خاطرة بعنوان "عيناها اللامعتان" بقلم المبدعه «أسماء عطيه » |تورنيد مصر

  

انا والليل صحاب متشابهين فى عتمتنا بندارى حزننا جوها علشان نقدر نكمل ويجى بعد العتمه نور ونبدأ يوم جديد منعرفش اى اللى هيحصل فيه بس متاكدين أن كل اللى جاى خير وحتى لو وقعنا شوية بسرعة هنقوم ونستقبل نور يومنا من جديد ..

" الحقيقة بقى أن انا دايما لوحدى عندى صحاب بس مش جمبى او انا مش بحب اظهر غير بأنى البنت اللي واخده الحياة ببساطة وبتعدى أحزانها ووحدتها لوحدها بضحكتها؛ الضحكة اللى ممكن يكون وراها وجع الدنيا علشان كده متاخدوش بالمظاهر يا جدعان .. طولت عليكم 

حياتنا مليانه أحلام بس مش كلهم "حلم" البنوته اللى ما فى حد يعرفها غير لما يحب روحها وضحكتها وتلقائية كلامها 

-حلم يا حلم قووومى بقى بطلى كسل اتأخرتى على المستشفى يا بنتى.. 

- حاضر يا ماما هقوم اهو ماانا عارفه يا ست الكل محدش بيعرف ينام في البيت ده 

- طيب بطلى لماضه وقومى علشان تلحقى تفطرى 

- ايوون جاية حالا بالا اهو " انا حلم" ايوة بالظبط اسمى حلم ولكم ان تتخيلوا معاناتى منذ الصغر مع اسمى بس بحبه جدا لأن أدركت اهمية الحلم فى حياة الإنسان، عندى 26 سنة ، عايشة مع مامتى واخويا "دكتورة أطفال ودى أحلى حاجة بعملها في حياتى 

- هو كل يوم ع الحال ده يا حلم. مفيش يوم تقومى من نفسك 

- اى ده اى ده الجميل زعلان منى وانا مقدرش ع كده ، صباح الفل عليكى يا ست الكل وست قلبى 

- كلى عقلى بكلامك بقى يا بكاشه؛ صباح الخير عليكى يا قلبى ، صليتى قبل ما تخرجى ؟! 

- ايوة يا ماما 

- اتاخرتى فى النوم ليه! نفس الحلم ولا اى 

- ايوة وسلام بقى علشان متاخرة جدا ؛ خلى بالك من نفسك ولو احتاجتى حاجه كلمنى

"نزلت من البيت للمستشفى فى الطريق بفكر فى الحلم اللى من بعد وفاة بابا وبقى جزء من حياتى يمكن لما ماما سالتنى حبيت اهرب قبل ما افتكر وكالعادة بهرب منه "وكأن خلقت حلم للهروب"

- دكتورة "حلم "حمد لله ع السلامة

- الله يسلمك يا دعاء؛ اى الاخبار النهارده؟!

- تمام يا دكتورة، فى ٩ حالات كشف و ٣ استشارة 

- تمام ربع ساعة وأبدى دخلى الحالات باانتظام وخلى بالك من الاجراءت والكمامات والمسافات بين الحالات يا دعاء..

- حاضر يا دكتورة ؛ بعد اذنك 

- أتفضلى 

بعد يوم طويل فى المستشفى ما بين كشوفات واستشارات ومرور ع الاطفال والاطمئنان عليهم وعلى صحتهم بضحكهم وحبهم قدروا ينسونى تعب اليوم والحقيقة دى ألطف حاجة ممكن الواحد يعملها التعامل معاهم 

- يااهل الدار؛ فينكم يا بشر انااااااا جيت طبعا نورت البيت انا عارفة 

- والله كنا مرتاحين من صداعك ده ولسانك يا حولم.."ده الرخم اخويا حازم ثانوية عامة وفاشل "

- اى ياد الرخامه والغلاسة وبعدين

اى حولم دى يا رخم اسمى دكتورة حلم يا فاشل 

- حلم ولا علم بقى مش فارقة 

- اى العسل ده لا كده كتير عليا يخربيت رخامتك يا ماااااااما تعالى شوفى ابنك ده..

