_انا نازلة.
'خرجت من المطبخ وهي بتنادي'
_طب استني كُلي قبل ما تخرجي.
_معلش والله متأخرة، سلام.
'بصت لي بهدوء وردت بزعل'
_مع السلامة.
”نزلت وروحت المدرسة على طول، طلعت في الاذاعة المدرسية ومن بعدها روحت الفصل بدون ما أحيي العلم واستنيت بقيت الطلاب ييجوا“
'ضحكت لي'
_طلعتي على طول.
_ااه.
_طب يلا عشان ننزل لتدريبات الرياضة.
_تمام.
”نزلنا وبدأنا تدريب، وفي نص الوقت اخدنا بريك فقعدت اظبط طرحتي وانا بضحك معاهم“
_والله ماما جابت لي لانش بوكس بس سيبتها في الشنطة.
'ردّت عليها ليل'
_لا انا فطرت قبل ما اجي، ومعايا فلوس كمان اجيب من المقصف.
'بصوا لي عشان اقول ايه اللي مخططة له للاكل'
_مفطرتش بس هجيب حاجة من المقصف اكيد.
_طب انا رايحة اشتري، اقابلكم هناك.
”قمر راحت معاها وانا طلعت الفصل كان فاضي، فقعدت ونمت على الديسك لحد ما حسّيت بخيال فوقي فرفعت راسي“
'ابتسم لي'
_انتي كويسة؟
_ااه الحمد لله.
_قاعدة لوحدك هنا ليه؟
_زهقانة فقولت ارتاح هنا شوية في هدوء.
'اتكلم وهو بيتجه ناحية شنطته'
_فطرتي؟
_لا، 'طلعت فلوسي' بس عايزة من المقصف اكل، روح هات لي.
'بص للفلوس وبص لي'
_استغلالية، 'اخدهم' اجيب لك ايه ياختي؟
”قولت له عايزة ايه ونزل يجيب لي الحاجة وهو بيبص لي بقرف من استغلالي ليه، بعدها بدقايق لقيته قدامي بالاكل وحاجات ليه كمان فاخدت منه الحاجة وبدانا نفتحها وناكل“
'وهو بياكل'
_على فكرة انتي مش على بعضك و مش عايزة تتكلمي.
'ضحكت'
_مش على بعضي ازاي؟
_زعلانة من حاجة؟ مخنوقة؟
_ولا اي حاجة، انا تمام التمام.
'رجع بضهره واتكلم وهو باصص لي'
_متخانقة مع مامتك مثلا؟
_لا، حتى النهاردة متكلمناش غير لما كنت جاية المدرسة.
'برّق لي باستغراب وهو مصدوم'
_نعم ياختي!
'ضحكت'
_ايه؟
”بص لي بقرف وقام يجيب كراسة من شنطته ورجع قعد قصادي وهو مكشّر“
_مريم.
_نعم.
'بص لي بعد ما ساب الكراسة قدامي'
_لما بكون متدايق بروح اقعد مع مامتي، ولما اكون زعلان بروح احضنها وبعدين امشي من غير ما احكي حاجة، ولما اكون تعبان من المذاكرة ببوس ايدها وراسها عشان ارتاح، وزي ما انتي دايما بتقولي لي اتعامل مع اخواتي بحنية وحب انا بقول لك اتعاملي مع مامتك على انها روحك لو حتى مش هتحكي، اتكلمي معاها وهزري وافتحي كلام معاها متسيبيهاش لوحدها، فاهمة؟
'ضحكت له ودموعي هتنزل'
_محسسني اني براوية ليه؟
_انتي مش كدا، انتي مش بتحبي تبيني زعلك لحد، بتخافي تظهري ضعفك لحد، حتى لما بتحكي بتحكي النص العادي وتسيبي النص اللي يوجع لنفسك عشان متحسيش بشفقة حد عليكي.
_ايه الكلام الكبير دا؟
'قام وقف وبص لي بضحكة تهدّيني'
_انا معرفكيش من يوم او اتنين، انا اعرفك من 11سنة، يعني فاهم فيكي ايه وساكت، متحوريش عليا بس، 'مد لي الكراسة' دي الدروس اللي فاتتك بسبب النشاطات ياريت ترجعي تذاكري وتهتمي شوية.
