_يااه يا بت يا فاطمة لو أعيش زي حواديت الروايات دِ، والبطل يكون بيعشقني وبيموت في دبديبي وينيمني في حضنة ويجبلي شكولاتة ومصاصة ويتشحطط عشاني، وأنا اتقل عليه وموفقش بسهولة، يعني نفرهضة حبتين.
_يختي ربنا على الظالم، جاتك وكسة يا منيلة، ليه دَ كلو ليه مرمطة دِ؟! هيتجوز جورجينا يختي؟!
_أنا أحلى طبعًا.
_أوماااال.
_تقدري تقولي غير كدَ.
_مقدرش يا ندوشة قلبي أنتِ يا شعلولتي.
_امشي بت من قدامي.
_بنتي متفكري شوية في العريس اللِ متقدملك، أدي فرصة او اي حاجه باين عليه بيحبك على فكرة، هو مش صاحب اخوكي.
_ايوا يا فاطمة صاحب اخويا بس دمو تقيل اووي ورخممم وحاجه كدَ استغفر الله العظيم يعني، لا مش عاوزاه.
_يا بنتي دَ جاب أهله كلهم عشانك وانت بغلة لا تبالي.
_متشكرين يا أبو الصحاب، وبعدين اصلًا بابا مش موافق غير لما أخلص دبلوم وأنا لسه في تالتة يعني لسه موضوع دَ وانا مش عاوزاااه، وعلى فكرة بقي هو عاوزني ومتقدملي من السنة اللِ فاتت لما كنا في تانية تجارة بس أنا مش طيقاه، وهو علطول كان ياجي لاخوي البيت، اول ميجي من هنا انا اخلع من هنا.
_طب ايه يعني انا عاوزه اللبس فستان سهرة يا بتتتت.
_سبيها للنصيب.
قفلت التلفون مع بطة وكنت بفكر شويه في موضوع نوبي (صاحب اخو ندا اللِ عاوز يتجوزها) بس لا عقلي رافض وقلبي لا يمكن اتجوز الرخم دَ.
عدة كام يوم من حواري انا وبطة وسمعت ان نوبي سافر السعودية بس مش عارفه زعلت ليه.
_هشام يا قلب اختك يا كتكوتي.
_عاوزه ايه يا هانم؟
_الا قلي هو صاحبك نوبي هياخدك كام سنة في سعودية؟!
_ليه بتسالي؟! يكونش الصنارة غمزت وحنيتي؟
_لا تفيت، ااقصد لا بسال عادي عشان البيت هادي علطول من سعت مهو سافر وانا عاوزه الهدوء دَ علطول عشان اتعودت عليه.
_اامممم هحاول اصدقك، هياخد سنة ونص وهيجي ان شاءلله واول بيت هينزل في البيت دَ، ها ايه رأيك؟!
_ياخي اللِ ياجي ياجي هو انا هشيلو فوق راسي جاتك وكسة انت وصحابك.
_خدي والله لشقلبك زي جون سينا مابيشقلب المصارعين خدي بت سأقتلكِ فقط.
الحمدلله قدرت أهرب من اخوي قبل متكسح بس حقيقي زعلت اوي لما عرفت ان نوبي هياخد سنة ونص بحالهم، طب وانا ازعل ليه كان حبيبي وانا معرفش ياخيي اللِ يسافر يسافر.
الايام بتعدي بسرعة واهلى مشاء الله مفيش سيرة في بيت غير نوبي نوبي نوبي نوبي تقولش محمد صلاح وانا معرفش وهذا يؤدي إلى شيء بداخلي بحس بشعور غريب فعلًا لما حد بيجيب سيرته قدامي، بكون عاوزه اضحك اوي وحبة مشاعر متلخبطة كدَ فرحة على حزن على خجل وكسوف على وجع بطن وسقعة في جسمي، ايه شعور غريب دَ يكون فعلًا حنيت؟! والغريب ان نوبي على الرغم انه لي فترة جامدة عاوزين مش بيزهق من انه يكلم بابا على ما أظن بيرن عليه علطول عشاني وقبل كدَ بعت ابوه واخوه وكلم اخواتي وخالي وبابا على نفس الجملة لما تخلص الدبلومة، حقيقي ايه التمسك العظيم دَ مكنتش كباية شاي اللِ ادتهالو في ايدو تعمل كدَ.
