" و كَأنكِ جِئتِ عَوضاً لِقَلبِى عَنْ كُلَ شَئ مَرَرتَ بِهِ ♡..! "
- يعنى كدا يا بابى مث هثوف مامى تانى خالث !
- لا يا حبيبة بابى هتشوفيها .
- طب ليه كل الناس عماله تعيط و جدو و تيتا بيعيطوا ؟!
- عشان ماما راحت مكان أحسن من الدنيا دى و هما زعلانين عليها .
- يعنى أنتَ بتضحك عليا يا بابى و كدا مث هثوف مامى !
- لا هتشوفيها ..هتجيلك فى أحلامك و مش هتسيبك ، يلا عشان نروَح يا حبيبة بابى ، روحى اركبى العربية و أنا جاى وراكى .
- حاضر يا بابى .
" بعد خمس دقائق "
- ايه ده أسفه مكنتش أقصد إنى أخبط فى حضرتك .
- .....
- حضرتك كويس ؟!
- ......فى عَقله : " أنا مش عارف هعمل ايه من غير شمس ، هى كانت شمسى فى الحياة و مراتى و حبيبتى و أم بنتى و كل حياتى ، اتجوزتها صالونات اه بس حبيتها و حبيت تفاصيلها و ضحكتها و كل حاجه فيها ، مش عارف هعمل ايه من غيرها ، مشيت و سابتنى مع إنها وعدتنى إنها هتفضل ، أنا مش قادر أعيش من غيرها ، مش عارف مين هيحرقلى هدومى و هى بتتكوى و مين هيعملى الشاى بالنعناع و يشربه معايا فى البلكونة ، يا رب أنا مليش غيرك يا رب قويينى عشان خاطر بنتى حياة "
على الجانب الأخر " كنت راجعه من الشغل و خبطت فى واحد كان شبه مُغيب عن الوعى ، كان الحزن مالى عينيه ، أتمنى بجد إنه يتعافى فى أسرع وقت ممكن من الشئ اللى مخليه كده أياً كان هو ايه ، مش عارفه اتأثرت ليه يمكن عشان قلبى رُهيف ؟! "
" بعد 3 أيام "
- عُدى مينفعش اللى أنتَ بتعمله ده ، أنتَ بقالك 3 أيام مكلتش ، أنا عارف و الله إنه صعب عليك تَقبُل الواقع بس حاول عشان حياة ، حياة متمتش 4 سنين و محتاجاك .
- .....
- عُدى رُد عليا أرجوك ، أنا صاحبك و خايف عليك .
- مش قادر ، عُدى مش قادر من غير شمس ....
- هتقدر بس حاول و أنا فى ضهرك و مش هسيبك .
- اللهم لا اعتراض على قضائك يا رب ، إنا لله و إنا إليه راجعون ....
- ربنا معاك يا صاحبى و هيقوييك عشان حياة ، تعالى أنتَ بس كُل لقمتين عشان تسند نفس.... عُدى عُدى أنتَ سامعنى ، ألو الإسعاف عايزين عربية بسرعة فى واحد أغمى عليه ...!
" فى المستشفى "
- ليه يا ابنى بتعمل فينا كده ، ليه يا حبيبى تعمل فى نفسك كده ..!
- أرجوكِ يا أمى سيبى عُدى يرتاح شويه ، و أنا هنادى عليكوا لما يفوق .
- ماشى يا عُمر ، ربنا يحفظك لعُدى و يقوييه و يصبره .
" بعد ساعة "
- عُدى بهلوسة : شمس ..متس..بنيش !
- عُدى أنتَ كويس ؟! ، دكتور ...
- الدكتور : متقلقوش هو بيفوق بس من أثر الصدمة و طبيعى يكون فى هلوسة عشان الصدمة كبيرة عليه شويه و احنا علقنالوا محاليل و ممكن ترجعوه البيت بعد ما يفوق .
- شكراً يا دكتور .
" بعد 3 ساعات فى البيت "
- خد بقى شوربة الخضار ديه عشان خاطرى .
- مش عايز ...
