كُنت قاعده في أرضية البلكونة وسانده ضهري علىٰ الحيطه وممده رجلي علىٰ الأرض.
-إتفضل.
قعد وسند راسه علىٰ رجلي وغمض عينه وإتكلم-مش عارف أطلع البيت وإنتِ زعلانه!
-بإيدي شيء أعمله؟
-بإيدك تسامحيني.
-صعب.
-بس مش مستحيل.
بصيت للسما وإتنهدت بحُزن-إطلع بيتكم يازين.
إتعدل وقعد قصادي وإتكلم-أنا آسف.
-يراجل محصلش حاجه متتعبش روحك حصل خير.
-بطلي تداري.
-هو أنا أستاهل منك كده؟
-صدقيني غصب عني حقك عليا.
بصيتله بوجع-إيه إللي غصب عنك معلش! مشاعري إللي كانت لعبه في إيدك تقرب وقت ماتحب وتبعد وقت ماتحب ده غصب عنك؟ العك إللي بتعمله بجريك ورا البنات ده غصب عنك؟ عدم إحترامك لمشاعري أو للإنسانه إللي معاك غصب عنك؟ إهمالك ليا غصب عنك؟
-كانت فتره والله وعمرها ماهترجع.
-لنفسك مش ليا، أنا مين ؟ أنا مش بالنسبالك حاجه أصلًا.
-والله مافيه واحده قدرت تاخد مكانتك عندي.
-إنت كنت ضامني وعلشان ضامني كنت بايعني.
-عمري مابعتك.
-عندك حق علشان ماإشترتنيش أصلًا.
مسك إيدي ولمحت دموعه في عينه-إديني فرصه وإسمعيني.
سحبت إيدي ودموعي نازله علىٰ خدي بقهر-إبعد يازين، تعالىٰ نتفارق من دلوقتي وإحنا لسه بنحترم بعض
ولو شويه، أنا مش عاوزه أكرهك يازين.
-مش هضيعك بغبائي تاني.
-تعرف إن الحُب علىٰ قد الزعل، حُبي ليك كبير يازين علشان كده مش قادره أسامحك، أنا كُنت دايمًا بخاف تسيبني وتحب واحده تانيه، كان كله يقولي عليك بلاوي وأنا اقف قصادهم وأقولهم شوفوا حبيبي بعيني وإنتوا هتسحبوا كلامكم، صحابي يحذروني ألف مره من غدرك وأنا أقولهم لأ بيحبني وأجملك في عنيهم، كان كلامهم بالنسبالي هطل قصاد كلمه منك إنك بتحبني، إكتشفت إني لعبه في إيدك وإن حُبي ليك مالوش قيمه عندك، بعت قلبي بالرخيص بعد ماإشتراك بالغالي، مش هنكر إن إنت كُنت أول حُب في حياتي وأول فرحه بجد بس قصاد ده كُنت أول وجع وجرح برضوا، العُمر واحد يازين وعلشان العُمر واحد فأنا أستاهل أتحب، أستاهل يتفاتلي بلاد، أستاهل أحس إن إللي قصادي بيدور حواليا علشان كلمة واحده بس مني، أنا مشاعري أغلىٰ من إني أخليها مع واحد يرخصها، وصدقني مهما قولت مش هعرف أرجع تاني، ونصيحه مني دور علىٰ البنت إللي بتحبها بجد وإللي متقدرش تتخيل نفسك مع حد غيرها وإشتريها بالغالي.
قلعت الدبله وحطيتها قصاده وخرجت وصوت شادية عِلَىٰ في المكان بِكُل حُزن
"ياقلبي ياإللي إشتريت عذابك
وبعت أجمل أيام شبابك
لو عِشت خالي وقفلت بابك مكانش سهم الزمن يصيبك
يقلبي سييبك سييبك يقلبي"
تعليقات
إرسال تعليق