”سابني ونزل وانا لمّيت الحاجة ورميتها في السلة وقعدت مكاني، دقايق وجرس فترة الراحة ضرب والمشرفين بداوا يمروا ع الفصول عشان الطلاب ينزلوا ارض المدرسة، فنزلت وقعدت مع البنات“
_انتي روحتي فين لما احنا روحنا المقصف؟
'بصيت لها وابتسمت'
_طلعت الفصل لاني تعبت بس بقيت احسن.
_الحمد لله.
”قعدنا نحكي شوية ونهزر واتمشينا شوية في المدرسة لحد ما الفترة خلصت وطلعنا، بس بطني بدأت توجعني واضطريت استأذن وارجع البيت وماما عملت لي مشروب يدفي لي بطني“
_بطنك وجعتك اكيد عشان اكلتي اكل غير صحي من المقصف، كان لازم تفطري ع الاقل.
_مش حوار يا ماما، انا بقيت احسن اهو.
'حطت قدامي المشروب'
_اشربيه عشان تتحسني، هروح اكمل غسيل.
_طيب.
”خرجت وانا قعدت ع الفون شوية لحد ما افتكرت فُلْك واللي قاله ليا، روحت ناحية شنطتي وقعدت قدامها وبدات اطلع الكراسات لحد ما طلعت كراسة فُلْك ففتحتها على آخر درس أقرأ المكتوب“
’مجتمع الإنسان يندرج إلى أكثر من طبقة، أول الطبقات الأهل، يليها الأقارب ثم الأصدقاء ثم الجيران ثم الزملاء فالمدرسين والمعارف الآخرين، في النهاية اعتماد الإنسان يقتصر على أهله من دمه..‘
”كلام كتير بعدها، تقريبا موضوع تعبير، فضلت باصة للكراسة واقرا الكلام وانا مش قادرة افهم هل دا عندنا في المنهج ولا دا من افعال فُلْك؟ نقلت اللي في كراسته لكراساتي وحطيت الحاجة مكانها بكل هدوء وخرجت قعدت قدامها وهي بتفصص توم“
_هو انا كنت عاملة ازاي وانا صغيرة؟
'ابتسمت'
_كنتي عسولة اوي، مكانش في احلى منك في الجمال والروح، وكنتي تحبي تصاحبي كل الناس والعصافير كنتي تجري وراها وتمسكيهم تلعبي معاهم وتجري ورا القطط تمشي ايدك عليهم، كنتي دايما تضحكي وتخرجي من الصبح ترجعي لي المغرب متبهدلة وهدومك متربة بس كنتي ترجعي بتضحكي.
'مثلت الصدمة والمفاجأة'
_بضحك؟ واااو! جديدة دي.
'بصت لي من فوق لتحت'
_انتي بس اللي انكمشتي في نفسك وبقيتي ساكتة لا ضحكة ولا حتى دمعة.
_هو انا كنت بتعامل معاكي ازاي؟
'رفعت كتفها'
_عادي، يعني لاني بسيبك تخرجي مكونتيش تقعدي معايا فمتعرفيش عني حاجة، ممكن لانك كبرتي الوقتي وبتقعدي في البيت تكوني عارفاني شوية.
_يعني مكونتش قريبة منك او غيره؟
'حاولت تفتكر'
_لا.
”ضحكت لها وغيرت الموضوع لمواضيع وانا بضحك، وبعدين دخلت انام عشان ارتاح ووقت المدرسة هقوم واروح عادي“
_صباح الخير.
_صباح النور، اغسلي وشك وتعالي عملت لك فطار.
_هاخد شاور بس.
_لا خديه بعد الفطار، يلا بس.
”قعدتني وقعدت تاكلني وجابت لي شاي على ما تجهز لي هدومي اللي هلبسها، بعد الفطار خدت شاور وجهزت للمدرسة ووقفت عند الباب“
_ماما، انا ماشية.
_مع السلامة.
_سلام.
”روحت المدرسة وكالعادة محضرتش الطابور وطلعت الفصل، بعدها بشوية الطابور خلص والطلاب بدأوا يطلعوا“
_عملتي ايه النهاردة؟
'كان في الديسك اللي قصادي فبصيت له'
_فطرت،'طلعت فلوسي' وهشتري تاني.