- لا يا عُدى أنا صبرت عليك كتير و أديك شوفت اللى حصل ، هتاكل يعنى هتاكل .
- طيب بس مش كتير ...
- ماشى يا عم أى حاجه .
- هى فين حياة ؟!
- من ساعة ما أنتَ تعبت الصبح و روحت المستشفى و هى مش عايزه تخرج من أوضتها .
- طب أنا هروحلها ...
- لا يا عم تروحلها ايه أنا هناديها !
- لا سبنى يا عُمر ...
" فى غُرفة حياة "
- أنتِ فين يا مامى ، ده بابى من غيرك تعبان أوى .
- " و أنا رايح الأوضة سمعتها بتقول كده بصوت واطى و هى بتعيط ، روحت خدتها فى حضنى و فضلت أعيط معاها ، ازاى أنا غبى كده و مش واخد بالى إن ورايا مسئولية زى دى ، كل اللى مهتم بيه حزنى و بس "
" بعد سنة من محاولات عُمر و أمى و أبويا و حياة إنهم يخرجونى من حزنى ، أقدر أقول دلوقتى إنى تجاوزت جزء كبير منه ، و النهارده أول يوم ليا فى الشركة اللى سبتها من ساعة موت شمس "
" فى الشركة "
- صباح الخير يا أستاذ عُدى ، ليك وحشة و الله .
- صباح النور يا حج محمد ، و أنت كمان بجد .
" فى غرفة المدير "
- أهلاً بأُستاذ عُدى .
- أهلاً بحضرتك .
- تقدر ترجع لمكتبك تانى من النهارده إن شاء الله ، و اللى كان مستلم الشغل مكانك هيبقى السكرتير بتاعك .
- ماشى يا فندم .
" فى مكتب عُدى "
- وجودك شيئ مكملنى لأنى لوحدى مش هقدر ملامحك كلها منى يدوب الإسم متغير ، مجرد بس ما ...
- احم احم لو سمحتى ... خلصتى ؟
- اه ..يعنى ..لسه ..اه خلاص ثوانى بس ( بصوت واطى : يا كسفتك يا دودى ) .
- لا عادى و لا يهمك .
- ايه ده هو حضرتك سمعت ؟!
- سمعت ايه ؟!
- لا لا مفيش خلاص ، أسفه عطلت حضرتك ، أنا ماشيه .
" فى بيت نور "
- مهو يا نور مينفعش برضو تقعدى ترفضى عرسان الدنيا كلها كده ، يا بنتى أنتِ عندك 24 سنة ، بصى أنا عارفه إن أنتِ مش مستعجلة و هتستنى الشخص المناسب و الكلام ده أنا حفظته ، بس اقعدى مع العريس ده بس .
- أحبك و أنتَ فاهمنى ، بس يا ماما قولتلك مش عايزه أقعد مع عريس دلوقتى ، و يلا بقى عشان هصحى الصبح بدرى ورايا بكره صفقة مهمة .
- بصى اقعدى معاه بس و بعدين نبقى نشوف حوار الصفقة ده .
- بقولك بكره يا ماما بكره ، يلا تصبحى على خير .
- و أنتِ من أهل الخير يا بنتى ، ربنا يهديكى و توافقى .
" فى اليوم التالى "
- صباح الجمال و الكريستال على ست الكل .
- صباح القمر عليكى ، خدى فطارك أهو حطيتهولك فى اللانش بوكس عشان عارفاكى دايماً متأخرة و مش هتلحقى تفطرى كالعادة .
- لا لا يستى عيب عليكى ، النهارده مش صاحيه متأخرة دى الساعة 7 .
- 7 ايه حضرتك ديه 7 و نص ، اه صح أصل الساعة اللى فى أوضتك باظت و قولت لأبوكى يصلحها بس شكله نسى .
- يلهوى ده أنا معادى الساعة 8 ، run .
- متنسيش أكلك بس .
- حاضر حااااضر .
" فى المكتب "
- أنا أسفه جداً بجد على التأخير ده .
- الساعة 8 و نص حضرتك .
