_كويس على اي ياحبيبي
-المسافة بينا!
ابتسمت: كويس ياحبيبي بس انت لسة صغنن فـ عادي يعني لو قعدت جنبي "لمست مناخيره" او حضنتك حتى
حاول يزنق نفسه جنب الشباك: بس ماما قالتلي ان لما وحدة بنت تيجي تقعد جنبي في المواصلات لازم اخلي فيه بينا مسافة علشان ماتضايقش!
ابتسمت: هي فين مامتك
شاور على قدام: هي قدام بس انا قولتلها عايز اقعد لوحدي علشان أتعلم ان لما بنت تقعد جنبي ابعد عنها لوحدي علشان ربنا يحبني
ابتسامتي وسعت: تسلم مامتك على التربية اللى ربتهالك ياحبيبي،هو انت اسمك ايه
-اسمي يونس
_اسمك جميل اوي يا يونس "طلعت بونبوني من الشنطة" ودي هدية بسيطة ليك ينفع تقبلها مني!
نزل من على الكرسي: ثواني هاسأل ماما واجي
"طلع لقدام ثواني ووقف عند كرسي، اتكلم شوية مع مامته، وبعدين لقيت وحدة ست جميلة وباين على ملامحها الطيبة بتبص عليا، ابتسمتلها فـ ابتسمتلي وهزتله دماغها وقالتله حاجة ورجع قعد مكانه"
مديتله ايدي بـ البونبوني فـ اخدها: ماما بتقولك شكراً
_العفو يا يونس
"وصل الميكروباص للمكان اللى رايحاه فـ طلبت من السواق يقف، وانا نازلة وقفت قصاد مامة يونس"
_انا حقيقي بشكرك انك بتربي ابنك بطريقة جميلة كدة وبتطلعيه انسان سَوي انا بشكرك لإنك أم مثالية وبتجاهدي تطلعي أطفال مثاليين
ابتسمتلي: العفو انتي انسانة لطيفه جداً وشكراً ليكِ على البونبوني
"ابتسمتلها ونزلت شاورت ليونس فـ ابتسم و شاورلي ، مشيت شوية وانا فرحانة ان فيه ناس لسة كويسة وحسيت اني اخدت كم طاقة كبير، وقفت قصاد المبني، خدت نفس طويل ودخلت عند موظفة الاستقبال"
_صباح الخير يارحمة
-ريحانة ازيك!
_الحمدلله بخير
-جاهزة!
خدت نفس: جاهزة
-تمام اطلعي عند دكتور جميلة وهي هاتوديكي أوضتك تحبي ابعت حد معاكِ يشيل الشنطة
_لا لا انا هاقدر اشيلها
-تمام ياحبيبتي، ريحانة انتي قدها تمام!
ابتسمت: مش عارفة
"طلعت عند دكتور جميلة"
_صباح الخير يادكتور
~وبعدين بقا ياريحانة انا قولتلك 100 مرة اسمي جميلة بس
_صباح الخير ياجميلة
~والله ما فيه جميلة غيرك، ع العموم يلا بينا اوريكِ أوضتك بتبص ع النيل زي م قولتي
"خدتني للأوضة كانت مُنظمة وهادية دخلت البلكونة خدت نفس طويل وغمضت عيوني، حسيت بإيديها على ضهري"
~انتي قوية صح! هاتقدري تعدي، دة اختبار من ربنا، احنا ااه في مرحلة متأخرة بس مش المرحلة الأخطر! حالات كتير كان عندها كانسر وخفت وعايشين حياتهم براحة وكل شئ كويس، انا اعرف ناس كتير منهم كانوا محجوزين هنا ولسة على اتصال بيهم، ريحانة انا بقولك كدة علشان واضح جداً عليكِ إنك فاقدة الأمل، لولا رحمة جارتك أقنعتك إنك تيجي تتعالجي هنا ماكونتيش هاتفكري حتى انك تتعالجي ودة غلط لازم ثقتك في ربنا تبقى كبيرة، صدقيني رب الخير لا يأتي الا بالخير.
اتنهدت: عايزة أرتاح شوية
ابتسمت: تمام انا هاسيبك ترتاحي شوية النهارده وبإذن الله هانبدأ جلسات من بكرة
"هزيت دماغي فخرجت بـ هدوء، دخلت من البلكونة قعدت ع السرير، اخدت كام نفس طوال ورا بعض علشان احاول اتماسك بس كالعادة فشلت، حطيت إيديا على وشي وبكيت بكيت على كل حاجة، على بابا اللى سابني وانا صغيرة وعلى ماما وعلى ريتاج، بكيت على وحدتي وعلى مرضي، بكيت على كل حاجة، حطيت وشي في المخدة وصرخت صرخة مكتومة، نمت مكاني وانا بعيط"
"صحيت تاني يوم على صوت تطبيل على الباب، قومت بسرعة وانا بنظم نفَسي مابحبش الدوشة مابحبش الصوت العالي بكره الازعاج"
فتحت الباب وصرخت: في ايه! نعم انت مين وازاي تخبط بالطريقة دي قصدي ازاي تصحي حد بالطريقة دي انت في فرح خالتك!
رجع لورا وبرق: انا بس كـ..
_مابسش، انت مين اصلا
=انا رحيم "شاور على الاوضة اللى جنب اوضتي" جارك
_وعايز ايه!
=جرا اي يا اثتاذة ثلمي م بالراحة
_سلمي مين انا اسمي مش سلمي!
زقني بهدوء ودخل: لا دة انتي باين عليكي نرم بقا
_انت.. انت.. انت ازاي تدخل الاوضة كدة اتفضل اطلع برا
=رمى نفسه ع الكنبة: مدام جميلة قالتلي ان اسمك ريحانة، اسمك حلو
_تمام اتفضل اطلع برا
=انا قولتلك ان اسمي رحيم مش كدة!، نبقى اصحاب بقا، قوليلي انك اتشرفتِ بـ معرفتي
لفيت واخدت نفَسي بهدوء وانا بحاول اهدي نفْسي، وهمست لنفسي: مش هاتعصب لا عادي جداً هو هايخرج دلوقتي مفيش حاجة حصلت اهدي.
