خاطرة بعنوان "عيناها اللامعتان" بقلم المبدعه «أسماء عطيه » |تورنيد مصر

تعرفى الجو دا محتاج ايه يا خالتو ؟؟

-اغرفلك شوربة عدس يا قلب خالتك.. ؟

لا.. لا محتاح حضن.. ومش اى حضن ، دا حضن ابيه احمد ..

-اما قليلة ربايه صحيح نفسى اعرف ابوكى وامك كانوا فييين وانتى بتتربى 

ضحكت وانا بغمزلها ..خالتو يحلوه يحتت سكره ..

بصتلى ورفعت حاجبها فكملت.. خلقك ضيق قيسينه بمسطره ..

فردت هجوزهولك ..

ابتسمت وانا بحضنها لكن دمك خفيف والضحكه منوره ..بجد هتجوزهولى ؟

.. يحول الله يارب البنات جرالها ايه طب مكنتى جيبتى ابوكى وامك وطلبتوا ايده

ضحكت يخالتو بقا انا بحب ابنك بس هو حلوف لا يبالى بيعاملنى كأنى طفله معن فرق السن بينا مش كبير يعنى دا اهما ٨ سنين

وبعدين انا ال شكلى صغير عشان كدا شيفنى صغيره وهو طول بعرض بارتفاع بحلاوه بدقن وشياكه بصيت لخالتو وسكت

فضحكت ..و٨ سنين دول مبيتولدش فيهم اجيال؟

.. طب ما اجوزك مصطفى اهو قدك ..

قدى!! ..احنا هنعيل ولا اى وبعدين مصطفى اى يخالتو دانا دايره اشقطله ف البنات انا عايزه احمد التقيل الراسى دا..

ضحكت طب والله لاجوزهولك يابت ياليلى

ابتسمت انا واثقه ..

..عدى شهر على جوزانا وهو لطخ طور بيهيم ..واى يعنى عنده 28 سنه وانا لسه هكمل 20

رايح فين يا .. احمد

رجع ورا شويه قولتى اى !

قولتلك رايح فين ي.. وقولت اسمه بمياصه" احمد "

ضحك صدقى طالع حلو منك قولى احمد تانى كدا

وقفت قدامه وانا بعمل نفسى بعدله لياقة القميص

وقولت .. احمد

..تانى كدا

قربت منه شويه كمان.. احمد..

..طب الكلام دا فى شقتكوا مش ع الملأ كدا

بصيت لمصطفى بقرف والله لاوريك

احمد شال ايدى من على رقبته انا رايح اقابل واحد صاحبى ومش هتأخر

ابتسمت ماشى ..

قرب منى شويه قولتى اسمى اى ؟

رديت بدلع احمد ..

ضحك طب انا ماشى

عايزه اجبلك حاجه ؟

سلامتك ي ..احمد

ضحك وطلع وقفل الباب

ضحكت جامد وانا ببص لمصطفى

فضحك وهو بيرفعلى ايده كفك ...

روحت قعدت جمبه ع الكنبه

فاتكلم ...دا كله عشان قولتيله يا احمد من غير "ابيه" اومال لو قولتيله هات حضن هيعمل ايه ؟!!

ضحكت اسكت اسكت اخوك دا دبش اصلا مفكرنى عيله مش مراته ولا حاجه 

بصى هو شايف انه كبير عليكى وبيحاول يتهرب من نفسه عشان ميثبتش عكس كدا

.. طب اى ..

هنشوق ولا ندوق ولا اى

ضحكت وانا بغمزله هنشوق ولا ندوق يوااد...

فلتصحبكى السلامات يفتاه..

بعد فتره

.. قعدنا انا ومصطفى نتفرج ع التلفزيون واحنا عمالين نضحك

...اصبر يااد هيعترفلها بالحب دلوقت 

فرد لا حاجه هتقاطعم ومش هيعرف يعترف ..

على دخلت احمد من الباب وانا بقول لمصطفى اهو اعترف وحضنهاااا

مصطفى ضحك منتى متابعه بقاا 

لقيت ال بيقفل التلفزيون وواقفلنا قدامه

هو فى اى ..!!

