" للأسف حالتك متأخره... بس فيه نسبة امل"
" وانا مؤمنه بالنسبة دي"
انا غاليه آخر سنه ليا ف تجاره.... كان دايماً بيجيلي صداع غريب لحد ما قولت انا هروح اكشف هخاف من ايه يعني انا لسه شابه
انا : السلام عليكم... صباح الخير
الدكتور : و عليكم السلام... صباح النور
- ايه اللي بتشتكي منه؟
قولتله الأعراض اللي بتجيلي... اللي قلقني شويه هي تعبيرات وشه
انا : خير يا دكتور؟!
الدكتور : خير ان شاء الله
- دي تحاليل و اشاعات هتعمليها عشان نطمن عليكي
- تمام شكراً لحضرتك
خرجت و انا قلقانه بس انا املي ف ربنا ملوش حدود أن شاء الله كله خير مهما كان!
روحت عملت التحاليل و الإشاعات اللي طلبها و عديت على اخويا سليم هو و مراته هدى و عندهم ابن اسمه ياسين بموت فيه ( متخافوش انا مش عمتو الحربايه) .... بالمناسبة انا و سليم ملناش حد غير بعض بعد وفاة والدتي و للأسف والدي منعرفش عنه حاجة لأنه كان منفصل عن ماما الله يرحمها
ياسين فتحلي الباب و نط عليا اتشعلق ف رقابتي ما هو أصله متعلق بيا حبتين
- يا يسو فين بابي؟
- لسه ف السغل
- يا لهوي على السغل و جمال الكلمه منك!
هدى : وحشتيني يا غاليه جداً
انا : انتي اكتر بكتير
هدى : بقى كده تعقدي كل ده و متجيش!
انا : حقيقي اسفه بس عارفه ان الامتحانات قربت ف بذاكر و كده و اهو اديني جيت هتغديني ايه بقى؟!
هدى : يا ترى يا يسو عمتو ايه اكتر أكله بتحبها؟!
انا : بتهزري اوعي تكون اللي ف بالي
هدى : ايون يا حبيبتي هي بعينها
انا : الله هتاكليني كابوريه كان نفسي فيها اوي
هدى : عارفه... عدي الجمايل بقى
انا : عداهم يا دودو هههه
هدى بدأت تحضر الغدا و انا دخلت أنيم يسو أصله بيحب ينام ف حضني وانا بحكيله قصه من تأليفي عشان بيزهق من القصص التقليدية اوي... الولد صاحب مزاج يا جماعه برضو مش اي كلام يعني
انا : دودو
هدى : ايه يا حبي
و ابتديت احكلها على يومي و على الدكتور و على كل حاجه بتعامل معاها اكانها اختي ما انا ماليش غيرها هي و يسو و سليم
هدى بقلق : كله خير يا غاليه كله خير ان شاء الله
انا : أن شاء الله
قطع كلامنا صوت سليم و هو بينادي عليا عشان وحشته
سليم : وحشتيني يا بنت امي و ابويا
انا : وانت اوي والله
- اخبارك ايه يا حبيبي
سليم : بخير طول ما انتوا بخير يا حبيبتي
هدى بهزار : طب وانا ايه موحشتكش؟!
سليم و هو بيضحك : الا انت يا جميل ده انتي وحشاني دايماً
انا بهزار : كم انتم اوڤررر
ضحكنا كلنا و اتغدينا و اليوم كان حلو صمموا يخلوني ابات بس رفضت لأن كان جالي رساله أن الاشاعه و تحاليل طلعوا خلاص ف لازم اوديهم للدكتور
انا : ازيك يا دكتور اتفضل جبت التحاليل و الاشاعه لحضرتك أهم
الدكتور : بخير يا نور... تمام اتفضلي اقعدي
بصيت ب استغراب بس انا اسمي غاليه مش نور و مكتوب ف الكشف عنده.... يلا عادي اكيد اتلغبط
لاقيته بصلي بحزن بعد ما شاف الحاجه اللي كام طالبها
- يؤسفني اني اقولك كده!!... ب... بس لازم تعرفي!
- خييير!!!
- للأسف عندك ورم ف المخ
محستش لا بيه ولا ب نفسي جملته اتعادت ف دماغي و بعديها ب كل قوة و ثقه ف ربنا ان اكيد اكيد فيه امل
- للأسف حالتك متأخره ... بس فيه نسبة امل
- وانا مؤمنه بالنسبة دي
- حقيقي يا نور انتي اول واحده تكون ردة فعلها هاديه كده!... انتي بخير؟!!