=اتشرفتي؟
لفيت وصرخت في وشه: اخرج برا.. برااااا
جت دكتور جميلة على صوتي: في ايه، في ايه يارحيم! ريحانة انتي كويسة
اتكلمت وانا بتنفض من العصبية: خليه يخرج برا، خليه يخرج برا بسرعة سيبوني لوحدي
-ماشي ياريحانة بس انتي إهدي، رحيم تعالي معايا ارجوك
"طِلع معاها وهو بيبصلي بـ استغراب، خرجوا وقفلت الباب وراهم وروحت قعدت على السرير"
" رحيم"
-رحيم انا قولتلك ريحانة غريبة، انطوائية وعصبية بشكل يُخض، مابتحبش تختلط بحد ولا بتحب حد يقتحم حياتها انا جمعت معلومات عنها ومن اللي عرفته انتوا مستحيل تبقوا صحاب فـ سيبها لوحدها
=ولو ولو، ان شالله تكون ايه، مفيش حد هايدخل المستشفى دي الا وهانكون صحاب
-يابني اسمع انتوا الاتنين مش هاتعمروا انتوا عكس بعض في كل حاجة
=مدام جميلة انتي قولتيلي نفس الكلام دة لما مروان جه هنا واهو دلوقتي بقينا اصحاب جداً
-بس ريحانة غير
=نتراهن!
-نتراهن
=لو نجحت اخليها صديقتي هاخرج اروح ماك
-انت بتهزر مش كدة
=لاا
-رحيم خروج من هنا مش هاينفع انت بتضعف كل يـ..
=يبقى اتفقنا
-رحـ..
=هاروح اعمل قهوة باي
"خرجت وقفلت الباب ورايا وروحت أوضتي، هو انا مش هاخرج من هنا بقا، والله لو كنت بكامل صحتي كان زماني دلوقتي عامل شركة وبقيت اكبر شركة فى الشرق الاوسط زي م كنت بتمني، بس مـ.. القهوة!، كانت هاتفور فـ لحقتها، دخلت البلكونة بالقهوة شربتها ودخلت الاوضة شغلت مهرجانات ع الفون وبدأت أغني معاها لقيت جرجس دخل"
•خليكي
=لو هاتمشي اناديكي
•انتي ليا انا ليكي
=احنا الاتنين قطاقييييط
•تسبيني
=اكره حياتي وسنيني
•اتوه ومش هلاقيني
=واشرب خمور وحشيييييش
لقيت الباب اتفتح علينا بعصبية: يافضحتي!
_اي الصوت دة انتوا اتجننتوا ازاي تشغلوا اغاني وتزعقوا بالصوت دة
اتكلمت بنفس طريقتها: وانتي..انتي..انتي ازاي تدخلي الاوضة بالشكل دة اتفضلي اطلعي برا
برقت: انت بتطردني!
=م انتي عملتيها من شوية
_انت انسان قليل الذوق
=من بعض ما عندكم
زعقت: وطي صوت الزفت دة انت فاهم
=الااه جرا اي يا أبلة هو سكتناله ولا اي
•اهدوا ياجماعة مش كدة، مين دي يارحيم ضيفة جديدة
=ااه لسة جاية امبارح وطايحة فى الكل مش عارف ليه
•ودي طريقة نعامل بيها ضيوفنا برضو!
=اهو دي طريقتي بقا "عليت الصوت ع الآخر" واهو
_وطي بقولك الصوت
=لاا
_صرخت: جميييلة
=في حضانة وهاتروحي تشتكي للمس يعني!
دكتور جميلة دخلت: في ايه تاني انتوا الاتنين
_بيعلي صوت الزفت دة ع الآخر، ازاي يعمل كدة، وازاي اصلا مسموحله يعمل كدة فى المستشفى.
-الكل هنا متعود على كدة كلنا سواء دكاترة او ممرضين او مرضى اتعودنا على طريقة رحيـ..
=بس انا مش متعودة ع كدة
_م عنك ما اتعودتي ياختي!
بصت حواليها وبعدين جريت على الترابيزة مسكت فازة بلاستيك وحدفتها عليا جات في دماغي وقفنا كلنا متسمرين لثواني وبعدها مسكت الفازة من الارض وجيت احدفها عليها جرجس مسكني: اهدا يابني مش كدة اهداا
=احدفها لو راجل احدفها
دكتورة جميلة مسكتها وحاولت تاخدها لبرة: يلا معايا ياريحانة خليك ماسكه ياجرجس
_سيبه ولا يقدر يعمل حاجة
=وعهد الله م عايز امد ايدي عليكي علشان مايقولوش مد ايده على وحدة نسوان
_لا مِد وورينا ورينا
جرجس بصلها وهو بيزقني لجوا: احنا آسفين يا انسة هانوطي الصوت اتفضلي انتي، خديها يادكتور
"خرجت وقفلت الباب وراها بعصبية"
=اي ياعم دة عارف لولا انها وحدة نسوان انا كنت نفختها والله
•ياعم اقعد في حتة معلش دة انت كنت بتهته وانت بتكلمها، دي سِنة كمان وكانت هاتبلعك.
=ياعم اسكت بس
•بقولك اي انا رايح اخد جرعة الدوا وانت اهدا كدة وخد جرعتك دلوقتي، فين هي علشان اجيبهالك
=والله م عارف اي اخرته اللى بنعمله دة، انا ابتديت اشك ان الدوا دة بيضعفنا مش بيعالجنا
•مش هانقاوح فين الدوا
=عندك ع الترابيزة اللى هناك دي
جابهولي وحطوا ع الكرسي اللى كان قاعد عليه جنبي وطبطب على كتفي: خدوا علشان خاطري ماتنساش وماتطنش
ابتسمتله وطبطبت على ايده: ماشي
خرج وانا اخدت الدوا وكلمت ماما اتطمن عليها.