بصتله يييييه يا ابييه قفلته ليه عايزه اكمل المشهد 

هو اى مشهد ايه وحضنها ايه المسخره دى .. !!!

فرد مصطفى خلاص يا ليلو هدى من روعك شويه ابقى اسمعيها ع اليوتيوب

لقيته جاى يشدنى هى اى ال تسمعها ع اليوتيوب ..اى قلة الأدب دى ..

رد مصطفى الشيخ احمد حضر انا هتكل على الله انام انا بقا ..

..خد يلا ... فجه عنده ينعم

بطل تفرج البت ع المسلسلات التركيه دى

بصله ببراءه انا !!

دا هى ال مفرجانى دى هى ال مخلياتى اتابع معاها

بصيتله بقرف بتعترف من اول قلم ياندل ..فغمزلى ومشى

اتفو عليك يا جدع اتفووو

..بصيلى انا هنا

بصتله ببراءه نعم

وكملت ..تعالى نطلع ي.. احمد

ابتسم نص ابتسامه طب هشوف امى واجى

ماشى ي.. احمد

ضحكت وهو داخل لخالتو يعن هى احمد ال بتثبتك كدا طب والله لوريك ي.. احمد ..

طلع واانا واقفه مستنياه

شوفتها ي..احمد

اه شوفتها يلا نطلع

انكجت ف دراعه واحنا طالعين ع السلم

فبصلى بنص عين كدا .. ابتسمت وانا بحضن دراعه مالك ي.. احمد

لا مفيش يا ليلى مفيش حاجه

دخلنا الشقه اعملك حاجه ي ..احمد وابتسمت وانا بقرب منه وبحط ايدى ع القميص

شال ايدى ..ليلى!!

بصتله ببراءه نعم

خبطنى على دماغى براحه ادخلى نامى

بصتله بقرف طيب..

دخلت الاوضه .. كلمت مصطفى

اتمايصتى عليه؟؟

اه قالى ادخلى نامى

ضحك روحيله الاوضه التانيه ..

حاسه انى كرامتى طايره كدا انت مخدتش بالك منها ؟...

ضحك مش عايزاه يعترف انه بيحبك 

ااه 

يبقى تسمعى الكلام

قفلت معاه وقومت لبست بجامه وسيبت شعرى وروحت الاوضه بصيت من طرف الباب ..

كان نايم على السرير

بصيتله يلهوى حد حلو كدا وهو نايم دا يتحط ف سندوتش ويتاكل دا ولا يتعمل فيه اى

دخلت براحه اتسحب وقعدت جمبه ع السرير

مشيت ايدى على شعره براحه .. ونزلت بإيدى على وشه لقيت ال بيمسك ايدى فجأه ...ليلى!!!!

اتخضيت واتعدلت

فبصلى اى دا واى ال حطاه على شفايفك دا

رديت ..دا ..روج

وبتعملى اى هنا !

قربت منه شويه جيت اشوفك نايم ولا صاحى

ولقيتينى اى!

لقيتك نايم ..

فقولتى تستغلى الفرصه صح !

زعقت وانا بشد ايدى منه فرصة اى ال استغلها مش انت ال قولتلى اتعامل معاك قدامهم كأى اتنين متجوزين عادى عشان

خالتو متقولش حاجه ولا تزعل ولا هى ولا ماما وبابا..

..رفعلى حاجبه بتركيز قدامهم ..قدامهم ياليلى بس

غير كدا انا ابيه احمد وانتى ليلى بس ..

قومت من جمبه ماشى يا ابيه احمد

شدنى من ايدى لا خليها احمد بقا ...

بصتله بعند ..لا انت ابيه وقدامهم بس ال هتبقى.. ووقولت بدلع .. احمد

شد شعره جامد اطلعى ياليلى اطلعى

.. الصبح روحت صحيته ..بالذمه دا يتقاله ي ابيه !! دانا ال ابيه بالنسباله ...