- ما قولنا أسفه...احم قصدى يعنى معلش مش هتتكرر تانى .
- ماشى اتفضلى على شغلك و جهزيلى الورق عشان العملاء قربوا يوصلوا ، و يا ريت التأخير ده يكون أخر مرة .
- حاضر يا مستر عُدى ، معلش يعنى بس ممكن أعرف معاد وصول العملاء .
- الساعة 9 .
- اه قصد حضرتك إن دلوقتى الساعة 9 .
- معاد وصول العملاء الساعة 9 و يا ريت ننجز .
- ايييييه ! ، ماشى تمام الورق هيكون جاهز إن شاء الله .
" نور بعد ما خرجت من المكتب "
- شكل ده هيبقى أخر يوم لنور هنا ، هه أصلاً عادى ، عادى اييييه بس هقدر أخلص كُل الملف ده فى نص ساعة إلا خمس دقائق ازاااى ، بس خلاص كفايه صياح أنتِ قدها و هتقدرى تثبتى نفسك ريلااااكس ، يا رب تبقى معايا يا رب أنا عبيطة .
" الساعة 11 "
- احنا اتبسطنا جداً بالصفقة ديه معاك يا مستر عُدى .
- شكراً جداً و إن شاء الله نكون عند حسن ظنكوا .
- طب بالمناسبة السعيدة ديه ممكن نخليهم مناسبتين .
- بمعنى ؟!
- يعنى أنا ممكن أخطب ابنى للسكرتيرة بتاعت حضرتك و خصوصاً كمان بعد ما عرفت إنها كانت مستلمة الشغل قبل حضرتك و معاها كلية حاسبات و معلومات و بنت عم مدير الشركة ديه .
- لا يا فندم مفيش حد هيتخط...
- بس اسكتى ، ممكن أفهم أنتَ عرفت كل التفاصيل عن حياتها كده ازاى ؟! لا و ايه مقرر كمان إنك هتخطبها لإبن حضرتك !! ، معلش الصفقة تُعتبر لاغية و اتفضل بعد إذنك و أنا هبعت المحامى بتاعى يخلص الورق .
" بعد ما العملاء مشيوا "
- أنتَ ازاى بجد تلغى الصفقة عشان سبب تافه زى ده !
- تافه يا نور ؟!
- اه تافه فيها ايه يعنى كده كده كنت هرفض باحترام و الموضوع يخلص ، لكن ازاى بقى مينفعش لازم الصفقة المهمة تبوظ و تتلغى عشان نور !
- نوووور !
- نور ماشيه .
" فى بيت عُدى "
- يا ماما مش قولتلك قبل كده متفتحيش الموضوع ده تانى !
- يا ابنى فكر فى حياة هى دلوقتى عايشه من غير أم و هى لسه صغيرة يعنى عايزه حنية الأم ، و أنتَ كمان لسه صغير يا ابنى أنتَ مكملتش 29 سنة لازم تشوف حياتك .
- حياة أنا بعرف أهتم بيها يا ماما متقلقيش .
- ماشى يا ابنى أنا عارفه إن أنتَ مش مقصر بس الأب مش زى الأُم .
- ماشى يا ماما تصبحى على خير .
- و أنتَ من أهل الخير ، ربنا يهديك .
"عدى 3 شهور و بدأت علاقة نور و عُدى تتحسن كل يوم عن اللى قبله و نور بقت تشوف غيرة عُدى فى أبسط الأشياء و بدأت شويه شويه تُقع ! ، و كمان عُدى بدأ يغير طريقة تفكيره و بدأ يحس بشئ ناحية نور و بدأ شويه شويه يُقع ! "
- احم احم ...هو ..أنا .. يعنى .. عايز ...
- اه الورق ماشى ثوانى و يبقى عندك .
- لا يا نور مش الورق ...قصدى يعنى لأ عايز الورق بس عايز حاجه تانى ...
- اااه افتكرت ملف صفقة بكره ، أنا خلصته بس فاضل فيه حاجات بسيطة خااالص هخلصه......