"ريحانة"
_ممكن تنقليني من الدور دة خالص وديني اي أوضة تانية تكون بعيدة عنه
-صدقيني مفيش ولا اوضة فاضية
_انا مش هاقدر اقعد فى الدوشة دي
-م تحاولوا تبقوا اصحاب طيب
عينيا رغرغت بالدموع فلفيت الناحية التانية: انا هانام شوية
اتنهدت: بعد ربع ساعة تقريباً ميعاد جلستك تعالي يلا
_اتفضلي انتي وانا هاجي وراكِ طيب
"خرجت وانا دخلت الحمام غسلت وشي من آثار الدموع وروحت اخدت الجلسة، ومن هنا فهمت معنى جملة دكتور ابراهيم الفقي 'لولا وجود عكس المعنى لما كان للمعنى معنى' لولا وجود الصحة مكانش هايبقى للمرض معنى وانا دلوقتي حسيت بمعنى الصحة وقيمتها فعلاً انا حقيقي مش قادرة استحمل حاسة ان الموت هايبقى افضلي دلوقتي.. انا مش قادرة، ما صدقت خلصت ورجعت اوضتي وهربت في النوم كالعادة.. يااه لو مفَتحش تاني!"
"رحيم"
"صحيت على صوت دوشة خرجت من الاوضة لقيت الصوت جاي من اوضة جرجس، فتحت الباب لقيت مارينا معاه جوا"
•قولتلك سبيني يامارينا مش قادرة تستحملي خلاص امشي
-ياجرجس انا بـ..
•امشي دلوقتي وسبيني لوحدك
_استهدى بالله بس ياجرجس وصلي ع النبي فيه اي بس
•عليه افضل الصلاة والسـ... انت بتعمل اي ياعم بقولك اي اخرج انت برا انت كلامك بيبوظ الدنيا
_يابني اهدا بس ووطي صوتك دة الواحد صاحي على صوت تجعيرك دة غير الموسوسة اللى فى الاوضه التانية ممكن تيجي تفجرنا، مالك يامارينا في اي
-اسأل صاحبك
_في اي ياجرجس
•اسألها
_جرا اي يلا منك ليها انتوا هاتلقفوني لبعض "زعقت" في اييه
-بص ياعم رحيم صاحبك بقوله في عريس متقدملي وبقوله انا اصلا رافضة بس أهلي مستغربين انا ليه برفض كل العرسان اللى بيتقدمولي من غير سبب، ومصممين اني اوافق على العريس دة، فبقوله بس انه ييجي يتقدم ونتخطب بشكل مؤقت وانا هاستناه لغاية مايخف ان شاء الله وهو رافض
زعق: اجي اتقدم ازاي بشكلي دة! بجسمي اللي.. اللي.. هو فين جسمي دة اصلا! بعنيا وعروقي اللى بارزين دول! بـ.. بـ..بهيئتي دي! دة ان سمحولي اخرج من هنا دة ان قدرت اطلع سلم العمارة اصلا!
-م فيه اسانسير
•انتي بتهزري يا مارينا! مارينا انتي مش مجبرة على كدة "حاوط وشها بإيده" انتي تستاهلي حد احسن مني انا مش عارف حتى اذا كنت هاخف ولا لاا
دمعت: بس انا مش عايزة غيرك
•واحنا عمرنا م هنكون سوا بقالي سنتين بفهمك دة وانتي مش قابلة الحقيقة، انا بنتهي يامرينا، امشي... امشي ارجوكِ
"خدت شنطتها وجريت برا الاوضة"
_ليه عملت كدة
•انت بجد مش عارف! رحيم هي ماينفعش تفضل متعلقة بيا كدة، احنا بنموت هنا وانت عارف كدة، مفيش حد بيتعافى من المرض دة غير حالة وحدة كل فين وفين يعني الاحتمال الاكبر اني هاموت هنا
_واحتمال تعيش
•مجرد احتمال
_دة مكانش كلامك فين ثقتك اننا هانخف وهانعيش حياتنا زي م احنا عايزين
•دة كلام بقوله كدة بقوي نفسي وبقويك بيه لكنه مش هايحصل
"بص ع الباب فبصيت انا كمان لقيتها واقفة وباين على وشها انها معيطة"
=البنت اللى كانت طالعة دلوقتي باين عليها بتحبك بجد، ارجوك حاول علشانها انت عندك حد تحارب علشانه فـ ماتخسرش الحرب وتخسر اللى بتحارب علشانه، انا واثقة انها هاتفضل جنبك ارجوك حاول على الاقل علشانها.
"مشيت"
•انا مش عارف اعمل اي
فوقت على هز جرجس ليا: هاا بتقول ايه!
•كنت سرحان في ايه
=فيها ا.. أقصد انها باين عليها حزينه جداً، تفتكر ياجرجس الانسان ممكن يعرف يعيش حياته لوحده من غير م حد يقويه ويشيل عنه شوية من حزن الدنيا او ع الاقل يسنده!
•انا مش فاهم حاجة
=خلاص مش مهم، المهم تكون فهمت كلامها، حاول علشان مارينا استحمل علشانها وعلشاننا وعلشان والدتك "جبتله الدوا من الدولاب" ميعاد الدوا، انت قوي.. صدقني.
"سيبت الدوا قدامه وخرجت قابلت فاطمة الممرضة وانا خارج"
~كنت لسة جيالك يارحيم، ميعاد جلستك
=تمام يافطوم روحي وانا جاي وراكِ
~ماشي ماتتأخرش
=مش هاتأخر لا
"دخلت الاوضة عملت قهوة وشربتها وروحت اخد الجلسة"
=اي الاقتراحات؟ نعمله هنا ولا تحت فى الجُنينة
•جُنينة؟! ياعم ريح نفسك مروان مش هايحتفل بعيد ميلاده دة معقد!
