بصلي وغمز
- ولو مضحكتش هتعملي اي
دوست علي رجله بكل قوتي وابتسمت
- ااااه يا بنت المجنونه
لقيتهم كلهم انتبهوا علي صوته فجز علي سنانه فضحكت علي شكله
- مش تخلي بالك يا حبيبي
لقيته قرب عليا وهو مبتسم
- ليكي يوم بس الصبر هتروحي مني فين
اليوم عدي علي خير عقبال ما اخلص منه هو كمان علطول ، مكملتش الجمله ولقيته بيتصل عليا ، يارتني افتكرت ١٠٠٠ جنيه
- خير؟
- مش احنا خطوبتنا كانت النهارده وانا في مقام خطيبك يعني بيقولوا بقي ان دى احسن فتره لحلاوه البدايات و..
- ولا بقولك اي شغل التلزيق ومحن المخطوبين ده مش هنا
- اي ي شيخه فاتحه بلاعه جوا اومال لو كنت قولتلك بحبك كنتِ عملتي اي
قفلت في وشه وحسيت ان قلبي بيجري من سرعه دقاته ابتسمت وخبطت ايدي علي راسي ، فوقي يا ملك فوقي كل ده اتفاق وبس وعمره ما هيكون حاجه غير كده.
- ده الطبق الكام ال تتطفحه من ساعه ما قعدنا
- هتبصيلي في اللقمه كمان
مسكت السكينه ال كانت قدامي وانا بصاله
- هتركز ف ال هقوله بما يرضي الله ولا اخليك تركز بما لا يرضي الله
- مش طافح خلاص
- بص بقي يا عسل احنا هنتعامل قدام العيلتين الفتره دي كويس اوي عشان ميشكوش في اي حاجه وبعد الفتره دي ما تعدي هتقول انك مبقتش مرتاح معايا ومش حابب تكمل وانا برضه هقولهم كده وكل واحد هيروح لحاله امين ي شبح؟
- سرسجيه ودمك حامي بس اعمل اي بحب في بقره
- هتتلم ولا المك
- خلاص يستي ده انتِ قفوشه جدا
قومت وسيبته واتحركت خطوتين بس وقفني
- بس انا لسه مقولتش شروطي
- شروطك؟
- اظن ده من حقي ولا اي!
لفيت وشي وانا بتكلم بصوت واطي
- كسر حقك يا بعيد
- بتقولي حاجه يا ملك؟
رجعت بصتله وقعدت قدامه تاني وانا علي وشي اسخف ابتسامه
- بقول واي هي شروط جنابك
- طول الفتره ال هنكون فيها سوا مضطره برضه تنفذي فيها كلامي
- مش فاهمه
- افهمك يعني مثلا بكره احنا خارجين سوا
- ده بعينك
لقيته ابتسم وكمل اكله
- يبقي خلاص اعتبري شرطك ملغي
مشيت وانا متعصبه وقفت قدام الكافيه وانا بحاول اتمالك غضبي ، عشان الخطه تمشي يا ملك لازم توافقي حتي لو مش علي هواكي ال بيحصل فأنتي مضطره توافقي علي كلام البغل ده ، دخلت تاني وقعدت قدامه
- انا موافقه
- كنت عارف انه اه علفكره
- بارد
قومت وانا سمعاه بيضحك
- مقبوله منك ي قمر
تلقائي ضحكت يا تري ناويلي علي اي ي مصطفي تاني!
