" اهو ده اللي صار و ادي اللي كان
مالكش حق .. مالكش حق تلوم عليا "
نفس اغنية كل يوم اللي مش بتتغير .. زي روتيني اليومي بالظبط
مج شاي باللبن و الوقفة في البلكونة وسط بتلات الورد و النعناع .. مستنياهم يكبروا ، اهو اي حاجة تونسني
نفس النظرة بتاعت كل يوم اتجاه الكورنيش المقابل للشارع بتاعنا ، و انا بسمع نفس الاغنية و تقريبا في نفس المعاد .. قبل ما أجهز علشان اروح شغلي
شيلت موبايلي من الشاحن علشان اطلب اوبر فلقيت مكالمات كتير من اخويا و مراته .. في العادة موبايلي دايما بيكون silent علشان كده مش باخد بالي مين بيتصل .. قفلت الراديو و نزلت علشان اروح شغلي
كان نفسي من زمان جدا اعيش مستقلة عن اهلي .. و ده متحققش غير و انا عندي 28 سنة.. يعني من كام شهر بس
اقدر اقول ان انا دلوقتي في أروق فترات حياتي .. بعمل كل حاجة بحبها ، حاجة واحدة بس اللي مش بحبها .. و هي اني بعمل كل حاجة لوحدي !
الحقيقة ان انا سيبت بيت اهلي بعد مشاكل كتير مع اخويا و مراته بسبب اني مرضيتش أتجوز ابن خالتها و شوفت انه مش مناسب ليا .. قلبت عليا رغم انها صاحبتي من سنين و انا اللي شاهدة علي قصة حبها هي و اخويا ..
سيبت الشقة بتاعتي اللي في بيت اهلي .. او بمعني اصح بعتها لكمال اخويا و كلمت عمي يشتريلي الشقة دي في عمارة واحد قريبنا .. مكان ظريف في حي هادي و الناس هنا في حالها هعوز ايه اكتر من كده
وصلت الشركة اللي بشتغل فيها .. اه انا رئيسة قسم الحسابات في الشركة ، حياة مملة رغم ان ليا تقريبا معارف في كل مكان بسبب شغلي .. بس بعد اللي حصل من منة صاحبتي - او اللي كانت صاحبتي قررت أسطح علاقتي بالناس كلها
- يا فندم الساعة بقت 3 العصر و انا من 9 واقفة علي رجلي بعمل جرد لكل حاجة في الشركة .. هي السنة المالية مش المفروض خلصت ؟
◇ خلصت اه بس ده تبع الشركة .. في نقص في المرتبات يا استاذة و انا عايز اعرف سببه ايه
حقيقي بحس اني عايزة اخبطني بمفتاح أنبوبة علي دماغي .. شغالة معاه بقالي خمس سنين و لسه مش عارفة استحمله .. رديت عليه ببرود :
- اتمني تكون عرفت السبب دلوقتي يا فندم
◇ بنفس نبرة الاستفزاز : ايوة عرفت يا فريدة .. تقدري تتفضلي
- جزيت علي سناني و انا بقوله : نادرة يا فندم .. نادرة
خرجت من المكتب و انا بخبط برجلي جامد في الأرض و سامعاه بيضحك علشان عرف يعصبني كالعادة
- مستر فادي اخد الرخامة كلها لوحده تقريبا .. ااه هتشل
كنت بكلم نفسي و انا ماشية لغاية ما خبطت في حيطة ماشية قصادي.. او بمعني اصح كتف شخص
الملفات كلها وقعت مني .. اه هيوطي يجيبهم صح ؟ لا الحركة دي شوفتها في مليون فيلم قبل كده ..
جبت الملفات من الأرض و سندتهم علي المكتب جمبي و هو لسه واقف قصادي كإنه بيتفرج عليا .. فضل يحرك دماغه يمين و شمال لغاية ما زميلتي ندهت عليا من بعيد .. اخدت الملفات و جريت من قدامه و انا بقول لنفسي ايه المجنون ده
باقي اليوم كان صعب جدا في الشغل لدرجة اني نسيت الشخص الغريب ده و مكالمات اخويا ..
