"سمعت الكلام ومردتش ،هيفيد بإيه الكلام؟هيفيد بإيه وأنا مهما أتكلمت هما فِ نظرهم إني مريضة ولازم أروح أتعالج ،هو سهل اللي مريت بيه؟ سهل إن أهلي يموتوا فِ وقت واحد؟ أنا مش عارفه أعيش حياتي ،مش عارفه ولا قادرة أكمل "
-ملبستيش ؟
'قومت من غير ما أتكلم لبست وخلصت وطلعت لقيتهم واقفين مستنيني ،مش عارفه هما مش بيحبوني ليه،مش عارفه أحدد او الاقي سبب،طب ممكن هما بيعملوا كدة عشان عايزين مصلحتي ودة أشك فيه لاني فهمتهم مليون مرة إني عايزة وقت أتعافى وهما مش مقتنعين ،فضلت ساكتة برضو وأنا معاهم فِ العربية لحد ماوصلنا '
-هنا محمد
'رفعت عيني فَعرفت إن أنا ،دخلتني وقفلت الباب وانا قعدت قدام الدكتور '
-إزيك ياهنا.
-كويسة .
-ممكن تعتبريني زميل وتتكلمي معايا عادي ونشوف حالتك واصلة لفين؟
-ينفع أسألك سؤال ؟
-أتفضلي طبعا .
-أنتَ لو أهلك بعد الشر ماتوا ف نفس اليوم ،هتاخد زعل قد إيه كدا ؟يعني كام يوم ؟
-كام يوم ! أكيد مش بالأيام ،وطبعا هزعل عليهم وأوي كمان دول أغلى حد فِ حياتي ،زي يوم وفاة بابا أنا قعدت فترة بتعافى من موته.
-تمام يعني مش عشان حزين تبقى لازم تروح لدكتور نفسي .
-عايزة توصلي لإيه ؟
-عايزاك ترد .
-أكيد دة موت أعز أشخاص على قلبي فَ أكيد هاخد وقت طويل .
-تمام ،أنا أهلي ماتوا فِ نفس اليوم ومن شهرين واللي المفروض عمي جابني هنا ،بيقول عليا إني لازم أروح عند دكتور نفسي وأتعالج وكدا ،أنت شايف إني عايزة أتعالج ؟
-سكت! مش لاقي كلام تقوله ؟ أنا عايزة طلب .
-أتفضلي .
-عايزاك تخرجني من هنا من غير مايعرفوا.
-هتروحي فين ؟
-هروح فين معرفش ،بس لازم أمشي ،،أرجوك خليني أمشي ،هما مش بيحبوني وهيأذوني .
-عايزك تفتحي الباب دة هينزلك علي أوضة هتخليكي فيها لحد ماأجيلك .
"أبتسمت وجريت على الباب ولقيت سلم نزلت عليه لقيت أوضة ديكورها هادي ولونها جميل ومريح للعين ،مكنش واصل ليا أي صوت ليهم ،الاوضة كأنها معزولة أصلا ،قعدت وبدعي إني أعرف أمشي من غيرهم ،ماما كانت على طول تحذرني منهم ،ولما كانوا بيضايقوني بابا كان بيقفلهم ،بس كحظي العسير إن أهلى توفوا ،وطبعا الناس مش عارفه حاجة وشايفين إن عند عمي أمن مكان ليا ،ميعرفوش إني أبات فِ الشارع ولا أبات عنده، بعد ساعتين تقريبًا لقيته دخل "
-يلا عشان تخرجي .
-هما مشيوا ؟
-أيوة وأتاكدت بنفسي يلا .
-أنتَ ..أنتَ أقنعتهم ازاي ؟
-مش وقته يلا.
-طب هروح فين ؟
-ينفع نخرج ونبطل رغي بس ؟
-حاضر .
'خرجت من العيادة ،و وداني عند عربيته '
-واقفة ليه أركبي .
