_يا ماما لا مش عايزة اتجوز انا دلوقتي
_انا مش بقولك تتجوزي انا بقولك اقعدي معاه وبعدين اللي فيه الخير يقدمه ربنا
_متضغطيش عليا يا ماما لو سمحت
_يحبيبتي مش بضغط عليكي دا انا اكتر واحده تتمنالك الخير في الدنيا دي كلها
كملت بدموع.. يحبيبتي انا نفسي افرح بيكي انسي يحبيبتي صوابعك مش زي بعضها وبعدين دا ولد كويس وهيتقي ربنا فيكي
_ربنا يخليكي ليا ياست الكل انتي عارفه اني مليش غيرك بس انا خايفه اوي يماما
_متخافيش يحبيبتي هو عارف ربنا كويس وشكله بيحبك واتقدملك كذا مره وانا اللي كنت برفض من برا برا عشانك
_خلاص يحبيبتي هقعد معاه وبإذن الله مش هيكون فيه نصيب برضو
_كدا برضو
_خلاص يحبيبتي انا هقعد معاه واعمل اللي عليا
_ربنا يستر ومتديهوش كلمتين من بتوعك اللي بتمشي بيهم العرسان كل مره
_متقلقيش خالث دا انا طيبه خالث
_مبخافش غير منك
اول لما خرجت من اوضتي راحت كلمت مامته وفضلوا يخططوا لكل حاجه ولا كأنها لسه قيلالي انها قاعده تعارف بس واني لو مش عايزة اتجوز براحتي طب هطفشه وتشوف بقى
عدى اليومين وجه يوم قاعده التعارف لبست فستان ستان لونه بيبي بلو فيه وخمار لونه اوف وايت ومحطتش ميكاب
_ايه رأيك كدا يماما
_زي القمر يحبيبت قلبي بس برضو محطتيش ولا ميكاب ولا لبستي طرحه ليه
_مش كل مره بقى يحبيبتي هقولك ان اللي هيتجوزني بعد الشر يعني لازم يشوفني على طبيعتي وبعدين دا جارنا يعني شايفني وانا كدا واتقدم على كدا ف والله لو مش عاجبه الباب يفوت جمل
_هيرضى دا الواد هيموت عليكي وانتي ولا هنا
_اما نشوف
_طب يلا اطلعي عشان قربوا يوصلوا
_يوصلوا ايه يماما دول في الشقه اللي تحتينا يعني ثانتين وهتلاقيهم هنا
_طب يلا وبطلي لماضه
الجرس رن
اهم جم يلا بقى
_حاضر اخرجي وانا هاجي وراكي
_السلام عليكم
_وعليكم السلام اتفضلوا اتفضلوا نورتوا والله
_منور بناسه يحبيبتي
_تسلمي يحبيبتي دا من ذوقك
_اومال عروستنا الحلوة فين
_ثانيه واحده وهجبها بعد اذنكم
_اذنك معاكي يحبيبتي
_يلا يا آيات ام العريس بتسأل عليكي
_طيب طيب شكلي حلو ولا اوفر
_جميله يحبيبتي متتوتريش دي مامته ست طيبه
_مش عارفه يماما خايفه
_دا طبيعي يحبيبتي يلا عشان منتأخرش عليهم عيب كدا
_يلا طيب
روحنا المطبخ خدت صنيه العصير وخرجت
_زي القمر والله ما شاء الله اللهم بارك تعالي يحبيبتي هنا جمبي
_تسلميلي يا طنط
_يختي على طنط منك زي القمر طب ايه يا ام آيات مش هنسيب العرسان لوحدهم شويه
_طبعا يحبيبتي تعالي معايا
خرجوا وسابونا لوحدنا وانا كنت هموت من التوتر اول مرة اقابل عريس واكون متوترة كدا اكيد عشان يعرفني واعرفه
_طب ليه هتفضلي بتفركي في ايدك كتير
_ها لا مفيش اتفضل انا معاك
_اتفضلي الورد دا
_شكرا مكنش ليه داعي
