_خليها تدخل
دخلت بنوته صغيرة، لا تتعدى 19 سنه، حقيقي صغيرة جدًا علي انها تيجي عشان، تتعالج!
كانت خايفه ومترددة وبتتلفت حوالين نفسها، حاولت اخفف حده الموقف وخصوصًا اني عارفه انها بتبقى خطوة صعبه_اتفضلي اقعدي
قعدت فـ قومت اقعد قدامها واكون قريبة منها
ابتسمت لها_اسمك اية
~انا.. انا اسمي اَيلين
_اسمك جميل اويي، شبه عيونك الحلوة دة، انا اسمي موج
ابتسمت لي ابتسامه خفيفه
_ممكن اعرف جاية هنا ليه يا ايلين؟
اتكلمت بريبة~انا .. انا جاية اتعالج، كُله قالي اني مريضة لحد ما صدقت، انا جاية عشان تعالجيني واكون شاطرة ومحدش يقول إني فاشله تاني
_مين قال بس انك فاشلة!
~كُل اللي حواليا، كُل الموجودين قالوا كدة ومن كتر فشلي في كتير مشيوا، انا مش عايزة اكون فاشلة! انا مش مجنونة زي ما قالوا صح؟
اتكلمت وانا عنيا بتطوف بالحزن _طول ما أنتِ مش عايزة تكوني فاشلة مش هتكوني، وأنتِ مش مجنونة، انا شايفه بنوته لسه فبداية عمرها وجاية عشان لو في مشكله وحاسه أنها عايزة تتكلم مع حد فأنا هكون موجودة ليها بس كدة
ها احكيلي بقا واتكلمي براحه قوليلي مين قال انك فاشلة دي؟
ابتدت تتكلم والدموع بتتجمع فعنيها~ماما، ماما كانت اول واحدة تقولي إني فاشلة، بس انا ماكنتش فاشلة، انا جبت مجموع كبير
_طب امال اية اللي حصل!
ضحكت بوجع واتكلمت~طلعت بنت خالتي جايبة اكتر مني، عشان كدة دعتني بالفاشلة
دة كُله كُنت فابتدائي، دخلت اعدادي وجبت مجموع كبير بردو واكتر من بنت خالتي، جبت ٩٧ يومها مفرحتش، بصيتلي نظرة عمري ما هنساها وقالتلي "أنتِ فاشلة كدة ليه! مش عايزة تفرحيني ليه وتجيبي ١٠٠"، دخلت ثانوي والموضوع زاد، كان عليا ضغط كبير اني عايزة افرحها، عايزة اعرفها وأثبت اني مش فاشلة، وفعلًا جبت ٩٨، جريت عليها عشان افرحها واقولها اني مش فاشلة
اتكلمت بحزن ودموع مغرقة وشها~قالتلي "هو أنتِ متوقعه انك هتجيبي أقل من كدة بعد المصاريف دي كلها!"، دة انهاردة، يعني انهاردة انا كان المفروض فـ حضن ماما وهي فرحانه بيا، لكن أنا فعيادة امراض نفسيه! بتعالج عشان بقيت حاسة اني فعلًا فاشلة، انا بس كُنت عايزة افرحها، كُنت عايزة اوريها اني مش فاشلة وأنها كلمه غلط ليه قالت كدة!
عيني دمعت، مش متخيله كم القهره اللي جواها دلوقتي وهي فـ يوم المفروض تكون أسعد واحدة فيه، مش متخيلة أن في أُم ممكن توصل بنتها للحاله دي!
قومت حضنتها وانا بتكلم _انا فخورة بيكِ اوي، ومبسوطة بنجاحك، أنتِ لازم تكوني مبسوطة، اوعي تفقدي الثقه فنفسك، احنا هنكمل لكن مش انهاردة، انهاردة هتروحي وتفرحي بنتيجتك، هستناكي تاني
مسحت دموعها وابتسمت لي~هاجي، انا محتاجة اتكلم معاكي.
