خاطرة بعنوان "عيناها اللامعتان" بقلم المبدعه «أسماء عطيه » |تورنيد مصر

-طلقني ياعدي 

-روحي وانتيييي قمر كده وزي العسل 

-مش بهزر ياعدي طلقني بجد انا زهقت اصلا وخلاص عايزه اتطلق ومش هرجع فيها 

-حاضر من عيني بس انا نفسي راحت للمكرونه البشاميل بتاعتك اوي اوي يرضيكي اطلقك قبل مااكلها 

-نفسك فيها اوي يعني 

-اوي اوي مقولكيش اي اكل بيدخل معدتي الا اكلك انتي بينزل علي قلبي علي طول كده 

-قول والله 

-والله 

-ثواني وتكون المكرونه هنا 

-طيب والطلاق مش كنتي عايزاني اطلقك 

-بعد مااعملك المكرونه وتقولي رأيك فيها 

-ده من عيوني اوي

-تسلملي عيونك 

_الا صحيح انتي عايزه تتطلقي ليه 

-كنت قاعده بكلم ابني حبيبي وبحكيله علي بلاويك علشان اول ماييجي ع الدنيا كده يبقي عارف مصايب أبوه ويقف في صفي دايما فإيه بقا 

-ايه بقا 

_هقولك اهو وانا بحكي افتكرت لما كنت زعلانه منك علشان كنت بتكلم العقربه بنت عمتك وانت وقتها اكلت بعقلي حلاوه وقعدت تقولي شكلك حلو شكلك مش عارفه ايه انهارده وانا اتصالحت زي الهبله بس خلاص زمن المصالحه الهبله دي راح 

-طبعا طبعا

-انا بقيت جامده اوي و متقدرش تاكل بعقلي حلاوه دلوقتي 

-اكيد مفيهاش كلام 

-ايوه ابعد بقا علشان المكرونه متتحرقش 

ضحك -طيب والله انا بحبك 

-انا كمان بحبك اوي اوي بس ليه بتقولها فجاه 

قرب مني حضني من ضهري 

-هو محتاج مناسبه او وقت معين علشان اقول لمراتي حبيبتي اني بحبها 

-ومراتك بتحبك اكتر 

_تحبي بعد مانتغدا ننزل نتمشي شويه 

-لا 

-لا ليه اول مره ترفضي 

لفيتله وحطيت ايدي الاتنين في وسطي 

-مش هنزل بالبالونه اللي قدامي دي 

ضحك جامد 

-والله طيب اشهد بقا ياابني ياحبيبي اني عايز اخرجك وامك رافضه 

-انت بتبتزني كده يعني 

-ايون 

-طيب خلصانه بعد الغدا ننزل 

-كان من الاول ولا لازم استخدم اسلحتي السريه يعني 

اتغدينا ونزلنا نتمشي علي الكورنيش شويه وانا حاضنه أيده زي مابعمل دايما بحس بالامان وانا معاه بحس اني مش عايزه اللحظه تخلص ونفضل سوا كده علي طول 

-تعرفي ياأريچ

-عرفني 

-اول مره شوفتك فيها هنا كنتي وقتها بتتخانقي مع الولد اللي كان بيعاكسك وما شاء الله مخلتيش فيه حته سليمه قولت بس هي دي ياواد ياعدي اللي هتخلص عليك 

-نعم يااخويا

-قصدي اللي وقعتك ووقعت قلبك اول ماشوفتك خطفتيني مكنتش عارف ايه اللي حصلي يومها علي طول عرفت بيتك وكلمت باباكي انا فاكر وقتها قالي تنور في اي وقت انت واهلك بإذن الله رديت وقولتله هروح اجيبهم واجي علي طول ابوكي ضحك وقالي انت متأكد انك جاي تتقدم لبنتي انا قولتله ايوه والله علي فكره ياأريچ ابوكي واثق فيكي اوي قالي دي بتاكل بني ادمين عملتلك ايه علشان واقع اوي كده 

