*بالليل قبل الرحلة ب يوم*
_الوو ، حمادة عامل اي
_الحمدلله ي مازن انت عامل اي
_فل يسطا الحمدلله ، هتعدي عليا بكرة امتي
_هم بيقولوا الاتوبيس هيتحرك من المدرسة الساعة ستة ، يعني هكون عندك ع خمسة كدة
_تمام يسطا ، بقولك اي تفتكر عبدالله عمل الرحلة دي ليه قبل النتيجة
_تقريبا مكافئة نهاية الثانوية العامة ، ي عم اهو فرصة الواحد يشم نفسه ، مصدقنا خلصنا
_عندك حق ، دي سنة ما يعلم بيها الا ربنا
_طب يلا غور روح نام بدري عشان متقرفنيش ف الصحيان بكرة
مازن بضحك:
_ماشي ي عم افتكر الذل بتاعك ده
_غور ي مازن سلام
_ سلام
"يوم الرحلة ، ف المدرسة "
_منه
_نعم ي عبدالله
_اي عاملة اي
_الحمدلله انت عامل اي
_الحمدلله ، جاهزة للرحلة
ابتسمت
_اه ي عبدالله ، ربنا يستر بس وارجع بيهم كلهم كويسين
_اه إن شاء الله بس ف حاجة ، الاتوبيس مش هيتحرك من هناك قبل الساعة 10
ابتسامتها اختفت
_10 اي ي عبدالله
_بالليل ي منه ف اي
_اي الي ف اي ميعاد الاتوبيس انه يتحرك من هناك الساعة خمسة يعني قبل ما الشمس تغرب يعني اقصي حاجة الولاد دول هيبقوا ف بيوتهم الساعة تمانية
_وانا قولت الاتوبيس مش هيتحرك من هناك قبل الساعة 10 انا هنا مدير المدرسة واظن الي انا عايزه هو الي هيمشي
"نقف هنا دقيقة ، عبدالله مدير مدرسة****الثانوية ، نظرا لان باباه صاحب المدرسة فهو بقي مديرها وهو سنه 26سنة ، منه تبقي خطيبة عبدالله ده طبعا الي جانب انها مُدرسة ف نفس المدرسة"
_يعني اي الي انت بتقوله ده ، العيال دي اكبر حد فيهم عنده 18 سنة ، اهاليهم وافقوا انهم يطلعوا الرحلة لانهم عارفين انهم هيرجعوا بيوتهم بدري ، انا طالعة بيهم كلهم لوحدي يعني انا الي شايلة مسؤوليتهم كلهم ، انت فاهم يعني اي تحرك اتوبيس بعد غروب الشمس ع طريق صحرا ، انت فاهم اي الي ممكن يواجهنا ولا ان ممكن حد فيهم يحصله حاجة ، ده لو حد حصله حاجة اهله مش هيسيبوك
_عادي نبقي نقولهم الاتوبيس عطل ومعرفش يتحرك من هناك ف الوقت الي محددينه
_انت بتهزر طب لو مش خايف عليهم مش خايف عليا اني ارجع ف طريق زي ده ف الوقت ده
_اي الي هيحصل يعني متأڤوريش ي منه
"ف الاتوبيس"
محدش فاهم ليه الاتوبيس متحركش لغاية دلوقتي ، مازن اتكلم:
_هو احنا متحركناش ليه لغاية دلوقتي
احمد رد:
_مش عارف ، انا هنزل اشوف ف اي
_مأڤورش ! انت....
_ميس منه احنا اي الي معطلنا احنا مفروض كنا اتحركنا من نص ساعة الساعة ستة ونص
_معلش ي احمد هنتحرك دلوقتي
عبدالله بص لاحمد بخبث وعدم اهتمام
_معلش ي حمادة التأخير ده عندي
_تمام ي مستر عبدالله ، مستنيين حضرتك ي ميس
_تمام ي احمد
_عبدالله انا هبلغ جميع الطلبة ولو موافقوش الرحلة هتتلغي دلوقتي
عبدالله قدم خطوتين ناحية منه
_منه دول عيال وانا الي احدد الرحلة هتمشي ازاي والاحسن محدش يعرف فهماني
_انت بتهددني!
_ميس منه اتفضلي ع الاتوبيس عشان الرحلة ميعادها اتأخر
_ي عبدالله اسمع..