..شعره منحكش ونازل عليه عينه كنت لسه همد ايدى ارجعه لوراا

صحى فجأه ليلى !!

ابتسمت قوم يلا يا ابيه عشان تنزل تفطر وتروح الشغل ..

طيب روحى هغير وانزل وراكى

بصتله بقرف وقولت ف سرى دا بدل ميقولى ساعدينى ..

بصلى بجمود اطلعى يلا.. ياليلى

خد بالك عليا دى مش معامله تعاملنى .بيها علفكره

ضحك جامد فسرحت فيه...

سمعت صوته بيزعق ليلى ...

هه نعم 

اطلعى عايز اغير..

بصتله بقرف وطلعت..

نزلت تحت قعدت مع مصطفى

ها عملتى اى قالك حاجه احكى 

لا يا اخويا دى اسرار بيوت احكيلك عن جوزى ليه ..

طيب غورى انتى وجوزك ومتقوليلش على حاجه تانيه وقلد صوتى بتريقه .. مصطفى اخوك مش معبرنى يمصطفى ..مصطفى 

انت متخيل انا ال قولت لخالتو عايزه اتجوزه .. مصطفى هو هيحبنى امتى نينيي

 اسكت بلاعة مجارى وبتتفتح يجدع .. بص انا عملت زى منت قولت وهو قالى اطلعى عايز انام

 طب اقعدى وهنغير الخطه بعدين..

...

خالتووو مصطفى رانن وبيقول ان سلمى بتولد وهو راحلها المستشفى ويلا نروح

..طيب طيب يلا ..طلعت باللبس ال كنت لبساه فوقه عبايه لف

رنينا على احمد واحنا ف السكه وعرفناه

 وصل وجه جرى علينا

سألنى طلعت ..

رديت وانا متوتره لسه جواا ..

بصلى من تحت لفوق وكأنه لسه واخد باله منى

اى ال انتى لبساه دا .. بصيت للعبايه المفتوحه ال لبساها وتحتها بجامه

فقفلتها بسرعه مخدتش بالى انها اتفتحت

برقلى طب واما ازعلك دلوقت..

جات خالتو شدتنى هو دا وقت زعيقك ليها انت كمان يا احمد

.. سلمى طلعت ودخلنالها و.. روحنا عندها البيت ..خالتو كانت بتبات معاها

واحنا بنروح ..

كنت قاعده انا ومصطفى بنهزر كالعاده وبنلعب كوتشينه

انت بتغشنييي مخبى ورقة الولد ف كُمك

ضحك قفشتينى

كان احمد جاى من الشغل

اول مشافنا وقف يبصلنا وزعق هو فى اى

قام مصطفى اى يا احمد

هو اى ال اييي وانت قاعد معاها هنا لوحدكوا ليه طالما امك مش هنا ..

بصناله باستغراب

ورديت ف اى يا ابيه دا مصطفى زى اخويا

مش كل مهقولكوا كلمه تقوليلى زى اخوكى دى

يلا اتنيلى اطلعى قدامى

مصطفى بصله وهو داخل دانت غريب ياخى

.. طلعت معاه فوق وانا بزعق هو فى اى يا ابيه زعلت مصطفى..

...ونبى وانتى همك مصطفى قوى

ايوا ميهمنيش ليه يعنى!

طب متصدعنيش بقا متقعديش معاه وخلاص الكلام خلص ..

بصتله بخبث وانا بقرب منه بهدوء انت بتغير عليا ي .. احمد

رد..بغير!!اى بغير دى وهغير لى ومن مين اصلا

حطيت ايدى الاتنين حولين رقبته من مصطفى مثلا بتغير عليا منه ...

زق ايدى لا مبتنيلش وهغير عليكى لي اصلا .. انا داخل انام .. وابقى اجهزى من الصبح وانا ماشى عشان هوديكى عند سلمى

تفضلى هناك ..لحد ما اجى مش الشغل ..

_بكرا كدا كدا السبوع وهنروح ... وانا ومصطفى هنروح العصر اما نيجى من الكليه .. لأنى عندى بكراا

زعق هو اي مصطفى مصطفى مصطفى هو ايييه !! 