=اسكت انت بس هانعمله يعني هانعمله الساعة 12 بالظبط لازم كل حاجة تبقى جاهزة وكويس ان جلسته النهارده وهو بياخد الجلسة ندخل نزين اوضته هانعمل الحفلة هنا
هنا سارة أتكلمت: طب ماهو هايدخل اوضته قبل الساعة 12 أكيد
محمد: مفيش غير حل واحد
اتكلمنا كلنا في صوت واحد م عدا ريحانة اللى كانت قاعدة فى ركن لوحدها واللى دكتور جميلة جابتها معانا الاجتماع بناءً على طلبي بالعافية اصلا والا كنت هاقعد اطبل ع الباب بتاعها لغاية بكرة وهي بتكره كدة: ايه هو؟!
محمد: نسرق مفتاح اوضته، مروان الوحيد فينا اللى اول م يخرج من اوضته بيقفل الباب بالمفتاح وياخده معاه فنسرق المفتاح ويكأنه اي بقا ويكأنه وقع منه وبما إن رحيم اكتر واحد فينا صاحبه فياخده معاه اوضته لغاية الساعة 12 ونقوله اننا لقينا المفتاح ونديهله فيخرج يروح اوضته يلقيها متزينة اي رأيكم
سقفنا كلنا: عااش ياض يامحمد "عدل ياقة القميص بغرور"
•باقي خطوة وحدة، ازاي هانسرق المفتاح اصلا، دة لو حد قرب منه هايقتله
=اسكت اسكت ياعم جرجس وحياة ابوك، يابني ما وهو داخل الجلسة بيسيب كل حاجة برا، واحنا هانظبط مع فاطمة تسربلنا المفتاح وتختفي بقا لغاية م مروان يهدا
بصينا كلنا لفاطمة: انتوا بتبصولي كدة ليه! لاا انا مليش دعوة هايقعد يزعقلي ويقولي اني مهملة وانتوا مايرضيكمش ام ياسين تتهزأ مش كدة
•لا يرضينا
فاطمة: كدة ياجرجس! ابقى تف على وشي لو خليت ياسين يلعب معاك تاني
•دة عقاب صعب جدا على فكرة وانا مش قده، يا فاطمة دة انا بتحايل عليكي تخلي ابنك يطلع برا اوضتي يافاطمة، يافاطمة دة انتي بتخبيه جوا الاوضة علشان مدير المستشفى مايطردكيش يافاطمة
فاطمة: احم قولتولي اسرق المفتاح امتى!
نورا: ايوة كدة يافطوم ياجامدة جمدي قلبك انتي سترونج
جميله: جلسته الساعة 12 الضهر يعني بعد 3 ساعات من دلوقتي وربنا يستر بقا انا الشيفت بتاعي خلص هاروح دلوقتي وهاجي ع الساعة 10 بالليل كدة وهابعت حد من الامن دلوقتي يجيبلكم الزينة
سارة: هاتسبينا لوحدنا معاه ياجميلة!
جميلة: سارة انا بيتي جنب المستشفى يعني في عشر دقايق هكون هنا لو حصل حاجة ادوني ميسد بس
=ان شاء الله مش هايحصل حاجة يلا بينا انطلقوا
"كانت اول وحدة خرجت من الاوضة هي ريحانة انا مش عارف هاتفضل لغاية امتى منطوية ومش بتكلم حد فينا كدة دة حتى سارة ونورا فشلوا انهم يقربوا منها"
~ازاي يعني ضاع انتوا اتجننتوا! احنا في مستشفى ولا فى الشارع، المفروض كل حاجة تبقى فى مكانها وفين فاطمة؟!
كنا واقفين كلنا ورا الباب وهو جوا عند دكتور احمد بيزعق وفاطمة واقف معانا بتلطم: يلهوي يلهوي هايموتني يخرابي
نورا: ششش وطي صوتك لو سمعنا كل حاجة هاتبوظ
سمعنا صوت دكتور احمد من جوا: اهدا بس يامروان وان شاء الله هانلاقيه وفاطمة استأذنت وروحت علشان ابنها تعبان
~ااه قول كدة بقا علشان ابنها تعبان فتهمل في شغلها بقولك اي فى خلال نص ساعة يكون المفتاح في ايدي فاهم
"جرينا كلنا استخبينا في اوضة محمد اللي تعتبر أقرب اوضة لمكتب دكتور احمد، وهو خرج "
•رايح على اوضتك رايح على اوضتك
=استعنا ع الشقا بالله
محمد: استودعك الله
=ادعولي
دخلت الاوضة لقيته قاعد ع الكنبة وحاطط وشه بين ايديه: احم مالك يامارو سـ..
~ماتقوليش مارو دي
=اي اللي حصل بس
~الاغبيا ضيعوا مفتاح اوضتي
=ان شاء الله هانلاقيه متخافش اهدا بس كدة وبعدين اوضتي واوضتك اي م واحد يامعلم خليك قاعد في اوضتي لغاية مايلاقوه
زعق: وليه يضيعوه من الاساس ليه الاهمـ..
"كح، كح كتير وانا خوفت عليه جبتله مية واديتهاله وقعد شوية وبعدين هِدي"
=يابني لازم تهدى نفسك وماتتعصبش دة مش كويس علشانك
~مفيش حاجة كويسة بتحصلي يارحيم "صوته هِدي" مفيش
=مروان لـ..