- انا تحت البيت قدامك ٥ دقايق وتكوني تحت
علي ما استوعبت انه بيتكلم ، بصيت في الساعه لقيتها ٧
- ما هو يإما انت مجنون يإما مجنون برضه ، هو فيه حد عاقل يصحي حد الساعه ٧ الصبح عشان يخرجوا برضه ، استهدي بالله كده يا مصطفي واتخمد
- بقوا ٤ دقايق بسبب كلامك الكتير
- مصطفي انت بتتكلم جد
- افتحي الشباك وانتِ تشوفي
فنطيت من علي السرير وفتحت الشباك بصيت لقيته تحت
- انت اكيد اتجننت
- بقوا ٣ دقايق
قفلت وانا بجري في الاوضه ، لبست ال جه قدامي واخدت شنطتي وجريت علي تحت ، مجنون واي حاجه هتخطر علي باله يعملها
فتحت باب العربيه واول ما شوفته رميت الشنطه ف وشه
- صباح الخير يا حبيبتي
- صباح الزفت ، رايحين علي فين
- دلوقتي تعرفي
كان لسه هيتحرك
- قبل م نروح اي حته بالصلاه علي النبي كده انا عاوزة اطفح
- في بنت رقيقه تقول اطفح
- مش انا قولت يبقي فيه
لقيته اتحرك وفي نص الطريق شغل اغاني رومانسيه واهو ابتدينا في شغل المحن وشكله هيكون يوم اسود علي دماغه
- انا مش مرتحالك انت خاطفني يلا
- اه خاطفك اسكندريه
لقيت عيني وسعت ولمعت كده وطلعت قلوب واي الولا الحليوه ال بيفهمها وهي طايره دي
- اوعي تكون بتهزر
- انا عمري ضحكت عليكي
- طيب وقف هنا
- ليه؟
- وقف بس
لمحت سوبر ماركت فنزلت اجري ف الشارع زي المجنونه من الفرحه وجبت تقريبا كل السوبر ماركت
- اي كل ده
- دي شويه تسالي لزوم الطريق
- جايب بنت اختي معايا والله العظيم مش خطيبتي لا
- طيب علي الصوت ي عسل وبطل لوك لوك شويه
بدأت ادندن مع الاغنيه وانا باكل فانتبهت لنظراته فوقفت اكل وبصيتله
- وبعدين معاك بقي
- ما انتِ ال حلوه اعملك اي يعني
- طب..طب ياريت تبص قدامك عشان منعملش حادثه
لقيته ابتسم جامد اوي ، واي الولا المسمسم ابو ابتسامه جنان ده بس ياربي
- انت تؤمريني ي عسل
بصيت الناحيه التانيه وابتسمت ، واي ده انا مالي بقيت ملزقه زيه كده ليه فجأه وحبيت جو العشق الممنوع ده ، لا انشفي ي ملك انشفي ، مفيش ضعف للكلام الفارغ ده
- وصلنا واخيرا..
مسبتوش يكمل اول ما شوفت الشارع نزلت وجريت وانا بضحك فلقيته نزل وسند علي العربيه وهو بيضحك فقربت منه
- ها يا مصطفي هنطفح فين
- هو انتِ مبتوقفيش اكل فصلتيني م اللحظه الرونامسيه ال كانت هتحصل دلوقتي
- طيب سيبك من الرومانسيه دلوقتي لغايه ما نطفح وبعدين نشوفها انا وانت وماما وناهد وكلنا حاضر
- في مطعم في اخر الشارع ده بيعمل سندوتشات برجر حلوه قدامي يلا
- انت كمان طلعت من العيال التوتو اخص
- اومال عاوزه تتطفحي اي يختي؟
- ودينا نفطر علي عربيه فول كده ولا متعرفش عربيات فول كمان
- انجري قدامي يا ملك انجري
اكلنا وفضلنا نتمشي فجات علي بالي فكره فبصيتله وضحكت
- اي رأيك نتسابق علي ال يوصل لغايه العربيه ال هناك دي الاول
- وال يفوز؟
- هينفذ ال التاني هيقوله
عديت لغايه ٣ وجرينا واحنا بنضحك
- استني ي شيخه ده انتِ عندك صحه مش عندي
- اعتبر نفسي كسبت
- بالتلاته كمان
- حيث كده بقي غني
- نعم يختي
- بقولك غني يا مصطفي
لقيته اتوتر وبدأ يغني وهو باصص حواليه فأنا ابتسمت
- بصوت عالي مش سامعه
فلقيته بصلي جامد وهو بيهز راسه ب لا
- ده كان شرطي ومطلوب تنفيذه يا دكتور