_ازاي بس انا اعرف انك بتحبي الورد
_نعم عرفت ازاي
_مش مهم المهم اني شوفت اللمعه الجميله في عيونك دي
_حضرتك مينفعش كدا احنا لسه في قاعده تعارف يعني مفيش اي حاجه شرعيه بينا
_انا اسف والله
_ولا يهمك اتفضل
_انا آسر عندي 29 سنه خريج فنون تطبيقيه وبشتغل في شركه والحمدلله مقتدر ماليا وعندي شقه متوضبه وكلها من مالي الخاص عشان زي ما انتي عارفه بابا الله يرحمه سابني وانا لسه كنت في اعدادي
_ربنا يرحمه ويغفر له
_امين يارب عايزة تسألي اي حاجه
_اه ليه انا وانت اصلا متعرفنيش
_مين قال كدا انا اعرفك مش ساكنه معايا في نفس العمارة ولا ايه واشمعنا انتي عشان انا شايفك ملتزمه ومحترمه
_الناس مظاهر وانت متهيألك انك تعرفني صدقني اما تعرفني هتكرهني
_متهيألك المظاهر مش كل حاجه
_طيب بص بقى القاعدة دي انا مكنتش موافقه عليها انا وافقت بس عشان خاطر ماما
_عارف
_ وبرضو جيت
_اه
_طيب بص بقى انت زي ما حضرتك شايفني كدا لابسه ولابسه خمار ومبحطش ميكاب ولا هحط ولبسي مش ناويه اغيره عشان لو عايز تغير فيا حاجه ف انا اسفه شوف غيري
_عندك كلام تاني ولا خلاص كدا
_لا خلاص
_طيب يستي انا موافق ومش بعيد البسك النقاب بعد الجواز كمان
_ايه دا ؟ يعني مش هتقولي كل حاجه قسمه ونصيب
_لا انا متقدملك عشان اخلاقك والتزامك اصلا
_والله طيب استحمل بقى
انا عندي شروط اول حاجه هنلتزم بالخطوبه الشرعيه
تاني حاجه مفيش تجاوزات ولو حبتني بعد الشر يعني مفيش كلمه بحبك ولا اي حاجه
تالت حاجه مفيش خروج لوحدنا ولا تلمس ايدي حتى
_اوكي موافق عندك حاجه تاني
_كشرت..لا معنديش
_طب متزعليش بس كدا بصي انا عندي حاجه كدا
_ايه
_انا مش عايز اعمل فرح
_بجد! انت ازاي كدا يعني موافق على كل حاجه ومش عايز فرح مش نفسك تفرح زي باقي الشباب اللي في جيلنا
_لا الزمن دا الناس بقت غريبه لما تنفذي شرع ربنا يبقى متشدده وكئيبه مع ان دا الفرض علينا ضوابط الخطوبه نادرا ما تلاقي حد عاملها وبيخرجوا سوا وبيحبوا في بعض ويمسكوا ايد بعض عادي وبيعملوا افراح والاغاني اصلا حرام يعني يبتدوا حياه جديده مليئه بالمعاصي
انا مقرر إن شاء الله ان مفيش اي تجاوزات وكلمه الحب مش هتتقال غير في الحلال عشان هتكون احلى بكتير
_انت فعلا محترم وملتزم زي ما ماما قالت هصلي استخارة وهخلي ماما ترد عليكوا
_اتمنى الرد يكون حاجه ترضيني
_اللي فيه الخير ربنا يقدمه بإذن الله
جت مامته وماما وفضلوا يتكلموا شويه بحكم ان ماما ومامته شبه اصحاب وكدا وبعدين مشيوا
_أيه رأيك في آسر يا آيات؟
_مش عارفه ي ماما هو كويس واول واحد اقوله شروطي ويوافق وملتزم زي مانا عايزة
_مش قولتلك يحبيبتي قومي يلا صلي استخارة واللي قلبك يختاره يبنتي انا موفقاكي عليه
