_اصحي يااخره صبري
_ عاوزه اي يا ماما، بتصحيني لي
_ هكون يعني بصحيكي لي وراكي الوزاره وانا معرفش ياشيخه اتووكسي دا اللي قدك بقا معاه عيل واتنين
_ اسطوانه يوم الخميس دي وراها اي يا ماما
_ قومي يابت، عاوزاكي تشيلي السجاد كله وتغسلي
_سجاد!! سجاد اي يا ماما منا لسه غسلاه الاسبوع اللي فات
_ هو كدا أفترى، وبعدين بسليكي بدل مانتي قاعده لا شغله ولا مشغله
_هو انا كنت اشتكيت ياست انتي
_انا كيفي كدا، ويلا بدل ماانزل الشبشب عليكي
_يووه انتي بتعامليني كدا لي هو انا مش بنتك
_ اه مش بنتي، احنا لاقناكي قدام المعبد اليهودي
_ ولما انا مش بنتكوا بتشحطتوني معاكوا ليي، ماكنتوا تسيبوني قدام المعبد هو انا كنت اشتكيت ولا طلبت حد ياخدني... يالهوووي
(ملحقتش أكمل كلامي ولقيت سلاح الام المصريه لازق في وشي)
_قومي عشان المره الجايه هجيب الحزام
_ حاضر حاااضر قومت اهوو
( انا خديجه عندي 25 سنه عايشه مظلومه ومقهوره في البيت دا بقالي كتير اه والله يلا هما زي عيلتي بردو )
_واقفه عندك مستنيه اي
(دا صوت الست الوالده الحاجه مديحه، المهم اني عديت ال 25 سنه ولسه لا اتجوزت ولا حتى اتخطبت، امي كل مره تنكد عليا بكلمتين أن العرسان اللي بيجولي بيجوا مره ويهربوا، طب انا اعمل اي يعني دا نصيب وانا مالي اناا )
_وربنا لو مااتحركتي من مكانك لامير السرير فوق دماغك
_ طب طب لي الخساير بس انا قومت اهو خلاص
(أخر النهار)
_ اااه ياوسطي اللي اتكسر، فيها اي لو نغسل السجاد مره واحده زي باقي الخلق ولا هو افترى وخلاص
_انتي لسه هتقعدي، قومي شوفي الاكل اللي على النار
_حااضر بس يا ماما استريح شويه دا الفقرات كلها دخلت في بعض اقسم بالله
_ اه يااختي وهو الاكل هيستناكي لما تستريحي والرز ميتحرقش
_ حاااضر قومت اهوو، انا بس ياربي اي اللي وقعني في أم العيله دي مكنتش وقعت في عيله ابو هشيمه مثلا
**************************
(تاني يوم)
_جوجو، حبيبتي يلا ياروحي صباح الخير
_عاااا عفريت يا ماما عفريت
_عفريت اي يابنت المجنونه انا امك
_اومال اي اللي على وشك دا
_دا مسك، قومي يلا عشان احطلك منه
_اامي يعني انتي عاوزه تقنعني انك مصحياني من النوم عشان تحطيلي ماسك
_قومي وبلاش غلبه عشان نلحق نخلص اللي ورانا عشان في ضيوف جايين انهارده
_ضيوف!! ضيوف مين دول احنا مبيجاناش ضيوف من ساعه الحرب العالمية الثانية
_ما البركه في ابوكي اللي علطول مكشر ومكره الناس تجيلنا
_سيبك من سعيد والعيله دي وقوليلي مين اللي جاي
_فاكره الخاطبه اللي أخدت صورتك الاسبوع اللي فات
_ااه هو انتي لسه بتصدقي الحاجات دي وأنها هتجيب عريس وكدا لا طبعا الحاجات دي انقرضت
_ لا منقرضتش يااخره صبري، وهي جيبالك عريس انهارده يابت
_ لا ياشيخه، طب مش كنتي تقولي كدا عشان الواحد كان يصحى على خير حلو
_هو انتي مدياني فرصه اتكلم، من ساعه ماصحيتي وانتي هبيتي في وشي زي البوتجاز
_متأسفين، ها المهم العريس دا شكله اي طويل قصير اسمر ابيض تخين رفيع
_معرفش يااختي لما يجي ابقي شوفيه يارب بس يكون من نصيبك
