...
_ مش علشان مهارات مختلفة بس علشان نوعين مختلفين، المقارنة تكون مع حد من نفس النوع اتنين بيتنافسوا على شغل أو دراسة أو حتى لعبة، إنما ليه اتعب قلبي بمقارنة أساسها غلط!
ضحك_ وايه كمان!
_ وكمان بصراحة انت بتحب العند وانا كنت بعمله علشان اعصبك فكده مش هعمله تاني.
_ لا يا تاج أنا مش بحب العند، انا بكرهه جدًا وبتعصب جدا لما حد يعاندني كمان.
_ بس انت قولتلي انك بتحب العند!
حرك دماغه بنفي_ بحب عنادك، عنادك انتي، بحبه علشان منك.
بصتلي بتوهان بعدها برقت بصدمة وسابتني ومشيت، ضحكت ومشيت خلصت المؤتمر الخاص بالمبادرة اللي وصل صوتها أخيرًا، وأخيرًا قدرت اساعدها ترجع شوية من حقوقها.
اتصلت بيها وطلبت نتقابل، كنت متلغبط، خايف لكن مبسوط، وعايز اطير واوصلها، اقف قدامها واقولها أننا قدرنا نعمل ده، قدرنا نحرر أجيال من الخوف لكونهم بنات.
_ في ايه يا عدي؟
_ تاج انا النهاردة كنت في مؤتمر خاص بالمبادرة هيتزاع بعد اسبوع والوزير قرر يتناقش في حاجات مهمة جدا خاصة بيكم.
ضحكت وغمازة دقنها خطفتني_ بجد يا عدي؟
_ والله بجد، مش مصدق انك قدرتي تعملي ده!
_ انا؟
_ انتي اللي غيرتي حاجات كتير يا تاج، بحنانك وعنادك وقوتك اللي بتحضر اول ما بيدق الخطر، غيرتي حاجات كتير انا مكنتش واخد بالي منها، وقدرتي برقة قلبك تحيي حاجات مكنتش عارف انها عايشة.
ارتبكت_ هو، هو انت بتتكلم عن المؤتمر!
خطفت ايديها وانا ببتسم بحب_ بتكلم عن ده، عن قلبي.
اتنهدت كعادتها وبرقت بصدمة وتمتمت بعفوية _ آه يا قلبي.
"لتكُن لي سُلطانًا، وأنا تاجُك" 💙
تعليقات
إرسال تعليق