_١ قهوة عند ترابيزة ٨
=حاضر
_بسرعة يا أحمد عشان الراجل مستعجل
=حاضر جاي أهو.
أتفضل القهوة يا فندم
خدها وهو بيبصلي بقرف وكإنى حاجة مقرفة، ما اهتمتش أوي لبصته مش أول واحد يبصلي كدَ، يمكن عشان هدومى مش قد كدَ يعني أو يمكن عشان وشي بهتان وباين عليه الإرهاق من كتر الشغل أو يمكن الغلط فيا.
=أنا ماشى يا على.
_طب أستني أقعد معايا شوية.
=معلش يا على أنت عارف، لازم ألحق الشغل التاني وإلا هنطرد وأنا مش حمل بهدلة، أنا ما صدقت ألاقي شغل تاني عشان أكفي مصاريف الكلية ودوا أمى
_طيب روح أنتَ، ربنا يقويك، اقابلك بكرة فى الشغل.
=تمام يا غالى
مشيت ألحق الورشة بسرعة لاحسن انطرد
_تأخير نص ساعة يا أحمد
=معلش أعذرني، يادوب خلصت شغل في المطعم وجيت علي طول
_أنا لولا إنى عارف ظروفك كان هيكون ليا كلام تاني، ياريت التأخير دَ ما يتكررش
=حاضر
خلصت شغلى وروحت البيت مهدود، أول حاجة بعملها أدور على أمي وأطمن عليها....دخلت عليها لاقيتها نايمة فمحبتش أصحيها وخصوصاً إنها تعبانة.
روحت اتوضيت وصليت ولما خلصت سمعت صوتها
_أنتَ جيت يا أحمد
=أه يا ماما جيت من شوية
_اتأخرت ليه يا حبيبي قلقت عليك
=كان عندي شوية شغل متراكمة عليا ماتقلقيش
_طب اجبلك حاجة تاكلها
=لا أنا مش جعان، أنا هنام شوية عشان ألحق أصحي بدري للجامعة
_ماشي، ربنا يعينك
نمت وصحيت تاني يوم اتوضيت وصليت وروحت أسلم عليها قبل ما أمشى.
=ماما....ماما
_نعم يا أحمد
=أنا ماشى، عايزة حاجة
_الدوا بتاعي خلص
=طب اسمه أي وانا هجبهولك وأنا جاى
_خد أهو
=تمام، همشى أنا مش تنسى تدعيلى.
_ربنا يوفقك ويعينك
مشيت وروحت الكلية خلصت محاضراتى وروحت بسرعة للشغل
_كنت فين يا أحمد
=معلش يا على كان ورايا محاضرات كتير فاتأخرت
_طب يلا عشان فى زباين كتير
=حاضر جاي
_عارف النهاردة أى؟
= مش فاكر والله
_النهاردة يوم القبض ودِ حاجة تتنسي
= بجد! الحمدلله
قبضت المرتب واشتريت الدوا بتاع ماما وحمدت ربنا على نعمه الكثيرة التى لا تعد ولا تحصى، مكانش معايا حق الدوا بتاع ماما ومن كرم ربنا يكون النهاردة القبض.
بعد يوم متعب روحت البيت أخيرًا
=ماما جبتلك الدول
_أتأخرت كدَ ليه
=معلش الشوارع كانت زحمة، المهم قومي عشان تاخدي الدوا
_حاضر
=كنت هقوم بس هي قعدتني تانى
_أقعد معايا، بقالى كتير مش كلمتك ولا قعدت معاك
=معلش الشغل واخدنى عنك، بس إن شاء الله قريب هتفرج.
المهم عايزة حاجة أعملهالك أو اجبهالك، أطلبى أي حاجة أنتِ عايزاها.
_مش عايزة حاجة غير إنى أشوفك مبسوط ومحقق حلمك
= عارفة يا ماما أنا إن شاء الله لما أحقق حلمى ويكون معايا فلوس، هطلعك عمرة وهشترى بيت جميل يكون دافى وهشتري عربية ذى إللِ بيركبوها الناس الأغنياء، ومش هخليكِ محتاجة حاجة خالص.
_وأنا مش محتاجة حاجة، أنا بس مستنية أشوفك حاجة كبيرة ومحقق حلمك، مستنية أشوفك فرحان بنجاحك، وفرحى أنا من فرحتك
= قريب..قريب إن شاء الله هيحصل.
نمت جمبها ومخدتش بالي، يمكن لأنى أول مرة أنام مطمن كدَ.
قومت صليت ولبست عشان أنزل الكلية وقولت أصحيها يمكن محتاجة حاجة
=ماما....ماما
_.....
=ماما أنا ماشى
_.....
=مش عايزة حاجة أجبهالك
_......
=ماما...ردي عليا.
البقاء لله شد حيلك يا أحمد وقوي نفسك.
كان على جمبي بيحاول يواسيني، بس أنا مش قادر حاسس إنى عايز أنفجر من العياط، ماما مشيت وسابتني، هعيش لوحدى من غيرها، طب هقول لمين كل يوم الصبح ادعيلى، مين هيطبطب عليا وقت زعلى ويطمنى
أول ليلة أنام من غيرك، أول مرة أدخل البيت وأنتِ مش موجودة، أنا خايف ومش قادر أقف على رجلي مش قادر أقوم، مش قادر أعمل حاجة من غيرك يا أمى.
خلصت إمتحانات والنتيجة بانت، أنا نجحت وتقدير كمان، دخلت البيت وكنت لسه هنادي علي ماما أفرحها بس افتكرت إنها مش موجودة، ساعتها انهرت من العياط أنا عارف إن دَ قضاء، وإن هى مكتوب إنها تموت...بس أنا مش قادر أعيش من غيرها...عايز أشوفها، أسمع صوتها، أو أكلمها حتى.
روحت أزور أمى عند قبرها...أد أى وحشتنى
أنا نجحت ياماما، عارفة أنا كمان هبقى معيد فى الكلية وكمان لاقيت شغل كويس، أنا بنجح ياماما، بس النجاح من غير وجودك مالوش طعم وطعمه ماسخ أوى، كنت عايزك تشاركينى نجاحى، كنت أتمنى تشوفينى وأنا بحقق حلمى ذي ما أنتِ كنتِ عايزة، كان نفسى تكونى موجودة عشان أكلمك ذى زمان، وحشتينى أوى، وحشنى كلامك معايا، وحشنى وجودك ودعائك ليا كل يوم....ربنا يرحمك يا أمى.
تعليقات
إرسال تعليق