_حاضر يحبيبتي هصلي وانام ماشي تصبحي على خير
_وانتي من اهله يحبيبتي
صليت استخارة وفضلت ادعي ربنا مختارة في أمره جدا افرض مطلعتش دي شخصيته وهو بيتصنع عشان احبه بصيت للسما من الشباك وفضلت ادعي ونمت
صحيت تاني يوم وانا مبسوطه حلمت بيه اننا اتجوزنا وروحنا عملنا عمرة وكنا عايشين حياه سعيده قررت ادعي لغايه ما ماما ترد عليهم
_ايه سر الابتسامه اللي على الصبح
_ابدا بس حلمت حلم جميل اوي
_خير يحبيبتي قوليلي
_حلمت ان انا وآسر اتجوزنا وروحنا عملنا عمرة في شهر العسل وكنا مبسوطين اوي يماما ووشنا منور كدا
_خير يحبيبتي ربنا يرزقك اللي بتتمنيه
_يارب يماما
روحت اتوضيت وصليت وقرأت قرآن شويه وبعدين فضلت ادعي وعدى 3 ايام وكنت بحلم بيه احلام جميله اوي وأنه كان خير زوج ليا
_ها يا آيات قررتي ايه
_قررت ايه في ايه يماما
_لا يحبيبت ماما متستهبليش عليا قولتي ايه في موضوع آسر
_آسر ايه الاسم الغريب دا اول مرة اسمعه
_اوكي خلاص مامته اتصلت وكانت مستنيه الرد هقولها انك مش موافقه
_صلي على النبي بس كدا يا ست الكل انا بس
_بس ايه ما تنطقي
_بصي بصراحه انا مرتاحه بس خايفه
_يحبيبتي متخافيش صوابعك مش زي بعضها وبعدين انا لو كنت شايفه انه مش خير ليكي مكنتش وافقت اصلا وبعدين توكلي على الله ومن يتوكل على الله يجعل له مخرجا
_ونعم بالله خلاص ردي عليهم
_ربنا يفرح قلبك زي ما فرحتيني كدا
اتصلت على مامته واتكلموا وبعدين زغرطت ولقيتهم بيقولوا بعد بكره قرايه الفاتحه وتلبيس الدبل ايه الهزار دا يجماعه انا كنت بترول هما نُرم ولا ايه انا اسفه انا عيله صغيرة والله
_يلا يا آيات اصحي وفوقي كدا عشان تلحقي تجهزي نفسك
_يوه يماما الغي الخطوبه دي مش موافقه
_هو ايه اللي مش موافقه هو لعب عيال قومي يابت
_شويه كمان طيب
_شويه ايه الساعه 11
_بطلي حركاتك دي بقى اتلاقيها لسه 7
_طب والله 11
_بتهزري صح يلهوووووي
مش هلحق اروق معاكي ولا اساعدك في الغدا
والهدوم مجهزتهاش
_يحبيبتي انا عملت كل حاجه روحي شوفي هتلبسي ايه ولو عاوزة تجيبي حاجه جديده جيبي
_يماما ليه بس عملتي كل حاجه لوحدك هتتعبي
_دا بالعكس متعبتش خالص دا انا ربنا باركلي النهاردة في وقتي عشان خاطرك
_والله يماما مش عارفه هتجوز واسيبك ازاي
_تسيبيني ايه بس دانتي في العمارة اللي جمبنا وبعدين انا مش هسيبك خالص دا انا مليش غيرك يا نور عيني في الدنيا دي كلها
_انا كمان بحبك اوي والله
_طب ايه هتنسي الهدوم ونقضيها عياط ولا ايه النهارده خطوبتك يا عروسه
_اه صحيح البس ايه
_تشتري حاجه جديده ولا ايه
_لالا معايا فساتين كتير
_يحبيبتي دي خطوبتك
_مش مصاريف وخلاص انا معايا فساتين ملبستهاش اصلا
_طيب يحبيبتي اللي تحبيه