- اه بخير الحمد لله
اتفقنا هنبتدي علاج امتى عشان نحجمه بعدين نشيله بس انا خلاص انا فاضلي اسبوع و امتحن عشان اتخرج و اخلص من هم الدراسة... ف قررت أن يوم حفلة التخرج هطلع على المستشفى عشان ابتدي علاجي و بعدين اعمل العمليه
مش هنكر اني كنت زعلانه لا ده مقهوره كمان بس اللي شوفته فحياتي كان أصعب من كده وانا عديت كل اللي فات عادي و لسه اهو مكمله و واقفه على رجلي... مش هسمح لأي حاجة انها توقعني
الدكتور : نوووور سرحتي فين؟!
انا : معاااك... طيب عن اذنك
وقفت عند باب الاوضه و قولتله بالمناسبة انا اسمي غاليه مش نور! و مشيت و سيبته
كلمت هدى و سليم هحكتلهم كل حاجه استغربوا برضو من هدوءي و ثباتي
صحيت تاني يوم على رقم غريب
- الو...مين؟!
- انا دكتور أسر
- وجبت رقمي منين؟!!
- ما ده الرقم اللي انتي هحجزتي بيه و على حظك كنتي اول واحده تحجزي اليوم ده ف كان سهل اني اجيبه
- اااه.... و تجيبه ليه مش فاهمه
- هو انتي دبش كده على طول؟!
- متأسفه بس حقيقي مش فاهمه حضرتك! بتكلمني ليه ؟!
- وحشتيني يا نور ( قالها بهمس)
بس خلاص كنت سمعتها
- بتقول ايه مش سامعه؟!
- بقول لحضرتك انك تتعودي على مكلماتي
- افندم!! و ده ليه ده أن شاء الله؟!!
- لازم نبقى صحاب لغاية ما ربنا يتم شافكي على خير
- أن شاء الله... سلام
- سلام يا نور
- ثانيه
- اؤمري
- هو ايه حوار نور ده؟!! انا ليا اسمي
و قفلت ف وشه السكه
خلصت امتحاناتي على خير و سيلم و هدى كانوا جانبي لحظه ب لحظه و طبعاً اللي مهون عليا حياتي و هو الدافع الأساسي لقوتي يسو حبيب قلبي
عدى اسبوع و النتيجه ظهرت و اتخرجت على خير... و جه اليوم اللي هبتدي فيه علاجي و طبعاً اسر اللي لحد انهارده بيكلمني كل يوم مكالمه لا تقل عن ساعه .... بقينا صحاب اوي ف أقل من شهر!
بعد مرور 3 اسابيع بقينا صحاب اكتر من الاول بكتير.... و الحمد لله العلاج حجم الورم و هعمل العمليه خلاص بعد يومين..... بعد يومين مش هشوف اسر اللي اتعودت عليه خلاص!!... يا ترى هيفضل صاحبي؟!
جه معاد العمليه و سليم منهار من العياط ( خايف عليا) و هدى نفسيتها وحشه زعلانه عشاني وانا داخله اوضة العمليات بابتسامه و بردد كلمة " الحمدلله"
دخلت اوضة العمليات وانا مستنيه دكتور التخدير...
أسر : نور!
انا : نعم
أسر : بحبك!
انا : مهو باين عشان كده مش بتقولي غاليه و بتقولي نور!! صح؟!
أسر : اول ما تفوقي و تقومي بالسلامه هقولك سبب التسميه يا نووور و قالها بضحكه جننتني كانت حلوه ذيه
دكتور التخدير جه و خلاص بدأوا العمليه
فوقت وانا على سرير ف اوضه و سليم و هدى و أسر حواليا و يسو نايم بهدوء جنبي
سليم : حمدالله على سلامتك يا بطل
هدى : حبيبتي الحمدلله انك بخير
أسر : حمدالله على سلامتك يا خطيبتي.... انا خلاص خطبتك من سيلم و هو وافق
يسو بزعل : لا إلا عمتو اخطب ماما لكن عمتو لأ
ضحكنا كلنا و لقيت أسر جه أعد على الكرسي اللي جنبي و قالي عارفه ليه بقولك نور
انا بفضول : ليه!
أسر : من يوم ما شوفتك وانتي مليتي يومي نور... دخلتي ب طاقتك الإيجابية وزعتيها ف كل مكان ف العياده ولا ابتسامتك اللي زي النور فعلاً جننتني! و دلوقتي انا اتاكدت انك تستهلي اللقب ده يا حبيبتي
انا : اشمعنا؟!
أسر : عشان فعلاً انتي مليانه امل و ب أملك خليتي حياتك و حياة اللي حواليكي كلها نور... تتجوزيني يا نور؟!
انا : ما سليم وافق على الخطوبه عايز ايه تاني
أسر : عايزك ليا
انا : موافقه
يسو اتحشر ف كلامنا و قال : انا بقى مش موافق!
تعليقات
إرسال تعليق