-أركب فين معلش ؟
-عربيتي .
-أنتَ بتستعبط ياكابتن ،أنتَ خلاص عملت اللي عليك وشكرًا جدًا ،لكن أركب معاك ليه إن شاء الله.
-الوقت متأخر مينفعش تمشي لوحدك يلا .
-يلا فين ياعم أنت ،هَـنيلا فيييين هااا.
-البيت
-أه اذا كان كدا ماشي يلا ،أنتَ أهبل ؟
-يابنتي لمي لسانك أنا دكتور !
-أنا أسفة ،أنتَ أهبل يادكتور .
-تمام خليكي واقفة كدا ،شوفي مين هيعبرك .
-تمام متشكرين ،يلا فِ رعاية الله .
'ركب العربية ومشي وأنا مقتنعة باللي عملته ،إيه دة ؟ دة صوت كلاب ؟ مش مقتنعة أوي على فكرة ،هاتوه تاني هااتوه ،مشيت وأنا بمد ،وأنا فعلا مش عارفه أعمل إيه أو أروح فين ،أنا معرفش حد غير عمي ،ومليش صحاب خالص ،أتخنقت وقعدت أعيط على الرصيف ،هفضل هنا أعمل إيه فِ الوقت دة '
-عامله فيها أسترونج وبتاع وأنتِ طعمية قومي قومي .
-أنا مينفعش أجي معاك .
-طب أسمعيني بس ،أنا ساكن مع والدتي وفيه شقة بتاعتنا برضو فِ العمارة اللي قدامنا يعني أنا هقعدك مع ماما وأنا هقعد فِ الشقة التانية .
-كلم مامتك طب كدا ؟
-مفيش ثقة ؟
- ثقة إيه أنا لسه عرفاك من تلت ساعات.
-مش هنخلص من لسانك ،أستني
'أتصل بمامته وفهمها وكلمتني '
-ها هتركبي فِ الليلة دي ولا لا .
-أنا أسفة بس مكنش ينفع أروح معاك غير لما أتأكد .
-أبتسم :ياستي عادي بس يلا نمشي .
-حاضر .
'ركبت معاه وفضلت ساكتة ،بس هو بيعمل معايا كدا ليه وميعرفنيش ،هو ليه صدقني ،يعني ممكن أكون بكدب مثلا !!'
-ينفع أسألك سؤال ؟
-أسألي .
-هو أنت بتعمل معايا كدا ليه ،يعني أفرض مثلا كنت بكدب ؟
-لحاجتين
أول حاجة :عشان أنا دكتور نفسي وبعرف أحلل الشخصية اللي قدامي كويس ،يعني عارف إن أنتِ مش بتكدبي وإنك صح .
تاني حاجة :إني أكيد مش هكون فِ مقدرتي إني أساعد حد ومساعدتش ،أنا مش كدا، وأنا قادر إني أساعدك!
-مفيش حد بالمثالية دي على فكرة .
-لا فيه كتير ممكن أنت مشوفتيش حد كدا بس لا دة فيه وكتير كمان.
-ممكن!
-أكيد،وصلنا .
-تمام .
"نزلت وطلعنا لقيت مامته منتظراني ،مكنتش عارفه أقول إيه ولا أعمل إيه لقيتها بتحضني ،بقالي شهرين شهرين بالظبط محدش طبطب عليا وحضني وقالي هتعدي ،محدش كان معايا ،محدش كان بياخد باله مني ،حضنتني وأنا عيطت ،عيطت كتير ومكنتش عارفه أسيطر على دموعي ،مش عارفه أسكت ،كانت بتقرأ قرأن وبتطبطب على ضهري "
-البقاء لله ياحبيبتي ،أستقوي بالله .
-ونعم بالله ياطنط .
-جعانة ؟
-لا تسلمي .
-لا مش عايزين كسوف من أولها ،اذا كان أنا وهموت من الجوع وواكل مرتين .