_وبطنك توجعك تاني؟ انتي ليه مش بتتعلمي من اول مرة؟
'ضحكت'
_عادي.
_ومامتك؟
_مالها؟
'بص لي بسخرية'
_سلميلي عليها..'اتعصب' حضنتيها ولا لا يا بت!
'ضحكت'
_نسيت.
'رجع بضهره'
_منك لله.
”ضحكت وبصيت قدامي، مفيش حاجة تتحكي وتتقال، من واحنا صغيرين سوا وهو عارف اني مش ميالة لأهلي زي ما انا عارفة انه بيحب اهله واخواته بس بعيد عنهم لانه برا البيت دايما، وبنحاول نعطي لبعض نصايح بطريقة متزعلش الطرف المتلقي عشان يقتنع“
_هيتعمل لكم استدعاء ولي أمر، امضوا!
”خناقة صغيرة وصلت للاداريين في المدرسة، كنت بقوم اجاوب سؤال فطالبة تانية اتدخلت وغلّطت في اجابتي اللي كانت اصلا صح، الموضوع كبر ووصلنا للاداريين، المهم اني هسلم لمامتي ورقة الاستدعاء وخلاص“
'مديت لها الورقة فـردت'
_اي دا؟
_استدعاء ولي أمر.
_ليه؟
_اتخانقت مع واحدة غلطت ووصلت الخناقة للادارة.
'طبطبت على كتفي'
_ادخلي نامي او خدي شاور وذاكري.
_طيب.
”عندها تصالح مع نفسها رهيب، مقتنعة ان بنتها مش هتعمل غلطة غير لما يكون في سبب، وان غلطتي دي ما هي الا رد فعل لِـفعل آخر، دخلت اوضتي وبدأت اذاكر لحد ما هي دخلت قعدت معايا“
_اعمل لك كيك؟
'بصيت لها'
_اعملي وتعالي.
'ابتسمت'
_ماشي.
”خرجت وبعدها بثواني لقيتها بتخبط وداخلة شايلة في ايدها صندوق بتبص له باستغراب“
_من فُلْك.
_هو كان هنا؟
_ااه، كنت تحت بجيب دقيق من المخزن ولقيته لسة هيرن ففتحت له.
'شاورت ع الصندوق'
_فيه ايه بقا؟
'رفعت كتفها'
_معرفش، قال لي اعطيه ليكي وانه مفيهوش حاجة تقلق يعني.
'خدت منها الصندوق'
_طيب.
”ابتسمت لي بتصديق وخرجت تكمل الكيك تقريبا، فتحت الصندوق وانا متعصبة من اللي فُلْك عمله، بس هديت بعدين..كان في الصندوق دريس كبير شكله جميل ومعاه شوكليت وفي ورقة تحتهم فـفتحتها“
’مش ليكي اكيد، لمامتك وياريت تعتبريها رد على الورد والحلويات اللي جبتيهم لاخواتي عشان تصالحيني عليهم، قرّبي منها الله يهديكي ملهاش غيرك‘
_مـامـااا.
'اجت على صوتي'
_نعم؟
_هتعملي ايه في الاستدعاء؟
_هتصرف متقلقيش، ذاكرتي؟
_ااه.
_طب تعالي الكيك جاهز، هعمل معاه نسكافيه على ما تيجي.
_تمام.
”خبيت الصندوق تحت السرير وروحت وراها المطبخ، ماما بتعمل احلى كيك فيك يا عالم والله، طلعت قطعتين ليا وليها وحطيتهم في أطباق واستنيت اما تجيب النسكافيه وقعدنا في البلكونة“
_الصندوق كان فيه ايه؟
_شوية حلويات مكان اللي عطيتهم لاخواته قبل كدا.
_تعاملكم لطيف سوا.
_مش كتير، ممكن وقت الضرورة بس.
'ابتسمت لي وشربت من النسكافيه'
_تمام.
”بعدها بشوية قامت تجهز هدوم لبكرا، وانا قومت اذاكر وانا بفكر في الدريس وهعمل به ايه“
'حط قدامي كان شويبس'
_اخفيه قبل ما حد يرخم عليكي ويوقعه.