_الجميل بيضحك ليه؟!
_خضتني يا زفت.
_حد يقول لاخو زفت؟!
_أنااا.
_حاضر ماشي كلو بحسابة ياختي، بقلك في عريس متقدملك.
_عارفه نوبي.
_لا ياختي مش نوبي واحد تاني ابوكي هيكلمك عليه شويه وابقي شوفي نفسك بقي محدش هيغصبك على حد ولو جينا للحق مفيش حد هيقدرك ويحفظك زي نوبي.
مشي وسابني وانا محتارة اوي حاسه نفسي غرقانة في بحر ومفيش اي حد ينقذني او حبل ينجيني، بالفعل ابويا كلمني على العريس دَ وقلي شوفي نفسك وانا قلتله هصلي أستخارة وأسيب الموضوع دَ لربنا يختارلي.
_ها يا بت صليتي أستخارة؟!
_صليت يا بطة.
_ايه شعورك؟!
_مرتاحة بصراحة شكلي هوافق.
_طب ونوبي؟!
قلبي دق جامد ووجعني وحسيت بنغزه في.
_صلي على نبي بس نوبي مين بلا رخامة.
_اه قعلا هو رخم.
_بت انا بس اللِ اقول رخم، انتِ متقوليش، كلب البحر.
_امممم، طيب ياعم ابقي بلغيني يا هانم لو هتتخطبي او هتعملي ايه حاجه، عاوزه انزل اشتري هدوم وخلاص نفسيتي عاوزه تبذير الايام دِ.
_النفس أمارة بالسوء حقيقي يعني.
_حصل يلا باي يا قطة.
_باي.
روحت لبابا ووافقت على الشخص اللِ متقدملي وبعدها دخلت اوضتي وجاني شعور غريب جوه قلبي واتفتحت في العياط ولا كأني معيطش لي كتيير اوي عياط رهيب بدون سبب.
_الو ايوا يا بت، في ايه بتعيطي ليه يخربيت كدَ سبتك ساعتين تغرقي الدنيا عياااط في ايه؟!
_مضايقة قوي يا بطة مضاااايقة.
_اهدي بس وصلي على محمد كدَ (عليه أفضل الصلاة والسلام) واستهدي بالله وهتتعدل.
_على فكرة انا لما كنت بصلي استخارة كنت بحلم بنوبي بس مقلتلكيش.
_بتي حرام عليكِ عاوزه ايه اكتر من كدِ إشارات دَ ربنا وحده عالم بِ.
_بأيه يا فاطمة الوو فاطمة، رصيدها خلص الكلبة المفلسة دِ.
قمت من على السرير وغسلت وشي وفتحت الفون وكلمت بطة واتس وسالتني مين اللِ متقدم وقلتلها اسمه، ما شاء الله مكملتش نص ساعة جابتلي بيان العيلة كلها بتعته وطلع انسان مش كويس ومش هيليق بي فإستغليت الفرصة وهروح اقل لبابا اني مش موافقة قبل ميرد عليهم.
بالفعل لحقت نفسي وقلت لبابا مش عاوزاه هو مش كويس وبابا سأل عليه تاني وفعلا طلع مش كويس بس سأل ناس مش من البلد طبعًا وبس الراحة اللِ انا في دلوقتي جميلة اوووي.
_كل يوم بتحلمي بيه يا مفترية كل يوم!
_اه كل يوم ومرة حلمت انه كان بأكلني زبادي ومرة.
_الطفاسة بتعتك حتى في الأحلام.
_متعصبنيش بدل مكملش ليكِ اهو.
_إحنا أسفين ياباشا كمل.
_ومرة كنا قعدين على البحر.
_كنت بتعملوا ايه؟!
_دماغك يا حقيرة دمااغك القذرة يا بت.
_انجزي؟!
_كنا بنزل رجلينا في المياة ونرمي بعض في المية.
_ياربي مش عارفه اقول تفاههة والا رومنسية.
_اقفلي بت اقفلي بدل مجيبك من شعرك بتتريقي على احلامي ماشي يا كلبة.
قفلت السكة في وشها جزمة دِ واكيد هترن بكرة زي كل يوم روحت اشرب ميه ولقيت اجتماع عالي في الصالة وبيتكلمو بصوت اهو شوية مسموع وانا طبعا اموت في كدَ اوباا روحت بقى ايه رميت وداني كعاهم مع انه غلط بس يارب سامحني انا انسانة فضولية لو معرفتش بيتكلموا في ايه هتجنن.