بصتله ببراءه ايه؟

شد شعره جاامد مفيش مرواح كليه معاه ..

مهو معايا ف نفس الكليه مروحش معاه لى

عشان انا قولت كدا واعتقد انى حذرتك ياليلى! عشان متشوفيش وشى التانى ودخل وسابنى

روحت الاوضه كلمت مصطفى 

-فى ايه انا سامع صوته لحد هنا

ضحكت شكله غيران منك ..

ضحك اهو بدء يتحرك

اعترف انه غيران ؟..

لا قالى انا اغير عليكى !! وشوح بإيده وعملى كدا

ضحك سيبك منه هتروحى الكليه بكرا امتى

نطنش اول محاضره نروح ع التانيه ع ميكون راح الشغل عشان نروح سوا ..

ضحك ماشى .. يلا سلام

..تانى يوم احمد مشى راح شغله وانا ومصطفى روحنا الكليه واما خلصنا روحنا عند سلمى مع بعض

وجه هو بليل عندها واحنا كنا بنجهز حاجات السبوع

.. يلا يا بت يسلمى قومى شيلناها ابنها وشغلنا اغنية السبوع وكان اخوات جوزها وكل البنات والكل هناك

سلمى وقفت ف النص واحنا بنلف حوليهااا

وغنينااا يارب ياا ربنا تكبر وتبقى قدنا ..ومصطفى كان عمال يلف قدامى الوحيد ف وسط البنات بيلف معانا وهو مبسوط

وبيضحك اوى انما الكِشرى ال انا متجوزاه قاعد يراقبنا بصمت .. واحنا عمالين نغنى حلقاته برجلاته ان شالله يعيش ان شالله يعيش، يكبر يكبر وسط اخواته ..

سلمى كفايه يعيال انا تعبت

خدت آسر منها ووقفت ف النص روحى اقعدى انتى بقا اشتغلوا يعيال يلا

ضحكو واحنا بنغنى اصغر واحد ف العيله رشو الملح عليه وارقوه

بصيت لاحمد وهو بيبصلى بابتسامه

ديرت وشى بسرعه وانا شيله آسر وعمالين نضحك ..حلقاته برجلاته يوم ورا يوم يبقى بشنبات ..يتجوز على قد حالاته

ويخلف صبيان وبنات ...

وكلهم صقفوا ومصطفى بيطفى الاغنيه وبياخد آسر منى هاتى الواد دا تعالى نشغل اغنيه احلى بقا

اداه لسلمى وجه شغلنا اغنيه عرسنا راجل جدع

فالكل قال اى دا

فبص للبت ال بيكرش عليها يجدعان هيصوا هيصوا

فضحكناا وقعدنا نرقص انا هو فى النص وانا عماله اغنى مع مقطع الاغنيه بتاع دا من النهارده خلاص جاتله ال هتلمه ... 

وخالتو وماما عمالين يبصولى ويضحكواا ..لقيت احمد بيشدنى من ايدى بطلى مسخره وقلت ادب

فخالتو قالته متسيبها ياحمد مكل البنات فرحانه اهى

زقنى جمب ماما وخالتو وهو بيقعد جمبى

...متسيبها يا احمد يابنى ف اى مكلهم فرحانين مع بعض سيبها تفرح معاهم ..

تفرح معاهم ولا تتنطط وسطهم مع البيه ابنك

ردت ماما ..يابنى واى يعنى ما مصطفى يعتبر اخوها ومترببن سوا

ميلزمنيش ..

خالتو زقتنى قومى يابت سيبك منه قومى ..

فقومت بسرعه دخلت ف وسطهم تانى مع مصطفى

وهما مشغلين اغنية كل البنات بتحبك كل البنات حلوين طبعا يسيدى يبختك منت ال زيك مين ولاا ولااا كل البنات بتحبك

كل البنات حلوين ..

احمد جه شدنى تانى لا دا كدا كتير بقا يلا نمشى احنا ..