_يارب يا ماما يارب يكون من نصيبي وياخدني من البيت دا على خير
(في الليل)__ الليل جه ومعاه العريس المنتظر ااه انا مستنيه اللحظه دي من قرن، العريس جه هو ومامته ومعاه طبعا طنط عفاف الخاطبه، دخلت وسلمت عليهم قال يعني مكسوفه وكدا وقعدت بعد ماقدمت العصير، بعد شويه ولقيت امي بتقولي
_ قومي باخديجه ياحبيبتي فرجي عريسك على البلكونه
_ بلكونه!! جديده دي مالها البلكونه مهي زي اي بلكونه فيها توم وبصل ومشابك الغسيل (ماما ساعتها برقتلي، فقومت علطول قبل ماتقوم حرب في البيت، اول لما دخلنا لقيته بيسالني:
_انتي مش شايفه أن اسم خديجه دا قديم شويه
_طب مانت اسمك حنفي الزعبلاوي كنت اتكلمت
_بس انا راجل وميعبنيش حاجه
_ وانا ست بردو وميعبنيش حاجه
_ اه طب في حاجه كمان انا شايف انك تخينه شويه من الجناب ومحتاجه تخسي شويه
_(بصراحه اتغظت منه جناب اي دي اللي بيتكلم عنها هو ماله ومال جمالي) وانت القرعه بتاعه سيادتك دي مش ناوي تزرعها شعر ولا ناوي تسبها عريانه كدا كتير
_ دا مش أسلوب حوار دا على فكره
_ قول لنفسك الكلام دا مش ليا
_ على فكره انا هقوم امشي وانتي اللي خسرانه
_ بعد لما شوفت القرعه دي مااعتقدش، انا قاعده في بيت ابويا معززه مكرمه مش واحد يجي يقولي خسي واتخني
( العريس طبعا خد الكلمتين في جنابه وطلع خد أمه وطنط عفاف ومشي، وامي ساعتها مسكتني من ودني)
_ قولتيله اي الله يخربيت سنينك خلتيه يهرب كدا
_ اه اه يا ماما ودني انا معملتش حاجه دا هو اللي خسران بكرا يجي راقع تحت رجليا وييقول انا ندمان... ساعتها جرس الباب رن، ماما سابتني وانا قولتلها:
_ شوفتي مش قولتلك هيرجع ندمان، افتحي ياماما ودخليه وانا هفكر واعيد النظر في الموضوع (راحت ماما عشان تفتح لقت فعلا العريس روحتله وقولتله)
_خلاص متزعلش انا سامحتك عادي في رجاله كتير قرع مش حوار يعني، ها نحب نعمل الخطوبه فين
_ قرع اي وخطوبه ااي اللي هنعملها
_ لا متقولش جواز كدا علطول
_ جواز اي انتي كمان انا جاي أخد البطيخه بتاعتي
_ بطيخه!! بطيخه ياابن البطيخه ( لبسته البطيخه في دماغه، بصراحه يستاهل هو في حد يروح يتقدم لواحده وياخد معاه بطيخه)
__ بعد يومين (طنط عفاف جت ومعاها عريس تاني، يابركه دعى الوالدين بس عريس انما اي بقا قيمه كدا وبيشتغل محصل كهربا قد الدنيا، دخلت بالعصير كالعاده لكن اتفأجت بيه أنه قصير وبكرش.. مش مهم اهم حاجه الاخلاق، وكالعادة دخلت افرجه على البلكونه ولقيته بيسألني..)
_تحبي مين فينا يمسك مصروف البيت
_ مش شايف أن السؤال دا بدري عليه شويه، بس نعتبر مثلا انا اللي همسكه
_تمام، تقدري تحدديلي المصروفات بتاعه الشهر قد اي
_ مصروفات اي هو احنا في حصه حساب
_ طب تقدري تستحملي لو كان مصروف البيت 500 جنيه في الشهر
_ 500 جنيه! وجاي على نفسك كدا لي، ماتبحبحها شويه
_ اه واعملي حسابك من دلوقتي انا مش هصرف فلوسي على البامبز والكلام دا
_ بامبز!!! هي وصلت لكدا
_ اه وكمان انا باخد في التموين بتاعي كيسين سكر ورز وازازه زيت، انتي بقا بتاخدي اي
_ باخد على دماغي
_ نعم!!