_______
_يابابا نوبي أتصل بخالي عشان ندا وبكرة هيجي اخوه ووالده عشان يتقدمولك عشان هو عرف ان في عريس متقدم لندا وهيتجنن هناك.
_قلوا يا ولدي ندا رفضت العريس واصلا اخوه وابوه جم نهاردة وقبلتهم وقلتلم خلاص قربت تخلص الدبلومة لو ليهم نصيب ربنا هيجمعهم ببعض.
_حاضر يابوي.
___________
ياللهوي على شغل الروايات دَ انا بحب كدَ هيتجنن عشاني يا خراااابي لازم اتكلم مع اخوي وأساله وخلاص انا هعترف لاخوي باني بحب نوبي، انا فعلًا حبيته من طريقة كلامهم عليه ومن كتر تمسكه بي لا حقيقي اكيد بيحبني وبيعشقني من بدري.
سالت اخوي بعد اسبوع وحكيتله واخوي طبعًا فرح وقلي ان نوبي جاي قريب، انا من كتر الفرحة حضنت اخوي مش متخيلة ياااه هشوفه، هشوف الشاب اللِ قلبي دق له من الحكاوي اللِ بسمعها عنه حقيقي غريب الحب مين فاهمة.
عده تلات شهور وخلاص فاضل تكه ونوبي ياجي هو وصل البلد بس لسه الاسبوع اللِ جاي هيتقدم.
الاسبوع عدَ بِبطء شديد وانا أعصابي في ذمة الله من الفرحة واهو نهاردة نوبي جاي وبجهز اللبس بتاعي.
_اتاخرتي ليه يا كلب البحر؟!
_كنت الميكب ارتست بتعتك ياختي اتاخر زي مانا عاوزه.
_حانفييييي.
_خلاص ياباشا تنزل المره دي.
_البس انهي درس؟!
_الإسود القطيفة على طرحة نبيتي وروج نبيتي وانت بيضة حلوه كدَ وادعيلي بقي.
_اوكي هيبقي تحفة في اكيد عشان من ذوقك.
_تسلم ابو الصحاب، ماتدعيلي يا بت.
_ربنا يكرمك بالكلية بأذن الله.
_لا أنا عاوزه عريس ادعيلي بعريس بس انتِ وملكيش دعوة بحاجه تاني.
_طيب يا فاشلة.
فضلنا نضحك سوى لحد مخلصت لبس وهطلع بالعصير وأني خائف حقيقي لتتكب الصونية عليه وهيبق منظري وحش اوي اوي قدامهم.
_تسلم ايدك يا ست البنات.
_العفو على ايه بس دِ ماما اللِ حضرته، انا بس اللِ حطيته في الكوبيات وجبته لكم.
_ ايدك لمسته لازم يبقي جميل.
أخجلني الولد دَ حقيقي.
ابص عشان الاقي ماما او بابا او حتى ابوه هو ملقيتش حد، الغدارين دول سبوني لوحدي.
_مالك اتوترتي ليه؟!
_لا عادي متوترتش.
_بصي يا ندا اقلك كل حاجه بس متستغربيش او متغضبيش تمام.
_تمام.
_اه نسيت خدي دول.
_ايه دَ؟!
_دِ شكولاتة ومصاصة اللِ انتِ بتحبيهم.
حقيقي كان هاين على اقوم ابوسه كدَ من الفرحة عيب بت اتلمي شويه اللِ انا بقوله دَ.
بعد كد فضل يحكيلي عن قد ايه هو بيحبني من وأنا في تانية تجارة ومرديش يقلي عشان يتاكد الاول مش مشاعره ولما اتاكد سافر علطول وكان دايما بيطمن على من اخوي وعلطول متابع اخبار وكلم بابا على كام مرة وكلم خالي واخواتي حقيقي مع كل كلمة كان بيقولها كان قلبي بيدق بسرعة وكنت متلخبطة اوي وعيوني من الفرحة بطلع قلوب كدهون (زي توم لما شاف القطة في البلكونة وجري عليها).