~لازم يبقى عندك ثقة في ربنا مش كدة! انت بتقول الكلام دة للكل وانت اكتر واحد محتاج تقنع نفسك بيه، بص شكلي بقا عامل ازاي! رحيم احنا ربنا مش بيحبنا علشان كدة ابتلانا بالمرض دة اللي بيحب حد مش بيعذبه
_اسفة ع التدخل لتاني مرة بتدخل بينك انت واصحابك، بس كنت معدية بالصدفة والله و.. وسمعته بيقول ان ربنا مش بيحبنا، على فكرة ربنا بيحبنا وجداً ربنا لما بيحب حد بيبتليه علشان يرجعله ويتوب عن اى حاجة وحشة بيعملها فربنا يغفرله ذنوبه لان احنا بطبعنا بنرجع لربنا لما بنبتلي صدقني ربنا بيحبنا جداً بيحبنا لدرجة انه ابتلانا بالمرض دة علشان اللي بيجيله المرض دة كلنا عارفين بيتعذب قد ايه فربنا اراد انه يتعذب في الدنيا علشان يغفرله ذنوبه بدل ما يتعذب في النار، الرسول صلى الله عليه وسلم قال " ما يصيب المسلم من نَصَب ولا وَصب، ولا هم ولا حزن ولا أذى ولا غم، حتى الشوكة يشاكها إلا كفر الله بها خطاياه " فـ انت متخيل لما شوكة تدخل في صباعك ربنا بيغفرك بيها ذنب ما بالك بقا بكم الألم اللى بنستحمله دلوقتي، خلي عندك ثقة وإيمان بربك يا استاذ مروان ربنا بيحبنا بيحبنا جداً، فاكر حكاية الطفل ريان -رحمه الله- اللى كانت منتشرة من كام يوم، متخيل حجم المعاناة اللى عاشها، طفل صغير وقع في مكان ضيق على عمق 32 متر كان كله تقريباً متكسر ومش قادر يتحرك قعد في مكان ضلمة جعان وعطشان وبيتألم و"صوتها اتهز" وخايف.. مرعوب، محدش يعرف اي الحكمة من كدة بس هل دة معناه ان ربنا مش بيحبه! طب دة طفل صغير ليه ربنا مش هايحبه ثق في ربنا وخليك عارف ان رب الخير لا يأتي إلا بالخير.
اتنهد: ونعمَ بالله، شكراً ليكِ انا كنت محتاج اسمع الكلام دة جِداً
"خرجت بهدوء، الحقيقة ان انا كمان كنت محتاج اسمع الكلام دة جداً، انا كنت بدأت افقد ثقتي في ربنا وبدأت اقتنع انه مش بيحبنا بس الحمدلله على كل شئ الحمدلله حمداً كثيراً، الحمدلله على كَم النعم اللى عندنا ومش حاسين بيها، فوقت من سرحاني لقيت مروان طالع من الحمام مسك المصلية وفردها وبدأ يصلي، طوِّل فى السجود فـ اتخضيت روحت اشوفه سمعت صوته بيبكي فسيبته وخرجت من الاوضة، وانا معدي من قدام اوضة ريحانة لقيت الباب مفتوح و لقيتها واقفة فى البلكونة خبطت ودخلت، لفت لقيت مناخيرها وعنيها حُمر، خليني اقول إن لأول مرة اخد بالي انها جميله اوي كدة جميله لدرجة تفتن"
=ا.. ا.. هانروح نكمل تجهيز لحفلة مروان تـ.. تحبي تيجي معانا
أبتسمت ولأول مرة اشوف ابتسامتها اللي زادت من جمالها: احب اجي معاكم
=ايه دة ايه دة بجد
_في ايه!
=انت عندك سنان زينا انا فكرت سنانك مكسرة ولا حاجة
ضحكت: ليه
=اصلك يعني ماكونتيش بتضحكي خالص
_طب يلا نروح نكمل تجهيز للحفلة
ابتسمت: يلا
"عديت على اوضتي وانا نازل تحت لأوضة مروان لقيته نايم قفلت الباب بهدوء ونزلنا لقينا سارة ونورا ومحمد وجرجس بيجهزوا الاوضة وتقريباً قربوا يخلصوا"
=عااش ليكو ياشباب
•مروان فين وعامل ازاي
=نايم دلوقتي
•احسن يلا نكمل بقا قبل م يصحي
"بدأت انا وريحانة نشتغل معاهم اظن انها هي كمان كانت محتاجة تسمع الكلام اللي قالته لانها بدأت تتفاعل مع الكل، كل حاجة كانت تمت والساعة كانت لسة 5 المغرب"
=انا هاروح اشوف مروان بقا
سارة: لو مكانش صِحي اوعي تصحيه يارب يفضل نايم لغاية بالليل
•ادعم لانه لو صحي هايفضل يزعق ويمكن يروح يجيب نجار يفتحله الباب
ضحكت: اشطاا ماشي
_يلا بقا كل واحد يروح اوضته عقبال م جميلة تجيب التورتة وهي جاية
*اشطاا
"كل حاجة اتبدلت فرحتنا ملحقتش تكمل كالعادة، فتحت الباب لقيته مرمي ع الارض وبينزف من بوقه ومناخيره كان بيحاول يوصل لريموت الانذار علشان حد يلحقه في مشهد سلو موشن كانت المستشفي بتتقلب فوقاني تحتاني بسبب صراخي بإسمه اول م دخلت اوضتي، كان دكتور احمد وفاطمة وممرضات كتير معاهم، خرجوني برا ووقفنا كلنا برا اوضتي "
"ريحانة"
"كنت بعيط لعياطهم خوفت لخوفهم، لسة متعرفة على مروان النهارده بس شئ من جوايا بيقولي اني اعرفه من زمان، بصيت على رحيم لقيت محمد وجرجس واقفين جنبه بيهدوه وهو رايح جاي فى الطرقة بعد دقايق لقينا دكتور جميلة داخلة الاوضة جري وبعد ثواني طلعوا بمروان على ترولي ووده العمليات، طلعنا كلنا لاوضة العمليات بعد وقت مش طويل طلعوا من جوة وجميلة بتبكي"
~خلاص.. خلاص ادعوله بالرحمة