'بصيت له وهو بيقعد'
_بمناسبة ايه؟
_انك قربتي من مامتك شوية.
'اتكلمت بقلة حيلة'
_انا مش صغيرة، هقرب منها بدون مكافآت يا فُلْك لان حبي ليها غير مشروط بمقابل، انا اللي بعيدة عنها وببعد بمزاجي محدش جابرني وانت عارف.
'لف لي واتكلم بعصبية'
_وطالما عارفة انك لازم تقربي منها مش مقربة ليه! طالما بعيدة بمزاجك وبتبعدي مش بتقربي نفسك ليه! ليه بتبعدي وانتي عارفة انه غلط!
'سكت شوية وبص لي وبعدين قام واتكلم'
_لو فضلتي بعيد كدا هتموتي لوحدك من غير ما حد يقرب منك عشان يتطمن عليكي يا مريم، لما تكوني على سريرك ومحدش ماسك ايدك خوفا من انه يخسرك هتحسي قد ايه انتي كنتي غبية اوي لبُعدك دا.
”مشى وسابني، بصيت حواليا لاول مرة لقيت نفسي قاعدة في الفصل لوحدي محدش جمبي او حتى معايا في الفصل، نزلت من الفصل لقيتهم لسة ما بدأوش تحية العلم، فـوقفت جمبهم واستنيت معاهم تحية العلم“
_اول مرة تحضري التحية.
'ضحكت لها'
_كنت زهقانة قولت اغير جو.
'ليل ضحكت'
_تغيير جو في المدرسة! يا ستار!
_ليل لا تطيق المدرسة يا شُباب محدش يطلع روح الشر اللي جواها.
'ضحكت على كلام قمر'
_يعني اللي معانا دي روح طيبة! يلهوي!
”بصينا لبعض بضحك وفجأة اتفتحنا في ضحك هيستيري، سكتنا بس لما المستر دخل الفصل وبدأ يشرح“
_يلا سلام يا بنات.
_سلام يا مريوم.
”خلص اليوم بطريقة غريبة، اول مرة اقعد معاهم فترة طويلة كدا، اتكلمنا في حاجات مكونتش اتخيل انهم يعرفوها، لعبنا وهزرنا سوا وكمان روّحنا سوا لحد ما اجى مفترق طرقنا وكان لازم نودع بعض، مشيت لوحدي في طريقي، وبدأت اقارن نفسي الوقتي ونفسي من خمس دقايق لما كنت ماشية معاهم، كنت بضحك وبهزر وبنتكلم في مواضيع كتير، اما حاليا ماشية لوحدي ومحدش جمبي“
_حمدلله على السلامة.
'بصيت لها'
_الله يسلمك.
_ادخلي اغسلي ايدك وغيري هدومك وتعالي.
_حاضر.
”غسلت ايدي ورجعت أوضتي، بدأت أغير هدومي وانا ببص للسرير وافتكرت الدريس فـوطيت أجيبه وانا بفكر اعمل به ايه بجد“
'خبطت ع الباب'
_مريوم، يلا عشان الغدا.
'رجعت الصندوق مكانه تحت'
_جاية.
”خرجت وقعدت جمبها، كانت عاملة سمك فـهي اللي فصّصته لاني مش بعرف، كانت تاكل لقمة وترجع تفصّص لي تاني، قومنا من على الاكل وهي راحت تغسل الاطباق وانا دخلت اوضتي اذاكر“
’لو فضلتي بعيد كدا هتموتي لوحدك من غير ما حد يقرب منك عشان يتطمن عليكي يا مريم، لما تكوني على سريرك ومحدش ماسك ايدك خوفا من انه يخسرك هتحسي قد ايه انتي كنتي غبية اوي لبُعدك دا‘
_يوووه! طب سيبته في المدرسة صوته في راسي ليه!
”خرجت لـماما لقيتها بتتعلم تعمل كروشيه، فقعدت جمبها وميّلت على كتفها وبدأت أنعس..هو انا لو مكونتش خرجت لها كنت هنعس ومش هلاقي حاجة اسند عليها؟ وأصحى الاقي رقبتي بتوجعني! هو انا بسأل أسئلة كتير ليه؟“
”صحتني بعد شوية تقول لي أنام في سريري، قمت أنام فلقيتها بتغطيني وبتتأكد من نور الأوضة عشان ميتعبش عيني“
_صباح الخير.