سكت شويه وغمض عينيه وبدأ يغني وطلع صوته حلو اوي لدرجه اني مأخدتش بالي من كم الناس ال بقيت حوالينا وبتسمعه زي ، ومع نهايه الكوبليه بدأوا يسقفوا
- طلع صوتك حلو يولا
لقيته غمزلي
- اومال انتِ فاكره اي
اتمشينا علي البحر واتكلمنا عن كل حاجه حتي عن شراب البطوط المفضل ليا ، شوفنا سوا غروب الشمس
- مبسوطه؟
- اوي
- طيب بما انك مبسوطه وانا كمان مبسوط ما تيجي نلعب شويه في الاتفاق ال بينا
- بمعني
- يعني نخلي الاتفاق حقيقه
اتوترت لما فهمت هو عاوز يوصل لايه فوقفت
- انا عاوزة امشي
لقيت الابتسامه ال رسمها اتمحت كأن مكنش ليها اثر من كام ثانيه وانا السبب ف ده قام بدون ما يقول ولا كلمه ولغايه ما روحنا برضه متكلمش
- مبيردش عليا ي رحمه
- وانتِ فارقلك ف اي
- لا انا مش فارقلي بس.. بس انا مكنتش حباه يزعل مني وفي اليوم ده بالتحديد هو كان مبسوط
- ال مبيفرقلوش حد مش هيفرقله هل الحد ده زعل او لا يا ملك ، بطلي تهربي من الحب واتعلمي تواجهيه عشان توصلي لاخره..توصلي لبر الامان يا ملك
قفلت وانا بفكر ف كلامها ، انا فعلا عمري ما واجهت نفسي بشعور حساه ودايما بهرب معرفش بضحك علي مين ، لو بضحك علي قلبي عشان اسكت احساسه فعقلي مقتنع بالعكس وعارف الحقيقه بس المرادي ولاول مره يكونوا الاتنين مقتنعين بشئ ومجتمعين عليه ، معقول انا بحب مصطفي!
فضلت اسبوع مش قادره اوصله
- اخيرا رديت يا قاسي
- عاوزة اي ي ملك
- افتح الشباك وانت تعرف
مكملش كام دقيقه وكان قدامي فضحكت اول م شوفته ، لسه ملامحه جامده ، وكده هيخلي ابو شيماء يتهور ، حطيت الصب علي الارض وشغلت اغنيه بهاء سلطان يكش تحنن قلبه عليا ومتصحيش الشارع كله يتفرج علينا
"طالعه في دماغي نروق شويه ، اعدي عليك وتنزلي ، ده انت فوق دماغي وحقك عليا طول خصامنا زلزلني ، تعال ادلعك قولي اي هيمعنك ، جمبك مش هتعبك والمكان هيعجبك ، تعال بحلفك قولي مين مقريفك ، لو كنت انت في مكاني عمري ما كنت هكسفك"
انا لمحت علي وشه ابتسامه بس هو سوسه قدر يداريها فوقفت الاغنيه واتكلمت
- انا عارفه اني غلطت يا مصطفي بس انا كنت محتاجه الوقت ال يخليني اتأكد من مشاعري وانت عارفني صح غبيه ومبعرفش أعبر وأدي كلمه لاي شئ إلا لو حسباها كويس ، الكارثه بقي اني كنت واقعه فيك من اول مره ومكنتش ماشيه ورا حسابات عقلي ، انا فلت ايدي من حسابات الدنيا وفضلت متشعبطه زي العيال الصغيره في الاحساس ده من اول مره شوفتك فيها يا مصطفي بس مكنتش اعرف انه هو ده الحب..مكنتش اعرف الا لما غيبت عني ، والاحساس ده مبقاش موجود
لقيته ابتسم فضحكت
- وهو فيه حد عاقل يجي لحد الساعه ٧ الصبح برضه عشان يعمل ال بتعمليه ده
- انت خليت فيا عقل يا شيخ قدامك بالظبط دقيقه وتكون قدامي يولا
٣ ثواني وكان قدامي وبحركه عفويه لقيته مسك ايدي وكان لسه هيقرب
- اي ي شبح ما تظبط كده
- هتموتي محروقه لو مفصلتنيش من اللحظه الرومانسيه
- طيب بص اوعدك نروح نفطر المرادي بس وهنشوف اللحظه الرومانسيه دي بعدها علطول انا وانت وماما وناهد وكلنا
حطيت ايدي ف ايديه واتمشينا وانا بغنيله ، وأهي واحده قصاد واحده
"تلاته بالعظيم مقامك عظيم ، خلافنا واختلافنا موضوع قديم ، جايلك بنيه صفيه وقلبي سليم"
تعليقات
إرسال تعليق