- ايه يا بنتي اهدي مالك داخله بزعابيبك كده.
- هو ليه بيتعبني وبيوجع قلبي كده.
- احكيلي بس حصل ايه لكل ده.
- عيطت .. انا ماستهِلش منه كل التجاهل ده والله.
- حضنتني .. هو مايستهلكيش والله انتي تستاهلي حد يقدرك.
- مش بإيدي اني حبيته هو دوناً عن الكل مش بإيدي خاالص.
قلوبنا مش بإيدينا دايما بنبقى حاطين مواصفات لفتى احلامنا وبندوّر عليها، لكن بمجرد ما تحبي بتنسي اي صفه انتي كنتي حطاها ، بتحبيه زي ما هو بكل عيوبه ومميزاته ، وانا للاسف حبيته وهو حلوف لا يُبالي.
- ملوكه بنت عمي القمر.
- بصيتله بشك .. الداخله دي انا عارفاها كويس، قول عايز ايه.
- انتي تعرفي عني كده.
- انا معرفش عنك غير كده أساساً.
- طب حيث كده ندخل في الموضوع على طول.
- اممم ارغي.
- انا هخطب.
- قفلت الكتاب اللي كان ف ايدي .. قولت ايه يا عنيا !
- اهدي بس هفهمك.
- عايز تخطب يا ياسين؟!
- يابنتي قوليلي هو انا متجوزك ف السر ؟!
- انت عايزها تاخد مكاني؟ وتفضل ترغي معاها وتختار اللبس اللي هتلبسه وتخرجوا مع بعض؟! لا ماكانش العشم، لقد تعاهدنا ع السنجله معا لكنك خليت بالوعد.
- ايه يا بنتي الدراما الاوڤر دي.
- يعني مانفعش؟
- خاالص.
- حاولت اضحك .. ألف مبروك يا ياسين.
يلا بقى عايزة انام ماتصدعنيش.
- براحه طيب ، ماتزقيش الاه.
مِشي وانا حاولت امسك دموعي بس ماقدرتش، هو للدرجادي معندوش نظر؟!، للدرجادي مابيحسش؟!
اصعب حاجه ممكن الإنسان يمُر بيها هو الحب من طرف واحد، انك تفضل تحب ف شخص هو ولا حاسس بيك ده موضوع مرهق جدا، بتبقى واقف مكانك لا طايل سما ولا أرض، لا عارف تكمل ولا تسيب وتمشي؟ ، بس لحظة أما تسيب هتبقى ماشي بلا روح سايب قلبك معاه.
- عيطت .. هيخطب يا نسمه هيخطب.
- يابنتي قولتلك ده مايستهلكيش
- طلع مابيحبنيش.
- عشان غبي.
- هو ماحبنيش ليه؟!
- ...
- هو انا قصرت معاه ف حاجه؟
- ...
- هل انا كنت استاهل كل ده؟!
اصعب سؤال ممكن يسأله الإنسان لنفسه "هو انا ماتحبش؟" انك تفضل تِدي فِ اهتمام وحب وفي الاخر ماتتحبش ده موضوع مؤذي جدا.
عيطت كتير اوي ، عيطت على حُبي، على كل لحظه حبيته فيها وماكانش من حقي، عيطت على نفسي وعلى قلبي، عيطت لحد ما حسيت اني خرجت كل حاجه مكتومه جوايا.
ومن وقتها اخدت قرار اني هبعد، هبعد لأن مابقاش عندي طاقه لاني احب تاني، هبعد لأن كفايه وجع قلب كده .. كفايه.
- ملك ايه رأيك نخرج النهارده؟
- مش وقته يا ياسين مش فاضيه.
- انهي قميص احلى ده ولا ده؟
- اي حاجه حلوه.
- بقولك ايه عارفه ال...
- ثواني يا ياسين ماما بتنادي عليا.
بِعدت .. ماكنتش عايزة أعشم نفسي أكتر من كده، الموضوع مش سهل عليا ابدا ، بس حرفيا مش هقدر اكمل، مش هقدر اشوفه مع واحده تانيه .. حرفيا مش هقدر.
كان بيجي يسأل عليا كنت بخلي ماما تقوله أي حاجه، نايمه، مش فاضيه، مش هنا، اي حاجه بس المهم مايشوفنيش.
- ايه ده انتي لسه مالبستيش؟!
- يا ماما مش عايزة أروح مش قادره.
-يلا يا ملك جدك هيزعل هو بيحب لمتنا حواليه.
- بس ..
- هستناكي براا
عارفه أنه هيكون هناك عشان كده مش عايزه اروح، مش هقدر أواجهُه، هو لازم يعني وجودي، خلاص يعني الترابط الأُسري مش قادر ! ، هقعد في البيت والله مش هعمل مشاكل، بُصوا خلوني في البيت وانا مش هتحرك من مكاني.
- يلاااا يا ملك
- قومت بسرعه .. حاضر حاضر
روحت هناك كانوا كلهم موجودين بس انا ماشوفتوش حمدت ربنا واتسحبت ع البلكونه، انا شخص مابيحبش التجمعات بحب الهدوء عشان كده روحت البلكونه قبل ما حد يندَه عليا.
- اخدت نَفس .. الحمدلله.
- بتتهربي مني ليه؟
- عااا في حد يخض حد كده.
- بتتهربي مني ليه يا ملك؟
- يخربيتك قطعتلي الخلف.
- ملك !!!
- عايزني أفضل موجوده ليه.
- عشان انا عايزك تبقي موجوده.
- ايوه وبعد ما ابقى موجوده ايه اللي هيحصل؟ في الآخر انت هتشوف حياتك وانا هفضل معلقه نفسي في حبال دايبه.
- قصدِك ايه؟
- قصدي انك غبي.
- ولو قولتلِك اني مش عارف اكمل من غيرك.
- لفيت وشي الناحيه التانيه .. ماينفعش يا ياسين انت هتخطب.
- ولو قولتلِك اني فركشت كل حاجه.
- بصيت لِيه .. عشان ايه؟
- عشانك
- !!!
- ماقدرتش اتخيل حياتي معاها، الوقت اللي بعدتي فيه كان كافي اني افكر كويس اوي ، افتقدتك جدا ف يومي وحسيت بقيمتك، يومي ماكانش ليه أي معنى من غيرك ، كنت باجي أسأل عليكي بس انتي كنتي رافضه تشوفيني ، طول الايام اللي فاتت كنت بفكر فيكي ، ومش عارف ليه كنت عايز أكلمك بأي طريقه بس تقريبا دلوقتي فهمت.
- فهمت ايه؟
- اني بحبك.
"وإني لا أريده كاملاً أو مثالياً ، يكفي أن يكون صادقاً ليطمئن قلبي معه".♥️
تعليقات
إرسال تعليق