_اتفضلي
منه اتحركت اتجاه الاتوبيس ، وعبدالله اتحرك اتجاه السواق وبدا يتكلم معاه ، ف احمد حس ان ف حاجة غريبة
_مازن انا مش مطمن
_انا حاسس بحاجة بس مش فاهم بصراحة
_ميس منه هو كله تمام مش كدة
_اه ي احمد مفيش حاجة تمام ، يلا ي عم محمد اتحرك
"بعد مرور بعض الوقت"
_طب ي جماعة اي الملل ده دي رحلة يعني وبعدين لسة شوية ع ما نوصل
_نعمل اي ي عم مازن
_اقولك انا نعمل اي ي محمد ، ريم انا معايا الجيتار هعزف وانتي غني بما ان صوتك حلو
احمد بص ل مازن بعصبية ، وضربه بأيده ف بطنه
_ااااااه ، نسيت نسيت يخربيتك بطني ااااااه
رحمة اتكلمت :
_اه يا ريم غني ومازن يعزف
احمد بص ل مازن
_عجبك كدة
_نسيت ي عم احمد ، اهبب اي دلوقتي اعزف ولا اقولهم اي
_اعزف اعزف ده انا هعزف ع وشك لما نوصل
_ي ماما!
عزف مازن و ريم كانت بتغني مع تتابع نظرات الكل عليهم وخصوصا نظرات احمد ل ريم
_عم رميو ! عم رميو عينيك فضحاك
_احم اي ده بجد حد خد باله
_حد خد باله! ده العيال كلها باصة عليك
احمد ضربه تاني ف بطنه
_اااه ، الله يخربيت الي يهزر معاك ي اخي ، معلش ي جماعة انا مش هقدر اكمل عزف اكتر من كدة بطلناها الشغلانة دي شوفوا حد غيري احسن
ضحكوا كلهم ، عدي شوية وقت مش قليلين ، وصلوا
*منه وقفت ،اتكلمت بتوتر وكان باين عليها ان ف حاجة *
_يلا ي جماعة وصلنا الحمدلله زي ما اتفقنا المكان الي هنتجمع فيه كلنا مش عايزة حد يتحرك منه غير لما يقولي ، جماعة انا مفيش غيري معاكوا ف لو سمحتوا خليكوا قد المسؤولية عشان نرجع كلنا بالسلامة ومبسوطين ، بتمنالكوا رحلة سعيدة ، يلا بينا؟!
نزلوا كلهم من الاتوبيس وبدأو يتجمعوا ف مكان ويحطوا الخيم ويشوفوا هيقسموا وقتهم ازاي لغاية ما الاتوبيس يتحرك الساعة خمسة!!
عملوا حاجات كتير من الي مخططين ليها ، قربت الساعة تكون خمسة ، كانوا قاعدين بيهزروا وبيضحكوا ، قرروا يلعبوا لعبة الصراحة
_حد يجيب الازازة دي ي جدعان ، يلا انا هبدأ ، يلا ي عمر انا هسألك ، اي اكتر حاجة بتكرهها ف حياتك
فكر عمر دقيقتين و رد
_ان اهلي شايفني فاشل ومهما عملت مش هنجح
_ي بني اومال مين الي طالع من اوائل السنة الي فاتت
_ي عم هم مش شايفين كدة ، سيبك يلا انا هلفها ، احمد نفسك تعمل اي الخمس سنين الجايين إن شاء الله
_ادخل الكلية الي عايزها وانجح واشتغل وابني الكارير الي بحلم بيه *سكت احمد لثواني ، بص ل ريم وكمل*وابني بيت وأكون عيلة مع البنت الي هختارها وقلبي يحبها *لاحظ احمد ان الريم خدت بالها من نظراته فبتحاول تبص ف اي اتجاه تاني ، كل ده كان تحت نظرات منه الي كانت قاعدة معاهم مراقبة كلامهم كلهم ونظراتهم*
_احم طب انا قايم اتمشي كملوا انتو لعب
_استني ي احمد انا جي معاك ، بعد اذن حضرتك ي ميس
_اتفضلوا بس متبعدوش ي مازن انت واحمد لو سمحت
_تمام
اتمشوا شوية بعيد عنهم
_اضايقت ليه