فضلت ادور لغايه لما لقيت فستان تل لونه كافيه في نفشه سيكا وعليه خمار نفس اللون وهيلز لونها ابيض ونزلت جبت اكسسورات لونها دهبي وتاج بسيط جدا لونه دهبي وكنت فرحانه جدا مع اني رافضه فكرة الجواز اصلا
عدى اليوم بسرعه رهيبه وجت الساعه 5 وكان قرايبنا بدأوا يجوا ولبست وخلصت وكنت فرحانه بنفسي اوي ولاول مرة احس نفسي بالجمال دا كله ويكون عندي الثقه دي خلصت الساعه 6 وكان آسر وقرايبه جم ماما جت خادتني وعيطت وعيطت معاها وبعدين قالتلي
_كبرتي بسرعه اوي يا آيات الف مبروك يحبيبتي ربنا يجمعكوا ببعض على خير
_يارب يماما يارب بصي بقى الجواز يكون بعد 3 سنين ماشي عشان مش هقدر اسيبك
_ان شاء الله يحبيبتي يلا
خرجت واول لما شافني عينيه لمعت كدا وقام ولقيته ابتسملي وبيديني ورد زي المرة اللي فاتت بس المرادي فيه شوكولاته وعلبه قطيفه
_شكرا ليك
_شكرا ايه بس يارب صبرني
خدت بالي اننا قريبين بعض مع ان في مسافه بس برضو بالنسبالي قريبين ف بعدت وانا متوترة وبدأوا يتفقوا على الحاجات وانا مش مركزة معاهم كنت متوترة منه حساه بيبص عليا مرة واحده سمعت جمله
"اللي انتو عايزينه انا موافق عليه واللي هي عايزاه تحت امرها كل دي بالنسبالي شكليات انا مش بشتريها بالفلوس انا هاخد واحده هأمنها على بيتي وحياتي واولادي ودي الحاجه الوحيده اللي مش هقدر اشتريها بفلوس الدنيا كلها"
فرحت اوي اللي هو انا يارب الكلام دا كله بيتقالي انا في زمن الناس مبقتش عارفه يعني ايه جواز ولا اصلا الرجاله معترفه بأفضال الست عليهم فضلت احمد ربنا كتير اوي ومرة واحده لقيتهم بيزغرطوا وبيقولولي يلا هننزل نجيب الشبكه
_أيه رأيك في الدبله دي
_جميله اوي بس شكلها غاليه
_مفيش حاجه تغلى عليكي بس عجباكي
_احم لالا نختار حاجه تاني
_اوكي اللي تحبيه
_ايه رأيك في دي
_جميله اوي
_بجد يعني حلوة على ايدي
_بجد هجبهالك
اختاري خاتم واسورة وحاجه فوق الدبله
_ايه دا ليه كل دا انا هاخد دبله وخاتم بس
_بقولك دبله وخاتم واسورة وحاجه فوق الدبله
_طيب بص بلاش اللي فوق الدبله
_طيب على راحتك
بصي ايه رأيك في دول
_الله حلوين اوي دول
_خلاص هجبهم
_ماشي هستناك معاهم هناك
_ماشي انا هدفع واجي على طول
دفع وجه وكلهم زغرطوا تاني وانا كنت طايرة من الفرحه هو بيحبني بجد ولا هو بيعمل كدا عشان لسه معرفنيش
روحنا البيت ومامته لبستني الشبكه وماما لبسته الدبله وكنا فرحانين اوي رغم ان كان فيه ناس بتتريق على اللي عملناه بس احنا كنا مبسوطين عشان مزعلناش ربنا
_بعد اذنك يا طنط انا عايز كتب الكتاب يكون بعد شهر بالكتير
_مش بدري يحبيبي
_ولا بدري ولا حاجه ايه رأيك
_طبعا يحبيبي الف الف مبروك
_وانتي يا آيات ايه رأيك
_ايه اه اللي تشوفوه