و اول ما وصلت البيت .. عديت في الاول علي جدو عادل ، ده يبقي صاحب البيت و عم بابا .. هو الشخص الوحيد اللي بيعرف يأثر عليا ، وحيد زيي بعد م ابنه و مراته اتوفوا و حفيده الوحيد سافر ، انا و هو ملناش غير بعض
- انت كل مرة تلعب طاولة مع حد غيري كده ؟
* و هو انا بشوفك فين يعني ! سُلاف واخدة اجازة بكرة يعني هفضل طول اليوم لوحدي
- والله! امال انا روحت فين .. بكرة يا جميل اطبخلك و نتغدي سوا .. يلا متنساش تاخد دواك قبل ما تنام ، انا جاية هلكانة النهاردة هطلع انام و بكرة نتكلم في كل حاجة .. تصبح على خير يا جدو
* و انتي من اهله يا بنتي
احساس انك تبقي لوحدك و فجأة تلاقي حد شبهك فتبقوا سوا زي ضل بعض بالظبط .. ده احساسي ناحية جدو عادل.. هو اللي باقيلي من بابا و هو اللي بيفكرني بيه
تاني يوم كان اجازة .. صحيت بدري زي ما انا متعودة ، بس النهاردة اليوم مختلف .. قفلت موبايلي و شغلت الراديو علي إذاعة الاغاني القديمة ، فتحت كل شبابيك الشقة و رفعت شعري لفوق .. و بدأت اقلب الشقة زي كل اسبوع ، و بعدها بدأت أطبخ
الوحدة مش وحشة ابدا .. الخوف كله من اني اعيش فيها طول حياتي ، انا بس عايزة الشخص المناسب
خلصت الاكل و لبست إسدالي علشان اخد الاكل و انزل .. نزلت و خبطت كتير علي الباب بس محدش فتح .. ف اضطريت افتح الباب بالنسخة اللي معايا
و اول ما دخلت من باب الشقة لقيت حد مسكني جامد من دراعي و كان متعصب جدا
= كنتي فين يا هانم من بدري .. و ازاي تسيبيه لوحده لغاية م تعب الشكل ده
- ايه ؟ انا مش فاهمة حاجة .. جدو عادل فين ؟
بدأ يسيب ايدي ببطء و هو بيبصلي جامد ..
= انا شوفتك قبل كده ؟ انتي بتشتغلي في شركة فادي
- ايوة انا فاكرة حضرتك ..
كنت بتكلم بنبرة هادية من الخضة .. لكن بعدها افتكرت مسكته لدراعي اللي لسه بيوجعني
- و بعدين انت بأي حق تمسك ايدي اصلا ؟ انت مين و ازاي دخلت هنا
= انا ريان .. و الراجل اللي تعبان جوا ده يبقي جدي لو متعرفيش
- ايه .. جدو تعبان ؟
= اه جدو اللي سايب مفتاح الشقة للغُرب اللي حتي مش بيسألوا عليه
- علي فكرة بقا هو يهمني اكتر منك .. و انت حضرتك كنت فين من الاول و سايبه لوحده.. لو تشوفه كل يوم و هو زعلان بسبب وحدته و مرضه ، انت اللي معندكش احساس علشان تسيبه كده .. متعرفش يعني ايه وحدة اصلا ولا ان حد يحتاجلك و متكونش جمبه
= عندك حق
قالها بخنقة و سابني و دخل البلكونة .. انفعلت عليه زيادة ؟ تقريبا كده بس انا معايا حق
.. قد ايه انه شخص قاسي و مش حاسس بجده .. ايه ده .. انا نسيت جدو عادل خالص
خبطت علي اوضته و دخلت لقيته نايم .. كنت لسه هطلع بس نده عليا
* تعالي يا نادرة انا مش نايم
- هبقي .. هبقي اجيلك وقت تاني يا جدو
* تعالي يا بنتي انا سمعت كلامك مع ريان
قعدت جمبه و بوست ايده..