"صرخنا كلنا ورحيم.. رحيم وقع على الارض وعيط زي عيل صغير.. عيل صغير فقد امه دلوقتي حالاً، محمد وجرجس كانوا بيعيطوا هم كمان، للحظة حسيت ان شئ بيربطنا كلنا بمروان اللى معرفش ازاي هانتخطى موته"
سارةة اتكلمت بعياط: لا لاا مش هاينفع يسيبنا مش احنا اتفقنا يانورا كلنا هانخف وهانعمل الشركة اللى نفسنا فيها صح
ردت نورا عليها: ايوة.. ايوة اتفقنا مروان مش هاينفع يسيبنا لاا جميلة قولي إنك بتكدبي ارجوكِ
~انا اسفة كان نفسي بس هو اكيد في مكان احسن دلوقتي
محمد سند دماغه ع الحيطة: ماعرفش حتى اننا كنا بنخطط لعيد ميلاده مكانش ليه حد بس احنا كنا جنبه احنا والله كنا فاكرين عيد ميلاده
• يرجع طيب نودعه، يرجع لثواني
"معرفش فضلنا كلنا قاعدين بنبكي ع الارض قدام اوضة العمليات لغاية امتى بس رحيم قام ودخل الاوضة فكلنا دخلنا وراه، بكى وهو بيبوس دماغه، والحقيقة انه كان مبتسم ووشه بيشع نور، ودعناه كلنا وخرجنا، انا بكره لحظات الوداع وخصوصاً الوداع الابدي، وانا خارجة حسيت اني سايبة جزء مني جوا فـ همَ ياتري حاسين بـ ايه وهم اصحابه من زمان!، كل واحد راح اوضته، بعد حوالي ساعتين سمعنا صوت صريخ اعتقد ان اهل مروان جم ياخدوه ضميت نفسي وبكيت لما الصوت هِدي لقيت فاطمة جاية على اوضتي وعلامات الحزن على وشها"
- رحيم قالي اناديكي واجمع الكل في اوضة مروان الله يرحمه
"روحت لقيت الكل فى الاوضة والحزن مالي قلوبهم قبل وجوههم"
اتكلم بصوت ضعيف: لـ.. لما رجعت اوضتي لقيت الورقة دي، مروان الله يرحمه كان كاتبها "بدأ يقرأ"
| صحابي الغاليين عارف انكم بتحبوني زي ما بحبكم واسف لو كنت بتعصب على حد منكم، انا عارف وانا بكتب الرسالة دي اني مش هاشوف حد منكم تاني ، رحيم اول واحد اعرفه واحبه في المستشفى هنا "بكي" صديق واخ عزيز انت كنت اقرب واحد ليا وعارف ان موتي هايأثر فيك خليك قوي و خلي بالك منهم يارحيم بحبك ياصديقي العزيز.
جرجس اخويا وحبيبي والله، اللي غيرلي فكرتي عن المسيحيين انا بحبك والله ولو كنت بتعصب عليك فعلشان عارف انك هاتستحملني.
محمد انت اخر واحد انضميت لينا ماكونتش بحبك في الاول لاني حسيتك بتخترق شلتنا بس والله يعلم ربنا انك بقيت في غلاوة رحيم وجرجس واني حبيتك كـ اخ ليا خليك جنب رحيم وجرجس خليكم كلكم جنب بعض.
الهُبل بتوعنا سارة ونورا اميرات الشلة والله ماعتقدش ان لو كان عندي اخت كنت هاحبها زي م بحبكم اسف اني هاسيبكم وهاخلف وعدي بس رحيم ومحمد وجرجس جنبكم.
ريحانة لسة عارفك النهارده بس رحيم حكالي عنك كلامك فوقني والحمدلله انك جيتي فى الوقت المناسب، اميرات الشلة زادوا اميرة.
انا بكتب الرسالة دي وانا حاسس اني خلاص النهارده اخر يوم ليا فى العالم دة، انا راضي جداً الحمدلله، انا بحبكم كلكم والله ويعز عليا فراقكم بس دي سُنة الحياة اشكرولي فاطمة وجميلة واحمد وعرفوهم انهم مقصروش، انا مبسوط اني اتعرفت عليكم كلكم، خليكم سوا وخلوا الشلة زي ماهي ووزعوا البهجة على باقي المرضى فى المستشفى زي م كنا بنعمل.
بحبكم..|
"حط الورقة على الترابيزة قدامه وحط ايده على وشه وصوت عياطنا كلنا زاد، رحيم خرج برا الاوضة، بصيت حواليا على الزينة اللي عملناها بكل حب لأجل مروان ودموعي زادت
خرجت روحت اوضتي وانا معدية من قدام اوضة رحيم سمعت صوت عياطه، ماكونتش هاقدر اقويه ولا اقوله حاجة فدخلت اوضتي"
"عدا كذا يوم دوشة رحيم اختفت والحزن كان ماليهم كلهم، بحاول اقويهم، بياخدوا الجلسات وهم فاقدين الامل.. ماعدا رحيم.. رحيم اللى بطل ياخد الجلسات وبطل يتكلم مع حد بطل ييجي يسأل عليا ويطبل على الباب زي م كان بيعمل كل يوم، خرجت من اوضتي وخبطت على اوضته ودخلت، اي الصوت دة؟ دة صوت قلبي اللي وقع في رجليا، كان مشغل مزيكا وواقف على سور البلكونة وبيرخي جسمه، لثواني وقفت متجمدة مش عارفة اعمل اي دخلت بهدوء وانا بتكلم"
_رحيم ارجوك انزل، رحيم علشان خاطري ماتعملش كدة ارجوك، هاتـ.. هاتموت كافر كدة يارحيم "دموعي نزلت" علشان خاطري انزل، اتهز فصرخت بإسمه وغمضت عنيا" لا يارحيم ماتسبنيش.. انا بحبك، فتحت عنيا بهدوء لقيته واقف ع السور وماسك في سقف البلكونة، انزل ارجوك
نزل: انتي قولتي اي!
خبطته في صدره وزقيته لجوة وانا بعيط: انت اتجننت اي اللى كنت عايز تعمله دة هاا بسهولة كدة عايز تنهي حياتك انت مجنون مفكرتش في عيلتك في اصحابك لسة خاسرين مروان من كام يوم كنا هانتحمل ازاي نخسرك انت كمان انت اناني يارحيم
سبته وكنت خارجة فمسك إيدي: اهديي اهدي، مين قال اني كنت هانتحر!