_ بص يااستاذ ناصح ولا ناصع البياض انت انا كنت راضيه بيك وبكرشك لغايه ماجت سيره التموين لا حضرتك كله الا التموين، وبصراحه حسيتك داخل على طمع
_ انا بردو اللي داخل على طمع، من ساعه ما دخلت بيتكوا وانا حاسس بكرشه نفس
_ اه دي اعراض الجلطه يااخويا خلي بالك
_ انا مش متفائل
_ ولا انا بصراحه، يلا بقا روح اشربلك حاجه سخنه ونام وهتبقى زي الحمار
_ هما مش كانوا بيقولوا زي الحصان بردو
_ لا في حالتك دي حمار متقلقش
( العريس خد بعضه ومشي كالعاده د، ومخلصتش من كلام ماما كالعاده بردو، المهم تاني يوم قررت انزل ادور على شغل بدل قعده بالبيت دي، روحت قابلت البت ليلى صاحبتي وروحتا على شركه هنقدم فيها )
_ بقولك اي يااخ، هي الشركه دي محتاجه موظفين
_ااخ!!
_طب متزعلش يسطا المهم عاوزين ولا لا
_ اطلعي اسالي ال HR فوق وهما يقولولك
_ طب ماتقول كدا من الاول بدل الفرهده اووف دانت رغااي اوي
_ عبيطه دي ولا اي
(مرضتش اعطل نفسي اكتر من كدا وطلعت عشان اقدم ودخلت لل HR اللي سالتني)
_ شايفه نفسك فين بعد خمس سنين
_ في بيت جوزي أن شاء الله اصل بصراحه لو قعدت في بيتنا اكتر من كدا امي هتنفخني
_ وانا مالي بأمك ولا بجوزك انا بسألك سؤال واضح اي طموحك خلاص الخمس السنين اللي جايه
_ اه، مش تقولي كدا بصراحه اعمل مشروع ويكون ليا مرتب كبير كداا وابقى اندبنتت وومن واسترونج كدا
_ اطلعي برا
_ اي انا قولتها غلط ولا اي
_ براااا
_ طيب برا برا براحه على نفسك (طلعت لقيت البت ليلى مستنياني)
_ ها عملتي اي
_ انا رفضت اشتغل معاهم
_ لي كدا
_ لا ولا حاجه المهم انتي عملتي اي، قدمتي؟
_ واه وبلا فخر اترفضت
_ بصي ياصاحبتي انا وانتي خساره في البلد دي تعالي بقا أما اعزمك علي عصير قصب
**************************
(بعد أسبوع)
_ حاضر يا ماما دي المره ال 130 اللي تعيدي فيها الكلام دا
_ اديني قولتلك وخلاص عشان ملاقيش العريس دا طفش زي الباقي، المره دي العريس مهندس قد الدنيا وزي القمر
_ بجد والنبي يا ماما شوفتي
_ اه الست عفاف ورتني صوره له، يلا انجزي بقا واجهزي بدل مانتي شبه المدمنين كدا
_ ماشي يا ماما الله يسامحك
(بعد شويه)
_ قوليلي ياخديجه، لو قدامك تلات ابواب الفلوس والصحه وانا هتختاري اي
_ اكيد مش هختارك انت يعني، انا صحتي عندي بالدنيا
_ طب لو شيلنا الصحه وحطينا العلم مكانها هتختاري اي
_ الفلوس، اصلي نفسي اشتري عربيه زي بتاعه البت مديحه بنت خالتي
_ طب لو شيلنا الفلوس تختاري اي بين العلم وانا
_ العلم طبعاا (لقيته اتعصب وقام وقف)
_ طب بعد اذنك انا مروحه
_ استني بس انت مالك عصبي كدا الكلام اخد وعطا
_ عطا دي تبقي الست الوالده، وابقي قابليني لو حد رضي بيكي
( انا ساعتها اتغصبت والدم غلي ف عروقي ومحستش بنفسي غير والفازه راشقه في نفوخه، لقيت ماما صوتت وقالت لي:
_ يالهوووي الجدع مات ياخديجه
(بعد أسبوع)
(العريس اللي مش عارفه رقم كام بس المرادي العريس كان غريب اوي وكان مركز مع المانجا اكتر مني)
_ احم.. ازيك يابشمهندس
_ ......