- انا مش هسامح نفسي ابدا اني سيبتك لوحدك .. انا مليش في الدنيا غيرك اصلا
* متزعليش من ريان .. هو كمان عاش لوحده من غير ونس ، كل واحد فينا كان تايه في دنيته و هو بيشتغل في مكان بعيد .. مكنتش اعرف انه هييجي النهاردة ، انا اللي كسلت اخد الدوا النهاردة ف تعبت .. انا مليش غيركم انتو الاتنين
- حاضر علشان خاطرك انت بس هعديها .. ارتاح انت كده و انا هدخل الاكل المطبخ .. و علشان قلبي طيب هسمحله ياكل معاك
دخلت الاكل في المطبخ و لمحته واقف في البلكونة و انا خارجة .. لا ما انا زودتها اوي ولازم اعذره برضه
- احم انا.. انا اسفة لحضرتك جدا علي انفعالي
ساعتها لف و بصلي.. كان تايه ، نفس النظرة اللي فضلت عايشة بيها بعد موت بابا
= انتي عندك حق.. انا معرفتش اكون حفيد كويس ، ولا حتي ابن كويس ، و قررت اعتزل الدنيا كلها بعد وفاة اهلي في حادثة .. كنت فاكر اني كده مش هتوجع بسبب فراق حد ، بس معرفتش اعيش لوحدي .. قعدت جمب جدي و اشتغلت في شركة قريبة ، بس بسبب الواسطة جابوا واحد يشتغل مكاني و نقلوني اسوان
- يا خبر !
= اه والله في اخر الدنيا.. و بقيت لا عارف اعيش لوحدي ولا عارف اشوف جدي غير قليل ، لغاية ما زهقت و قدمت استقالتي خلاص .. متزعليش مني انا طلعت كل عصبيتي عليكي و انتي ملكيش اي ذنب .. انا اسف .. انا ...
- انت احسن حفيد في الدنيا
مش عارفة قولتله كده ازاي و طلعت شقتي بسرعة
.. مسكت موبايلي اللي كنت ناسياه و لقيته مش مبطل رن
- ايوة يا كمال .. انا بخير الحمد لله .. كان في حاجة ولا ايه
• لا انا بطمن عليكي بس
- بتطمن عليا بس ؟
• بصراحة كنت عايزك تيجي بكرة علشان...
- عريس صح ؟ لأول مرة اسمحلي اقولك لا يا كمال.. انا مش هتجوز غير حد يعرفني كويس و جاي علشاني انا مش علشان انت روحت كلمته عني
• ....................
- اوعي تكون فاكر اني مش عارفة زن مراتك عليك علشان تجوزني.. يا خسارة الصحاب والله
• اه يبقي في حد تاني و منة عندها حق بقا
- اقولك علي حاجة ؟ اشبعوا انتو الاتنين ببعض.. بس انسي خالص ان ليك اخت
قفلت السكة و رميت الموبايل و انا متعصبة .. و طلعت فوق السطح كعادتي لما اكون زعلانة ، لأول مرة في حياتي اعيط بصوت عالي كده .. ضغط كل السنين اللي فاتت خرج مع العياط.. و اول ما بدأت اهدي سمعت صوت بيكلمني
= ها بقيتي احسن ؟
- انت هنا من امتي
= من اول شهقة والله قبل ما تعيطي .. بس قولت اسيبك شوية مع نفسك .. خوفت يكون ده بسبب كلامي ف قولت اعتذرلك و جدو قالي انك بتقعدي هنا
- لا والله انا اصلا نسيت
=اتمني تكوني ارتاحتي شوية
- بحاول
= المهم متعرفناش كويس و انا اصلا افتكرتك المسئولة عن جدو في الاول ف اتعصبت عليكي .. و بعدين عرفت اننا قرايب .. خلينا نتعرف بطريقة احسن ... انا ريان
- نادرة
= انتي فعلا نادرة
- ايه ؟
= تشربي قهوة !