- عاملة هيصة ليه يا حلم ، حازم بيهزر معاكى وانتى عارفه يا حبيبتي حمد لله ع سلامتك اكيد جعانه صح 

- عارفة يا ماما، الله يسلمك ؛ اكيد طبعا فى حد يقدر يقاوم جمال ريحه اكلك يا قمر..

- لغايت ما تغيرى هدومك وتصلى يكون الاكل جاهز 

- اشطااات يا ست الكل 

- يلايا حلم علشان الاكل ميبردش 

- جاية اهو؛ تسلم ايديكى يا ست الكل 

- بالهناوالشفا يا حبايبى 

- عامل اى يا حازم فى المذاكرة والدروس شد حيلك خلاص هانت 

- الحمد لله يا حلم دعواتك 

- مالك يا حلم سرحانة فى اى!!!حلم..

- نعم يا ماما بتكلمينى! أيوة يا حبيبتى مالك متغيرة هو فى حاجه حصلت معاكى 

- لا مفيش حاجة انا شبعت وهقوم انام شوية ..

"مش عارفة كنت بهرب من اى بس كنت عايزه اكون لوحدى ومفيش احسن من اوضتى علشان اهرب فيها من كل شئ...

-٢- 

الأحلام هى ما نتمنى حدوثه فى الواقع.. وكلا منا لديه أحلام يريد تحقيقها فهل نستطيع تفسيرها والوصول إليها ؟! 

" دخلت اوضتى وقعدت أقرأ شوية فى كتاب عن تفسير الأحلام؛ عايزة الاقى اى تفسير لحلمى اللى مش متأكدة انه حلم او واقع ده اللى بيخلينى فى حالة تفكير دائم، 

"من بعد وفاة بابا بدأت احلم بشئ غريب قد يكون جزء من الواقع لا أعلم.. 

"فى مكان وزمن ما بلد صغيرة "قديمة جدا من البيوت اللى فيها اقرب لقرى الريف المصري القديم وكل حاجة فيها بدائية للغاية،في وسط هدوء اللى فى القرية ومشى وانا بتفقد اركانها وأجزائها!! فجأة بسمع صوت بعيد بينده عليا مع صرخة توجع القلب على أثرها أقوم من النوم 

" بكون فاكرة كل شئ فى الحلم وكان غريب بنسبالى بس اتعودت على حلمى وبقى جزء من يومى او نومى..

قطع تفكيرى وشرودى دخول ماما الأوضة..

- حلم انتى لسه صاحية ؟ فى حاجة شاغلكى يابنتى ؟! 

- أيوة يا ماما لسه صاحية؛ لا مفيش حاجة بس بس كنت بقرأ شوية 

- انا عارفة اللى بتفكرى فيه، بس متفكريش كتير يا بنتى ده مجرد حلم مش أكتر. 

- انتى عارفة يا ماما أنه مش مجرد حلم وتكرره يقلق؛ انا بقيت أخاف انام علشان الحلم ده. 

- يابنتى ده انتى أسمك "حلم "وحلمك اكيد هتعرفى توصلى لمعناه، اطمنى وقومى أقرى وردك ونامى على وضوء يا حبيبتى. 

- حاضر يا ماما 

- يلا يا حبيبتى تصبحى ع خير 

- وانتى من اهله يا ست الكل 

" فعلا قمت قرأيت فى المصحف شوية خلصت قراءة وقومت علشان انام وانا عارفة أن هشوف نفس الحلم ونمت..

فجأة لقيت نفسي في القرية دى بس لوحدى مفيش حد تانى!! طيب فين الناس اهل القرية دى"فضلت أمشى وأجرى عايزة اوصل لاى حاجة أفهم اى اللى بيحصلى وانا هنا فين وليه ؟!..