'نسيت أصلا إنه موجود '
-تمام جعانة .
-عدينا مرحلة الكسوف الحمد لله.
'كلنا وقومت ساعدت مامته فِ شيل الأكل ودخلتني أوضة ونمت ،نمت كتير أوي ،صحيت على خبط على الباب '
-مين .
-أنا ياحبيبتي أفتحي .
-حاضر.
-صباح الخير ياحبيبتي .
--صباح النور .
-يلا عشان تفطري .
-شكرًا بس أنا مش بعرف أكل أول ماأصحى.
-لا ازاي لازم تاكلي أهم حاجة الفطار .
-مش بعرف والله .
-تعالي بس .
'شدتني وخرجتني بره ،ولقيت زين قاعد وبياكل ،هو مش مستنينا ليه ،فين الاحترام ؟فين الذوق ؟ '
-يلا ياحبيتي أقعدي .
-حاضر .
'قعدت بقلب فِ الاكل ،مش بعرف أكل بس مش عايزة أكسر بخاطرها '
-كلي ياقلبي ،اغصبي على نفسك وكلي.
-حاضر .
"كلت ولاقيتني كنت جعانة فعلا ،غريبة أول مرة أفطر من بعد وفاة أهلي ! يمكن عشان أول مرة من بعد وفاة أهلي حد يلح عليا أصلا ؟ ساعتها عيوني دمعت ،انا مش قد فقدانهم ،أنا محتاجاهم ومش قادرة أكمل والله ،رفعت عيني لقيته مركز معايا وبيهز دماغه وبيبتسم ،أبتسمت ومسحت دموعي وكلت وشيلت معاها الأكل زي أمبارح وطلبت مني أعمل شاي ،وعملته وخرجت ليهم "
-أنتِ حاطة كام معلقة سكر؟
-تلاتة .
-بحبه معلقة واحدة .
-يع ! ازاي دة ؟
-كدا بحبه كدا.
-أبقى أعمله بقا أنتَ.
-هو أنتِ ازاي كدة ؟
-ازاي يعني ؟
-بتخبي حزنك ليه ؟
-هتستغل مهنتك كطبيب عليا ؟
-ممكن أستغل مهنتي كصديق مثلا !
-بسمع إن الصحاب بيسمعوا لصحابهم بس مجربتش .
-ملكيش صحاب خالص ؟
-لا ،أنا حياتي كانت مقتصرة على أهلي ،ولما ماتوا يعتبر مكنتش عايشة كنت بنفذ أوامر بس ،أعملي كذا ومتعمليش كذا ،ألبسي كدا ،طب نامي هنا انهاردة ،روقي هنا ،يعني كنت عايشة بعمل بلقمتي اللي مش باكلها يعتبر .
-عمك بيعمل كدا ليه ؟
-معرفش صدقني معرفش عارف يا... إيه دة هو أنتَ أسمك إيه صحيح ؟
-أبتسم :زين .
-عارف يازين أنا حتى بابا معندوش ورث وبيعملوا كدا عشانه ،عصرت دماغي بدور على سبب بيعملوا كدا بسببه ،بس ملقتش ،ملقتش خالص يازين ،إلا صحيح هو مشيوا ازاي أو عملت إيه ؟
-مفيش خليت الممرضة تدخل حد تاني وهما زعقوا شوية ومشيوا .
-والممرضة صدقت ازاي وانا مطلعتش قدامهم أصلا .
-عشان ...عشان ..اه انا
-قول الحقيقة شكلك باين.
-أنا طلعت ملقتهومش .
-كان بيجيبوا حاجة يعني ؟
-كانوا مشيوا ياهنا .
"عارفه إنهم مش بيحبوني ،وإنهم مش عايزيني ،بس يسبوني ويمشوا ؟ مفكروش هروح فين وهما متأكدين إني لوحدي مش هعرف أروح !لإني حتى معرفش الدكتور فين ؟ هما ازاي قلبهم قاسي كدا ،ازاي مفكروش فيا ؟"
-هنا .