لا تمشوا اى مش هتباتوا النهارده؟؟

كله هيبات ..

مصطفى رد اه هنبات طبعااا وبص لملك كراش السنين

..فرد احمد لا هروح انا وليلى، يلا ياليلى

متقعدوا بقا يا احمد النهارده وابقى امشى بدرى روح غير وروح شغلك بدل متمشوا بليل كدا

قعد بزهق وهو بيشدنى اقعد جمبه

مصطفى بصلى وغمزلى

فضحكت

اهل جوزها نزلوا يباتوا تحت

مصطفى قال طب كدا احمد وليلى هيباتوا ف الاوضه التانيه وانا هبات ع الكنبه هنا بقا وضحكلى بخبث

فكمل وخالتى وامى يباتوا مع سلمى ...

وبص لجوز سلمى وانت تبات معايا ف الكنبه ال جمبى يابطل اخوات مع بعضينا

ضحك ماشى يا اخويا ..

دخلت اوضة الاطفال انا لوحدى..

رجعت لسلمى تانى بت هاتيلى بجامه

افتحى الدولاب وخديلك ال انتى عايزاه

فتحت اختارت بجامه حلوه كدا وروحت هو كان قاعد مع مصطفى ومحمود ف الصاله

فلبستها ووقفت ابص لنفسى ف المرايه قمر يا بت يا ليلو قمررر

حسيت بيه بيدخل

وقف بصصلى شويه وهو بيقفل الباب

انتى كنتى جايبه هدوم معاكى ناويه على بيات ولا ايه؟

لا.. دى بتاعت سلمى ..اكيد يعنى مش هنام بهدوم الخروج فخدت هدوم منها

حرك راسه بهدوء اه ماشى

قلع القميص ..هنام انا ع الارض ونامى ع السرير انتى

بصتله بقرف طب متنام ع السرير جمبى !!

لا عشان مضايقكيش ..

دا اى الهم دا ياربى ..ماشى براحتك ..

روحت نمت ع السرير وهو فرش ونام ع الارض

خايف ينام جمبى هاكله ولا حاجع،..

تعالى نام ع السرير عشان ضهرك يا ابيه ..

رفع راسه وهو بيبصلى ابيه!!

اه ابيه هو احنا مش لوحدنا؟

طب اتخمدى ياليلى

بعد شويه ...قام فجأه ...اووف ليلى ..

هااا

مش عارف انام ع الارض ..

قولتلك من الاول يا ابيه

فطلع ع السرير ..فتحت عينى نص فتحه بصتله وهو بيبصلى وغمضتها تانى

عدى وقت مش عارفه انام فتحت عينى بصتله كان مغمض

فاتقلبت براحه ونمت على دراعه

فلقيته بيشدنى ليه وبيحضنى حلو

..انت صاحى يا ابيه !

.. لا نايم ..

ضحكت وبتتكلم وانت نايم ؟

اه ..

طب انت بتحضنى ليه مش عيب كدا ي ..احمد

فتح عنيه متلمى نفسك بقا وتتخمدى ..

ضحكت وانا بحط ايدى على وشه ليه بس ي ..احمد

متخلينا صاحين شويه

بص فى عينى وهو بيرجع شعرى ال على عينى نامى ياليلى .

ضحكت وانا بحضنه حاضر ي ..احمد

..صحيت الصبح كان لسه مسكنى زى مهو

ابتسمت وانا ببصله فلقيته صحى فجأه فابتسمت ببلاهه كدا

فبعدنى وقام ..

فبصتله بقرف

..خد بالك عليا دى مش معامله تعاملنى بيها دى ..

عايزه اى يا ليلى..

مش عايزه علفكره انت ال حضنتنى امبارح انا كنت بتقلب بس

رد .. ماشى يستى انا اسف

..بصتله بضيق وانا باخد الدريس البسه ولفيت الطرحه

كانوا صحيواا

مصطفى كان قاعد هو وماما وخالتو ف الاوضه عند سلمى دخلتلهم

بصلى اول مدخلت فى اى يحزينه؟

بصتله وانا بقعد جمبه اخوك دا دبش حلووف بيهيم

.. خبط ايده ف بعض يفيد بأيه البوح والبعيد لوح ..

