قرأت الرسالة مرة واتنين وتلاتة وعشرة ولسا مكملة قراءة فيها ، أقرأها مرة وأدخل أبص ع الصورة أتأكد من الشخص اللي باعتها ، مكنتش عارفة أرد بإيه ، مكنش عندي إحساس معين تجاه الرسالة أو الشخص اللي باعتها حتي علشان أقدر أعبر عنه بكلمات أكتبهاله كرد ع رسالته ، وفجأة كأني بقيت في سينما وقدامي شاشة عرض بتعرضلي حياتي من سنة بالظبط ، حياتي وقت ما كان هو موجود فيها .
_بابا مش موافق أخطب من برة البلد
= مش مشكلة نا معاك لحد ما يوافق
_ مش معايا فلوس أتقدم دلوقتي انتي عارفة ظروفي
= هتحملك ومعاك لحد ما الظروف تتعدل متقلقش
_ أنا تعبت من الخذلان أوعي تطلعي زيهم
= لو الدنيا كلها سابتك أنا عمري ما هسيبك ، صدقني أنا معاك للآخر .
_ أنا اتخانقت مع بابا علشانك ، لسا بردو مش موافق ، طب هو يختارلي ليه مش أنا اللي المفروض أختار اللي هعيش معاها .
= بس دا مينفعش ، ٱتكلم معاه بالراحة طيب يمكن يستوعب ويعملك اللي انت عاوزه
_ أنا مخنوق
= خير ربنا معانا ومش هيسيبنا إن شاء الله هتتحل
"جاسر انت فين مختفي ليه متقلقنيش عليك "
" انت مش بترد عليا ليه انت كويس؟"
بصيت ع رسالتي اللي اتعمل عليها صحين باللون الأزرق واستغربت ، دي أول مرة تحصل ، أول مرة يشوف رسالتي وميردش عليا ، يا تري فيه إيه !!
كنت هتجنن وأعرف ماله ، كنت فاكراه متخانق مع باباه ومخنوق ومش حابب يتكلم مع حد هه شوفتوا سذاجة بالشكل دا قبل كده ؟
إزاي كان دا تفكيري ؟ ازاي ملاحظتش أن دي بداية الغدر من ناحيته ، صدمتي اللي بجد لما لقيت رقمي اتحذف من عنده ، يمكن دي كانت أكبر من صدمتي لما عرفت اللي عرفته بعدين ، كان في دماغي ألف سؤال وسؤال ، لدرجة اني متحملتش وقررت إني طالما هو مشي من غير إجابات وساب ألف علامة استفهام ان أنا اللي هعرف بنفسي حصل إيه
= فيه شاب من بلدكم اسمه جاسر الحربي تعرفيه ؟
___ أيوة أعرفه مش دا اللي هيخطب ندي صاحبتنا ، ولفت للبنت اللي جمبها علشان تسألها تأكيدا علي كلامها ، وبالفعل البنت هزت راسها وقالتلها أيوة ، دول مرتبطين من 3 سنين وما صدقوا بقوا لبعض .
بدل ما أقلل علامات الاستفهام كترتها ، ندي مين ؟ ومين دا اللي هيخطبها ؟ و3سنين إيه دول ، هما قصدهم علي مين ؟ مش معقول يكون هو !! لما هو مرتبط بيها بقاله 3 سنين أومال هو معايا من 3 سنين بيعمل إيه ، ثانية واحدة كده!!! ندي !!! الاسم دا مش غريب عليا ، مش دي الإكس بتاعته ؟ مش دي اللي كان بيحكيلي عنها وأنه قد إيه مبقاش شايفها وأنها مش مناسبة ليه بأي شكل وأن كل تصرفاتها مفيش راجل يقبلها؟
= طب معاكي صورة ليها طيب ؟
___علي فكرة انتي ممكن تكوني عارفاها دي من سننا ، بس هي في كلية علوم.
= علوم ؟ ، أنا ليا أصحاب هناك ، تمام هسألهم.
= تعرفي بنت اسمها ندي معاكم في الكلية ؟
__ أيوة أعرفها بتسألي عنها ليه دي بنت مش كويسة!!!
= مش كويسة ازاي يعني؟
__ بصي هو انا مش بحب أتكلم عن حد بس هي مشهورة عندنا في الكلية أن كلامها كله مع الشباب وبتقعد معاهم وارتباطاتها كتير
= تعرفي تجيبيلي اسكرينات أو أي حاجة ليها مع الشباب دي
__ مش متأكدة بس هدورلك
= تمام هستناكي
___ آية انا لقيتلك اسكرينات وبعتهالك واتس
= تسلمي يا حبيبتي شكرا
لوهلة بقيت مصدومة ومش عارفة أنطق وأنا بشوف الاسكرينات ، معقولة هي دي ؟ ، هي دي اللي وافق يديها اسمه و خلاها مكاني !!!!!!