-أجددلك الشاي وأعملهولك معلقة سكر واحدة؟
-متكتميش ،أتكلمي .
-طب أعمل قهوة؟
-هنااا.
-عايزة أنام ،هنا عايزة تنام ،معلش هدخل أنام بعد إذنك .
"أنا لما بزعل مش بلجأ لأي حاجة غير النوم ،بحسه بيسحبني وبيرحم عقلي من التفكير فِ حاجات مش لاقيه ليها رد ،صحيت بصيت على الساعة لقيتها 12 ،خرجت وقفت فِ البلكونة ،
-أخيرًا ،كل دة نوم .
-نمت كتير فعلا.
-يومك هيتشقلب ودة مش حلو.
-لا عادي هنام تاني .
-معقولة؟
-اه.
-حاسه بإيه ؟
-عايزة أفضل نايمة على طول .
-هروب .
-مش قادرة أواجهه والله كل اللي بيحصل كتير عليا أنا مش كبيرة للمشاكل دي .
-لو مش قدها ربنا مكنش إبتلاكي بيها.
-تفتكر قدها.
-أفتكر إنك قدها .
-أنتَ ازاي واثق كدة ! أنت متعرفنيش عشان تثق اني هقدر أتخطى الفترة دي .
-من معاملتي معاكِ عرفت إنك شخصية عنيدة ،ولو حطيتي فكرة إنك تقاومي وتعيشي هتعملي كدا ،ودة اللي حللته من شخصيتك متنسيش إني دكتور .
-ينفع تبطل تتعامل معايا كدكتور ؟أنتَ مش قولت هعاملك كصديق ؟
-ينفع أوي .
- أنا فكرت إني هنزل أشتغل وأجر بيت عشان مينفعش أقعد هنا كتير ،أنا بجد بشكرك من كل قلبي انك ساعدتني .
-ياريت متفكريش تاني ،احنا ممكن نلغي المخ أصلا .
-مينفعش صدقني أنا لغبطت كل حياتك ونومتك أنتَ مش مضطر تعمل كدا.
-ياستي هو انا نايم فِ الشارع ؟ مانا قاعد فِ البيت اهو ومبسوط .
-طب ومامتك ليه متقعدش معاها .
-هي حبيتك جدا وحابه كدا متشليش هم ،يلا ادخلي نامي عشان ماما هتصحيكي عشان تفطري ،تصبحي على خير .
-وأنتَ من أهله.
"دخلت الأوضة ،هو ممكن يكون حد بالمثالية دي ؟يشقلب حياته عشان واحدة ميعرفهاش أصلا! القريب رماني والغريب أستقبلني بكل حب معقول دة ! لو حد قال كدا فِ الاول مكننش أصدقه ،ازاي القريب يرمي لحمه كدا دة مش طبيعي ومستحيل والله "
-صباح الخير ياباشا .
-صباح النور .
-زين هما ماجوش سألوا عليا خالص عندك؟
'سألته وانا عارفه إنه أكيد محدش سأل ،يسألوا ازاي وهما سايبني أصلا ،بس كان عندي أمل '
-لا ودة طبيعي هيسألوا عندي ليه أصلا،أنتِ عايزاهم يسألوا ؟
-مش عارفه.
-وضحي أكتر .
-عايزاهم يسألوا عشان أعرف إني غالية وهما بيحبوني ،ومش عايزاهم عشان مش هقدر أعيش معاهم تاني .
-يبقى أحسن ليكِ إنهم ميسألوش .
-مش فارقة، المهم عايزة أنزل أدور على شغل.
-يالهوي هو أنتِ كل لما تكوني فاضية تفكري فِ الشغل يابنتي ؟
-أفهم بس أنا فعلا بزهق وطول مانا قاعدة بفكر وانا مش قادرة أفكر لأني مش بوصل لحاجة ،عايزة حاجة تشغلني ،توقف تفكيري شوية .