وبعد جرى كتير لقيت نفسي وسط ناس كتير "أهل البلد فى مكان زى السوق ، بس ده مش حلم؛ دى حياة بجد وناس بتتعامل بس ازاى أنا هنا وليه ؟! اسئلة كتير جدا بتدور فى دماغى ملهاش اجابة، بدأت الناس تاخد بالها من وجودى ولبسى اللى بنسبالهم غريب "لبسهم أشبه بالبس البدوى او الفلاحين بس جميل جدا.. بيبصلوا بأستغراب ودهشه "

 لقيت نفسي ببعد عنهم وبجرى لاى مكان ميكونش فيه ناس بس مفيش "كأن الدنيا أغلقت ابوابها هنا"

- قعدت لأخذ انفاسى قدام احد الدكاكين الموجودة وأخذت افكر في ما يحدث واى السر في وجودى هنا وهقوم واصحى بعد سماع اسمى وصوت الصرخة ولا لا ؟ قطع تفكيرى وخوفى ودموعى أيد صغيرة تطبطب عليا.. 

- بصيت عليه يالله اى الملامح والجمال ده، طفل صغير فى العاشرة من عمره جميل القلب والقالب "كأنه جاء من السماء ليبعث الاطمئنان إلى قلبى مرة أخرى "

- سألنى ببراءة " مالك بتعيطى ليه؟ 

- بعيط على نفسى فجأة لقيت نفسي هنا ومش عارفة انا هنا ازاى وليه. 

- "إنَّ الله يَمتحِن قلبَك امْتحانًا قد يكون عسِيرًا ..فاثبتى 

- "رده طمن قلبى واختفت مخاوفى؛ فما أجمله من رد من صغير مثله. ردك جميل زيك قولى بقى أسمك أي ؟!

- وانت برضو جميلة؛ أسمى حمزة وأنتى ؟!

- أسمك جميل يا حمزة؛ انا أسمى حلم..أول ما قولت أسمى بصلى بأستغراب وقالى.

- حلم أنتى موجودة بجد !

- أيوة بس أنت تعرفنى ازاى ومنين زاد استغرابى ودهشتى ازاى حمزة يعرف أسمى واى معنى كلامه!

- إنت "حلم "حلمنا وأملنا فى حياة جديدة من غير تعب ولا مرض ..

- أستغربت كلامه وقبلما أسئله سمعت صوت صرخة ولكل بيجرى ناحيتها وحمزة اخدنى من أيدى وجرى بيا ناحية الصوت.. 

- وصلنا لمكان أشبه بالخيمة بس كبيرة جدا فيها أمهات وأطفالهم صوت صرختهم تخلع القلب من بين ضلعيه

- واقفة بين ذهول من اللى بيحصل حواليا مش عارفة اعمل اى اتحرك ناحية مين أنقذ مين أشوف فى اى ؟

"وسط كل ده لقيت أسمى بيتردد.. حلممممممم حلمممممم 

"كأن صوتهم وصوت صراخهم يدعو بكل عزم

لشئ ما يريدو حدوثه فى واقعه..

"خلقنا لنحلم ونسعى لتحقيق أحلامنا فى واقع لا يساعدنا على ذلك "

#حلم..

                                  -٣-

"عندما تتيح لك الفرصة لمساعدة الآخرين فى تحقيق حلمهم فلا تتردد عسى أن تكون سببا فى آنارة حياتهم من جديد ، وتجديد آمالهم وسعيهم للوصول

- وسط ذهولى بكل اللى بيحصل حواليا وبكاء الأطفال وصراخ الأمهات خوفا وفزاعا على فلذات كبدهم 

"يمسك بإيدى حمزة وكأنه يدرك ما يدور فى خاطرى وعدم استيعابى لكل هذه الأحداث ونظرته لى تمدنى بالقوة كى أستطيع الصمود..

"على الرغم من صغر سنه إلا انه يمتلك من القوة والشجاعة والروح المثابرة ما لا يمتلكه الكبار "

- حلممممممممممممم حلممممممممممم! 