في وقت عصبيتي وصدمتي كنت هعمل حركة هندم عليها عمري كله ، كنت هاخد كل حاجة اتبعتتلي وأقوله شوف اللي بدلتني بيها ، شوف اللي آمنتها علي اسمك عاملة إيه ، مش عارفة إيه اللي صبرني وخلاني أهدي ، يمكن ربنا كان ليه حكمة أن دا يحصل واني مبعتش حاجة لأني واثقة لو كنت عملت كده كنت هفضل لحد ما أموت ندمانة ومحتقرة نفسي،وبعدين أنا هبعتهم ليه ، م أنا لو بعتهم هو هيسيبها ، أنا كده استفدت إيه؟ يعني أنا شايفة ربنا بيجيبلي حقي بأنه سلطه علي نفسه بأنه يختار البنت دي من بين كل بنات العالم وأنا اللي أروح أحذره منها ، هو حر كل إنسان مسؤول عن اختياراته ، ودا اختياره وهو يتحمله بقا .
قومت اتوضيت وصليت ركعتين ودعيت فيهم وقولت يارب زي ما زرعت حبه في قلبي ، طلعه من قلبي يارب ، الغريب اني صحيت تاني يوم فعلا مرتاحة وحاسة أنه مش فارقلي ، بس كان فيه لسا حاجة جوايا مش قابلة ونفسها يعيش نفس الوجع والإحساس ، كنت حاسة إني كده هرتاح بجد فعلا .
" بت مش جاسر ساب خطيبته ، بيقولوا أنه لقي علي تليفونها محادثات مع شباب معاها في الشغل "
لما قرأت الرسالة دي اتخضيت ، معقولة القدر عادل للدرجادي ؟ ، بس أنا ليه مش مبسوطة !! ، أو ليه مش شمتانة ؟ ، يمكن علشان دا مش طبعي !!
'ربنا يسهله ويعوضه '
دا الرد الوحيد اللي رديته ، متوقعتش أبدا أن انا أول واحدة هتيجي علي باله بعد ما يسيبها، وأن بعدها بيومين بالظبط هيبعتلي الرسالة دي ، معقول حس أن دا ذنبي؟ ، حتي لو كان كده مش هتفرق كتير بالنسبالي لأنه صفحة وقطعتها ورميت الكتاب كله وراه.
رجعت تاني للحظة دي ، ولتليفوني اللي في أيدي والرسالة اللي موجودة فيه . ولسا بردو مش عارفة أرد أقول إيه.
' ربنا يسامحك ، بس أنا ! مظنش أن هييجي يوم وأسامح .
" صدقيني مكنش قصدي أعمل كده ، كنت فاكر اني بحبها ومعرفتهاش علي حقيقتها غير بعدين ، انا مش عارف ازاي ضيعتك من إيدي ؟ ، أنا حاسس ان اللي حصلي دا ذنب اللي أنا عملته فيكي "
' وانت كنت مستني إيه؟ ، مستني حياتك تبقي كويسة إزاي وفيه شخص أنت ظلمته كان بيستني قيام الليل كل يوم بفارغ الصبر علشان يدعي ربنا يجيبله حقه ؟ ، عارف أكتر دعوة كنت بدعيها إيه ؟ اللهم نفس الوجع لا أكتر ولا أقل ، حسيت دلوقتي أنت عملت إيه فيا؟ عرفت أحساس أنك اديت ثقتك لحد وخانها من غير ما يتأثر ولا يرفله جفن ، ربنا يعوضك بعيد عني .'
" أديني فرصة واحدة طيب ، آخر فرصة صدقيني "
' الفرصة دي أنا سايباها لحد يستاهل ، وأنت متستاهلهاش صدقني ، مع السلامة '
"طب أنا نفسي أشوفك ، حتي ولو لآخر مرة "
' وأنا نفسي ملمحش طيفك ولو صدفة حتي '
الوقت الذي عجزت فيه حروفي عن وصف ما أشعر به ، كان ذلك اليوم الذي تأكدت فيه بأني لن أعود كما كنت ، لم يكن قلبي الذي كسر ، ولم تكن روحي ، ولم يكن شغفا حرصت علي تجميعه منذ زمن ، كانت إنسانيتي ، لن أنسي هذا اليوم ما حييت ، ولن أنسى السبب ، ومن كان السبب ، حين فاجئني تفكيري بشخص ليس أنا ، لم تكن تلك أنا ، كانت أخري لا تشبهني بأي شكل ، بعد فترة اكتشفت اني مدينة لهذا الشخص الذي كان السبب ، لذا لقد غفرت ونسيت ، لكن لم أنسى الدرس ، فقط أنتظر الوقت الذي أثبت فيه أني تعلمته بكل قواعده الصحيحة ، وكم ستكون لذة انتصاري كبيرة وقتها 🖤
تعليقات
إرسال تعليق