-حاضر يا هنا ،أنتِ خريجة إيه ؟
-هندسة .
-كويس جدًا هوديكي عند زميلي هو عنده شركة وخريج هندسة برضو يعني هتشتغلي فِ مجالك ،وهكون مطمن عليكِ .
-ينفع نروح دلوقتي كدا كدا الساعة تمانية ؟
-تمام قومي ألبسي بس متتأخريش.
-أعتبرني خلصت .
'مشيت خطوة وبعدين رجعت'
-شكرًا يازين بجد شكرًا .
-أبتسم وأتكلم :العفو ياستي أنا معملتش حاجة ويلا ألبسي عشان ننجز هتأخريني .
'لبست وخرجت'
-يلا؟
-يلا.
"روحنا الشركة وروحنا لصاحبه ورحب بيا جدا ،وهشتغل تحت إيد واحد عشان يدربني الأول لإني مش فاهمة هعمل إيه ،يوم مرهق لأبعد الحدود ،بس أحسن من قاعدتي ،أنا محتاجة فلوس عشان أجيب هدوم ليا ،ويكون معايا أنا فلوس ،والحل الوحيد هو الشغل ومفيش أحسن من شغلي ،شركة كويسة ومدير محترم ،هحتاج إيه تاني !"
-خلصتي ؟
-تعبت نفسك وجيت ليه ؟
-هتروحي ازاي ياذكية هو أنتِ تعرفي البيت ؟وبعدين أكيد مش هسيبك تروحي لوحدك يعني ،ولسه هنروح مشوار مع بعض .
-مشوار إيه؟
-تعالي هتعرفي .
"ركبت معاه وكنت مركزة على الطريق ،بتفرج علي الناس ،ناس بتضحك وناس حزينة ،كل واحد فينا جواه حكاية والحكاية دي ممكن تكون سعيدة أو حزينة ،بناءًا على الحكاية دي طريقك بيتحدد ،واحد فاقد الأمل فِ كل شيء ،هيفضل واقف طول عمره فِ نفس المكان ومش هيتحرك ،واحد عنده طموح لحاجة هيفضل يعافر يعافر لحد مايوصلها ،كل الحكاية إن عشان تحقق اللي أنتَ عاوزه لازم يكون عندك دافع ،دافع بيحركك عشان توصل ،ومتفضلش واقف حاول مرة واتنين ،حتى لو محققتش حاجة بس مش هتندم ،أحسن ماتفضل واقف مكانك ومش بتتقدم ،هيجي وقت تندم إنك محاولتش ،محاولتك فِ حد ذاتها إنتصار ليك ،نقاوم شوية الظروف وربنا أكيد هيكون رحيم بينا ومدينا مع الإبتلاء صبر "
'فوقت على صوته وبيقول وصلنا ،فَنزلت '
-إيه دة ؟
-تعالي بس .
-جايبني هنا ليه يابني ؟
-هجيب هدوم وعايز رأيك فيها يلا متنحيش .
-يلا .
'دخلنا بس طريقه للبس الحريمي ،فَفهمت '
-يلا يازين ،يلا يابابا أنا مش هجيب حاجة .
-لا هتجيبي ،يلا أسمعي الكلام.
-مش هينفع صدقني وانا كدا كدا هجيب لما أقبض .
-لسه بعد شهر ،أنتِ أول يوم ياماما ،بصي نعمل ديل .
-إيه ؟
-أجيبلك ولما تقبضي تديهوملي .
-هتاخدهم؟
-هاخدهم .
-تمام .
-يالهوي أخيرًا يلا يابنتي.