_ يااستاذ هو العصير عجبك اوي كدا
_ ......
_ هو انت مبتردش عليا لي، عندك مشكله في السمع ولا حاجه
_ بشرب العصير ياانسه هرد عليكي ازاي
_ طيب بالهنا والشفا بس يعني ..
_ عاوزه اي
_ كلمني عن نفسك شويه
_ عويسي دي ولا ذبديه
_ هي اي دي اللي عويسي
_ المانجا
_ معرفش والله هبقى أسألك الحاجه
_ تعرفي أن احسن انواع المانجا هي الفص
_ فص!! بقولك اي حط العصير كدا وركز معايا انا شويه انت مش قاعد في الوكاله هنا
_ اهدي شويه ياانسه احنا بنتكلم عادي يعني
_ طيب اهو بنتكلم، احكيلي عن نفسك بتحب اي بتكره اي خلينا نخلص
_ اكتر حاجه بحبها هي المانجا اكتر من اي عصير تاني، وبحب اكلها كمان مقولكيش بقا بزروط الدنيا بس متقلقيش انا بنضف مكاني
_ بزروط!! ممكن تسيبك من المانجا عشان كرهتها ( قسما بالله انا ساعتها كان نفسي امسك سكينه الفاكهه واخرمله نفوخه وأشوف فيها اي بس اتفأجت لما قال :)
_ أنا اكتر اكله بحبها اوي هي المحشي بس مش كل الانواع، عندك مثلا ورق العنب دا روحي روحي روحي لكن مليش في الكرنب اوي يعني عشان بيجبلي انتفاخ
_ اللهي تتنفخ بمنفاخ
_ اي يابانيه انتي زعلتي من المحشي ولا اي، خلاص خلينا في الملوخيه تصوري وانا صغير كانت امنيه حياتي أن أمي تعملي سندوتشات ملوخيه
_ هو انت عندك خال اهبل؟
_ اه، بس انتي عرفتي منين
_ لا مهو واضح أن العيله كلها لاسعه
_ لي كدا بس، طب بلاش الاكل خالص نتكلم ف حاجه تاني
_ ايوااا بقا انا عاوزه الحاجه التانيه دي بقا
_ تعرفي أن سامي صاحبي لسه متجوز من كام شهر ومراته كمان حامل
_ وانا مالي بسامي دا كمان
_ استني بس الله دا متجوز عن حب أصلها كانت معانا في الكليه
_ يالهوووي يخربيتك على بيت سامي في ساعه واحده
_ طب خلاص بلاش سامي انا ممكن احكيلك. عن مراد ولا ممدوح الاتنين احسن من بعض
_ اطلع براا
_ نعم!!
_ اطلع برا بدل ماامسك السكينه دي واشقك نصين
_ اهدي بس ياانسه السلاح يطول دا مراد دا اكتر واحد محترم فينا والوحيد اللي مش بيشرب سجاير فينا
_ ااااه منا حسيت بكدا بردو، انت شكلك ضارب كام سيجاره قبل ماتيجي صح
_ لا انا مش بشرب سجاير
_ اومال بتشرب اي، مانجا بس؟
_ لا وشيشه بشرب شيشه
_ برااااا
**************************
( تاني يوم كنت قاعده في اوضتي ولقيت بابا جاي يقولي:
_ مالك ياحزينه قاعده كدا لي
_بص بقا يا بابا انا زهقت من حوار العرسان دا
_ طب يابنتي هنعمل اي بس انتي طولي بالك شويه
_ بذمتك يا بابا شووف بذمتك، انت شوفت واحد فيهم عدل
_ بصراحه لا
_ شوفت، يبقى خلاص تقعد كدا من غير جواز احسن، المهم انا كنت عاوزاك في موضوع كدا انا كنت مقدمه ورقي في كام شركه والصبح في شركه كلمتني قالتلي اني استقبلت
_ طب وامك ياحلوه هنقنعها ازاي وهي مصممه تجوزك الاول
_ ياحج خليك مسيطر كدا واقف وقولها الجوازه دي لا يمكن تتم
_ وبعدين ياختي انام على السلم مش كدا؟
_ ياحول الله يارب صدق صعبت عليا ياحج( ساعتها ماما دخلت علينا)
