ويا سيدي.. هالقلب ملعي، هيك ما فيو جلادة، مو قادر يحرّك قشّة، كل ما حاول يطلع على الأفق بتجيه من الأفق صفعة حزن بتجيب أجلو، وأجلو صار جاية مرات كتير، بزاورو وبيطمن عليه، بقول لسا ما استوى.. بقطف نبضاتو بعدين، باقيلو حسرات ما داقها..
هالقلب دايب.. بيهوى أي.. بس الحبّ قاسي عليه شوي، أنا قلت شوي؟ ما في شوي مع هالقلب غير الفرح، صححها.. الحب قاسي عليه أكتر من كل شي، مغروم بس ما بيعترف، سهران بس ما بيتغزل حبيبو بطول سهرو وسواد جفونو، جفافو العاطفي مبلش من لما كان الكراش ما لو مسمى ومصطلح يشرحو..
ويا سيدي هالقلب ضعيف، شاطر بالبكة، حتى لو صاحبو ما بكي بيضل هو على نواح.. مأصّل بتأثرو، رهيف، حنيّن، والمآسي مو مقصرة، صاحبو صار يخبي عنو الأخبار الي بتزعّل متل ما بخبو الشوكولاتة من الولاد، أي حقو.. ح يروح من إيديه بالرخيص، ح يروح من كيس حالو هالقلب!
بقا شايف كيف بيوصفو القلب المفحم؟ كان ضروري تسألني شو يعني مفحم؟ تركو.. فحماتو بينشوى عليهن وجبة اكتئاب دسمة، بكون هلأ عم يتعشاها بدل الأكلات يلي بحبهن كرمال يقسى ع حالو أكتر.. وكأنو بقيان فيو مطرح يتحمل جلد الذات.
ابقى دعيلو.. يا تنشعل فحماتو فرح.. يا تنطفي لنكنّس شحّارو ونقول: الله يرحمو.. كان قلب محبوب.
تعليقات
إرسال تعليق