"المفروض نجيب هدوم ليا وكدا بس اليوم أتقلب بعد الهدوم لغدىٰ ،وأتمشينا فِ المول ولفيناه يجي خمس مرات كدا ،هو جميل أوي ،أنا فِ حياتي ماشوفتش حد بالجمال دة ،خليط بين الطيبة والحنان والذوق وكل حاجة حلوة"
"روحنا وكل واحد أتقلب نوم من التعب وعندنا شغل بكرا كمان فنمنا ،نمت لأول مرة من فترة كبيرة وأنا مبسوطة ، الدنيا بقت مليانة ورد وصوت العصافير أقتحم أحلامي ،هتتعدل ؟هو ممكن وجودك شخص يكفيك ؟يخليك مش عايز حاجة تاني خلاص! "
"شهر عدىٰ شهر واحنا كل يوم ننزل نروح الشغل سوىٰ ويعدي عليا ياخدني ،بقا بيشاركني كل حاجة ،وأنا جربت احساس إن حد يسمعني ،حد يداوي حزني ويبدله بفرح ،حياتي أتغيرت 180 درجة ،بقت ألطف بوجوده ،بقت أجمل بكونه موجود "
روحنا ووصلنا الشركة ،وانهاردة القبض ،روحت وانا سعيدة هاخد مقابل تعبي الأيام اللي فاتت ،خدت القبض كنت سعيدة جدا بيه ،أول مرة أمسك فلوس تكون بتاعتي أنا ،أنا اللي جيباها ،ثمرة تعبي أنا ،اليوم خلص بسرعة ولقيته جيه "
-يلا؟
-يلا أوي بس هنروح وسط البلد .
-أشمعنا يعني عايزة حاجة ؟
-عايزة أتمشى هناك .
-تمام يلا بينا .
'روحنا وسط البلد وركن العربية ونزلنا نتمشي '
-لو حد قالي إن حياتي هتتعدل كدا مكنتش هصدق،ودة بفضلك من بعد ربنا ،أنا بجد مهما شكرتك مش هوفي حاجة بس أنا ممنونة للظروف اللي جمعتني بيك .
-ربنا لما بيحطنا فِ أختبار فَ أكيد بيكون نهايته خير وعوض ،عودي نفسك كدا ،طول ما أنتِ فِ وقت صعب أفتكري إن عوضك عندنا ربنا هيكون كبير وأوي كمان ،عشان ينسيكي كل الحزن اللي فِ قلبك ويبدله لفرح.
-ربنا يخليك ليا يا زين وتفضل تسمعني كدا على طول .
-أنا معاكِ دايما ياهنا .
-تعالى أعزمك على أيس كريم تعالى .
-يلا .
-اه صح ،أمسك الفلوس أهي بتاعه الهدوم .
-يالهوي ،يابنتي بس بقا بس ،هو عشان بقا معاكِ فلوس هتصرفيها كلها ،أفرضي عوزتي حاجة فِ الشهر دة هتعملي إيه .
-مش هعوز حاجة أنا ،أمسك الفلوس يازين .
-طب بصي خليها معاكِ ولما تقبضي تاني الشهر الجاي بإذن الله هاتيهم ،عشان يكون معاكِ فلوس .
-أنتَ كل مرة بحجة شكل ،أمسك يازين يلا.
-عايز أيس كريم بالفراولة .
-متوهش أنجز.
-وعليه شيكولاتة .
-زين !!!
-إيه مينفعش الأتنين على بعض ؟
-حسبي الله بجد ،الشهر الجاي هتاخدهم على فكرة ومش هسيبك .
-مش عايزك تسبيني أصلا.
-إيه ؟!!
-إيه .
-أنت قولت إيه ؟
-الأيس كريم ياهنا ،أنتِ هتزلينا ولا إيه .
"قضينا يوم جميل زي باقي أيامي معاه ،أنا وقعت بجد بقا ،والله حقي فِ حد يشوف الجمال دة والعيون الرُمادي دي وميوقعش ؟أكيد لا مش ذنبي أنا بقا "
-هنا أنا الأسبوع دة هبات فِ الشغل .