_بابا حبيبي من يومه بيحب يشكر فيا وفي تربيته قدام الناس 

-اكيد طبعا المهم روحت خليت بابا وماما يلبسوا وهما مش فاهمين حاجه وعديت جبتلك البوكيه والجاتوه كل ده تحت استغراب منهم اللي هو الواد اتجن ولا ايه مفهموش حاجه غير في حوش بيتكوا وانا بقولهم احنا طالعين نتقدم لبنت ساكنه هنا لو طلبوا عيني هديهالهم يومها بابا بصلي جامد وقالي وقعت ياشاطر وامي عيطت وزغرطت قبل ماانطلع وتوافقي اصلا 

-انا فاكره يومها سمعت الزغروطه من تحت بس مفيش زغروطه خطفتني غير زغروطتك اول ماوافقت وقرينا الفاتحه كنت هموت ضحك عليك يومها 

-الفرحه مكنتش سايعاني يومها اصلا 

-ندمت علي اختيارك ليا في يوم ياعدي 

-ندم ايه ياما انتي بتهزي ده انا ندمان علي حياتي قبلك اني عيشتها من غير وجودك ندم قال 

-خلاص ياعم متزوقش 

-طيب انتي ندمتي في يوم من الايام

-اااااه 

-نعم يااختي 

-ااااه ياعدي بولد الحقني يخربيتك 

-بتولدي ايه لا استني طيب اعمل ايه طيب اتصرف ازاي 

-وقف تاكسي بسرعه ياعدي مش قادره هولدلك ابنك مخرب اللحظات ده في الشارع والله 

-طيب استني استني 

وقف تاكسي وركبني وروحنا علي المستشفي اللي هولد فيها وطبعا مقولكومش الدكاتره والممرضين استغربوا ازاي في واحده بتولد وهاديه بالشكل ده ولا زعقت ربع زعيقه حتي هه بهزر الشارع والمستشفي والعيانين ده حتي الميتين اللي في التلاجه كان ناقص يقوموا يخرسوني 

-لو سمحتي هي كويسه 

-بتولد يااستاذ اهدي شويه متقلقش 

-طيب محتاجين اي حاجه اروح اجيبها بسرعه 

-لا ممكن بس حضرتك تهدي والدكاتره بيشوفوا شغلهم 

-طيب هي هتطلع امته 

قطع كلامنا صوت البيبي وهو بيعيط 

-اهي المدام ولدت عن اذنك اشوف شغلي 

-اتفضلي وطمنيني ارجوكي 

بعد شويه خرجت الممرضه ونقلوا اريچ والبيبي اوضه تانيه 

-الف مبروك يااستاذ عدي المدام جابت ولد زي القمر وهي وهو دلوقتي في الاوضه بتاعتهم تقدر تدخل تتطمن عليهم 

-أريچي انتي كويسه 

-انا كويسه ياروحي ابننا كويس 

-كويس اهو نايم جمبك علي سريره متقلقيش 

-مدام أريچ حضرتك محظوظه بجوزك بجد احنا حسينا أن هو اللي بيولد مش انتي 

ابتسمت وبصيت ليه

-ده عوض ربنا ليا في الدنيا وحبيبي وابويا وكل حياتي مش عايزينوا يقلق عليا ازاي 

باس دماغي وراح شال البيبي وجابوا في حضني 

-مبروك علينا ثمره حبنا هتسميه ايه ياروحي 

-ياسين هسميه ياسين ياعدي الاسم اللي اتفقنا عليه 

-ربنا يخليهولنا يارب وياخد مننا الحلو بس 

-امين يارب 

-قولتلي ياأريچ انا احلي ولا هو 

-هو طبعا ده ابني قمر ياحبيبي 

-لا والله 

-طالع لابوه

ضحك -ايوه كده اتعدلي 

"وقعت في حبك من اول نظره وعرفت الحب علي ايديكي كنتي ليا اجمل صدفه وكنت ليكي افضل عون"♥️