- ثوانى ثوانى ايه فى ايه نافورة و فتحت !
- بقى كدا ماشى مش هديك الملف .
- مش عايزه أنا عايز رقم والدك .
- هو ايه اللى مش عايزه أومال هتعمل ايه يعن.....ايييه رقم والدى هتعمل بيه ايه حضرتك ؟!
- هبلعه ...!
- طب ما أنا كدا مفهمتش برضو يعنى أنتَ عايزُه ليه ؟!
- يا ربى على الغباء !
- قصدك يعنى إن أنا غب.... ااااه رقم بابا اه اااه كُح كُح !
- ايه فى ايه اتفضلى مايه اهى ....
- لا لا أنا كويسه ....كُح كُح كُح ....هات .
" عُدى خد الرقم و اتصل بوالدها و حددوا معاد يجى فيه ، و بعد نقاشات عائلية كتير بينهم و رفض من مامتها و باباها إنهم يجوزوها لواحد أرمل و معاه بنت و إقناع من نور ليهم ..... فقد تقرر الآتى : إنهم موافقين بس على شرط إنهم يفضلوا قاعدين هنا و ميسافروش بعد ما يتجوزوا زى ما عُدى كان عايز "
- ألبس ايه يا اسراء ده هيجى النهارده ؟!!
- بت زنقة الكلاب بتاعتك دى مبحبهاش ...
- نص رواقانك يا شيخه بقولك هيجى الساعة 5 و دلوقتى الساعة 3 و أنتِ و لا هنا ! ، أنتِ بنت خالة مش جدعة علفكره .
- خلاص يا ستى و لا تزعلى نفسك عندك الدريس البيچ و الأسود و اللافندر و كلهم قمر عليكى .
- طب البيچ و لا اللافندر ؟!
- البيچ ألطف .
- و الطرحة البيضة و لا البيچ ؟!
- البيضة أحلى .
" على الجانب الأخر "
- ألبس ايه يا عُمر ؟!
- أى حاجه حلوة عليك يا صاحبى ، بُص عندك القميص البيچ و الأسود و الأبيض .
- طب البيچ و لا الأبيض ؟!
- البيچ أحلى .
- و البنطلون الكلاسيك الأبيض و لا الأسود ؟!
- الأبيض أجمد .
" فى بيت نور "
- اتفضل يا ابنى نورت .
- بنورك يا عمى .
" و بعد كلام كتير أبو نور قال الجملة الشهيرة : نسيبهم مع بعض شويه "
- ايه سجادة بيتكوا حلوة أوى كدا ؟!
- اه قمر ...
- زيك .
- لا لا كده مينفعش مينفعشششش ! ، الغوا رحلتشى .
- لا لا خلاص دا أنا لما صدقت .
- احم.... طيب .
- هو ايه اللى طيب أومال فين نور الرغاية ؟!
- ما أنا هو الله .
- طيب أنا عُدى عندى 29 سنة و بشتغل مدير تنفيذى فى شركة تصنيع ألعاب إلكترونية ، أرمل و معايا بنت عندها 5 سنين اسمها حياة ، أنا عارف إنى مش مثالى بالنسبالك بس مُنتظر موافقتك .
- بتقولى ليييه ما أنا عارفه بتقولى ليييه ؟! ، طيب و أنا نور عندى 24 سنة و بشتغل سكرتيرة مدير تنفيذى فى شركة ألعاب إلكترونية اسمه عُدى لو تعرفه ، خريجة حاسبات و معلومات ، و عارفه إنك مش مثالى و متقبلة ده لأن مفيش مثالية فى الحياة و محدش مثالى و كلنا عندنا عيوب و بالنسبة لموافقتى أو رفضى فا مستحيل يرتبط بحاجه زى ديه .
- يعنى أفهم من كدا إنك موافقة ؟!
- لسه هفكر و ردى هيوصلك عن طريق بابا .
" بعد يومين فى بيت نور "
- يعنى ايه لسه هفكر و ردى هيوصلك عن طريق بابا ؟!
- هو ايه اللى يعنى ايه ما هو ده الصح يا اسراء .