_يبقى على بركه الله
خلص اليوم بسلام رغم اني اتفاجئت ان ماما وافقت غلى فرح بعد شهر وانا قيلالها 3 سنين بس معرفتش اتكلم
_مامااااا يا ماماااا
_ايه عايزة ايه
_انا مش قيلالك الفرح كمان 3 سنين فاكرة ولا مش فاكره
_لا مش فاكره
_طب انا مش موافقه الغي الجوازة
_براحتك كدا كدا معندناش بنات بتفسخ خطوبتها وبعدين انتي متكلمتيش ليه
_والله بقيت انا الغلطانه دلوقتي اقول ايه بعد ما حددتوا كل حاجه وطبعا مقدرش اكسر كلمتك
_بنتي حبيبتي اللي متربيه يناس
_انتي هتجنيني انا مش عايزة اتجوز
_شششش من بكرة تشوفي اللي ناقص في جهازك عشان اجبهولك
_كتر خيرك دانتي بتجهزيني من ابتدائي
_ما دا هيفدنا عشان معندناش وقت
_مالك فرحانه كدا ليه
_فرحانه بيكي والله نفسي اشوف عيالك قبل ما اموت
_والله ازعل منك ربنا يطولي في عمرك وبعدين دانتي اصغر مني
_قري يختي قري
_يجميل انت يقمر
_يلا يا بت يا بكاشه
_انا هروح اشوف آسر جايبلي ايه
_الله يسهلو يستي
روحت مسكت بوكيه الورد وشيلت الشوكلاتات اللي فيه وفتحت العلبه لقيت فيها سلسه دهب رقيقه خالص وشكلها تحفه
افتكرت العلبه اللي مامته ادتهاني قبل ما تنزل فتحتها لقيت فيها خاتم فيه فص واحد بس عشان بتلبس فوق الدبله وكان شكله جميل اوي لقيت ورقه مكتوب فيها "انتي مرضيتيش تجيبيه بس انا عجبني اوي وجبتهولك وعلى فكره مش كتير عليكي ولا حاجه انتي تستاهلي اكتر من كدا"
مسكت الحاجة وفضلت اعيط ان ربنا عوضني ب راجل بحنيه آسر وانه دايما عايزني فرحانه وبيسعى لكدا
عدت الايام وكنا بنتكلم شات بدون اي تجاوزات واستلطفته اكتر وحسيت انه بيحبني بس انا مش هصدق غير اما يقولها برضو دايما كان حريص انه يجبلي الحاجة اللي بحبها لما يجلنا زياره ودي حاجه بسطتني جدا وعرفتني قد ايه هو شخص كويس وحنين
جه يوم الفرح واللي كنت على قد مانا فرحانه على قد مانا متوترة حياه جديده هبدأها وهكتشف الشخص اللي معايا على حقيقته بس مطمنه راحه غريبه في قلبي مخلياني مطمنه ليه
لبست فستان زفاف مكنش منفوش اوي ولا كان ليه اكستنشن طويل بس كان سيمبل وعليه الخمار اللي مقبلتش اني استغنى عنه في يوم زي دا زي ما برضو آسر منعني اني اقلعه
بعد ما لبست وخلصت ومكنتش حاطه ميكاب حسيت نفسي اميرة وفكرت في رد فعل آسر
لما جه اتفاجىء بيا ونفس لمعه عيونه اللي بشوفها كل مرة بس الزياده المرادي جمله"بسم الله ما شاء الله اللهم بارك"
اتكسفت وضحكت بعدين روحنا على المسجد اللي هنكتب فيه كتب الكتاب وبعد ما المأذون اختتم بجملته الشهيرة"بارك الله لكما وبارك عليكما وجمع بينكما في خير" لقيته قام شدني وباسني من راسي وقالي مبارك علينا
بعد ما عملنا سيشن وخلصنا وروحنا واول ما دخلنا الشقه
_مبارك عليا انتي
_...
