_ آنسه رحمه معايا
_ أه مين حضرتك
_ أنا محمد صاحب خالد ممكن أقابل حضرتك في موضوع مهم
_ أزيك يا محمد طبعا ممكن نتقابل ..... بس هو خالد كويس
_ لما نتقابل هستناكي الساعه** في****
_ تمام هكون موجوده
~مع السلامه
________في المعاد_________
_ آسف اتاخرت عليكى
_ لا عادي ولا يهمك اتفضل
_ شكرا… بصراحه أنا عندى ليكى أخبار عن خالد لازم تعرفيها
_ خير يا محمد
_ بصى هقولك الحكايه من أولها
_ اتفضل
_ احم من فتره كده خالد كلمنى عشان ننزل بدرى زي العادى بس المرادى كان عندو حاجه مختلفه
___نرجع بالزمن لورا شويه____
- صباح الخير كل ده نوم يا محمد
_ عاوز اي ...
- الناس بتقول صباح الخير مش عاوز اي المهم يعنى تعالى ننزل نتمشى حبه
_ الساعه كام كده
- احم تلاته كده
_ نعم يا أخويا بتكلمنى الساعه تلاته بالليل وكمان عاوز ننزل أنت اهبل ياسيد مش كفايه نزول آخر الليل
- سيد مين أنت بتخونى يا محمد أنا قصرت معاك في حاجه عشان تعمل فيا كده
_ بقولك اي أسكت أوفر أوي الشغل ده
- رأيك كده خلاص يلا انزل عشان خاطري
_ شكلك عامل مصيبه و هربان من بيتكم
- حاجه زي كده تعالى و هقولك
_ أمري لله البس وتعالى
- هو انا لسه هلبس انا تحت بيتكم انزل
_ ماشى هلبس و أنزل
- شاطر مستنيك
----------------------------------
- كل ده بتلبس لي يعني
_ لو مش عجبك ممكن أطلع تانى عادي
- لا عجبنى خلاص
_ شاطر هنروح فين
- اممم ممكن البحر
_ بتفكر على إيه هو أنت بتروح مكان غيرو
- فكره برضو
----------------------------------
_ مالك بقا
- مليش منا كويس اهو
_ الكلام ده علي مين
- مش عارف عليك مثلا
_ قول عملت اي
- هسيب رحمه
_انت بتهزر صح
- لا
_ انت هتستهبل أنت فرحك كمان شهور
- اه منا عارف بس خلاص قررت ننفصل
_ لي طب
- انا مش مناسب ليها
_نعم مش دي حب عمرك و خطيبتك و حبيبتك غيرت رأيك يعني
- اه غيرت رأيي
_ الكلام ده مش داخل عليا حصل اي
- منا عارف بس هقولك بعدين
_ لا دلوقتى
- بس محدش يعرف حاجه عن الكلام ده
_ قول اتفضل
- كنت تعبان من فتره و دايما مجهد و بتعب بسرعه وفي دوخه دايما مع الصداع
_ اه أنت قولتي وكنت هتكشف
- اه منا كشفت
_ وبعدين
- طلب مني تحاليل كتير و إشاعات و… وقال عندي سرطان في الدم
_ ..... انت بتقول اي بطل هزار
- مش بهزر
_عامل مقلب صح
- لا مش مقلب
« كان فعلا باين عليه التعب ملامحو تعبانه كان بقالنا كتير مش بنتقابل حسيت أن هو كبر عشر سنين » أخدت نفسي وأنا بحاول استوعب
_ من امتى وأنت عارف طب
- من فتره كده
_مقولتش لى
- مكنتش قادر
_تعالي نروح لدكتور تانى ممكن يكون في حاجه غلط
- مظنش هتفرق حاجه
« صوتي بقا عالي و أعصابي سابت وهو قدامي بارد بيتكلم من غير ما يبص ليا… يعنى مش هشوفو تانى إزاي ده صاحب عمرى ده سندى في الدنيا مش متخيل فكره إني اخسرو أنا مليش غيرو »
_ أنت إزاي بارد كده أنت متخيل أنت بتقول اي
بصلي لأول مره عيونه مطفيه من الحزن
- اه متخيل شاب لسه بيبدا حياته وعنده كنسر وأيامه معدوده هيسيب صحابه وحبيبته مش ب ايديه أعمل اي يعنى
~ وحد ربنا ده نصيبك وأن شاء الله هتخف وترجع لينا
- تعرف قولتك انهارده لى
امبارح كانت اول جلسه كيماوي ليا مقدرتش اروح كنت لوحدي وخوفي هزمني … انا راضي بقضاء ربنا بس أنا انسان بخاف برضو ومش عاوز اموت
_ بعد الشر عليك انا معاك ومش هسيبك طمن قلبك ان شاء الله هتخف و هتكون زي الاول
- ربنا يسهل
_ طب رحمه مالها
- رحمه انسانه جميله اوي وطيبه تستاهل حد يقدر يسعدها ويكون سند ليها وأنا مش هقدر أسند نفسي خليها تشوف نصيبها بعيد عني
_ بس أنت بتحبها
- عشان بحبها مش هخليها تتعب
_هي مش هتسيبك تعمل كده هي كمان بتحبك
- منا هخليها هي الى تطلب نسيب بعض
_ده الى هو ازاي
- هنعمل ..................