عزومة بفنجان قهوة و كلمة حلوة .. كانت اول معرفتي بيه
..............................................
= انا لقيت شغل
- بجد والله !
= اه والله .. بس اوعي تقولي لجدو لغاية ما اجي و نحتفل سوا
- حاضر.. الف مبروك يا ريان انت تستاهل كل حاجة حلوة
= اه ما انا عرفت
- ايه ؟
= ايه
........................................
- ريااان افرحلي يلا
= هيييه فرحتلك اهو خير
- يا بايخ .. الوردة بتاعتي طلعت اخيرا
= اشطر كتكوت اللي هيفتح مشتل قريب
- و بالمناسبة دي انا عملت ايس كوفي و طلع حلو اوي
= لا نزليلي المج بتاعي في السبت بسرعة اتأكد بنفسي
........................................
= بتعملي ايه ؟
- بحاول ارسم
= و ايه تاني ؟
- بسمع اغنية قديمة
= هو ده الرد اللي كنت مستنيه
- يعني كنت عارف ؟
= اه طبعا.. بصي انا مطبق في الشغل و زهقان الصراحة ، ابعتيلي التراك اللي بتسمعيه اهو اتسلي شوية و انا بخلص كام حاجة
- بس انت مش بتحب الاغاني القديمة
= حبيتها
- ايه ؟
= ايه
.......................................
كلامه غريب .. مختلف خصوصا لما يقولي انتي فعلا نادرة
، كل واحد فينا كان لوحده و ما صدق يلاقي الونس .. الونس اللي طلع حلو اوي
= ايوة يا نادرة في ايه.. اول مرة تكلميني فون
- ريان تعالي علي المستشفي القريبة من البيت بسرعة جدو تعب و اخدته علي هناك
بعد أقل من عشر دقايق لقيته قدامي .. الدكتور طمنا انهم شوية ارهاق بسبب الأمراض اللي عنده و كبر السن و انه هيرتاح يومين في المستشفي و بعدين يرجع البيت
ريان خلص كلام معاه و رجع قعد علي الكنبة و مسك دماغه بإيديه الاتنين .. متكلمتش بولا كلمة لغاية ما جات سُلاف اللي كانت سايبة جدو لوحده كالعادة
قام ريان اتخانق معاها و صوته علي
= انتي متخلفة.. ازاي مش شايفة شغلك كده ، الراجل الوحيد اللي باقيلي كان هيروح مني بسبب إهمالك
لقيت نفسي بمسك دراعه ابعده عنها و ارجعه مكانه ..
- ريان اهدي .. انا هتصرف و هكون جمبه
= مليش حد غيره يا نادرة
- مش هخليه يتعب تاني متخافش
بصلي بقلة حيلة و دخلنا نطمن عليه
= حمد الله على سلامتك يا عم كده تخضنا عليك .. بس ماشي تعبك راحة انا مسامحك علي الخضة دي
* حقك عليا يا حبيبي انا تعبتك
= تعبك راحة يا جدي .. انت نفسك سبب راحتي والله
حقيقي استغربت .. بيعرف يخفي زعله في لحظة
في الآخر جدو اصر عليه يروحني و يجيب كام حاجة من البيت علشان يبات معاه
= تحبي نتمشي شوية ؟
- لسه مخنوق ؟
= مش قادر ارجع البيت و هو جدي مش فيه
- اوك نتمشي
فضلنا ماشيين علي الكورنيش و تقريبا اتكلمنا في كل حاجة
- صحيح انت كنت بتشتغل في أسوان .. علي كده تعرف تتكلم نوبي ؟
= طبعا يا بنتي
- انا بحب اللغة دي جدا .. قول اي كلمة كده
= علي اساس انك هتفهمي ؟
- انا واخدة فيها كورس يا استاذ .. تحب اسمعلك ؟ استني هقولك حاجة ...