"بعد الصوت ده الكل سكت، وصلت لصاحب الصوت وحمزة ممسكا جيدا ل يدى.. اظن أنه رجلا حكيما او ذو مكانه ما في هذة القرية كما أنه من الممكن ان يكون في 60 من عمره ، كما يبدوا أنه يعرف حمزة جيدا "

- حمزة :إزيك يا عم جاد؛ عارف مين اللى معايا ؟! 

- عم جاد :بخير يا حمزة الحمد لله؛ طبعا عارف معاك "همزة من حلمنا اللى بنسعى نحققه من سنين ودلوقتى حان أوانه "

- طبعا يا بنتى مستغربة كلامى وده واضح عليكى جدا يا حلم بس عايز اقولك انك مش فى حلم دى حقيقى وأنتى جزء منها "أسم كل واحد فينا جزء من حياته وما أحلى أسمك اللى فيه أحلامنا

- أحلام مين ؟! وانا فين وازاى ده مش حلم وهفوق منه ؟! ولو حقيقة أنا هنا ليه واى اللى بيحصل هنا!! والأطفال مالهم " فى اللحظه دى حسيت أن قلبى بيعلن عن انهياره وكأن ما يحدث لى فوووق طاقتى وتحملى"

- معرفش عده قد اى من الوقت كتير او قليل مش عارفة بس فوقت بعدها ولاقيت نفسى ع سرير قديم في نفس المكان "كنت فاكرة هفوق ع سريري في اوضتى فى بيتنا فتحت عينى لقيت حمزة جمبى وست عرفت بعد كده أنها "أم حمزة"

- أم حمزة :حمد لله على سلامتك يا بنتى .الف بركة قومتك بالسلامة ده حمزة وعم الشيخ جاد كانوا قلقنين عليكى وبذات لما رقدتك طالت..

- حمزة :حمد لله ع سلامتك يا حلمنا ..

- الله يسلمكم ويبارك فيكم؛ حمزة انا عايزة أشوف الشيخ جاد ضرورى!

- وهو كمان منبه علينا لما تفوقى نديله خبر هروح ابلغه حالا..

"عرفت من أم حمزة شوية معلومات ممكن من خلالهم اكون فهمت شوية من كلام الشيخ جاد وحمزة انى حلمهم "

الشيخ جاد..

- حمد لله على سلامتك يا حلم 

- الله يسلم حضرتك 

- بصى يا بنتى انا عمك الشيخ جاد "شيخ قرية حلم " اللى احنا فيها دى؛ علشان تفهمى اللى أنتى فيه ده موضوع كبير يطول شرحه وفيه هتلاقى الاجابة عن كل اسئلتك متقلقيش انتى معانا ووسطنا فى أمان. 

بلدنا دى أسمها "حلم " على أسمك يا بنتى ، احنا مستنينك من زمان علشان تنقذى حلمنا؛ ولادنا يابنتى هما حلمنا وأملنا من غيرهم ميبقاش فى حلم !! هما الأمل والقوة والسند والعزوة هما بكرة" اللى جاى بس اللى بدا يحصلنا من كام سنة فاتوا موت حلمنا وبيقضى عليه ولو استمر مش هيبقى في حلم !!

- اللى فهمتوا من الشيخ جاد وكلام أم حمزة قبل منه أن أطفال "حلم "جالهم مرض من كام سنة والغريبة ان المرض ده مش بيصيب غير الأطفال ومحدش عارف اى هو ولا اى علاجه وبسببه أطفال كتير ماتت وده كان سبب صراخ الأمهات وخوفهم على أطفالهم ؛ مش مستوعبة اللى بيتقال واللى عرفته ومش عارفة ممكن اساعدهم ازاى لأن البلد بدائية جدا..