عندك حق يابنى والله ..

..روحنا اليوم دا وخدنا سلمى معانا

طلعنا الشقه ..مالك بس ي ..احمد

ضهرى بيوجعنى

قربت منه طب مش عايز مساعده ؟

روحى نامى ياليلى مستغنين عن خدماتك

-انت الحر , براحتك..

دخلت الاوضه ..ونمت

لقيت ال داخل

ليلى..

نعم

انا مش عارف انام ع السرير ال هناك دا

ضحكت منت بتنام عليه بقالك شهر

بيوجعلى ضهرى ..

طب عايز اى ي.. احمد

عايز انام هنا

بصتله ع السرير!

ااه جمبك عادى ..

ضحكه خبيثه من جوايا طيب تعالى نام ..

جه نام ع السرير وباصص ناحيتى تصبحى على خير

بصتله وانا بحط راسى ع المخده وانت من اهله

المره دى متقلبتش عن قصد نحيته

حسيت بيه بينزاح جمبى وبياخدنى ف حضنه

فعملت نفسى باتقلب وحضنته

سمعت صوته اعمل فيكى اى يعنى .. انتى سحرالى..

ضحكت وانا بدارى وشى فيه

..قومت الصبح ..عملت نفسى متفاجأه اى داا!!

بصلى اى ..

انت ال حضنتنى

محصلش ..

بصتله بشك انا ال اتقلبت وروحت نايمه ف حضنك كدا ؟؟.

حصل ..

_طيب معلش ي ابيه

ضربنى بإيده على دماغى ابيه ف عينك

قومت خلاص يا مودى

..وطلعت اجرى وهو بينادى .. ليلى . بت ..

خدت الهدوم وروحت الاوضه التانيه غيرت ..

ونزلت قبل ميشوفنى

... كان مصطفى واحمد رايحين فرح واحد صاحبهم

.. مصطفى :ليلى خدى قفليلى زرار الكم دا

فاحمد زقه لا ونبى ما امك واختك قاعدين اهم مفيش غير ليلى ولا اى..

وجالى هو ليلى تعالى اقفليلى انا ..

ضحكت جاامد وانا ببص للزورار مهو مقفول اهو يااحمد

..ونديت لمصطفى .. تعالى يمصطفى اقفلك

..زقه تانى قولتلك اقفليلى انا ..افتحيه واقفليه تانى

ضحكت وانا بفتح الزراير واقفلها تانى ومصطفى راح لسلمى تعملهوله وهو بيضحك بخبث كدا ..

... كل يوم يعدى يجى يتلكك انه عايز ينام جمبى ع السرير عشان السرير التانى بيوجعله ضهره ..

... كنت قعده جمبه ع الكنبه ..

ليلى..

نعم..

ماما بتبص علينا

يعن اى

احضنينى لتشك فينا ولا حاجه..

حضنته ...

ليلى ..

نعم

ماما بتبص عليناا

يعن اى

بوسينى

تنحتله ..ايي اتلم

ضحك بعن الحضن عادى لكن البوسه لا ..

اه الحضن بنحضنه لأى حد لكن مش اى حد يتباس كدا

..لا ونبى وانا اى حد يعنى !!

ل..لا انت

ايواا انا اى ..

احم احم

بصيت لمصطفى وكأنه انقذنى

احمد بصله بقرف متتلم بقا ياخى وتغور

مصطفى رد .. متطلعوا شقتكوا بدل قعدتكوا هنا دى

صدق انت صح اول مره تقول حاجه صح قومى ياليلى

...لاا اقوم فين انا دخله ابات مع خالتو لحسن تعبانه وطلعت اجرى على جوا 

تانى يوم وقال انه مسافر ف شغل اسبوع

..

اسبوع !!

اه ياليلى ..

وشغل اى دا

حاجات تبع الشركه ..

بصتله بضيق ماشى

..روحى نامى بقا..