_ انتوا سايبني وقاعدين هنا بتقولوا اي، قوموا يلا عشان الناس اللي جايه دي
_ طيب حاضر انا قايم اغير هدومي
_ كدا ياحج بتبعني
( بليل العريس رقم عشروميه جه، بس المرادي قلبي مارتحلوش ابدااا كدا لله ف لله )
_ هو انت مسرح شعرك على جنب كدا لي
_ اي دا هو مش عجبك ولا اي
_ لا بصراحه دا جميل خالص ماالص
_ شكرا، انتي عندك كام سنه
_ 25 سنه، وانت
_ 28 سنه و3 شهور و7 ايام و12 ساعه
_ لا دقيق، اومال اي الالوان دي كلها دانا جالي حول في مشاعري ياشيخ
_ اصل انا بحب الألوان كلها
_ منا خدت بالي، طيب بتشتغل اي
_ بصراحه انا لسه بدور على شغل، بس ماما قالتلي أن الف شركه تتمناني
_ ااه دي زي الف بنت تتمناك كدا
_ ايوا دي لسه ماما قايلهالي قبل مانيجي
_ بص يااسطا حزلقوم
_ اسمي زعتر
_ مفرقتش زعتر من بعتر الحقيقه، المهم انت هتطلع دلوقتي تاخد الست الوالده وتورينا جمال خطوتك
_ افهم من كدا انك بترفضيني
_ وهي ليها معنى تاني ويلا بقا عشان احنا بنام بدري
( لقيته بصلي بقرف وخد صنيه البسبوسه وخلع النتن، يلا بقا مفيش نصيب، تاني يوم صحيت بدري عشان اروح الشغل والحمدلله اول يوم عدى من غير كوراث، لكن وانا مروحه البيت وقفني واحد.)
_ ياانسه ممكن لو سمحتي تقريلي الورقه
_ ااه انت حرامي صح وهتخطفني
_ اخطفك اي ياانسه بقولك اقريلي الورقه
_ مش عيب على شحط زيك ومش عارف يقرأ
_ ياانسه انا دكتور على فكره
_ هو في دكتور مش بيعرف يقرا انت فاكرني عبيطه ولا اي، لا خد بالك انا محنكه جدا
_ محنكه!! مهو لو تديني فرصه اتكلم كنت اتنيلت وقولتلك اني نسي النضاره بتاعتي
_ ازاي دكتور يمشي من نضاره انت عاوز تموت المرضى
_ هاتي الورقه، انا هشوف حد تاني يقراها
_ استنى طيب انا كان نفسي اساعدك ( بعد ساعه وصلت البيت ودخلت الاسانسير ولسه هيقفل لقيت واحد داخل يجري علي باب الاسانسير ودخل)
_ انت تااني دانت مصمم تخطفني بقا
_ اخطفك اي هو في يبصلك اصلا
_ لا مانت مش هتقولي أن دي صدفه، لا انت ماشي ورايا وعاوز تخطفني
_ ياستي انا طالع الدور السادس عند الاستاذ شفيق
_ ابوياا!! ناوي تخطف ابويا
_ اللهم ماطولك ياروح، اتصلوا بيا وقالوا إن في مريض في العنوان دا
( مصبرتش وجريت على الشقه فتحت ودخلت وعرفت أن ماما هي اللي تعبانه، ولما الدكتور خلص كشف لقيت ماما بتنده عليا)
_ اسمعيني ياخديجه
_ سلامتك يا ماما، هو الدكتور قال عندك اي
_ شششش اسكتي واسمعي انتي لازم تتجوزي على العريس اللي جاي انهارده
_ عريس اي يا ماما هو دا وقته انتي في اي ولا اي
_ اه وقته انا ضغطي عالي والدكتور قال إن العصبيه وحشه عليا
_ بعد الشر عنك يا ماما
_ المهم لازم تتجوزي قبل مااموت عشان ابقى مطمنه عليكي
_ يا ماما متقوليش كدا والنبي
_ اسمعيني ومتوجعيش قلبي انتي لازم تتجوزي ايمن ابن طنط سعيده
_ ااي ايمن دا بطرس
_ عادي بكرا يخس
_ طب دا أقرع اي بكرا نزرعله كمان ولا اي
_ اهم حاجه الاخلاق
_ طب انا شوفته بيشرب سجاير مره اهو أخلاقه زي الزفت اهو
_ يابت دا كان في اعدادي!!