- أنتِ ليه مقولتلوش موافقة علطول بجد .
- أولاً لأنى لسه بفكر فعلاً ، ثانياً مينفعش أقوله كدا لأنى كدا بصغر أهلى قدامه ، الأهل دايماً فى المقام الأول و لازم نحافظ على قيمتهم .
- العاقلة بتاعتنا دى يا أخواتى .
- أيوه طبعاً أوماااال !
" أم نور دخلت "
- ها يا بنتى قولتى ايه عشان أبوكى يرد على الراجل .
- لا لا سبونى أفكر شويه كمان .
- شويه كمان ايه يا حبيبتى ، أنتِ تقوليلى أخر كلام دلوقتى عشان أبوكى قاله هرد عليك بعد يومين .
- اييييه انتوا ازاى تعملوا كده من غير ما تقولولى ، حد يخض حد كدا ؟! ، و بعدين أنا عايزه شهرين مش يومين .
- ماشى هروح أقول لأبوكى إنك موافقة .
- لا لا يا ماما استنى ... ثوانى بس كدا يا ست الكل سيبينى ساعتين و هقولك أخر كلام .
- يا رب صبرنى على ما بلتنى .
- شكراً يا ست الكل .
" بعد ساعتين "
- بصى يا نور أخر كلام ايه موافقة ماشى ، اللى يسألك تقوليله موافقة تمام ، ريلااااكس .
- أنتِ بتكلمى نفسك يا نور ؟!
- لا لا يا ماما خااالص .
- ها قولتى ايه ؟!
- مش موافقة .
- ماشى على بركة الله ، يا حج نور موافقة .
- لا لا خلاص رجعت فى كلامى أنا عيلة صغيرة .
" بارك الله لكما و بارك عليكما وجمع بينكما في خير "
" أهم حاجه يا جماعه الثبات على المبدأ برضو "
- طب ايه بقى ؟!
- ايه حضرتك ؟!
- ليا حضن علفكره .
- لا يا بابا ده فى الأحلا.... بقى حد يخض حد كدا ؟!
- بس عشان بقالى كتير مستنى الحضن ده ،
و همس فى ودنها : " و كَأنكِ جِئتِ عَوضاً لِقَلبِى عَنْ كُلَ شَيء مَرَرتَ بِهِ ♡..! ".
- " وإن غابت شمسُ الكونِ فإني لِكونِكَ نُور ★ "
- و بحتاجلك ...
- و تحتاجلى ...
- ما بينا ألف حلقة وصل ...
- و بشبهلك ...
- و تشبهلى ...
- فى حب الخير و طيبة الأصل .
" بعد 3 سنوات "
- شمس تعالى هنا هتتزحلقى !
- حياة خُدى أُختك شمس عند بابا و ادخلوا الأوضة عشان بمسح .
- حاضر يا ماما .
" اتجوزنا أنا و عُدى و خلفنا شمس بعد سنة ، و حياة بتعاملنى كأنى مامتها و أنا بعاملها كبنتى ، و الحمد لله حياتنا سعيدة ، و حققت اللى كان نفسى فيه و هو إنى أقدر أكوّن عائلة لطيفة ! " .
- نوووور ، النسكافيه هيبرد ...
- ثوانى ... جيت أهو ، نيمت شمس خلاص و حياة نامت من شويه ، تعالى نشرب النسكافيه فى البلكونة .
- دو يو نو إنى بَحبِك ؟!
- أى نو يا عُدعُد يا قمر أنتَ ، شايف النجمتين اللى فى السما دول مختلفين تماماً عن بعض يعنى واحدة لونها أزرق و صغيرة و التانية لونها أبيض و كبيرة و بالرغم من كده قريبين من بعض .
- زينا كده صح ؟!
- يا سوسة عرفت ازاى ؟!
- و بشبهلك و تشبهلى ♡.
" وجودك شيئ مكملنى لأنى لوحدى مش هقدر ، ملامحك كلها منى يدوب الإسم متغير ♡ "
تعليقات
إرسال تعليق