اروح انام !

انت مش هتيجى تنام على سريرى عشان السرير ال بيوجعلك ضهرك

..لا هنام هناك النهارده

طيب

دخلت الاوضه وانا مضايقه اما انت ابن .. اقول اى يعنى

...استنيت شويه وروحت انا هناك

نمت جمبه ع السرير ففتح عينه بصلى

ليلى..

بصتله م..معرفتش انام هناك ..اص..ل

لقيته قرب منى وخدنى ف حضنه نامى

حضنته وسكت

...كان مسافر الصبح

قومنا نزلنا تحت هما سلموا عليه وهو بيقولى ابقى باتى هنا بقا مع ماما ياليلى

حركت راسى بهدوء

طلعت معاه عند الباب

فبصلى انتى زعلانه كدا ليه

فعيطت عشان انت ماشى

مسحلى دموعى وهو بياخد ايدى ويبوسها مش هتأخر وعد ..هو اسبوع بس

هتوحشنى ...

ابتسم وهو بيحضنى وانتى اكتر

..سابنى ومشى

لقيت مصطفى بيضربنى على دماغى

جرا اى يمُحن دا حتت اسبوع

اسكت انت يحلوف تفهم اى ف المشاعر انت ..

ونبى ودلوقت الباشا بقا بيفهم

..اهو ماشى حاله

... قاعده حزينه ليه

احمد وحشنى

اااه يانا ع المُحن انا داخل انام لحسن المراره على تكه..

... الفون رن فرديت احمد

خد نفسه ..وحشتيى 

وانت كمان يا ابيه

ابيه ف عينك يا ليلى

ضحكت .. طب عامل ايه

وحشتينى ...

بجد؟

لا كدا وكدا بغرغر بيكى ..

فرديت ..وحشتك ليه ؟

سكت شويه ومردش

اتقفلت فجأه الجواب وصلنى يلا هقفل بقا انام... وقفلت وقعدت اكلم نفسى

هو مش هيحبك انتى وحشتيه كا ليلى .. بس ال متعود يشوفها كل يوم .. بس بس كفايه بقا محاولات ومياصه ع الفاضى ..

مهو بيقول لخالتو وحشتينى وبيقول لسلمى يعن انتى عادى يقولك بردو .. يبقى تتلمى وتخلى عندك كرامه شويه مش هتفضلى مدلوقه عليه كدا

..

عامله اى يا ليلى

رديت كويسه يا ابيه وانت

فى اى ياليلى..

اى يا ابيه

بطلى زفت كلمة ابيه دى

مهو محدش جمبى ..

حد جمبك ولا مش جمبك متقولهاش وخلاص

ماشى ..

هقفل عايزه انام ..تصبح على خير ومستنتش رده

ايوا كدا شاطره ياليلى قومى نامى يلا ..

...عدى الاسبوع على نفس النظام دا منكرش انه وحشنى بس انا هخليلى كرامه شويه كفايه ذل لحد كدا

عايز يفضل يشوفنى ليلى الصغيره بنت خالته يفضل هو حر بقا ..

..كنت مشغله اغنيه وواقفه بغسل المواعين

..انا مش بعيد يحبيبتى عنك دا ال بينا خطوتين ورغم شوقى وقربى منك صعب تيجى العين فى العين .. يمكن قدامى ومش طايلك بس انا فى القلب اكيد شايلك ..

حسيت بريحته قريبه منى

اديرت بصيت بسرعه

لقيته بيشيلنى من ع الارض وبيحضنى وحشتينى ..

ح...حمد لله على سلامتك

حطنى ف الارض ..بس ؟

هجهزلك الاكل اهو تلاقيك جعان

ليلى بقولك وحشتينى اكل اى دلوقت ..

اه تلاقيك جعان تعالى بس

شديته برا يقعد معاهم وقعدوا يتكلموا معاه وكملت جهزت الاكل وكلنا

..طلعنا انا وهو الشقه

..ليلى هو فى اى

فى اى يا ابي.. اقصد يا احمد

..اتغيرتى معايا..