دخل بابا وعرف اني موافقة واتفق هو ووالد نوبي على الفرح وقرينا الفاتحة وكان أفضل يوم في حياتي بجد واتفقوا على الفرح واشترينا الدهب.
_بتقولوا ايه؟!
_الفرح بعد 50يوم لالا مينفعنيش الكلام دَ الغي رحلتشي.
_ايوا مينفعش ازي يعني لا حضرنا فستان لا انا ولا هي.
_ولا ميكب.
_ولا خلصنا حاجاتك.
_ولا عملنا شوبنج ايه العيشة دِ بقى.
وفي ظرف دقيقتين كنت انا وفاطمة بنجري في بيت هروبنا من ابو ورده بتاع ماما عشان نلبس وننزل نشتري باقي الحاجات اللِ ناقصة.
خلصنا الحمدلله على خير والايام بتجري حقيقي وبكرة الفرح وكتب الكتاب ويعني يا ليل انا منمتش لحد الآن من كتر التوتر وبعد كدَ نمت عادي مفيش مشكلة.
صحيت الصبح ورحت الكوافير ومش عارفه ليه الصبح بدري كدَ وهطلع الساعة 4ليه وقت دَ كلو هو تشطيب شقة.
بعد شويه سمعت الجملة ("بارك الله لكما وبارك عليكما وجمع بينكما في الخير "والزغاريط كل في حته وانا مستخبيه زي ما بت فاطمة قالتلي عشان الفرست لوك والفستان بقى اللِ فضحنا من كبره.
_كنتِ فين يا نانوش؟
_كنت بستخبه.
_ها كملي قولي ليه؟!
_عشان تدور على وتجري ورى عشان الفرست لوك.
_طب سيبك من الهبد دَ اكيد بطة الهبلة اللِ قلتلك على كلام دَ.
_بضحك_اه هي والله.
_طب مسمعتيش بحضن كد بيبقي بعد كتب كتاب دَ، عندك فكرة عنه.
_اه اعرفه بس لو ضمتني في حضنك مش هطلع تاني.
_هو لكِ اصلًا بدون كلام واوعدك مش هتنامي غير في حضني وهتضحكي في حضني وهتطمني في حضني.
_وهاكل في حضن.
_لا كدَ كتير انا همشي.
_خد ياولاه
حقيقي لما الإنسان بيتوكل على الله ربنا بيكرمه ومش بيخيب ظنه وبيجبر بخاطره واهو دلوقتي عده على جوازي انا ونوبي 5شهور وانا حامل في الشهر الرابع وحقيقي كان اجمل يوم لما عرفت اني حامل من الشخص اللِ حارب الدنيا كلها عشاني وهو أنبسط وفرح اكتر وبيعاملني كاني طفلة كدَ ويجيبلي شكولاتة كتيير ومصاصااات واول ميجي من شغل يحضني ومستحمل هرمونات لا إنسان جدع اوي وبيقلي بحبك يا نانوش دايما في اي وقت كدَ ولو زعلت منه يصالحني ولو زعلته هو بردو هو بيصالحني، مفتكرش في يوم نمت زعلانه منه، بيخاف على من نسمة الهواء، وبيلعب معي ومش بيزهق خالص،بيساعدني في شغل البيت لو تعبت، بيهتم بي لما بتعب اوي اوي بيسهر جمبي ومش بيقدر بينام غير لما يطمن اني كويسة ، انا بحبه اوي ومقدرش اعيش من غيره ثانية واهو سافر دلوقتي وأنا مفتقداه جدًا مفتقدة ضحكتة اللِ أنا بحبها، هو أصلًا كلو يتحب، ومفتقدة حضنة الدافي ربنا يرجعه لي بالسلامة بإذن الله، واهو اللِ مصبرني على بعده البيبي اللِ بطني وأحنا كلنا منتظرينه بفارغ الصبر عشان ينور حياتنا كمان وكمان، افتكروا دايمًا ان الذي يتوكل على الله يجبره من حيث لا يدري.
[والذي أحبني في صمت وتحدى الصِّعب لِأجلي؛ هنيئًا لك بات الآن حبك يسري في دمي ويتغلغل في عظامي]
#قصة حقيقية وأتمنى تدعولهم أن ربنا يسعدهم ويفضلوا جمب بعض دائمًا وحبهم لبعض لا يقل مع الأيام بل يزداد.
تعليقات
إرسال تعليق