_انا عارف انك متوترة ودا حقك بس عايز اقولك اني هتقي ربنا فيكي ومش هخلف العهد اللي عهدت ربنا بيه وحتى لو محبتنيش بس على الاقل هنتعامل ب مودة ورحمه متخافيش مني
_بص بصراحه انت لازم تعرف حاجه
_اتفضلي قولي كل اللي عايزاه
_بص انا بصراحه خايفه انا عيشت طفوله صعبه خلتني معنديش ثقه في حد بابا كان متجوز ماما صالونات عشان يرضي اهله وماما وافقت عشان مكنتش تعرف بعدين بعد الجواز ابتدى يخونها مع اللي كان بيحبها ولما خلفتني مكنش بيحبني عشان كان نفسه في ولد وكان بيعاملني وحش
عيطت..مكنش بيهتم بيا وكان بيضربني وخلاني كرهت نفسي ومبقاش عندي ثقه في نفسي وكان بيزعق لماما عشت في الرعب دا عشر سنين لغايه لما توفى كنت بخاف من الرجاله كلها وكنت برفضهم عشان خايفه نفس تجربه ماما تتكرر والاسوأ انها مكنتش تجربه ماما بس تقريبا معظم اللي شوفتهم عاشوا كدا ومنهم اللي كمل عشان الاولاد واللي طلق انا حبيت اكون صريحه معاك عشان لو لقيت تصرفاتي غريبه
_حضني ومسح دموعي بالله في حد يعيط يوم فرحه انتي هتقلبي اليوم نكد عليا ولا ايه ويستي انا هستحملك زي مانتي كدا وبعدين دانتي قمر انتي مبتشوفيش نفسك في المرايه ولا ايه سامحي بباكي هو خلاص بين ايدين ربنا ادعيله بالرحمه
_مسمحاه والله
_طب ايه انا جعان
_ايه دا ايه قله الادب دي انت ازاي حاضني كدا
_مسيو جاك انا زي جوزك برضو
_ولو ازاي
_ازاي ايه بس يلا ناكل انا هفتان
_ماشي هغير وجايه
_متتأخرش عليا يجميل
_عيب كدا على فكره
_اصبري عليا بس
بعد ما كلنا وخلصنا قالي عايز اقولك على حاجه
_نعم فيه حاجه
_اه فيه ايه القمر دا
_انت قليل الادب كدا من امتى
مانت كنت محترم ايام الخطوبه
_دا انتي جننتيني بس الحلال احلى بكتير
_عايز ايه بقى
_بحبك
_يعني ايه
_انتي غبيه ليه؟
_لا والله مفهمتش
_بحبك يا آياتي
_قول والله
_والله
_بص انا ممكن اعيط دلوقتي عشان مش عارفه ارد عليك
_تعالي بس مترديش
وحضني وبعدين باسني على خدي
_طب ايه انا عايزة انام بدل ما اعيط
_يلا يستي
قضينا اجمل اسبوعين في حياتي فاكره لما جالي دور برد فضل جمبي ومكنش بينام وكان بيعمل الاكل ويروق وكل شويه يقولي "ارتاحي انتي بس على قلبي زي العسل"
غصب عني لقتني بدوب فيه وبحبه حنين بطريقه غريبه اللي هو هو لسه في منك دلوقتي دايما بيقولي "انا هتقي الله فيكي واعملك باللي يرضيه عشان يتردلي في عيالي انتي النعمه اللي نورت حياتي يا آيات انا فضلت خمس سنين احبك ومكنتش بقولك غير لما اكون جاهز وكنت بدعي بيكي لغايه ما ربنا حققلي امنيتي"
وفي يوم كان راجع من الشغل
_آياااات يحبيبتي انتي فين
_انا هنا اهو
_عندي ليكي خبر حلو
_ايه
_حضن ممس فين
_عيب على فكرة
_خلاص مش قايل
_حضنته اهو خلاص كدا قول
_هنطلع عمرة الاسبوع الجاي
_يعني ايه