" احنا عايشين علشان نحلم ونسعى نحقق علشان نحقق حلمنا.. ولو فشلنا في حلم بنسعى لغيره.."ولكن عندما يتعلق حلمنا بحياة فلا مجال للفشل يا اما نجاح ووصول يا اما موت 

-"نحن دائما في اختبارات من الله ولكن لا نعرف حكمة القدير من هذا ولكننى اعلم أن ما يختاره الله لنا هو الأفضل دوما؛ كنت محتاجة ألجا لربنا فى الوقت ده اسجدله لعلى وعسى ينير طريقى بما يمكننى فعله كى احافظ ع حلم "

- بدأت فى خطواتى كى اقوم بمهمتى للحفاظ ع حلم "كان الشيخ جاد، وحمزة، وامه خير عونا لى "

- بدأ سريعا خبر انتشار خبر كونى دكتورة أطفال ووجودى فى حلم لكى اساعدهم للحفاظ ع حياة أطفالهم وامالهم في الحياة 

" أقترح الشيخ جاد ع ان يكون هناك مكان يتم فيه علاج الأطفال بعيدا عن البيوت وتم ذلك بالفعل بمساعدة أهل القرية "كأنهم وجدوا خيطا امل يضئ حياتهم ويحقق أحلامهم "

- بينما كنت أستعد للذهاب إلى المكان الذى اصبح يشبه الوحدات الصحية النائية في الكثير من القرى 

- حمزة: حلم الشيخ جاد لقى مساعد ليكى وهو كمان دكتور ولكنه فى الأعشاب الطبية ويمكنه ان يساعدك وهو دلوقتى فى الوحده مع الشيخ جاد مستنيك..

- ده كويس جدا يا حمزة واكيد هيساعدنى كتير يلا بيناع هناك..لا أعرف ما الذى أفعله ولكننى انتبأنى احساس بأننى احد اهم هذه القرية ويجب على تقديم كل ما فى وسعى لمساعدتهم واكتمال مهمتى "

"خلقنا لنكمل بعضنا البعض ونتعاون فى الخير وليس العكس يا عزيزى                             

          

                                 -٥-

" لعل ما نحلم به يصبح واقعا فى يوما ما"..

عدت أيام كتير على اللى حصلى فى حلم، بس الغريبة ان مبقتش أحلم نفس الحلم من تانى كنت أيام كتير بتمنى أن ارجع لحلم وحمزة ومامته والشيخ جاد ومصطفى!!

"وعندما أحسست بغيابك أدركت أنك بداخلى وفى مكانا ما لم يصل إليه غيرك "..

فى يوم رجعت من الشغل زى كل يوم وبعد الغداء وشوية الرخامة من حازم ، دخلت أوضتى وقعدت أقرأ شوية؛ كنت بحاول أشغل نفسى بأى شئ علشان مفكرش فى اللى حصل في حلم والأيام اللى كانت هناك كنت مفتقده الأيام دى جدا وأهل حلم 

- أدخل يا حلم ؟!

- اى ده يا خبر أبيض يا ست الكل طبعا إنتى هتستأذنى قبل ما تدخلى..

- لا يا لمضه مش بستأذن بس شايفكى سرحانه والكتاب فى ايدك بس!! 

- ولا حاجة يا ست الكل ، كنت بفكر بس فى حاجات كده، قوليلي بقى حضرتك كنتى عايزنى فى حاجة ؟!

- ماشى يا حلم غيرى الموضوع على العموم يا بنتى انا كنت عايزة اتكلم معاكى في موضوع كده. 

- والله ابدا يا ماما مفيش موضوع اصلاعلشان اغيره يا قمر ، اتفضلى طبعا وكلى اذانا صاغيه يا ست الكل 

- جيالك عريس يا حلم وياريت تفكرى المرة دى مش زى كل مرة يابنتى ترفضى حتى من قبل ما تقابليه ولا تشوفيه..

- يا ماما مش قفلنا الموضوع ده قبل كده وقولتلك أن مش بحب الجواز بالطريقة دى ومش هقابل حد كده..

- يابنتى مينفعش انا عايزة اطمن عليكى قبل ما اموت ومفرحش بيكى.