سحبت ايدي من ايده: اومال كنت واقف بتتشمس حضرتك
اتنهد: كنت بهدي نفسي احساس ان مفيش حاجة مقيداك احساس جميل صدقيني ماكونتيش بنتحر انا كنت مبسوط جداً حسيت.. حسيت للحظة اني ممكن اسيب نفسي واطير دلوقتي حالاً
حطيت ايدي على وشي وحاولت ابطل عياط: افرض كنت وقعت كنت هاعـ.. كنا هانعمل اي
=انا اهو قدامك ماوقعتش اهدي وبطلي عياط انا كويس ياريحانة "اتنهد وقعد على الكنبة" لا انا مش كويس انا مش كويس أبداً انا حاسس بتعب رهيب، نفسي وجسدي
_علشان مش بتاخد الجلسات قوم معـ..
=م مروان كان بياخد الجلسات وايه اللي حصل اهو مات، على رأي جرجس احنا بنموت هنا، ريحانة احنا هانخلص هنا واحد ورا التاني، ارجعي افقدي الامل تاني هنا مفيش أمل
_ليه بقيت كدة انت كنت اكتر واحد فينا عنده أمل كنت اكتر واحد بيقوينا، انت قوي يارحيم، عارف احنا كلنا أبطال، ومروان مات علشان دة قدره ودة يومه ربنا أراد انه ياخده جواره هانعترض على ارادة ربنا!
هَمس: استغفر الله العظيم
_قوم معايا علشان تاخد جلستك بقالك من يوم موت مروان رحمه الله وانت ما اخدتش ولا جلسة، حتى الدوا بتاعك مش بتاخده وبص بقيت ضعيف ازاي!
حسيت نفسه بقا مش منتظم: رحيم انـ.. انت كويس
اتكلم: انا مش بحبك ياريحانة وانت ماينفعش تحبيني فاهمة، قلبي مدقش ليك، ولا مرة شوفتك مناسبة ليا، انا اسف
دمعت ورجعت لورا كام خطوة: انـ.. انا كنت.. انا بس.. ليه يارحيم!
"حط وشه بين إيديه، وقفت ثواني مستنياه يقول حاجة لكنه.. لكنه مقالش فخرجت روحت أوضتي وقعدت ورا الباب وبكيت وافتكرته
Flashback
فتحت الباب بعصبية: مش هاتبطل بقا شغل العيال والتطبيل دة
دخل: المفروض تكون أتعودتي
_ياسيدي انا مابتعودش ع الازعاج ممكن بقا تبطل كل شوية تيجي تزعجني، وبعدين انت بأي صفة تدخل أوضتي كل يوم بالشكل دة بصفتك أيه هاا
بص فى عنيا: بصفتي بحبك مثلاً
" سرحت لثواني في عينيه اللي اول مرة اخد بالي انها جميله كدة"
ضحك: بـ.. بهزر معاكي ماتتصدميش كدا، ع العموم انا جيت افكرك ان ميعاد جلستك النهارده
حاولت ارجع صوتي: م انـ.. انا عارفة يعني مش محتاج تفكرني واصلا لو نسيت فكدة كدة دكتور جميلة بتبعت حد يقولي ودلوقتي اتفضل اطلع برا
قام من على الكنبة: يابنتي بقا انتي عليكي عفريت اسمه اطلع برا، جرا اي يااستاذة ريحانة، الحياة ابسط من كدة ماتاخديش كل حاجة ع اعصابك عيشيها بسلاسة دول كلهم يومين
Back
بكيت وانا ضامة نفسي: بس انا شوفت في عنيه انه بيحبني بجد.. انا والله شوفتها في عنيه
"كنت خايفة لعلاقته بيا كصديقة تتأثر انا مش عايزة اخسره، كفاية اللي خسرتهم، قررت اني اروح اقوله اني قولت كدة بس علشان ينزل، انا مش هاقدر اتحمل انه يتعامل معايا بطريقة غير اللى كان بيعاملني بيها فى الاول، اللي اقصده اني مش هاتحمل يعاملني بحساسية، روحت اوضته خبطت ودخلت"
_رحيم انـ.. رحيم لاااا
"كان واقع على الارض، جريت عليه" رحيم رد عليا لاا يارحيم فوق رحيييم" صرخت " ياساارة، الحقوني
دكتور جميله دخلت بسرعة هي والممرضة نجلاء حطت ايديها على رقبته جست النبض: نجلاء روحي نادي لدكتور احمد بسرعة
لقينا دم بدأ ينزل من مناخيره: وخلي حد يجهز اوضة العمليات بسرعة، يلاا
اتكلمت وانا ببكي: دكتورة هو هايـ.. هايبقى كويس مش كدة
~ان شاء الله، ماتخافيش
"جم وحطوه على ترولي وخدوه العمليات، نفس الموقف بيتكرر تاني كل حاجة حصلت من كام يوم بتتكرر قدامي، بس المرادي محدش كان قادر يتحمل حرفيا كنا كلنا منهارين، محدش كان لسة اتخطى موت مروان، الوقت اللي عدا وهم جوا كان تقيل جداً علينا كلنا، قومت مرة وحدة ومسحت دموعي واتكلمت"
_بنعيط ليه هاا مفيش حاجة هاتحصل هو.. هو هايبقى كويس "روحت عند نورا ومسحت دموعها" رحيم هايخرج دلوقتي يانورا وهايبقى كويس "روحت لسارة" ماتعيطيش ياسارة هايبقى كويس والله "حطيت إيدي على قلبي وهَمست" انا متأكدة، محمد وجرجس ماتقلقوش ماشي كل شئ هايبقى تمام وهـ..