= آي كادُولي
- ايه ؟
= ايه
بيحبني انا ؟ انا كنت .. مرتاحة و حابة الشعور ده بس مش عارفة اتوترت اوي ليه
فضلت ماشية بسرعة لغاية ما وصلت البيت و هو بيحاول يحصلني
لغاية ما وصلنا مدخل العمارة
= اقفي بقا قطعتي نفسي
- ريان مينفعش تمسك ايدي كده
= انا اسف بس اسمعيني .. نادرة انا مليش حد بعد ربنا غيرك انتي و جدي ..و مش ده السبب والله انتي لو وسط مليون واحدة هختارك انتي ، انا مرتاحتش كده غير معاكي انتي.. انا عيشت طول عمري تعبان و وحيد .. مستخسرة نفسك فيا !
سيبته و طلعت شقتي .. قفلت الباب و شغلت الراديو بصوت عالي ، زي ما بعمل لما اكون عايزة اطرد كل حاجة من دماغي ..
" متغرب والليالي يا بوي
مش سايباني فى حالي يا عين
والرمش اللى مجرحني يا بوي
ضيعني وأنا كان مالي يا عين "
سمعت صوته من ورا الباب
=عارف انك ورا الباب و سامعاني .. انا اسف اني ورطتك معايا انا و جدي طول الوقت ده ، انا مش فاهم ليه بعدتي كده بس انا هعذرك ، مش شايف اي مبرر لبُعدك غير ان دي انانية و جُبن منك.. بس مش انتي اللي تعملي كده .. انتي نادرة
انهارت من العياط اول ما سمعت صوت خطواته بتبعد.. انا كنت خايفة و مش عارفة اطمن ، واثقة فيه و مش عارفة سبب خوفي ايه
" القلب الأخضراني يا بوي
دبلت فيه الأماني يا عين
ولا قادر طول غيبتكوا يا بوي
يشرب من بحر تاني يا عين "
فضلت شهر بحاله مش بعمل حاجة غير اني بروح شغلي و برجع اقعد لوحدي .. من غير اغاني و من غير كلام ، حتي بلكونتي قفلتها.. مش فاكرة غير كل حاجة كانت معاه بس ، اختفي و مش بيرد علي رسايلي ولا مكالماتي .. بقيت بتلكك بكل حاجة علشان انزل لجدو و اشوفه و برضه مش بعرف
مكنتش بفكر غير في قد ايه هو وحيد
* 'هو كمان عاش لوحده من غير ونس '
= ' بس معرفتش اعيش لوحدي '
= 'مليش حد غيره يا نادرة '
= ' انا عيشت طول عمري تعبان و وحيد .. مستخسرة نفسك فيا ! '
= ' انتي فعلا نادرة '
انا فعلا جبانة .. فضلت عايشة طول اللي فات لوحدي علشان جبانة .. و مش عايزة اضيع اللي جاي
بعتله رسالة : انا استاهل محاولة تانية علي فكرة
ايه ده ! شاف الرسالة في نفس اللحظة .. لأ انا جبانة فعلا استخبي فين دلوقتي
فضلت قاعدة طول الليل اراقب الشارع مستنياه ييجي.. لسه في ايدي مج الشاي باللبن المفضل
سمعت صوت راديو من تحت.. الصوت عالي جدا و محدش بيعمل كده غيري .. لبست إسدالي بسرعة و نزلت اشوف في ايه
" تعب الهوى قلبي والحلو مش داري
و لإمتى هنخبي على بعض ونداري
تعب الهوى .. تعب الهوى قلبي "
نزلت جري لقيته واقف عند اول السلم.. تقريبا الجيران كلها اتلمت علي صوته و هو بيغني مع الراديو
وقفت قصاده مش عارفة أبدأ منين .. بس هو قاطعني
= نادرة بس هي اللي تستاهل كل المحاولات
- و ريان بس هو اللي يستاهل اللي نادرة هتقوله دلوقتي
= هتقولي ايه ؟
- آي كادُولي
= يالهوي .. رقم المأذون بس يا جماعة لو تكرمتوا
( و تكفيني نظراتُكِ نادرة الوجود .. التي لا تشع طمأنينة سوي بِرِفقَتي و من أجلي )
تعليقات
إرسال تعليق