_لا مش هساعدك في ده أنت بتهزر
- مش بهزر مفيش حل تاني
_لا في روح كلمها و أحكي ليها كل حاجه
- لا كده هتتمسك بيا أكتر وأنا مش عاوز كده
_فكر تاني في كلامك رحمه مش تستاهل منك كده
- وهي مش تستاهل تفضل متعلقه بحد هيموت
_بس من حقها تعرف
- مهي هتعرف بس بعدين… هتساعدني ولا لا
_حاضر
________________________________________________
+ الو رحمه معايا
_ايوه أنتِ مين
+ مش مهم انا مين المهم ان خطيبك مع واحده تانيه
_انتِ هبله يا بنتى
+ لو عاوزه تتاكدي ممكن تروحى ***** و هتعرفي أنى صح
_ شكلك فاضيه وجايه تهزري
+ انا عملت الى عليا سلام
« وقتها انتِ نزلتي روحتي العنوان أنا وقتها كنت بدعي أنك متجيش و متصدقيش حاجه منها بس أنتِ جيتي و شوفتيه وهو قاعد مع واحده تانيه وقالها بحبك قدامك وأنتِ مستحملتيش أكتر ورميتي ليه الدبله و فركشتي كل حاجه كان نفسي تشوفي الحزن الى في عيونه كان نفسي تحسى بنبره الانكسار بس للأسف هو عمل خطه صح تخليكي تصدقي أن هو بيخونك ومن يوميها أنتِ متعرفيش عنه حاجه صح »
بصيت ليها بعد ما خلصت كلامي كانت الصدمه باينه عليها
قالت ودموعها بدأت تتجمع _هو خالد فين دلوقتي
_ خليني اكمل الاول
_ اتفضل
_ خالد كان بيحبك وكان عنده أمل أن الخطه دي تفشل لأي سبب وتكملو مع بعض بس محصلش كده وافق بعدها أنه يبدأ العلاج للمره التانيه أنا معاه المرادي وأنتِ عارفه أن في الحالات دي لازم النفسيه تكون كويسه بس هو مكنش قادر ينسى وكان كل يوم يتعب اكتر عن الى قبلوا ويضعف و مكنش بيتحمل الكيماوي في يوم كلمنى وقال أنه هيروح انهارده لوحدو وصمم على كده مع أننا بنروح مع بعض كل مره المهم وافقت وجه معاد الجلسه مكنتش مطمن وحسيت بحاجه غلط كلمتو كتير مردش عليا قلقت أكتر كلمت الدكتور قالي أن خالد مجاش روحت على البيت بتاعو وكان معايا نسخه من المفتاح دخلت ولقيته واقع ومش حاسس بالدنيا كلمت الإسعاف بسرعه بس كان فارق الحياه وكان موصيني انك تعرفى الحقيقة وكان نفسى هو الى يحكى ليكى أنا آسف مع السلامه……
قومت وسبتها اصل أنا مش مستوعب أن صاحبي مشي و مش هشوفو تاني ده كان اخويا الموت قريب اوي مننا ومن كل الي حوالينا اسف يا صاحبي لو ضايقتك في يوم اسف لو كنت في وقت محتاج وجودي وانا غبت عنك هفضل فاكرك طول عمري .
تعليقات
إرسال تعليق