حطيت المفتاح في الباب وانا بفتحه، فسمعت صوته وهو بيقرب مني
= اتأخرتي ليه انهاردة؟
_كان ورايا حالات كتير
مسك أيدي وشدني عشان نقعد فالبلكونة في نهاية كُل يوم=طب تعالي، احكيلي يومك
بصيتله بحزن وانا لسه بفكر فـ "ايلين"، حقيقي حزينه على حالها، مش من طبيعة شغلي اني أتأثر بكُل حاله تجيلي، لأني واجبي اسمع حالات اكتر، لكن مفهاش حاجة لو قلوبنا عبرت عن حُزنها شوية!
_في بنوته جاتلي انهاردة
=وحصل اية؟
اتكلمت بدموع كُنت كتماها طول اليوم_جت عشان تتعالج، بنت عندها 19 سنه جت تتعالج من أذى نفسي خلقهولها كُل شخص فحياتها وأولهم اللي المفروض أحن شخص عليها، والدتها يا أمان!
=من غير عياط يا موج!
_احساسها اية لما تتعب وتنجح عشان تفرحها وتيجي هي تكسر فرحتها!، القلب بيتفتت من أثر الكلمه الوحشة، تخيل أنها تيجي من أقرب الناس ليك!
جه ميعاد مقابلتي ليها للمرة التانيه، كُنت مستنيه أقابلها وأشوف عملت ايه!
~ابتدي؟
_سمعاكي
اتكلمت بدموع كعادتها~ انا روحت البيت، حاولت أفرح لكن حقيقي معرفتش طول ما هي مش مبسوطة بيا، كُله فرحلي إلا هي!، من ساعت موت بابا وانا مليش ضهر، هو الوحيد اللي كان بيشجعني على كُل حاجة، كان بيراضي قلبي وقت ما تجرحه هي
ظهر بعديها شخص، حسبته هيكون ركن هادي وحنين اميل عليه، لكن كان أذى جديد داخل حياتي! اخر مرة شوفته فيها كان بيقولي "أنتِ مريضه، أنتِ محتاجه تتعالجي لأنك مش طبيعيه، زي ما هي دايمًا بتقولك: أنتِ فاشله فكُل حاجة!" كُل دة لمجرد اني كُنت بطمن عليه! واتاريه كان مع واحدة تاني وعشان كدة اتعصب، صدقيني انا مش فاشلة، انا مش قصدي حتى أكون فاشلة
حتى أقرب صاحبة ليا قالتلي اني فاشلة واني مش هنجح فـ حاجة عشان هي بتغير مني! مع أنها كانت بتجيب دايمًا مجموع عالي زيي، لكني ببقى أعلى منها، هي بتغير مني!
_لكن انا وأنتِ عارفين انك مش فاشلة!
~كُتر ما هتسمعي كلمه علي نفسك هتصدقيها، طول ما اللي حواليكِ بيعرفوكِ انك فاشلة غصب عنك عقلك هيبتدي يقتنع بيها، وكُله بيقولي كدة!
_تسمحيلي اقولك انا حاجة جديدة، وهي أنك مش فاشلة
لما حسيتي انك ابتديتي تتأثري جيتي هنا عشان تعالجي وجع جواكي، تعبتي وواجهتي كُل موقف وكلمه وحشة حسيتي بيها وكُنتِ دايمًا ناجحه فدراستك، مستسلمتيش وسيبتي كُل حاجة، أنتِ قوية، وناجحة .. صدقيني أنتِ ناجحة جدًا
~انا بشكرك اويي .. أنتِ تاني حد يقولي اني ناجحة بعد بابا
ابتسمت لي بتأثر وقربت .. حضنتني!