_صباح النور.
_نمتي كويس؟
_اه الحمد لله.
”ابتسمت لي وبدات تعمل الفطار، اما انا دخلت آخد شاور وبعدين لبست يونيـفورم المدرسة وخرجت لها لقيتها واقفة عند الباب“
'دخلت وهي بتعدل طرحتها'
_فُلْك برا، قولي له يدخل.
_فُلْك! دا بيعمل ايه هنا!
'بصّت لي باستغراب'
_فُلْك طول عمره بييجي لنا يا مريم، فوقي يا بت.
”خرجت له لقيته واقف وبيبص لساعته وجمبُه خديچة أخته الصغيرة، فتحت لهم يدخلوا فـخديچة دخلت أما هو فضل واقف فدخلت وهو هيدخل بعدي، بعدها بدقايق كنا متجمعين على طاولة الأكل بنفطر عشان نروح المدرسة، وكالعادة هو وماما بيحكوا في كل أمور الدنيا خلال الربع ساعة دي“
_الحمد لله، 'بص لي' يلا نمشي؟
_طيب.
”روحت اجيب شنطتي، وطلعت الدريس من تحت السرير وظبطت شكله وبعدين حطيته على سرير ماما، خرجت لهم وسلمت على ماما بعدين مشينا“
'مد لي ايده بـهوهوز'
_عربون صلح، عشان زعقت لك امبارح وكدا.
'خدت الهوهوز وحطيتها في شنطتي'
_اتصالحت خلاص.
”مسكت إيد خديچة وهو مشى قدامنا، دقايق وكنا وصلنا خديچة لمدرستها وكملنا احنا لمدرستنا“
_عملت ايه لما عرفت خناقتك في الفصل؟
_قالت لي ادخل انام او اذاكر.
_مزعقتش؟
_لا، هي عارفة اني مش هعمل مشكلة من مفيش.
'ضحك لي'
_ونعم الأم.
”كنا وصلنا المدرسة بعدها بثواني، طلعنا الفصل نجهز كتبنا ونزلنا تاني للطابور، أول مرة أنزله السنة دي، حضرت التمارين والإذاعة وتحية العلم وبعدين طلعنا، وكان يوم عادي زي اي يوم دراسي“
_سلام يا بنات.
_سلام يا مريوم.
”واحد واقع ع الأرض عيونه بتحاول تفتح، وواحد تاني ماسكه اتنين تانيين بيحجزوا بينه وبين واحد تاني، كل اتنين ماسكين في بعض ضرب وخناق، دم، سكاكين وسيوف، صرخات بتعلى كل شوية، حجارة بتترمى من بعيد لـبعيد وفي وسط كل دا حجر من اللي بيترموا يتضرب فيا، واضح اني مكونتش بعيد“
”صوت صرخات ونحيب، صوت أنين وآثار دموع، أدعية كتير وأمنيات أكتر ووجع مخيّم على الجو، ريحة معقمات وكحول طبي، الوسط حواليا أبيض فيه أجزاء زرقا، ايه الدوشة دي!“
_حمدلله ع السلامة يا حبيبتي.
_الله يسلمك يا ماما، تسلمي لي.
_متحرمش منك يا حبيبتي.
_هو ممكن نروح؟ زهقت.
_هستأذن الدكتور ونخرج.
_تمام.
”وافق على خروجي، روحنا البيت ودخّلتني أوضتي وبعدها بثواني دخلت لي الاوضة بصينية اكل وحطتها جمبي“
_كلي، لازم تعوضي الدم اللي نزفتيه دا.
'ابتسمت لها'
_حاضر.
'قعدت جمبي'
_مش هنتكلم عن اللي حصل، الحمد لله انك بخير وخلاص.
'ابتسامتي وسعت'
_حلو دا.
”بعدها بـنص ساعة كنت مخلصة الاكل وهي قاعدة جمبي، متغطيين بالبطانية وفاتحين فيلم من أفلام جيبلي وابتسامتنا من الودن للودن♡︎.“
تعليقات
إرسال تعليق