مشيت دخلت الاوضه ..

فجه ورايا ليلى انا بحبك

بصتله ببرود عارفه ..

عارفه !! عارفه اى؟

عارفه انك بتحبنى ..بس مستكتر نفسك عليا ..

قرب منى انتى بتقولى اى!

كملت كلامى بقول ال كان لازم يتقال .. انت شايفنى ليلى العيله الهبله وانت ابيه احمد الكبير العاقل ال مينفعش مع ليلى..صح ؟

-انا عارفه انى اول مره اكلمك كدا بس هو دا الصح هى دى الحقيقه ال انت عايشها ..صح

رد..بس انا عمرى مفكرت كدا اا كل تفكيرى كان فيكى انتى وف فرق السن دا اذا كنتى انتى قبلاه بجد ولا انتى موافقه

تتجوزينى عشان متعلقه بيا ،، انا عمرى مكنت شايف نفسى كتير عليكى ياليلى واكون كتير عليكى لي اصلا ،، انا كنت شايفك

انتى ال كتير عليا خصوصا انك من وانتى صغيره كنتى بتقعدى تقولى عايزه اتجوز واحد قدى عشان نبقى فاهمين بعض ..

رديت ..واشمعنى جاى تقولى الكلام دا دلوقت مقولتهوش مثلا اول متجوزنا وكنت عمال تبنى ف حيطان بينا .. وانا احاول اهدها

...معرفش ياليلى معرفش ..

خدت نفسى اما تبقى تلاقى كلام تقوله ابقى تعالى قوله...تقدر تطلع تروح تنام ..

خرج من الاوضه ...وانا روحت قعدت ع السرير مش ندمانه ع ال قولته دا ومش ندمانه على اى حاجه ..

..ليلى..

فتحت عينى بصتله ..

انا مش عارف انام هناك ..

ضهرك بيوجعك برضو!

جه قعد جمبى .. لا... قلبى..

بصتله وسكت ..

فاتكلم ..ليلى انا اسف انى كنت بعيد واسف انى كنت رخم بس انتى كنتى مجننانى ومش فاهم بتحبينى ولا لا عايزانى معاكى ولالا

وشويه ابصلك انتى ومصطفى وانتو بتهزروا واقول ليه مش انا ال تهزرى معاه كدا .. التفاهم ال مبينكوا خلانى مش عارف

اخد اى خطوه نحيتك .. عارف ان مصطفى بالنسبالك زى اخوكى بس كنت اقصد تقارب السن ..انك لما تكونى مع حد ف سنك هتبقوا

بالطريقه دى

..كنت خايف افرض نفسى عليكى..

تفرض نفسك علياا..؟

انت ناسى ان انا ال قايله لخالتو تجوزنى ليك

انتى!!!!

هو انت متعرفش !!

لا .. هى ماما قالتى ..عليكى .. وانا قولتلها خدى رأيها لو موافقه انا موافق .. متعرفيش كنت مستنياها ترد عيا ازاى كنت على اعصابى...

وضحك بس اول مره اعرف انك انتى ال جايه تطلبى ايدى بقا وكدا ..

ضحكت لقيتك مبتتحركش فقولت يفيد بإيه البوح والبعيد لوح احنا نحركه احنا..

ضحك وهو بيقرب منى دانا غبى وحمار واهبل وو

حطيت ايدى على بوقه خلاص خلاص ...ابتسم ..طب اى وحشتينى ..

يعن اى يعنى ..

يعن مفيش وانت كمان! وبطلتى المياصه ال بتعمليها دى ليه ..

ضحكت وانا بحط ايدى حولين رقبته مهى كانت بتضايقك يا مودى ..

تصايقنى انا !!!دااا يالهووى

مقولتليش بحبك ليه؟

عشان مبحبكش ..

وحياة امك!

ضحكت عايزنى اقول بحبك ليه ..؟

وكملت ..بحبك بس مش قايله ..

 ضحك وانا بحبك ياليلى 

فابتسمت وانا بكمل يامجنون مش انا ليلى ..