"جميلة خرجت فـ جرينا عليها"
سارة خدت نفسها واتكلمت: هاا ياجميلة رحـ.. رحيم بقا كويس صح؟
•ماتتكلمي يادكتور ردي على سارة وقوليلها انه بقا كويس وهايخرج دلوقتي
حطت إيديها على بُقها وكتمت صوت عياطها: ادخلوله عايز يودعكم
"سارة صرخت ونورا قعدت على الارض ومحمد وجرجس جريوا لجوا، اتنفست وروحت قومت نورا ووقفتها جنب سارة"
_رحيم كويس جميله بتكذب كل شئ كويس ماتقلقوش ماشي يلا ندخل نشوفه علشان هو بيحب يهزر وانا هاكشفهولكم دلوقتي يلا
"اخدتهم ودخلت"
•قوم بقا يلا قربت اخف وهاتجوز مارينا علشان تغني في فرحي زي ماقولت
ابتسم وحاول يتكلم: محمد هايغنيلك انت قلقان بس علشان انا اللي كنت هاولعلك الفرح
-مش هاغني لوحدي والله م هاغني لوحدي قوم يلا بالله عليك
نورا راحت ناحيته واتكلمت وهي بتعيط: نسيت الشركة يارحيم! مين هايبقى المدير ويقعد يتأمر علينا
سارة كمان بكت: هاتسلمني لـ إسلام مش كدة! انت عايز تخلف وعدك يارحيم انت عارف اني معنديش اخوات وبابا ميت هاحط ايدي في دراع مين ويسلمني لعريسي!
ملامحه حنت وحاول يطلع صوته: مش بإيدي والله يعز عليا اني اسيبكم "بص ناحيتي" سمعيني صوتك ياريحانة مش هاتقولي حاجة
قربت منهم ومسحت دموعي وضحكت: عرفت تضحك عليهم كلهم اهو، انا ماتخدعتش قوم يلا وبطل رخامة، على فكرة هزارك رخم، وانت أرخم
ضحك بهدوء وكان بيتنفس بصعوبة: لسانك بينقط دبش "مدلي ايده فمسكتها" انا بحبك والله، ماقدرتش امشي من غير م اقولها انا بحبك اوي بحبك ياريحانة
ماقدرتش اتماسك اكتر من كدة فعيطت بصوت: قوم يارحيم بقا قوم، طب لو بتحبني ماتسبنيش انا مليش غيرك، عارف بابا مات من زمان وماما وريتاج اختي ماتوا في حادثة عربية انا الكل سابني انا مافرحتش ابدا يارحيم "همست" ماتتخلاش عني.. ارجوك
=مش عايز اسيبك ياريحانة والله، بس إرادة ربنا فوق كل شئ... ولا نسيتي، انا آسف " وزع نظراته علينا واتكلم وهو بيتنفس بصعوبة وهنا قلوبنا كلنا ارتعبت" انتوا الخمسة.. اقويا مش معنى اني ومروان ما انتصرناش يبقى مفيش أمل، قاوموا أتغلبوا ع المرض الخبيث دة وحققوا حلمنا، انا بحبكم ومبسوط اني اتعرفت عليكم "بص لمحمد وجرجس" ماتسيبوش ماما ولُبنى لوحدهم "بص ليا وسارة ونورا" وانتوا كمان خليكم جنبهم وزوروهم دايماً انا حكيت ليهم عنكم.. كلكم "فرد إيده قدامه" على العهد هاتنتصروا "محدش فينا كان قادر يتكلم فكرر كلامه" على العهد؟ "مدينا إيدينا بس قبل مانلمس إيده.. وقعت جنبه وعينيه غمضت، صرخنا صرخة اتهزت ليها المستشفى كلها لإنها كانت طالعة من القلب "
"اتنفضت"
=ايه ايه في ايه! كنتي سرحانة في ايه
_و.. ولا حاجة يا حبيبي ماتشغلش بالك يلا نكمل؟
=في ايه ياريحانة انتي اتخضيتي جامد
اتنهدت وابتسمت: افتكرت رحلتنا
ضحك ومسك إيدي: طب يلا علشان نحط اللمسة الاخيرة
"روحنا عند مدخل الشركة، ااه شركتنا حققنا الحلم، سارة كانت واقفة مع إسلام جوزها، ونورا كانت واقفة مع محمد اتخطبوا بعد مناهدة كبيرة، وجرجس مع مارينا اخيراً اتجوزوا، مسك برواز صورة مروان، ومحمد جه مسك آخر رسالة من مروان اللي كتبها بخط إيده، وجرجس مسك الرسالة بعد م طبعناها وبروزناها، وكل واحد علق اللي كان ماسكه، وقفنا كلنا واتصورنا سيلفي واحنا بنضحك وصورة مروان ورسالته كانت بيننا"
=حققنا الحلم يامروان
•هاتفضل دايما في قلوبنا يحبيبي
-هانفضل فاكرينك في كل إنجازاتنا واحلامنا ياصاحبي
"ابتسمنا ودخلنا علشان نبدأ مشوارنا، مكتب كل واحد فينا كانت فيه صورة لـ مروان ونسخة من آخر رسالة كتبها"
وانا بشتغل رحيم طبل على الباب ودخل: مش هانبطل العادة دي
=وحشتنا ياعم
_رحيم مش عايزين هزار هنا اتفضل اطلع برا
=وانتي مش هاتبطلي الكلمة دي بقا، مرت سنين ولسـ..
قاطعته: ماتفكرنيش بالسنين دي يارحيم انا م صدقت نسيتها
ضحك: خوفتي اوي وقتها صح
_مش عايزة افتكر أبداً
=على كدة لو كنت مت وقتـ..
حطيت ايدي على بوقه: انت عايش ياحبيبي دلوقتي والحمدلله انها كانت مجرد غيبوبة انت دلوقتي "دمعت" دلوقتي قدامي وكويس بلاش نفتكر اللي حصل زمان.
مسح دموعي: انتي استرونج يابت ماتعيطيش
_طب يلا بينا نكمل شغل علشان المشوار لسة طويل
=عندك حق لسة المشوار طويل.
زقيته: طب اخرج يلا علشان اعرف اشتغل
=خارج خارج بس عايز اقول كلمة وحدة
حطيت إيدي في وسطي: قول ياسيدي
ضحك: بحبك
ضحكت: وانا بتوه فيك
"و روحك في الكُون تسري مَعي" ♥️🖇️
تعليقات
إرسال تعليق