- بلاش الكلام ده علشان خاطرى، ربنا يخليكي ليا ويباركلى فى عمرك وما يحرمنى منك أبدا يارب 

- يابنتى دى سنه الحياة ومحدش فينا مخلد فى الدنيا ووافقى ع الاقل تقعدى وتقابليه ده محترم هو واهله..

- حاضر يا ماما هفكر فى الموضوع..

- ربنا يهديكى يابنتى وتوافقى وتفرحينا بيكى..

- ماشى يا ماما "مش وقته خالص عريس الزفت ده . انا قلبى مش ملكى ومليش عليه سلطان..شد رحاله للى أختاره حبيب وراح يكون معاه مطرح ما يلاقيه "

- نمت وانا مش عايزة أفكر فى حاجة واضح أن الحلم هيبقى كابوس ويخنق فيا بس حلمت بمصطفى وقالى جملة واحده بس وفضل يرددها لغايت ما صحيت..

"الحب أرواحا توهب فهل تكفيكى روحى "

- صحيت والجملة بترن جوايا والقلب أصبح يرفرف من سعادته"صباح الفل والورد والياسمين يا ست الكل إنتى يا قمر..

- اى الروقان ده كله ع الصبح يا حلم ! صباح الورد يا ورد..

- يا ماما يا حبيبتى تكرهلى الروقان يوم فى حياتى 

- لا يا حبيبتى ربنا يروق بالك علطول يارب 

- يارب يا ست الكل يلا بقى يدوب الحق المستشفى 

- ربنا معاكى يا قلبى ،خلى بالك من نفسك 

- يارب؛ حاضر مع السلامة..

"وصلت المستشفى بس المفاجأة وأنا داخلة العيادة لمحت طفل شبه حمزة جدا لا مش شبه ده هو حمزة. جريت عنده بس لقيته أختفى حاولت أدور عليه بس ملقيتهوش؛ لقيت دعاء فى وشى بس..

- صباح الخير يا دكتورة، حضرتك بتدورى ع حاجة ؟!

- صباح الخير يا دعاء. لا مفيش بس اتهيقالى أن شوفت حد أعرفه علشان كده جيت اشوفه بس طلع مش هو. 

-حصل خير يا دكتورة هجهز لحضرتك القهوة لغايت ما توصلى العياده..

- شكرا يا دعاء ع تعبك تسلمى 

- العفو.

"بعد اكتر من كشف واستشارة. كان اخر كشف قبل المرور ع الأطفال اللى فى المستشفى بس المفاجأة بقى أن الحالة اللى دخلت كانت حمزة ومامته!! هو بجد حمزة نفس الملامح ولمعه العيون بس هو معرفنيش طيب ازاى مش ممكن "

- قبل ما مامته تتكلم انا اتكلمت وقولت حمزة! 

- بصتلى مامته بأستغراب ايوة اسمه حمزة..

- حاولت اتماسك وملامحى تظهر عادى وقولتله. القمر بتاعنا بيشتكى من اى؟ 

- حمزة يا دكتورة بقاله كام يوم مش بياكل كويس ياريت حضرتك تشوفى ماله وتكتبيله فيتامينات.

- لا لا كده مينفعش ومال مين اللى هيكبر ويحقق حلمه ويحمينا.

- رد حمزة ببراءة انا طبعا، انا بأكل كويس ومش بشتكى من حاجة والله..

- أنا مصدقاك يا حمزة بس توعدنى تاكل اكلك كله وانا هجبلك بنوبونى وشكولاته حلوة زيك كده 

- خلاص أوعدك

"فرحت جدا بإن شوفت حمزة فهو همزة الاطمئنان الاولى فى حلم"

- رجعت البيت بعد اليوم الجميل ده من اول حلمى بمصطفى لغايتما شوفت حمزة؛ يااهل الدار يا جماعه اللى هنا انا جيت.

- حازم: تيجى بدوشه وتمشى بدوشه يا ست انتى امتى بقى تتجوزى وتسبينا..

-قاعده ع قلبك يا لمض، فين ماما..