_بتحاول تعمل نفسها مش واخدة بالها من كلامي
_طب ي عم متقولها بدل ما انت مضايق كدة
_مينفعش ي مازن هي ملهاش ف جو الارتباط والجو ده وانا مش عايز اغضب ربنا فيها
_طب وبعدين انت بقالك سنتين ع الحال ده يعني
_تقريبا مفيش حل
_لا ف انا عندي حل ، روح قول لأبوها
_اقول لأبوها اي ي مازن انت اتهبلت ، صباح الخير ي عمي انا عندي 18سنة وبحب بنتك
_ي عم اكيد لا روح اشرحله الموقف وفهمه انك مش عايز تغضب ربنا فيها بس ف نفس الوقت مش عايزها تضيع منك وهو اكيد هيفهم الموقف ،انت معملتش زي الباقي وروحت ارتبطت بيها من ورا اهلها
_هي اجمل من كدة بكتير
_طب خلاص فكر ف الي انا قولته اه ف حتة جنان بس ادينا هنجرب
_ماشي ي عم مازن يلا الاتوبيس المفروض هيتحرك
رجعوا تاني ليهم ، كانوا لسة قاعدين بيتكلموا ، بس منه كانت جاية من ناحية الاتوبيس ، اتكلم احمد بإستغراب
_ميس منه مش المف..
_احمد انت ومازن عايزاكوا دقيقة
خدتهم ووقفوا بعيد شوية ..
_ف اي ي ميس ، احنا متحركناش ليه الساعة بقت خمسة ونص احنا متأخرين نص ساعة
_احمد ، اسمعني لو سمحت انت ومازن يعتبر اعقل اتنين هنا ودماغكوا كبيرة شوية عن الي هنا فحاولوا تفهموا الي هقوله براحة
_ف اي ي ميس
_اتوبيس المدرسة مش هيتحرك من هنا قبل الساعة عشرة
استغرب احمد ومازن وقالوا ف وقت واحد
_ايه!
كمل احمد كلامه
_ميس يعني اي الكلام ده
_مستر عبدالله قرر ان ميعاد تحرك الاتوبيس هيبقي الساعة عشرة
احمد صوته علي شوية وبدأ يزعق
_يعني اي قرر ، الرحلة دي ميعادها الساعة خمسة
_انا مالي ي احمد منا زيي زيكوا
_حضرتك كنتي عارفة قبل ما نتحرك مش كدة
منه سكتت
_يعني كنتي عارفة ومقولتيش عشان كدة كان ف قلق قبل ما نتحرك
_هو قالي مقولكوش حذرني اني اقول عشان الرحلة متتلغيش
احمد صوته علي اكتر
_حذرك!احنا اهالينا عارفين اننا راجعينلهم بالكتير اوي الساعة تسعة ، عارفين اننا هنتحرك من هنا قبل غروب الشمس
مازن مسك ايد احمد وحاول يخليه يهدي
_احمد اهدي
_هو اي الي اهدي ي مازن ، انت مستوعب يعني اي نقعد هنا لغاية الساعة عشرة احنا ف وسط صحرا ، حضرتك عارفة ان ف بنات معانا ف الرحلة اهلهم قلقانين عليهم وهيقلقوا اكتر لو اتاخروا ، انتو اتجننتوا عشان تحركوا اتوبيس مدرسة ف طريق صحرا الساعة عشرة بالليل
_انا مالي ي احمد انا مالي عبدالله الي قرر ورفض اني اناقشوا وقولت كل الي انت بتقوله ده وهو مقتنعش ، ي بني انا طالعة وشايلة مسؤوليتكوا لوحدي حاول تقدر ده
_هو عايز مننا اي عبدالله عايز مننا اي ، احنا لو حصل حاجة لحد فينا هيبقي ع مسؤوليتكوا احنا يعتبر مخطوفين دلوقتي وع مسؤولية حضرتك عشان مقولتيش قبل ما نتحرك
_ي بني حاول تفهم انا زي زيكوا
_هو مش عم محمد موجود احنا هنتحرك دلوقتي والي يحصل يحصل
احمد لسة هيتحرك ، منه ندهت عليه:
_استني ي احمد ، عم محمد مش موجود ف الاتوبيس
_نعم!!!!!!!
تعليقات
إرسال تعليق