-هتبات فِ الشغل ليه ؟
-عندي ضغط شغل بدل ما أروح متأخر وانزل بدري فَهبات هناك أفضل وكدا كدا هما أسبوع بس ،مش هوصيكي على ماما.
-فِ عيوني يازين فِ عيوني .
-يلا هقوم بقا .
-فِ رعاية الله.
"لو قولت إن الأسبوع دول من أرخم الأيام اللي مرت عليا مش هكون ببالغ صح؟ أتعودت عليه ؟ عيونه وحشتني ،كلامه اللي بيرحني واحشني ،أنا عايزاه يجي تاني وهعمله الشاي معلقة واحدة زي ماهو عايز ،هو جاي إنهاردة ،هملي عيوني منه أنا قلبي وعيوني مشتاقين ليه ،أنا بحبه "
-خليكِ ياطنط أنا هفتح .
'عارفين الجري ؟أنا كنت بجري عشان أفتح '
-هنا .
-حمدلله على السلامة .
-هما أسبوع ،هو أنا كنت مسافر .
-أدخل يازين أنا غلطانة أدخل .
-ست الكل .
-نن عيونها ،عامل إيه ياحبيبي .
-زي الفل ياحبيبتي .
-هقوم أحضرلك الأكل ،تلاقيك جعان .
-ماشي ياحبيبتي .
-هتفضلي واقفة كتير ياختي ماتقعدي.
-أديني قعدت .
-تعرفي إني أكتشفت أكتشاف ف الاسبوع دة.
-أشجيني .
-إنك كنت وحشاني طول الوقت ،وبجد يومي كان ناقص كوباية الشاي اللي بتتعمدي تعمليها تلت معالق ،واقفة البلكونة اللي كنت بقف فيها لوحدي دلوقتي بقيتي تشاركيني فيها ،واحشني كل حاجة كنا بنعملها سوىٰ ،وأكتشفت إن قلبي حبك وبيطلب من قلبك كمان يحبه .
"كلامه كان بيمر على قلبي قبل ودني ،ضربات قلبي المسموعة موضحة ردي هيكون إيه ،فِ حد يرفض النعمة دي بالله ؟"
-قلبي بيحب قلبك يازين والله بيحبه .
"أتجوزنا أنا وهو ومعملتش فرح عشان أهلي بس كل حاجة كانت جميلة كفاية وجوده فيها ،مكنتش مصدقة إن ربنا هيعوضني كدا ! دة العوض طلع حلو أوي بجد،إنهاردة 11/2 اليوم اللي جيت طلبت مساعدته فيه ،اليوم اللي حياتي بقت أجمل وألطف بسببه هو "
-ألو .
-إيه ياحبيبي .
-ماتنزل كدا الأوضة بتاعتك.
-اللي فِ العيادة؟
-أيوة .
-أشمعنا؟
-أنزل بس.
'دقيقة وكان عندي ومعالم وشه كلها أستغراب'
-جيتي ازاي هنا من غير ما أشوفك؟
-كل الدعم لمريم دخلتني لما كنت بتتوضى.
-اممم ياترى إيه المناسبة .
-إنهاردة من سنة جيت هنا وأنا شايفة كل حاجة بتتهد قدام عيوني ،بخسر كل حاجة ،كنت خسرت أهلي وكانت حياتي مملة ومفيهاش أي نور ،شوفت حد بعيون رمادي بتدوب كدا وطلبت منه مساعدة وساعدني وبدأ ينتشلني من الحزن ويحوله لفرح على طول ،وقف جنبي أكتر من أي حد ،إنهاردة من سنة عيوني لمحت عيونك وبعديها قلبي حب قلبك ،فملقتش أحسن من المكان دة أقولك قد إيه أنا بحبك .
-أنا عايزة أروح أشكر عمك إنه جابك عندي والله .
-تشرب شاي ؟
-تلت معالق سكر ؟
-تلت معالق سكر.
تعليقات
إرسال تعليق