- انا هنا يا حلم فى المطبخ يلا بسرعة غيرى هدومك وتعالى ساعدينى ..

- هو فى اى يا ست الكل واساعدك فى اى بس. 

-جاى لينا ضيوف باليل وعايزكى تساعدينى..

- ضيوف اى اللى جاين فجاة كده ..

- حازم: حلم تعالى اقولك ضيوف مين ده عريس ليكى علشان نخلص منك ونرتاح بقى 

- عريس عريس ازاى!! يا مااااااااااااماااااااا عريس اى اللى جاى وازاى متاخديش رأى فى حاجة زى كده هو انا اى كرسى في البيت مليش رأى.

- انا مش قولتلك باليل وقولتيلى هفكر 

- اهو هفكر وانا لسه بفكر يعنى ولا قولتلك ايوة ولا لا يبقى جاى ليه.

- ومال الصبح كنتى مبسوطه ورايقه ليه ماانا قولت اكيد وافقتى.

- ياربى! يعنى لازم اطلع مكشرة علشان تعرفى ان لسه بفكر.

- خلاص اقعدى معاه وشوفيه وبعدين قررى زى ما انتى عايزة...

- حاضر يا ماما بس عايزاكى تعرفى انا مش موافقه من دلوقتى..

"دخلت أوضتى وانا خلاص مش قادرة اقاوم ولقيت دموعي زى المطر خوف وقلق مش عارفة هو مصطفى موجود وهشوفه ولا وهم وحلم بس حتى لو كان شئ مجردا فظللت أحبه..

"لو أن كل شئ ممتلئ بالتفاصيل وأنت مجرد... أحببتك أنت وتجريدك"

- حلم ماما بتقولك يلا العريس جه..

- حاضر يا حازم جايه اهو "جه لقضاءه عريس الهنا "السلام عليكم ورحمة الله وبركاته .

- وعليكم السلام ورحمة الله وبركاته..

- مامته: بسم لله ما شاء الله زى القمر يا حبيبتى..

- شكرا يا طنط تسلمى ده من ذوؤقك "ووشى فى الارض مش عايزة ابصله علشان ما اولعش فيه "

- اخته : دكتورة حلم معروف عنها كل خير هنا وفى شغلها..

" لا بقى لازم اشوف مين دول ما هو مش هرد ووشى فى الارض دايما..

- اى ده مش معقول!! حمزة ومامته ومصطفى كمان اى ده انا مش فاهمه حاجة فضلت متنحه لشوية من الوقت لا شويتين لاااااا تلاته اى ده !

هو مش حضرتك اللى كنتى فى المستشفى النهارده الصبح ومعاكى حمزة صح ؟!

- أيوة انا بالظبط بس أنا سلمى اخت مصطفى ومامت حمزة وبصراحةهو مكنش تعبان ولا حاجة بس انا كنت عايزة اشوفك من كتر كلام مصطفى عنك..

- اهاااااااااا اهااااااا هو انتى قولتى مصطفى هو اسمه مصطفى، انا سمعت صح..

- أيوة يا حلم هو انتى متعرفيش ولا اى. 

- لا معرفش 

" الغريبة ان الحوار داير ما بينى وبين سلمى وهو ساكت يحزنى هيطلع اخرس ولا اى..

- سلمى يلا يا جماعه نسيبهم شوية مع بعض..

- ماما: ايوة برضو احسن علشان يتكلموا ع رحتهم..

"يلهوووى ادبست وهما مشيوا.. وتقريبا هو اخرس مش بيتكلم..

- مصطفى "الحب أرواحا توهب فهل تكفيكى روحى لكى نحلم سويا فلا حلم ينفع بدونك ولا حياة تعاش لا توجد به حلم"

- جئت بلطفا فأذاب القلب فى عيناك .. لا أعلم أن كنت حلما ام علما ولكننى علمت أنك شئ لطيف جاء الى عالمى.. 

فهنئينا لى بك جئت لكى يضئ حبك عتمتى .