_ يا ماما دا بيلبس الهدوم بتاعه أبوه من قبل حتى ما يموت
_ واي المشكله يعني دا كفايه أنه لسه بيبر أبوه بعد لما مات
_ بصي من الاخر كدا انا لا بحبه ولا بطيقه
_ يبقى على بركه الله والف الف مبروك ياحبيبتي
( بعد كام يوم، ماما الله يسامحها صممت اني لازم اتجوز ايمن ابن سعيده ومش كدا وبس لا دا الفرح كمان شهور بس، انا قررت اروح أقابله من وراهم عشان اخلص من الواقعه السوده دي)
_ ايمن انا عاوزه اعترفلك بحاجه
_ قولي ياخديجه
_ انا مش عاوزه اتجوزك ولا طايقاك من اساسه
_ ياااه ومين سمعك
_ حيث كدا بقا انت تروح لأمي وتقولها كل شئ قسمه ونصيب وتفسخ الخطوبه
_ ياسلام ياختي ولي انتي متقوميش بالمهمه دي وتروحي لأمي وتفسخي انتي الخطوبه
_ الاا هو انت طلعت مغصوب انت كمان ولا اي
_ اه ياختي مغصوب ومحروم من الميراث لحد لما اتنيل واتجوزك
_ لا اله الا الله لا صعبت عليا يابني
_ اه دانا حالي يصعب على الكافر، دانا ساعات ببات من غير عشا
_ يا ضنايا يابني، طب انا حالي يصعب على مين دلوقتي دانا قربت انتحر
_ يبقى على بركه الله وتبقي عملتي فيا خير واعيش حزين عليكي
_ اه يابن الوارمه بقى انت عاوزني اموت عشان تخلع انت
_ ايوا، واوعدك اني هزرعلك صبار على قبرك بس اتكلي انتي على الله
_ بعد الشر علياا انشالله اللي يكرهوني اللي هو انت منهم
_ انتي الخسارنه دانا كنت ناوي اعملك كولدير تمر هندي على روحك بس الظاهر انك ملكيش في الطيب نصيب
_ ربنا يوعدك بجاموسه هبله
( بعد شهر الفرح تم والعريس اخدني على عش الزوجيه )
_ مبروك ياخديجه
_ مبروك في عينك انت صدقت ولا اي هي كلها شهر ولا اتنين واخلعك واهبدلك في محاكم الاسره
_ طب لي كدا بس
_ دانا كانت العرسان عليا زي النمل كدا بس هو البخت بقاا
_ ااه لا منا عارف دانتي اخبارك كلها عندي بأماره طنط عفاف
(باحراج): طب وسع كدا عشان عاوزه اناام دانت رغااي اوي
_ اهربي اهربي بس يعني هتروحي مني فين
(بعد شهرين)
_ ايمن ياحبيبي انت لسه عايش
_ اه عاايش، انتي اتهبلتي ياخديجه حد يسيب الاكل على النار ويقعد يمسك الفون
_ بصراحه اندمجت وانا بلعب
_ بتلعبي!! بس سيبك تعرفي أن وشك حلو اوي عليا
_ لي بقاا
_ جالي عقد عمل في الكويت والمفروض اسافر بعد أسبوع
_ طيب وانا ؟
_ طبعا هتيجي معايا
_ اصل مهو انت المفروض تطلقني بعد أسبوع
_ انتي عبيطه انا عمري ماهسيبك
_ بجد ياايمن، اومال اي حوار انك متجوزني عشان حوار الورث دا
_ لا ابدا دا كان حوار كنت بضحك عليكي بيه عشان اتجوزك
_ ياابن اللذينه
_ ولي الغلط طيب، انتي عارفه ياخديجه انا بحبك من امتى
_ لا متقولش من خمسه ابتدائي لما ضربت الولا محمود عشاني
_ ايوا مانتي فاكره اهوو انا قولت نسيتي
_ مهو بصراحه انا اعجبت بيك من ساعه الموقف دا
_ طيب ودلوقتي؟
_ احم .. يعني شكلي هحبك
_ بحبك ياخديجه
تعليقات
إرسال تعليق