_هو انتي بتتغابي لما بتفرحي ليه
_لا ثانيه كدا انا هطلع عمرة يلهوووي لالا مش مصدقه
_خلاص يهبله متعيطيش
_تعرف انا حلمت بكل اللي احنا فيه دا دلوقتي وكمان حلمت اني طلعت عمرة معاك ربنا يخليك ليا يا آسر
_ويخليكي ليا يحبيبتي
روحنا العمرة وكان بالنسبالي احلى حاجه عملتها في حياتي شعور مهيب قد ايه فضلت اشكر ربنا على نعمته عليا وآسر فضلت احمد ربنا عليه ودعيت لينا كتير كان افضل وقت قضيته وبشكر آسر عشان خلاني اعيشه
بعد ما رجعنا تعبت اوي بحسب من السفر وكدا بس التعب زاد
_تعالي نروح نكشف يحبيبتي انتي بقالك 3 ايام مبتكليش وبدوخي على طول
_لا خلاص مفيش داعي بكره لو لقيت نفسي لسه تعبانه هروح
_بكره ايه بس تعالي دلوقتي
_خلاص يا آسر معلش ريحني
_حاضر يحبيبتي اللي يريحك نامي دلوقتي
فضلت افكر في حاجه وكنت بتمنى انها تطلع وبعد ما آسر نزل الشغل روحت الصيدله وبعدين طلعت البيت ولما طلع اللي في دماغي صح مكنتش مصدقه وصليت ركعتين شكر لربنا وفضلت افكر ازاي افاجأه
وصلت لفكرة وقررت انفذها
_السلام عليكم
_وعليكم السلام عامله ايه النهارده
_الحمدلله بقيت احسن والله
_يستاهل الحمد بس برضو نروح نكشف
_ماشي اللي تحبه بص قبل ما ترجع من الشغل قولي عشان ممكن انزل لماما
_ماشي يحبيبتي هقفل دلوقتي عشان عندي شغل
_ربنا يعينك سلام
جهزت الغدا اللي هو بيحبه ولبست فستان احمر وحطيت ميكاب وجبت هدوم بيبي وكتبت ورقه وحطيتها على الهدوم وجبت الاختبار وحطيته معاهم وحطيتهم على السفره
ولما قرب يجي كنت خلصت كل حاجه
_انا جيت يحبيبتي
_حمدالله على السلامه تعالى عملالك مفاجأه
_هو فيه مفاجأة اكتر من جمالك وحلاوتك دول
_اتلم واصبر
_وه وه جهزتيلي الغدا اللي بحبه
_ايه رأيك
_تسلم ايدك يحبيبتي مكنش ليه داعي تتعبي نفسك زياده
_لا مانا عرفت سبب التعب
_بجد ايه السبب
_بص كدا على السفرة
_ايه الحاجات دي
_شوف الورقه
فتح الورقه اللي كان مكتوب فيها"i will come soon wait me dad , i love you"
_بصلي وقالي ايه دا يعني
_مبروك انت هتبقى اجمل اب
_بتهزري صح
_شوف الاختبار عندك
_حضني وقال..لالا مش مصدق الف حمد وشكر ليك يارب
_فيه مفاجأة تاني
_اكتر من كدا
_اه حاجه مني ليك
_قولي
_ أحبك يا من اخرجتني من ظلمات تعاستي الى انوار حبك
احبك يا من علمني ان الحياه ليست بهذا السوء الذي كنت اظنه عندما نجد من يحبنا ونحبه
أحبك يا من آسرت روحي وفؤادي بفيض حبك وحنانك علي
أحبك يا من عرفت معه كيف ان الحب يجعلنا أقوى ونشعر بالأمان في وجود من نحب
أحبك يا من علمتني معنى الحب وان الحياه ليست جميعها ظالمه مثلما كنت اظن
أحبك آسر قلبي💕
_عيط ..آيات انا مش عارف اقول ايه غير انك نعمه من ربنا ليا ربنا يديمك ليا العمر كله انا كمان بحبك اوي💙
تعليقات
إرسال تعليق