عدىٰ كذا يوم وجع ميعادها، لكنها مجتش
خوفت عليها، حقيقي كأنها بنتي!، مقدرتش استنى وخدت عنوانها اللي كانت مسجلاه اول ما جت وروحت بيتها
فتحت لي بنوته، تشبه لـ عُمر ايلين كتير، الظاهر انها بنت خالتها
_دة بيت آنسه ايلين؟
•ايوة هو!
_طب هي موجودة؟ ممكن اشوفها؟
عينيها دمعت وهي بتتكلم•انا آسفه بس .. ايلين ماتت
لساني اتشل! كأنها صاعقه نزلت عليا، معرفتش اتكلم، انا بس .. مش عارفة اتحرك!
_از.. ازاي!
•انتح.رت
دخلت البيت معاها بعد ما شافت صدمتي! عيني اللي الدموع بتنزل منها وكأنها فقدت جزء كبير منها
دخلتني أوضه وعرفتني أنها اوضه ايلين، المنظر كان كالآتي، ست باين عليها القهره، قاعدة عالسرير وهي سانده راسها عليه ومحاوطه صورة، الظاهر بردو أنها صورة ايلين، وان دي والدتها!
_انا دكتورة موج، ايلين جت عندي مرتين لأنها كانت بتتعالج
بصت عليا وكأنها عرفاني، أو مستنياني!
°حض .. حضرتك الدكتورة؟
_ايوة!
قامت من مكانها وادتني ظرف ملفوف كرساله، خدتها ومشيت بعد ما عرفت انها رساله ايلين كتبتهالي قبل ما تموت، زي ما كتبت لكل شخص منهم رساله زيها، تحمل من وجعها كتير
"أنتِ الوحيدة اللي سمعتيني ومبعدتيش، لكن المرة دي انا اللي هبعد، أنتِ شاطرة اوي وكُنتِ هتعالجيني، لكن أذى نفسي عمره ما كان هيطيب، دة مش ذنبك! انا بس اللي تعبت زيادة شوية، انا مقدرتش اكمل، مقدرتش اسمع كلامهم اللي بيقتلني، انا خوفت اكون مريضه بجد! كلامهم قاسي اويي، بيوجع القلب كمان تعرفي! وهما وجعوا قلبي اوي .. اوي حقيقي، انا بس مقدرتش استحمل تاني فكُنت عايزة استريح، انا عارفة انك اكتر حد هيزعل عليا، بس بتمنى أن هي كمان تزعل عليا، أو لا عشان متتوجعش، انا مش عايزة احسسها بنفس الإحساس اللي كُنت بحسه، انا كتبت ليكوا كلكوا رسالة أخيرة، بتمنى تنجحي فحياتك، واوعي تأذي طفلك اللي هيجي بكلمه، صدقيني هو بس هيكون محتاج حضن، حضن منك ينسيه كُل شعور وحش هيحس بيه، محدش محتاج اكتر من حضن وإحساس أن حد واثق فيه، وفنجاحه"
قفلت الرساله مع دمعة جديدة نازله من عيني، بصيت فالسما وانا بودعها، العالم دة كان قاسي .. قاسي اوي على قلب يشبهلها.
"آثر الكلمه الوحشة مبيروحش، بيفضل ياكل فقلبك لحد ما ينهيه، هو الانسان اية مُناه غير حضن حنين يتحامى فيه!، حياه هاديه وناس بيحبهم يكونوا جمبه، يدعموه ويعرفوه أنه مش فاشل، وأنه لو فشل فحاجة مش هي نهاية العالم، هينجح ودة الأكيد، متأذيش انسان بكلمه، أثرها علي نفسيته وقلبه مش هتروح، يمكن أنتَ تنساها، لكن اتأكد أن قلبه عمره ما هينساها، نهايات كتير انتهت زي ايلين، يمكن مش كُلهم انتهوا بموتهم لكن صدقني الأكيد أن قلوب البشر كانت قاسيه عليهم اوي
آثر الكلمه السيئه لا يزول، كأثر الفراشه بالضبط"
تعليقات
إرسال تعليق