_للدرجادي وجودي مؤذي بالنسبالك!
_هتسافر امتي
_عملت ايه عشان تكرهيني يا سلمى، دا انا انا بحبك
_اجوزتني غصب، وبدل ما تحاول تقربني منك كرهتني فيك بسيطه يعني
_ومطلبتيش الطلاق ليه؟
_هستفيد منه ايه، هرجع لأهلي اللي هيلموني وهيقولو اني مش وش نعمه ولا هصرف علي نفسي منين، مش هتجيب همها صدقني اديني مستحملاك
_انتي طالق
ساب البيت ومشي، احساس الحريه دا غريب لما بيجي فجأه بتحس انه ادلق عليك جردل مايه ساقعه انت مكنتش مستعد او يمكن كنت مستعد بس اتوجعت بردو، صحيح دا اللي كنت عاوزه اوصله بس متخيلتش اني هحس اني بردانه كدا
_مهو انتي لو كنتي خلفتيله حتت عيل كان زمانكم موصلتوش لهنا، كان زمانكم بتحاولو عشان المركب تمشي مش تنطو منها
_بقولك مبحبوش، مش عايزه اعيش معاه تقوليلي المركب تمشي، يا ستي متتكسر المركب علي دماغي ودماغه هتبقي مبسوطه لما اجيب عيال وبردو هطلق لأن مفيش بنا حاجه حلوه مفيش، انتي بتفكري ازاي ولا عايزه مني ايه بالظبط
_عايزالك الخير، كنتي متجوزه دكتور راجل محترم مش العواطلي اللي كنتي متشعلقه فيه
_ووصلت لفين مع الدكتور
_انتي اللي غبيه محافظتيش علي بيتك
_بقولك مش قادره اعيش معاه، مش عارفه مبحبوش حرمتوني من اللي كنت هبقا مبسوطه معاه عشان الدكتور
الدكتور اللي هيعيشني في مستوي محلمتش بيه صح
كل دا مبسطنيش يا ماما
_وخالد وفقره كان هيبسطك يا سلمى
_الموضوع انتهي، لا بقى فيه لا خالد ولا عمر سبيني في حالي بقا
_ناويه علي ايه يا سلمى؟
_عايزه ابعد، عايزه ادور علي نفسي في حته تانيه
عايزه اشتغل واكمل تعليمي وعايزه الاقي حد ياخد بايدي مش يرميني
_هتمشي؟
_لازم امشي يا هند، بس الاكيد اني هرجع بس هرجع سلمى، سلمى تانيه خالص
_بصي يا ستي دي شقه طالبات هتقعدي معاهم، وايجارها بسيط وهما بنات كويسه جدا اظن هتتعودو علي بعض بسرعه هسيبكم تتعرفو وهروح انا اكمل شغلي
شقه فيها 7 بنات وانا التامنه كليات مختلفه بس بنات لذيذه ساعدوني اني ابدأ مشروعي اونلاين واعمل وجبات وابيعها كلمو صاحب السوبر ماركت اللي تحت البيت اني احط عنده عينات مجانا ياخدها الزباين وطبعولي ورق الدعايا هديه منهم، بعد فتره الموضوع كبر والشغل مشي معايا وفتحت مطعم صغير وقدمت في الجامعه عشان اكمل
درست تجاره عشان اعرف افيد نفسي وشغلي
_تطلب ايه يا فندم؟
خالد!!
_مبروك يا سلمى، فرحت لنجاحك
_عامل ايه يا خالد مشوفتكش بقالي كتير
_بخير الحمدلله عايش، اشتغلت في شركه واتجوزت وعندي ياسمين 3شهور
_مبروك يا خالد تستاهل كل خير
_مبروك ليكي يا سلمى كنت واثق انك قويه كافيه عشان تمشي حياتك وتقفي علي رجلك وتواجهي كل دا
_الحمدلله
_مبسوطه انك شوفتيني بجد؟
_بجد يا خالد من يوم ما اتجوزت عمر سيبت كل حاجه ورا ضهري عشان مكنش ينفع، ان مكنش عشانه ف عشان نفسي يوم ما قررت ابدأ من جديد رميت القديم كله ورا ضهري
سامحت عمر، حتي فكرت اعزمه علي الافتتاح الاسبوع الجاي، احنا مشغلينه بس كدا خفيف لحد الافتتاح وانت اكيد معزوم ومراتك وبنتك
_مبروك يا سلمى انا مبسوطلك ربنا يوفقك
_مبروك كدا متنفعش مستنياكم اكيد
_اوعدك هاجي
_مبسوطه اني شفتك يا خالد
_الو
_مين معايا
_انا...انا اسفه
_سلمى!
_علي كدا انا الوحيده اللي مديونالك بأسف
_عامله ايه يا سلمى
_عازماك علي افتتاح مطعمي الصغير الاسبوع الجاي لو ممكن تيجي
_......
_صدقني يا عمر انا عايزه ابدأ صفحه جديده ومش عايزه حد يشيل مني، هستناك وهبعتلك التفاصيل يلا مش هعطلك اكتر من كدا هستناك
_هاجي
_متهيألي حياتي الجديده احسن بكتير، فيها سلمى اللي انا شكلتها، سلمى اللي تستاهل فرصه تانيه وتستاهل تعيش
صالحت اهلي والدنيا كلها ربنا رزقني ب 7 اخوات بنات غير اختي وناس واقفين في ضهري وسند
_الف مبروك يا سلمى
قطع تفكيري صوته _عمر الله يبارك فيك يا دكتور
_اتغيرتي يا سلمى
_للأحسن
_.....
_الحمدلله، انا اديت لنفسي فرصه عشان اعيش واختار
_واختارتي
_هختار نفسي كل مره
_طب...واحنا يا سلمى
مينفعش ندي لعلاقتنا فرصه ؟
_......
_متسكتيش يا سلمى، فرصه من غير ضغط ولا غصب، نبدأ حكايه جديده انا كمان اتغيرت وصدقيني لو اخترتي تبعدي هحترم رغبتك
_لسه علي الخطوه دي شويه مش هنا بس اللي عايزه اوصله
_هتخليني في دماغك؟
_هفكر
يلا ناخد صوره لينا كلنا .
في ناس بتعيش حياتها تقرا روايات وناس تانيه بينكتب عليها تعيش الروايه دي، دي حكايتي انا انا سلمى .
تعليقات
إرسال تعليق