=أنا رايحة عند بيت ماما، ومتحاولش تمنعني، متحاولش
_أنا محاولتش أمنعك، بس ممكن أعرف ليه؟
=عارف قيس كتب في ليلى كام قصيدة؟ عارف كان بيحبها إزاي؟
_طب منا بحبك بردو
=اثبتلي
_أثبتلك؟ عارفة قيس اللي أنتِ فرحانالي به ده اتحوّر عليه أكبر تحويرة في التاريخ البشري وغير البشري كله، اسمعي يختي
لمَّا تَلاقينا على ســـــــفحِ رامَةٍ ** وجدتُ بـنان الـــــــعامريَّةِ أحــمرا
فقلتُ خضبتِ الكفَّ على فراقنا؟! ** فقالت : معاذ الله , ذلك ما جرى
ولكنَّنِــــــي لـــــــما وجدتُكَ راحلاً ** بكيتُ دماً حتى بللــت به الـثرى
مسحت بأطراف البنانِ مدامعي ** فصار خضاباً في اليدين كــما ترى
يعني ست ليلى بتاعته اللي اتجنن عشانها لما اتجوزت وحنّت إيدها وهو شافها حوّرت عليه التحويرة دي
=عشانه بيحبها صدقها على فكرة
_عارفة مشكلة قيس إيه بل مشكلة الصنف البشري كله يتلخص في جملة بتتقال من قديم الأزل (الممنوع مرغوب)، يعني لو هو كان اتجوز ليلى وعمه رضي به مكناش سمعنا عن قيس وليلى أصلاً
=بردو مش هتخليني أتخلى عن قراراتي، عارف ابن زيدون كتب نونية لولادة بنت المستكفي، اشمعنى
_ولادة بنت المستكفي اللي سابته واتجوزت الوزير! أستحلفك بالله تبس وتستهدي بالله وتدخلي شنطة هدومك، مش شوية شعرا يخلوكِ تعملي فيّا كده
=على فكرة دي كانت عوزاه يغير عليها عشانه بص للجارية بتاعتها
_تقوم تتجوز؟ أي منطق هذا يا أخت؟
=طب سيبنا من ابن زيدون وقيس بن الملوح، محمود درويش إيه أخباره معاك، أكتبلي أي حاجة زي ما كان بيكتب لحبيبته ريتا
_ريتا؟ الصه.يونية؟ عارفة ريتا أو بالأصح تامار في حرب 1967 وبعد قصة حب بينها وبين درويش اختارت إنها تنضم للجيش الإس.رائيلي ومن بعد فراقها كتب درويش قصيدتين لها، الفراق على فكرة دافع كبير للكتابة لكن أنتِ في حضني أهو
=باااس وهنا بيت القصيد، أنا هروح عند ماما عشان تتعذب في فراقي وتكتب لي أي حاجة تخلدني بها في دفاتر الزمن، كتير عليّ يا عالم أتخلّد في دفاتر الزمن؟
_لا تعليق، هنا سأسكت قليلاً
=تسكت؟ لا فوقلي كده
_بتعيطي ليه فهميني، ارحمي أمي العيانة شوية
=مبقتش تحبني صح؟ مستخسر فيّ إني أتخلد في دفاتر الزمن؟
_الله يلعن إبليسك يوم ما بيتسلط عليكِ كده، اسمعي يا ستي
يا هائمًا بهوى السمراء وحسنها
تالله ما أنتَ وحدكَ في حسنها هائمُ
=مش كفاية على فكرة
_لا بقا أنتِ تخدي هدومك وموتورجل على مامتك
=منا بقول كده برضو، أنتَ شكلك بخيل المشاعر وأنا اتخدعت فيك
_خدي هنا يا مجنونة الله يغزي شيطانك، النهاردة صباحية زفافنا هنتفضح، بهزر خدي هعملك اللي أنتِ عوزاه
=بجد؟
_أه يا حبيبتي بجد، بس إيه الحلاوة دي كلها
=بجد حلوة؟
_قمر يا حبيبتي، تقولي للقمر قوم وتتربعي مكانه
=أيوا أيوا، اكذب بضمير ما أنت مش هتتحاسب على كدبك عليّ، عرفت بقا إني كان عندي حق من الأول وإني لازم أسيبك
_يا بنتي بقا، إيه رأيك أحكي لك قصة الرسول وستنا عائشة وهعمل فشار على ما تغيري هدومك؟
=إذا كان كده ماشي، أفكر... بس قولي أنا أحلى ولا..
_أنتِ طبعًا يا روحي، هو حد ييجي في حلاوة سمارتي حاجة؟
=يا حبيبي يا ياسين، هغير وأجيلك
_أوف، صعبة بس طلعت هبلة وبتتراضى بكلمة زي العيال الصغيرين، لسة قلبها متلوثش من الدنيا وبراءتها بيضا، ربنا يديمها في حياتي نعمة .
تعليقات
إرسال تعليق